響響
<戰鬥篇>
230E大修期間，我都有keep住楂車(318is同彩藍四門111)，所以我楂車既信心仲係越黎越大 ，到230E大修完之後，我已經有七個月牌齡loo，加上部車又爽左咁多，我就開始響公路度隊思域(我最憎既車)，而且越隊越近(少於一尺，有時前面部車戔尾燈都見唔倒)，亦都越楂越快 ，亦都試倒部車既極速係一百九十幾km/h，一百至百六既加速最快......
VS MR-2 (AW11)
果一晚我記得係同D朋友響咖啡灣BBQ，載哂佢地返屋企後，雖然已經好夜(起碼十二點幾一點)，但依然唔係咁想返屋企，想繼續楂下車. 於是我一邊傾偈一路沿元朗公路，屯門公路轉上三號幹線出九龍，一路keep住行100km/h左右，去到美孚對開，突然響倒後鏡見倒有架車飛緊埋黎，當時我已經準備加速追佢 ，佢好快就已經響我惻邊過我;原來係架好舊款，用AE86 4A-GE偈既白色MR-2，於是我就抽出快線踩盡地板油去追佢，呢次應該係記憶之中第一次谷行部車，去到太約160km/h，終於追倒佢 ，當時太約同佢有半個車位度，冇幾耐佢就開始加速，而我亦一心諗住試下過唔過倒佢，好快大家就開到一百九十幾，果陣我仲係踩盡地板油想再快D，可惜部車已經去到極限，好彩部MR-2都冇快到 ，就係咁樣，我地就以接近200km/h，keep住半個車位咁行駛，最後就平靜咁完成呢一場追逐......
第一次隊人第一次極速飛馳之後既第二晚，我竟然響一個鐘頭內二次俾亞sir截停查車，真黑仔! 事緣果晚同D friend去西貢釣魚，楂車去又唔駛俾錢泊車 ，釣下釣下就釣到點幾;楂車沿西沙走，知道果度多快相，都唔敢開快，突然，見倒前面藍燈閃下閃下，成個road block響度，唔通真係有快相? 但心諗自己又冇超速 ，可以不理~ 但係去到個road block果陣，個亞sir竟然指我埋去，唔X係呀? 中左?
亞sir甲同我講:"熄匙，車牌，身份證"，亞sir乙同佢地講:"身份證丫唔該";原來係查車......亞sir甲一面用電筒照住個匙膽一面同我講:"部車邊個架?" "我亞媽既" "咁夜去邊呀?" "釣完魚返屋企lor" "咁D魚具呢?" "響車尾箱" (架車坐滿人，唔通個個楂住個魚排，攬住個水筒咩???)，跟住亞sir甲就去check下行車證既資料 ，同時亞sir乙就登記緊身份證，亞sir乙突然問我:"你響外國返黎架?" "下???" "你響加拿大考車牌架?" "唔係~ 響香港考既" "考左幾多次呀" "一次" "嘩~ 新牌就楂Benz!"......(苦笑)......交返身份證俾我地果陣 ，佢竟然將個friend既"曦"字讀做"儀"字，我地當堂笑左出黎......原來D亞sir又八掛又文盲。
過完西沙個road block之後，無驚無驗就返到元朗，車靜最後一個，去到學校附近，見倒前面有架鐵馬停低左，行到過去......頂! 又俾人截! "熄匙，車牌，身份證;去邊呀?" "車人返屋企lor;頭先岩岩先響西貢傯road block截" "係咩......" 又係一面用電筒照住個匙膽一面同我講:"部車邊個架?" "我亞媽既" "冇~ 睇下係咪偷車姐~" 當時我真係燢燢地 "唔係呀? 呢部都有人偷(雖然係Benz，但係係一部超過十年兼唔值錢既車)? 你睇住前面部梯丫佬(咁岩前面有部)好過啦!" "......" "依! 你塊面好紅喎 ，飲左酒呀?" 我從來唔飲酒楂車，所以忍唔住串佢:"係咩，我塊面不嬲都咁紅架喎! 唔信你咪俾我吹波仔lor，橫掂我又未試過~" "咁唔駛喇 ，冇野勒。" 就係咁，一個鐘內俾人查兩次車，兩次D亞sir都咁頂癮~
呢兩晚去左BBQ，又走幾轉車人返屋企，出尖咀兜左轉，又去埋西貢，出出入入，亞媽借車俾我果陣係入滿油，還車果陣就去到底，所以......順理成章俾人省左一輪......