My Dream Cars:

銀底藍E36四門M3	Mecedes-Benz AMG E55 (W211)

*相中M3為單門版

我對車的感情:

對於我黎講，除左家人同朋友之外，車，就係我生命中最重要既部份；每一日我一定會睇下車，諗下車；鐘意車，或多或小係因為遺傳，細個果陣，老豆已經開始教我關於車既野，甚至教埋我D路牌點解；三、四歲果陣，我開始響屋企門口坐響老豆對腳上面楂車，雖然淨係控制個呔盤，但係已經好好玩；到七、八歲果陣，我對腳開始夠長踩腳掣，老豆就正式教我楂車，而當時部車係豐田Liteace棍波，初頭唔識控制個極力子，搞到成日死火，老豆就坐響我隔離一路教我，我就不斷響屋企門口吞前吞後，仲學埋泊位添!

十八歲生日之後果日，即刻去報名考車牌(貨van)，雖然中間有七、八年冇楂過車，但係我楂大膽車既經驗，對我之後學車同考牌有好大既幫助。仲記得學車第一堂，個亞講左唔止一次：「我肯定你有駕駛經驗!」呢D經歷令到我對考牌充滿信心，結果，我成功地一次考倒個車牌；由報名到拎住張駕駛執照，岩岩好用左三個月，真係好快!

車就好似人一樣，每部特性都唔同，就係因為我當車係人一樣，曾經，我亦為三部車流過眼淚：

第一部係屋企部寶馬325i，「1997年4月13日」 --- 一個永遠唔會忘記既日子；凌晨約三點，部車響有線電視大廈對出屯門公路屯門方向隻左彎，以時速190公里撞向慢線一部壞車，然後再撞向路中石壆，繼而全車反轉。就係咁樣，佢保住左車上面四條人命，全部都係輕傷，而佢自己就......收到呢個消息以及探晒所有傷者後，我地既即刻去汽車扣留中心，果日係星期日，我地只係能夠隔住鐵絲網望入去，真係唔敢相信果部係佢---如果唔係寶馬獨有既「鼻」，根本認唔倒係佢，甚麼M3包圍，甚麼白橙，已經冇晒，眼前只係一部爛晒既車；當時落住毛毛雨，加上已經好傷心......望下望下，原來佢車尾對指揮仲閃緊，佢好似好痛苦地向我求救；呢個時候，我終於忍唔住流出眼淚；之後我已經冇晒胃口食野。 雖然同佢相處左只有兩個月，但因為實在太鍾意佢，所以印象好深刻。就算而家諗返，個心都仲係好唔舒服。佢永遠都活響我既心裡面，見倒寶馬，好自然就會即刻諗起佢。
第二部令我流淚既車就係彩藍四門111 --- 一部肯定係全港最型、最齊料、最快既Corolla AE110，雖然佢唔係原裝既AE111 Corolla 四門版 Corolla GT，但可以肯定佢比任何一部GT都更靚更完美。2001年8月既一個晚上，亞哥叫我行出門口睇野；佢 楂左部炭黑C220返黎，已經心知不妙；果然，彩藍四門111已被 trade-in 換左呢部C仔番黎；我以為亞哥改變左主意唔賣部車，點知突然又換左部Benz返黎。新車主係一間車行既老闆---擁有Aristo、Altezza、Echo、小福星EP91，架架都全改，加上 初頭又見佢登廣告賣部車，睇黎部車都係會被轉手居多......自從部車被賣出以黎，我每日都想響街見返彩藍四門111；直至2002年3月某一日，我同朋友行過新車主間鋪頭，睇緊廚窗既野，突然，睇尾見倒鋪有道彩藍色，抬頭一望，原來就係彩藍四門111，佢俾人升高左整緊野；我即刻衝入鋪裡面，行去佢前面望住佢 ，果一刻真係好開心，係咁傻笑，而我亦feel倒自己對眼開始濕；當時我同個新入面車主打招呼(好耐之前同佢食過飯)，佢仲講笑問我有冇興趣買返彩藍四門111；就係咁，我就企左響部車前面係咁望住佢，而對眼都仲係咁濕；之後，我同朋友雖然行左去第二度睇野，但係我個腦仲係諗住佢，心情仲未平復，於是我又再返轉頭睇多次；最後，我至依依不捨地離開果條街。其後數次我去返果度，都會見倒佢，而每次都有D改變，睇黎，個新車主應該決定左唔賣部車。所以我而家每次落旺角，都一定會去果條街睇下見唔見倒佢；旺角太平道。 可惜，佢而家已經俾人改頭換面；變成白色！眞係諗極都諗唔明點解要將佢改頭換面，咁特別既彩藍色唔要，要隻普通到爆既白色！
第三部令我流淚既車就係我既戰車---230E，考倒車牌後第一架楂既車就係佢，楂得最多最熟最快又係佢；不過，又係我令到佢要被賣出......到交車俾人果一日，我最後一次洗呢部車，我一如以往，用心地慢慢洗；中間我諗左好多野，好唔捨得兼好內疚；到抹車果陣，亞哥叫我抹快D，因為要趕住楂俾人，呢個時候，我意識到佢好快就要走，以後都唔會返黎，個心開始拿住拿住；好快，亞哥就上車，而我就企響屋企門口望望住部車開走、轉彎、出路口、慢慢離開我既視線......收返洗車工具後，我已經忍唔住，D眼淚係咁標係咁標，唔捨得既同時亦都好內疚；親手洗靚部車再俾人，真係好難受!

三部經常可以響街度見倒既車---325i、Corolla、230E，對於我黎講，就係代表住三段深刻回憶。

或者你覺得Carboy好傻，竟然為車而流淚；但係，就係因為我咁鍾意車，我至會為佢地流淚∼