|
30/11/2004 - 畢業禮~ 響IVE讀左三年, 終於等到呢一日, 終於畢業啦... 叫做拎左個HD... 估唔到自己, year1既時候成日諗住轉科, 轉過第二間IVE... 但唔知係咪因為響沙田IVE都過得開心, 識到唔少朋友, 而且都算過得幾成功... 慢慢, 我都無諗過轉科呢樣野... 事實上, 呢三年, 我都學左好多野, CP亦都比左好多機會我試唔同既野... 話唔定轉左科, 我根本無機會試... 講返呢日, 我就兩點先去到個紅磡, 但係兩點半就要入場, 所以開頭既時間, 都無乜點影相... 入到會場, 嗯, 我坐個位都差唔多算係握手位喎, 都幾近個台... 台上面d人個樣都可以望得幾清楚... 不過, 就睇唔到部大電視... 我同埋其他拎丁既同學, 都有得上台... 唔知點解, 都係有小小咁多緊張呢... 其實畢業禮就預左會悶到爆架啦, 不過挨左三年, 都唔差在三個鐘... 所以都無早走, 一路坐到最尾先至出去... 一出到去, 真係瘋狂影相... 要響附近周圍走呢... 不過最可惜, 無得同Doctor (佢比左好多好多機會我), Emily(一樣... 比左好多機會我, 而且, 仲係yr3既恩公...), 仲有Joanna(傑出教師...)影相... 話時話, 係咪大家都大個仔呢~ 好似唔見畢業禮有乜離愁別緒... 相反, 大家都係好興奮咁拎住d花呀, 公仔咁周圍走... 阿先仲誇張, 酒都有支... 不過 0個支酒, 我都應該係果汁一類既汽酒吧... 夜晚去左打邊爐, 吹下水... 有"侯文華"響度, 點可以唔打邊爐呀~~~ 好... 開開心心咁過左一日... 要同IVE講byebye啦... |
|
27/11/2004 - 獸醫... 朝早要返UST聽個講industry training既talk, 要take attendance, non-走-able... 局住晨早起身返去... 其實個talk d野, 真係可以上網睇返... 我就有半個talk係撻左Bennett部PPC黎打機... 但有樣野, 就算訓著都會嚇醒, 就係IC training係要100% attendance... 如果想defer畢業, 可以選擇drop左呢科佢...... 聽完talk, 同埋阿Rick, 阿光食埋飯, 就去左划艇... 好早去到... 自己拉左陣機... 有時見到自己條鋼筋都真係好好好頹... 唉, Full Slide仲衰過人地Half Slide... 我呢日先知... 原來科大個保健中心外號叫做獸醫... 仲攪到我講埋d白痴野...(雖然我個樣禽獸d 0者, 都唔使睇獸醫掛...) |
|
26/11/2004 - 大走特走... 如果唔係要做lab, 呢日都唔會響UST出現... 巧合地, 今日個lab又可以超快做完, 極速閃人...... |
|
25/11/2004 - 訓的回想... 入左科大之後... 一係心情靚靚, 撻落床, 3...2...1, 訓著~~ 爽; 又或者係d功課多d PK, project忙到PK, 結果上堂既時候, professor數3, 2, 1, 又訓~~ 好耐無好似呢晚咁, 失眠, 望住條街唔知做乜... 之前有朋友唔開心, 我同佢講, 要學下控制自己情緒. 如果比情緒控制返轉頭, 一定唔會成功. 但似乎我自己都做唔到. shit, 仲以為我都大個仔tim... 有時間, 不妨睇下... 幾得意... 第一次會覺得張飛咁可愛... http://www.mwjx.com/bbs/html/6000/4599.html |
|
24/11/2004 - 科大的夜晚... 個group proj未攪掂... 點都要盡返做組員既責任... (其實, 仲係random抽出黎既group leader...), 所以就留返響UST既Comp. Barn度做... 無理由要Wilson留兩晚, 所以叫佢返屋企先... 反正一般programming work我一個人應該handle得到... 而d 騎呢Linux問題, Wilson佢地都solve晒lu, 所以都唔係問題... 做到兩點, 攪掂... 閃得... 好彩有通宵小巴... 走既時候, 仲見到師姐個frd... 真係"鄧"佢危險... 估唔到Nike個網咁有心... 0個日跑完, 衝線一刻, 仲有片上埋網... 有心既可以去 http://www.nike.com.hk/10k_2004 搵搵... |
|
22/11/2004 - 跑山... 尋日跑完, 腳都未痛完, 今日land train又跑, 仲係跑山tim... 雖然唔係最斜 0個段, 但係係咁跑, 都幾係野... 跑到面容扭曲... 救命... 操完, 順便跟阿Rick去new hall沖個涼, 食埋飯, 先返屋企... Wilson同偉呢晚通宵響度做野, 辛苦晒... |
|
21/11/2004 - Nike 10K... 如果唔係Bo Bo要準備考車, 跟住搵我去扮佢去跑Nike 10K, 我諗我呢世仔都唔會10km不停咁跑... 今次Nike 10K響天水圍濕地公園舉行... 都係啦, 我唔諗住投身色魔行業, 如果唔係為左跑, 我諗我都唔會入天水圍... 8點開跑... 結果我5點半就要起身啦, 真係一日比一日早... 一開跑, 阿廉同高源浩揀左46 - 50min既地方起跑... 咪玩啦, 我邊跑到... 唉唔理啦, 反正都係比人爬頭架啦... 再者, 附近有幾個小妹妹都算相貌娟好... 開跑前, 都叫可以relax下~~ 不過一開跑, 就一d都唔輕鬆啦... 我比人鬆左不下廿踭, 仲要響我身後面批到去我前面... 而亦都有好多阿叔, 自己擺個心口埋我個踭口位度... 為左搶位, 真係...... 不過, 我知我自己唔係多氣, 所以... 死忍, 爬我頭咩, 我比你爬, 算... 我唔想頂唔住... 如果係快過佢既, 自然會追得返佢... 諗返平時land train, 就算係跑5個定10個圈都好, 我都係keep住兩分鐘400m咁上下... By M.I. 理論上繼續加距離, 時間都應該係差唔多... 好, 即管試下... 結果我就全程都係keep住均速, 無論上落斜定平路都係咁上下快, 無話突然間加減速... 2km mark, 4km mark, 6km mark... 呢條MI都仲係valid既... 但係, 一過左6km, feel到對腳d水泡開始黎料, 而且, 地心吸力加埋跑步時既上下震動, 似乎將腸入面d野都越dun越落... 所以, 6km開始, 就慢左落黎啦... 去到7km mark, 我記得高源浩話佢以前響呢個位係咁發力過人... 但我當時即刻計左條數... 3km = 3000m = 7.5 x 400 = 即係仲有七個半圈要跑... 以我既體能, 都係忍下算啦... 最後, 52min攪掂... 唔使一個鐘... 第一次跑咁長, 我覺得算係有交待lu... |
|
20/11/2004 - Row~~~ 響朝早划艇真係唔多慣, 晨咁早要起身... |
|
19/11/2004 - Last一年扮後生... 人地成日話十八廿二... 今日係廿二歲生日... 即係... 我仲可以做埋last一年後生仔... 跟住... 無lu... 生日都仲係對住堆code, 係夜晚11點先出去同生, 黎B, Handsome同埋稭打幾鋪機, 同埋去大排檔食小小野, 吹下水~~ 仲要響順利行返屋企... 等架通宵巴隨時要等幾個字, 仲要十幾蚊車錢, 我行返去都係4個字... 做乜偷懶呢... 不過, 半夜三更, 怕人老笠之嘛... 跟手仲要縛我響巴士站... |
|
17/11/2004 - 暗病?? 終於, 可以頂到返朝早堂COMP171啦, 雖然遲到... 不過換黎代價, 係響圖書館冬眠... 眠到miss左堂MATH132 tutor... 訓醒既時候, 除左發現我流晒口水之外, 一呻鼻涕... 原來... 流埋鼻血... 哎哎哎呀... |
|
15/11/2004 - 抽筋... 衰人........ 尋日去街件褸擺低左, 又唔記得拎第二件返學... D海風吹到呢...... 唔知係天氣轉呀, 定係跑多左兩個圈... jogging既時候竟然抽筋... 連我條鋼筋都抽... 不過, 我估真正原因, 應該係我joggin開始既時候, 真係輕鬆到好似童話入面d細路咁彈彈下... 幾步即抽... 終於feel到個運動場響海邊有乜唔好... 就係大風到爆... 跑既時候要用好多力... 真係想將自己既身體鍛練成風帆形, 利用bernoulli theorem... 唔使力之餘仲可以加速... |
|
14/11/2004 - Ladder 49... 響ICQ度同雞脾佬吹吹下水... 佢話晏晝一個人去睇戲, 咁當然會八掛下, 問下睇乜戲... 原來去睇火海豪情... 一聽到套戲講消防既... 極速上網睇小小簡介, trailer... 跟住佢問我一唔一齊, 咁就緊係即刻仆出去啦... 但當時已經兩點咁濟, 要兩點半出到新世紀, 如果搭地鐵行過去既話... 睇怕戲入面d消防員未流汗, 我就已經變左水人... 所以就落樓下搭27號巴士, 響新世紀落車攪掂... 點知, 邊個會估到星期日大塞車... 塞到我諗我響屋企跑去新世紀都跑到去... 攪到我第一次約人睇戲就遲大到... >_< 結果當然miss左兩點幾 0個場... 唯有周圍行下... 最後決定去沙田睇5點幾 0個場... 未夠鐘, 就周圍行下先... 上下夠鐘先入沙田... 講返套戲... 如果係諗住睇好多好多爆炸, 好多好多火既... 呢套戲應該唔太滿足到要求. 但, 好真實... 無刻意做出高潮位, 最後場面都幾感人... feel到主角既絕望... |
|
12/11/2004 - Play games with you~~ 一朝早, 又係鬼佬教171 tutor... 佢無開電腦, 跟住用極其流利既英文講: " I have no computer to play with, so I just play with you..." 果然, 都仲未坐暖個seat, 就成排人比佢叫左出去玩人肉Hashtable...... 跟住, 全班過半數人未能幸免... 人肉sorting最誇張, 難為d矮既男仔... 佢地一企出黎, 可以睇到d人幾得意既野... 有一個矮仔, 佢唔介意比人知道, 佢真係同一個矮既女仔差唔多咁矮... 但另一個, 明明矮過個女仔, 但就唔敢接受現實咁... 自尊作崇吧? 其實, 拍埋個2.07m既鬼佬隔離, 一砌已經唔重要... COMP171 又派卷... 我expect高分既, 炒, 我expect死得舒服既, 偏偏係救返我既... 晏晝, 趁有d時間剩... 用左三個字隊lum個麥當勞... 無他, 都好耐好耐無同過ive班同學仔食飯lu... 又到project時間, 當然亦係分組時間... 唉... 錢財身外物, 分數何嘗唔係? 如果為左呢d事傷感情, 有乜謂? 語贈有緣人... |
|
11/11/2004 - 又係問題... 上COMP171時, 個professor都會問下人問題, 當然, 除左間中有d前排既好學生show佢, 都無乜人會出聲 (唔計傾偈), 跟住佢就會講 (英文): "有無人自願去答? 快d搵人答左佢啦, 如果唔係, 我就會響exam度出啦..." 但我會諗, 如果佢認真既話: 如果我唔識, 我當然答你唔到; 但如果我識, 仲係淺既, 咁我打死都唔答啦, exam有返d分袋袋平安唔好? 當我傻架? 今日做gym, 幾ok... 每一組d力都用得幾盡, 真係頂盡 0個隻... 做到last真係無力但又唔算太死谷... |
|
10/11/2004 - 問題... 而家攪到朝早九點堂COMP252都奉旨走堂... 剩係靠自己睇書... 呢日都係走左啦, 不過就早d返去print下notes咁... 去到七仔附近時, 突然比個中年婦女截住... 佢開頭講一抽野, 我都聽唔明, 聽聽下... 發覺佢好似問... 邊度有校服... 下?? 校服?? 我唯有叫佢過對面街市度睇下啦... 但係佢跟住又話, 唔係, 係可以"道"書既... 下?? 問乜?? 跟住佢用普通話講"學校"... 哦, 要搵學校... 我估都係搵小學啦... 所以點返佢過坪石 0個三大間小學... 但佢仲係咁問係咁問... 但係, 我d普通話同佢d廣東話都一樣咁靈光... 最後, 佢自己走左去... 我亦都照返學算lu... Math132派卷... 阿sir順便講下答案... 有條講下logic既... 類似係阿媽同後代既問題... 阿sir話無一個人係全世界人既阿媽係common sense... 點知竟然有d同學仔話: 你話common sense, 即係話比我搵到一個例外, 就可以推翻你個假設啦... 當然, 全班都無佢咁好氣... |
|
8/11/2004 - 爆肺Land Train~~ 終於可以上網睇到MATH132既分... sh?t... 我既最弱項, 竟然係暫時知道mid term結果既科之中, 唯一一科above mean... 小小咁多... 係咪玩野呀... 朝早, 約左Thomas同埋阿文去Barn睇返上次present條片... 其實我真係唔想睇返自己present時候有幾咁樣衰囉... 但無計, 要做evaluation... 下晝本來要去見Amy, 但係突然cancel... 又要搵時間見過lu... 夜晚, land train... 已經係入左UST後一個最固定節目之一, 但唔知點解, 今次做乜都好似發軟蹄咁, 攪乜呀...... 今日激囉... 剩係掌上壓... 連被人罰, 連埋Train, 都做左200下咁濟... 加埋其他... 真係谷得幾爆, 咁大個仔, 就算係玩掌上壓麻雀, 掌上壓鋤dee, 都未做過咁多... 就連以前童軍都未試過... 不過... 我唔滿意自己跑8個圈慢過上次成30秒咁多... 理論上就算唔進步, 都應該keep住時間嘛... 下次個節奏要控制返好d... 一開始標得好似太快, 唔慣... 聽日, Rowing Soc新人 (男仔) 可能會傳出乳癌驚魂... 事關一個二個心口都可能出現硬塊... |
|
6/11/2004 - Water Train... 朝早返UST考COMP252... 呢科就算炒, 都一定無之前 0個幾科咁轟烈... 份卷最IVE style掛... 同埋d野真係睇書識... 不過, 咁小時間我真係記唔到咁多野... 定係我懶左? 下晝, Rowing water train, 終於有機會去玩隻8人艇啦... 不過仲未試到8個人一齊划既滋味係點... 頂多都係4個人... 同埋, 自己d姿勢都係好唔正確... 仲有, d筋真係緊到... 緊到係人地抽筋咁... 救命... 今日有單交通意外... 就響我去艇會既時候, 響消防局隔離炒, 都幾近我... 炒左埋碌燈柱度... 成盞燈跌左落黎... 佢好好彩, 響正消防局隔離炒... 架救護車唔使一分鐘就響消防局出左黎... |
|
5/11/2004 - 好眼訓... 同Wilson去canteen食飯時, 見到Thomas, 佢守緊天文學會既counter... Thomas: 君... 喂... 睇英文present 0者, 唔使咁鬼崇呀話... 真係驚人誤會我地兩個去睇咸片.......... |
|
4/11/2004 - 歡樂先生... 今日, 係個鬼佬TA黎講COMP171既test answer... 佢一路講我一路唉... 事關, 戰術錯誤... 我本以為條條做d咁樣執step分... 點知, 我發覺我都唔係咁多條會執到分... 不過, 我見個鬼佬TA越講越興奮, 就黎興奮到唔記得自己係上緊堂... 我就知道, 我至少做緊一件善事... 我為佢地帶來歡樂... 夜晚去gym section... 見到另一個鬼佬... 痴線... 拎住兩個34KG既啞鈴, 輕輕鬆鬆咁推胸, 好快就舉到十幾下... 都好似唔使力咁... 但呢個34KG既啞鈴, 你叫我拎, 都係勉強, 更遑論仲要學佢咁舉... |
|
3/11/2004 - 返IVE... 又一晚通頂... 做Elec102 HW做到10咁濟, 如果唔係易拎仗義相助, 教左我兩條... 我真係唔使交都似... Thx a lot... 放學... 返左IVE... 好多野攪呢... 首先, 去拎件畢業袍先~~ 好好彩, 撞到阿威, 仲有阿俊... 真係估唔到會見到佢地... 拎完件袍, 破完財... 跟住拎堆UST application form比Sonia... 似乎唔知係E-mail唔到呀, 定係Ignore左, 似乎Emily無收到我封E-mail咁... 總之... 好似阿婆咁長氣都要架啦... 係咁提Sonia要三思... 話晒都係我之前Ocamp既組女... 咳咳... 比完application form佢, 跟住落樓梯既時候見到doctor, 當然要呻下苦先啦... 響UST讀既辛苦程度, 同IVE真係差幾條街... 嗚嗚... 之後搵另一個前組女Pockei食個tea, 吹下水... 跟住就閃返屋企休息下lu... |
|
2/11/2004 - IQ Test... 今日考COMP171, Data structure and algorithm... 早知真係溫小d都仲得... 事關, 睇書可以答到既, 只有唔夠一半... 其他, 都係似IQ題多d, 要我做, 唔係唔得, 不過我平時做兩日既野, 而家變做一份兩個鐘既卷... 120分滿分, 120分鐘... 1分鐘1分... 唉... 我真係每一分鐘睇住我唔見一分... |
|
1/11/2004 - 我要谷爆... 之前一晚, 溫書, 做ELEC等等都做到好好好夜... 跟住先有時間搵LANG present既野, 攪到7點半先有得訓... 跟住10點返到Atrium等... 結果話如果我遲到就成個CENG既人會diu我既Thomas就係最遲既一個... 我去到既時候, 阿文已經響度... 最後, 落左Canteen, 練左兩次... 我好似都幾順, 緊係啦, 睇稿讀嘛... 咁趕先攪好份野, 無信心可以睇20隻字就present到, 莫講爆肚... 食完飯, 跟住去左lib記訓返個覺先... lib記已經係我半個睡房... 今日夜晚, 都係Land train... 突然間, 由跑6個圈變跑8個圈... 打左個突... 跟住河馬既節奏跑... 對於我黎講, 算係要谷小小, 但都跟到佢既速度... 最後可以爆多200米... 似乎太多, 即係之前留力留多左小小... 下次或者可以快返d先... 但唔知係唔係因為極唔夠訓既關係... 跟住做station, 我就lum lum地啦... 個頭痛到爆炸... 那到死下死下咁... 真係痛到我做唔到野諗唔到野... 仲有, 無理由兩組station, 每組各樣30下就可以lum到我既... 我竟然響第二次既30下掌上壓要分幾次做... 可惡... 下次唔可以... train完... 跟住就係隊長交接... 阿Tim交捧... 佢響度講野既時候... 真係講到眼濕濕... 真係見到佢係幾咁熱愛划艇... 至於新既男隊長係阿康, 女隊長就係阿Ann... 佢兩個當然都要出黎講下野... 我第一次見阿Ann講咁多野呢...... 突然間, 覺得渣灘好似真係有d對唔住咁... 所以, 同河馬跑多五個圈之後, 自己再補返頭先hae左既30下掌上壓... 雖然係"艾丟"左dd, 但係, time management既目標, 除左要就到時間去rowing既training之外, 仲要... 每次training前一晚, 都至少有6個鐘訓下... 如果唔係, 一來辛苦, 二來谷唔起個人... 實唔會進步... |