Sa gitna ng krisis na kinakaharap ng lipunang Pilipino, nakikita na natin kung saan ba talaga napupunta ang pera ng taong bayan. Ang maanumalyang NBN-ZTE deal ay isa lamang sa maraming mga proyekto ng gobyerno na umano’y malalaki ang kickback ng mga taong nakipagtransaksiyon para dito. Ang halaga ng NBN-ZTE deal, ayon kay Jun Lozada, ay $329 milyon at ang komisyon na umano’y hinihingi ni Benjamin Abalos ay $130 milyon.Inamin din naman ni Secretary Romulo Neri na tinangka siyang bigyan ng 200 milyong piso para mapadali ang transaksiyon ng NBN-ZTE deal.

Napakalaking pera ang nakikita nating napunta lamang sa bulsa ng iilang mga tao sa proyektong ito. Ngunit nakapagtataka kung bakit ang laging sagot ng pamahalaan kapag humihingi ng budget ang UP ay wala tayong sapat na pera.

Sa ika-isang daan taon ng unibersidad ng Pilipinas, hindi ito parin ito hiwalay sa mga isyu ng mas malaking lipunan. Ang hinihingi ng UP para mapatakbo ng maayos ang kanyang 11 isang units ay mahigit-kumulang sampung bilyong piso. Ang ibinigay lamang ng pamahalaan ay anim na bilyong piso, dahil nga wala raw pera ang gobyerno.

Sa lantarang pagnanakaw sa kaban ng bayan, na pinatunayan ng mga testimonya ni Jun Lozada, hindi na kapanipaniwalang wala tayong pera. Ayon nga kay former Student Regent Terry Ridon, ang bawat pisong binubulsa ng mga magnanakaw sa gobyerno ay pisong nawawala mula sa edukasyon at iba pang social services.

Kung ating mapapansin, marami nang nagaganap sa unibersidad upang masapatan umano ang kulang na budyet na binibigay sa atin ng pamahalaan.

TOFI

Noong Disyembre 15, 2006 ay ipinasa ng Board of Regents, ang pinakamataas na policy-making body ng unibersidad, ang 300% tuition and other fee increases. Ang base tuition na 300 pesos per unit ay itinaas sa 1000 pesos sa UP Diliman, Los Banos at Baguio. Ang base tuition naman sa UP Visayas at UP Mindanao ay naging 600 pesos per unit mula sa 300 pesos.

Ang TOFI ay sumakop lamang sa mga papasok pa lamang na mga estudyante sa UP. Ginawa itong stratehikong plano ng administrasyon ng UP upang hatiin ang mga estudyante; sinasabi nilang huwag nang makialam ang mga upperclass dahil freshies lang naman ang maapektuhan.

Mariing tinutulan ito ng mga mag-aaral, kasama ng ibang staff at mga guro. Naglunsad ng mga walk-out sa klase, mga teach-ins, mga rally at piket. Sa kabila ng pagtutol ng mga estudyante at sa mga pagkilos, sinabi ng administrasyon na kaunti lang naman daw ang tumututol.

Nagkaroon ng mga huwad na student consultations kung saan hindi naman talaga kinonsulta ang mga estudyante kundi ginamit lang iyon na pagkakataon ng admin upang ipamukha sa estudyante na ipapasa nila ang pagtaas ng matrikula may tumutol man o wala.

Noong Disyember 15, 2006 ay nagbarikada ang mga mag-aaral ng UPD, UPM at UPLB sa Quezon Hall upang ipakita ang mariing pagtutol sa isa na namang represibong polisiya ng UP admin. Ngunit, biglang nilipat ang board meeting sa Malcolm Hall ng hindi man lamang pinapaalam sa Rehente ng mga mag-aaral at rehente ng mga guro.

Ayala techno-park

May itinatayong Science and Technology park ngayon sa Arboretum, lupang pag-aari ng UP. Sinasabing ito daw ay magiging lugar na tutulong sa pang-akademikong kaunlaran. Paano nga ba makakatulong sa pang-akademikong kaunlaran ng mga mag-aaral ang call centers?

Bakit nga ba pinagkakakitaan na ng UP ang kanyang mga lupain, kaysa sa gamitin ito upang pagtayuan ng mga gusali na pwedeng tumulong sa pang-akademikong kaunlaran ng kanyang mga mag-aaral?

Ang laging sagot ng UP admin, wala raw kasing pera ang UP kaya kailangang gawin ang lahat ng paraan upang makakalap ng pondo. Babalik na naman tayo sa usapin ng pera. Wala nga bang pera ang gobyerno? Ang maririnig mong malakas na sagot ng mga estudyanteng piniling dalhin sa lansangan ang laban ”May pera sa korupsyon, wala sa edukasyon!”

Demolisyon

MAhigit 1,500 pamilya sa mga komunidad ng Ricarte, Palaris at Dagohoy (RIPADA) ang nanganganib mapaalis dahil sa proyektong pagpapalawak ng Circumferential Road 5 (C5) ng Metro Manila Development Authority (MMDA).

Marso ng taong ito unang pumasok sa RIPADA ang MMDA ng walang pahintulot ng administrasyon ng UP, ayon kay Sandy Verano, isang kasapi ng Save RIPADA at lider ng Anakbayan. Magsasagawa sana ng sarbey ang grupo ng MMDA sa RIPADA ngunit nahinto rin nung panahon ng eleksyon.

Ang proyektong C5 ay naglalayon na magpaggawa ng 22-kilometrong kalsada mula sa kanto ng Katipunan Avenue at C.P. Garcia Avenue sa Brgy. UP Campus ng QC hanggang sa Letre Road ng Malabon. Nais nitong pagdugtungin ang North Luzon Expressway at South Luzon Expressway at pag-ugnayin ang mga industriyal na distrito ng Caloocan, Malabon, Navotas at Valenzuela at industriyal na sona ng Novaliches-Balintawak ng Quezon City.

Suportado ng mga estudyante ang pakikipaglaban ng Save RIPADA kontra sa demolisyon. Sa inilabas na statement ng University Student Council ng UP Diliman, nakasaad na tinututulan ng USC ang proyektong C5 dahil ito ay nangangahulagan na pagtapak sa mga karapatan ng mga residente. Naniniwala rin ang USC na “ang pagtanggal sa karapatan sa tahanan ay halos pagtanggal na rin sa karapatan nating mabuhay.”

Hindi lamang ang RIPADA ang humaharap sa mga banta ng demolisyon. Kahapon ng umaga, ang Philcoa Wet and Dry Market ay dinemolish ng MMDA. Ang dating maayos na palengke ay isang mistulang abandonadong gusali na lamang. Pilit itong isinasayos ng mga manininda sa ngayon, sa tulong ng ilang mga militanteng organisasyon sa UP. Pilit na sinagawa ng demolisyon dahil gagamitin rin ang lupang kinatitirikan ng palengke para sa proyekto umano ng Ayala. Wala pang masyadong impormasyon tungkol dito dahil sa ngayon ay naghuhugas-kamay ang administrasyon ng UP.

Napapatunayan lamang natin sa mga panahong ito, na ang UP ay isa sa mga unang naapektuhan sa korupsyon, represyon at sa kabulukan ng sistema ng pamahalaan.

Kung may pera sa korupsyon, nasaan ang para sa edukasyon?