31 Oct 05 可能連日來太勞累，返到屋企食埋飯9點唔夠就訓左...11點叉完電起身整理近期影既相，不經不覺攪到2點先訓，臨訓前發現三個由公司打來的miss call...有咩事搵我呢? 30 Oct 05 又是忙碌的一天，9:00am起身前往"Hello寵物Win Win Day"當義工。唔係18叫到我都唔知有呢個活動呢! 大會分配工作，我地被安排清理會場的貓狗便便... 以為抽到下下籤，點知原來都幾悠閒，同巡場冇乜分別。看到有尿尿的地方就蓋上貓沙，待貓沙把水份吸乾便會變成一粒粒大沙粒，然後把沙粒掃走便可。 工作期間當然有偷懶，哈哈!因為此活動有很多artist出席，我地又點會錯過合照機會? 做完義工我地去左行街...行左同Muji冇乜分別既UNIQULO，全部都係basic items。基本上冇咩收獲，換來雙腿拉柴!! 夜晚去左Mercury Cafe探Mui Mui，Mui Mui係18之前養既西伯利亞雪橇，因為一d原因，18唔可以繼續養Mui Mui，幾經轉折，現在Mui Mui被Mercury Cafe的店主收養了。Mui Mui當然比之前又大隻左，仲蝦店主一隻5歲大既迷你牧羊...真係Mui仔大過主人婆。 29 Oct 05 都唔知幾耐冇訓過8.5小時，起身精神爽利!約左Nancy食lunch兼行街街。 我的老毛病還是改不了...遲到半句鐘...真係唔好意思啊! 起UCC食左個墨魚本菇飯(配墨魚汁)，賣相黑漆漆貌似黑糯米，食落滿口墨魚香，本菇爽脆有咬口，多謝Nancy好介紹! 加多$20有沙律及香味濃郁蒸餾咖啡，人貪心真係冇藥醫，在沙律吧弄來一大碟沙律，吃了一半也沒有，真浪費... 食飽飽逛逛TST SOGO，基本上係mini版SOGO，都係咁上下啦!同Nancy行街大家目標一致，最愛看化妝品，結果係冇好結果，又係出血時間... 行完街往元朗老大之家食大閘蟹，我竟然係最早到呢! 慶幸見到uncle & BB都別來無恙，只是BB咳得有點厲害，真係健康無價! 今晚既大閘蟹全是公蟹，公蟹蟹膏較甘香。蟹膏入口一刻成個口被一陣甘香濃罩，嘴巴完全被膠著狀態，吃蟹其間有天使飛過，成檯鴉雀無聲，各人只顧專心吃蟹。 Carmen從台灣回來了，看看她的旅行相...心想："不知自己下次會到什麼地方旅行呢?" 28 Oct 05 賤命一條，連續數天睡眠不足，這樣貧撲的生活相信還要持續兩天!日日返工放工既刻板生活好dry，太多節目又會好tired，唔想咁dry唔想咁tired可以點?How to take a balance? Anyway今晚去海洋公園哈佬喂應節!多謝Florence比我同Derek早走一句鐘，不過準時去到海洋公園都作用不大，兩位大爺7:00pm才以"龜速"到達...我地買左普通飛，基本上每個鬼屋都要排好耐隊才可進入。不過~Lap之前玩完留左四條至尊手帶比我地，令我地玩每間鬼屋都暢通無阻!Thx Lap。 其實入鬼屋係笑多過驚...Derek既精彩加專業演出應該可以起海洋公園呃到飯食!而Larlin以龜速全速前進令Gapさん進入第一間鬼屋時發出憤怒咆哮："行快d啦!" 鬼屋方面，我自己就最中意彈弓人果個位，起我冇心理準備之下一個人從山洞跳出，真係比佢嚇到正一正，攪到我仲kick到舊石差d PK... 玩晒五間鬼屋都只係11:00pm，襯仲有時間玩埋機動遊戲!一直未有機會玩海洋公園既跳樓機，嘩...真係好好好~流呀!當然好難同日本既相提並論，但說真的，海盜船都仲好玩好多! 玩到12點幾終於走人，去灣仔meet埋肥成食燒夜。最後返到屋企已經係2:00am，今晚終於有覺好訓了! 相簿1 相簿2 27 Oct 05 今晚完全為藝術犧牲，只有4.5小時睡眠時間，為的是幫朋友拍照。這輯照片相信也有2.5級，我就沒勇氣當model了，還是當攝影師過癮!想看照片的請自行聯絡Cherry...嘻嘻! 26 Oct 05 "博頭指向地，左手伸直，上桿後用力發出去。"我諗發出去既時候加埋手腕轉動應該可以打得更好。 我平時發球是把波放在tee上，這樣我會打得準一點，應該說是較易炒起波底。不過今日放起人造草皮上都打到，總算有點進步... 今次打波竟發現隔離bay有個貌似鄭家穎既靚仔...一直以為只有老坑中坑先打golf...(在說自己嗎?) 25 Oct 05 "愛兄弟，還是愛金錢" - 電影"黑社會"海報中的slogan。 以黑社會為題材的港產片比比皆是，但"黑社會"仍有其吸引力。此片很straight forward，沒有"無間道"的彼此猜疑，鬥智鬥力，說的是爭名逐利，以"愛兄弟"為義，到頭來還不是"愛金錢"?片中演員全是好戲之人，梁家輝，任達華當然不用說，張家輝的演出絕對有驚喜!只是古天樂被比下去了... 本片當中5個小角色其實不容錯過，他們一舉一動往往影響全片，亦為續集埋下伏線。 很喜歡"交通燈"一幕，以靜止的畫面形造緊張氣氛，無疑是成功了!而片中最後"馬騮山"一幕，當中隱喻可讓各位細味，足見其用心! 以$35觀看此片絕對是超值，若票價是$50我還是會覺得物有所值! 本片落實開拍第二集 - "以和為貴"，絕對期待! 24 Oct 05 這陣子lunch time的conference room變得很熱鬧，大家吃完飯都會一起玩"挫大Dee"。今天Derek帶來一副Uno，大家玩得痛快，幾近拆天，看來HR manager快要罵人了... 下午軍佬來電告訴我荃灣有間很好吃的麵店 - 麵棧，哈哈...我可曾經是這間店的常客呢! 但我不推介，因為覺得這兒味精很重。 留言版終於做好了，大家不妨留言! 23 Oct 05 本來打算在家看看VCD，收拾東西，hae左呢個holiday...但早上上網看見不地，閒談幾句，都係決定去尖咀take下野。Take咩?Take photo是也。 老實說，近來香港天空已少見那種像綿羊般大片大片的雲...今日既天空，只可說"萬里無雲，一片灰朦"。雖然景色欠佳，但試玩了不地的長鏡，用來拍攝鳥兒真不錯呢! 話說早前以為自己的鏡頭發霉了，今日比不地醫生診斷過後，原來只是body內的cmos入了塵，虛驚一場! 因為應承了mami回家吃飯，不能和不地&基拍攝夜景...其後他們說影夜景幾ok喎!唉...唯有下次啦!不過晚飯吃到今早由川龍買回來的靚靚西洋菜，那兒是即買即割的，新鮮到不得了!算是一種補償吧! 20 Oct 05 原來Word真係好難用...幾乎激到七孔生煙!! 話說本人有些html文件想改以Word形式制作，點知原來Word博大精深，只見佢個cursor形態甚多，變化萬千，絕對是摸不著頭腦! 看看雜誌"新假期"，今期專訪中國金秋，令人為之嚮往!當中介紹以天下絕險見稱的司馬台長城看日出，慶幸上次去北京曾到此一遊呢! 19 Oct 05 "親切的金子" - "影評"隨筆 唔太鐘意個主題...唔係話佢拍得唔好，只係JSA較有人情味，o岩我睇d。覺得金子cult又cult唔晒，後半講得太白，風格跟前半統一會好一點。但朴贊郁既directing仍可觀，始終將一件事拆散再組合係佢拿手好戲。其實金子內心戲可以重些...描寫個5歲細路起佢生活出現亦可多些...好過用咁長篇幅講佢點借刀殺人。 18 Oct 05 今晚和"影評"看"親切的金子"。慣常地看完一套戲會問問別人："覺得怎樣?"一心洗耳恭聽影評的專業意見，卻得到這樣的一個答案："通常看完戲第一刻的感覺是不真實的，戲院的漆黑會帶你進入戲中的感情，我明天再答你吧!" 嗯!也許是吧! 17 Oct 05 一心想買條軍褲，點知原來細碼都好大條。行過相機舖見到好多鏡頭都好岩洗，不過都係睇下算囉! 16 Oct 05 現在逢星期天好像不能缺少一杯靚茶，所以6:00起床也在所不計，要到川龍嘆下一盅兩件。 好明顯今日疲勞過度，起H2O做facial的時候睡得很甜。 做完facial到三聯逛逛,終於買到中國國家地理雜誌!$20帶你遊遍中國名山聖湖,所以話"書中自有黃金屋"呢! 15 Oct 05 今天Cherona打來通風報訊，說天水圍那邊一片煙霞，能見度低。可是我們晨早約好了，還是依舊到白泥走一趟吧! 2:00pm準備出門口，Marco姣婆守唔到寡，話唔黎又黎… 因為元朗33號小巴站頗難找，等齊10人出發已經是3:45pm了。我們4:30pm到達下白泥，只見天色灰朦，煙霞一片，只得一丁點陽光。不過反正來到，就隨意拍幾張照片。雖然拍不到金光閃閃的日落，但對我來說，首次踏足濕地泥灘還是新鮮感十足! 朋友們話今次"白黎"一趟，但我不完全同意... 6:30pm黎開白泥，開始今晚的首個活動 - 往流浮山食海鮮。因為流浮山沒有櫃員機，大家身上盤川又唔多，所以budget定為$100左右。(其後發現原來可以visa結賬) $120可以吃到甚麼? 1. 粉絲蒸扇貝 - 比上次南丫島的大隻多了。 2. 炒聖子 - 極盡肥大肉厚之能事。 3. 炸蠔 - 酥炸脆漿做得很薄，入口鬆化，肉質肥美甘香，比上次原桶美國炸蠔出色多了。 4. 清蒸大星斑 - 時間控制得宜，不過未係最top既口感。 5. 辣酒煮花螺 - 野味唔太辣，連我都食到。 其他未能詳錄菜色有：白灼蝦，白切雞，乳鴿，炒蛋及甜品。另外要多謝Derek幫我開乳鴿腦，其甘香程度直迫鵝肝! 飲飽食醉大家意猶未盡，應Cherona之邀去佢間豪宅玩。Sunny係咪好羨慕呢?! Cherona屋企有好多Poohさん，雖然我唔中意Poohさん都忍唔住影返兩張。我地幾個賭鬼玩到11:30pm先肯走... 搭西鐵去到荃灣西站都唔識落車...白痴! 14 Oct 05 在7-11買了兩包麥提莎，現憑麥提莎吉包到UA可以$30換購戲飛。在7-11看中國國家地理雜誌，看到當中的訂購表格，真想訂本"鳥瞰非洲"來看。 13 Oct 05 攝影=敗家。這句話一點也沒錯! 放工捉埋細佬去鴨記睇腳架...以我性格又點會空手而回呢?回家途經三聯書局，走上去逛逛，還是找不到今期的中國國家地理雜誌。 12 Oct 05 打golf好像又有點進步。對我來說，打45分鐘已經夠累了... Lawrence提議請教練，我也有同感。考慮一下吧! 11 Oct 05 這幾個鐘的付出，希望是有價值的。 08 - 09 Oct 05 這兩天的日記我想可以一拼寫，因為都唔知點分... 今天(08 Oct)一早同上星期日一樣6:00起身去川龍飲茶。發覺蒸蝦米腸比齋腸好吃，下次記住要拿蝦米腸喇!之後也和上次一樣，治引水道步行至城門水塘。途中巧遇一位鄰居，一路行一路聽佢講旅行經歷都唔錯! 之後返到屋企就係咁訓係咁訓!雖然訓唔著都迫自己訓。何解?因為今晚將會"夜戰鳳凰山"!行夜山我都係第一次，當中經歷教人難忘! 晚上約了朋友們在東涌地鐵站集合，一行七人1:00am正式由伯公拗開始登山。山路初段頗易行，都是平路。可是大約經過半小時路程後...幾乎全是斜路，有幾段更近乎70度!不過行夜山的有趣之處係睇唔到前方或附近既山勢地形，只能以電筒照著前方小心翼翼地前行...其實當時右邊係極斜既緣涯，睇唔到由自可，回程時真替自己抹一把汗...路已經難行，最要命係迎面吹來的6-7級烈風。有幾次我同卓弟弟更差點被風吹倒... 行左約2小時，問下隊友仲有多少時間才登上山頂，答："行左一半多d掛...以我地既速度睇怕要8:00am先上到去。"嘩!唔係掛!?即刻人都灰晒... Anyway，暫且停下來休息，怎知一個空樽從天而降，好彩冇被擊中。心想，風勢咁勁連膠樽都吹過黎!?唔理喇!休息過後繼續趕路，點知奇蹟發生，行多兩分鐘就已經登上山頂!Yahoo!好明顯頭先個膠樽就係山頂既朋友掉下來啦... 此時3:30am，山頂上已有十幾二大人，有人仲帶埋帳幕黎!時間尚早，我地都躲到大石之後擋風，亦由於風勢關係，帶來的啤牌變得無用武之地。又凍，又累，坐著坐著，我感覺自己有一段時間冇左意識...(可能係半入睡狀態) 5:00am，大家開始set野，好彩有帶腳架，如果唔係就影少好多。太陽準時6:15am出來，呢個時候我地最忙，不停按動快門，希望唔好miss最美一刻。可以企得咁高看日出，視野的確一流。在一望無際的天空中看著"鹹蛋黃"由一丁點光，到慢慢"成隻"升上來，愛透了這種和天空如此接近的感覺。 影完相已經係7:15am，起成晚未訓過既狀況下落山。不過呢個moment仲未識累，仲行得走得。落到山腳坐車一刻...haha...真係差d訓到唔識落車!回到東涌市中心，吃久違了的麥記早晨全餐，感覺份外滿足，亦為這次日出攝影畫上完滿的句號。 05 Oct 05 岩岩去完旅行話要儲錢...轉頭就去左大出血，呢方面既自制力實在太差...(請自摑50大把!)如果今晚打golf應該唔會出事的，是否應怪罪到Lawrence頭上? 今晚Daddy Mami約了舊朋友BBQ，所以我只好食公仔麵...呢兩次煮既公仔麵明顯有進步,軟硬度適中，細佬食過都發出"嘩"一聲怪叫，相信係太好食既關係，wakakakaka! 我既sleeping cycle又黎喇，今晚訓左9句鐘，爽! 04 Oct 05 原本以為Dicky早放工今晚可以吃到峰壽司，點知因為我地行開左唔補檯比我地...無奈。改往吃咖哩飯，呢間d咖哩飯都ok架!只是燒八爪魚丸d麵粉太多... 宜家既EL真係十足一個學生，一個人拎住5本加埋成呎厚既書...學生既生活實在令人嚮往! 多謝Dicky送既"怨靈傳說"figure，好正!咁岩係我鍾意果款! 返到屋企收到一個消息，知道一個舊朋友(大我兩年)，當了大學的lecturer，佩服!佩服! 02 Oct 05 今天特地早起，往久違了的川龍歎一歎山水名茶及行一行城門引水道。最愛川龍的蒸腸粉，在其他地方始終食唔到咁黏咁滑咁有口感既蒸腸粉。 不過代價就係要早起(今日6點起床)，遲左就冇晒喇... 01 Oct 05 今日公眾假期原本打算去行山，8點幾起身刷完牙卻收到一個電話說cancel...冇mood，冇癮!好彩未洗頭，二話不說就跳返上床再訓過! 今晚同幾個朋友一齊去探下Bill，順便為佢媽媽裝注香。Bill好憔悴...要快d重新振作呀!遲d出黎食飯啦! 之後去左山林道食潮州菜，呢間飯店水準唔算好突出，不過當中都有一兩菜值得一提!第一次吃血奄，雖然吃到成口血卻沒有腥味，配上一些蔥絲，鮮甜惹味!檸檬鴨湯，檸檬及鴨的味道濃淡適中，balance到可以玩搖搖板!Good! 在這餐飯當中學會了花膠，魚標及魚肚的分別，大家對食好講究呢! Sept 05