<戰鬥篇3>
230E VS 黃色EP82小福星
果晚車個friend由元朗返屯門，部車連埋我有四個人，路線係由博愛迴旋處轉上元朗公路落屯門。上到迴旋處，見倒有架黃色單門EP82小福星收都唔收就由凹頭個出口轉左去屯門方向，見佢咁楂法，開始諗: 撩唔撩佢玩好呢?.....隊自己鐘意既豐田又好似唔係咁好......但無奈自己實在太想玩，太想試下自己同架車既實力，於是我就開始追佢，由於佢唔係楂得快(~90km/h)，所以好快就隊住佢，佢亦開始加速(~120km/h)，但條路有好多車，過左一陣就俾前面D車阻住......呢個時候，佢開始表演攝車罅，而我就一於"跟"! 佢每次攝車罅都會打揮燈，"好守規則"~ 我就一路隊住佢攝車罅，由於佢架小福星短過我架230E好多，加上響公路，所以每次佢攝完條罅都係夠我緊緊過倒，諗返起真係好刺激。佢一路攝我一路跟，我完全冇俾佢甩開，仲係隊住佢個尾黎行......攝下攝下，前面己經冇乜車，當時我估佢一定會係咁踩，玩高速......點知，佢竟然打燈入慢線俾我過，於是我亦都冇繼續隊佢，同佢差唔多平排果陣，果位前輩做左一個令我好難忘既舉動---就係豎起...唔係中指...而係拇指呀! 佢仲望住我微笑添~ 果一刻真係開心到爆呀! 第一次俾人讚，第一次俾人認同我飛車既技術，仲要係出自對手既添!
呢一次經歷，令我既信心增強不少呢! 但亦都對下一集故事埋下左伏線......
下回預告: 第一次大皮;極度刺激，影響深遠!