海下灣仔逍遙遊

日期：18-08-2004

出席人物：LingLing，阿基，fun，Fanny

行程：海下，灣仔

難度：1星

後記：by 基

因為阿fun的朋友Fanny想去海下，而我也想輕輕鬆鬆住郊外行下，於是便有了這一次海下逍遙遊．海下灣沿岸有一片紅樹林，近岸有海星海膽睇，對出水較深的地方有為數不少的珊瑚，由於生態資源豐富，所以在1996年被劃為海岸公園，現在每縫假日都係人山人海，旅遊車出出入入，最開心相信係海下士多的老板．

早上係西貢市中心集合，食完早餐就乘坐來住西貢市中心及海下的小巴，唔使半個鐘就到了海下村．在住灣仔前我們打算先到海邊紅樹林，由村口入紅樹林可以試行海邊過，不過因為水漲，所以我地只好穿過樹林....

係樹林度行左一陣，行過一間村屋，見屋內有幾隻大狼狗係度狂吠，巳心知不妙想番轉頭，點知ｄ狗巳經撲左出來，我只好學Fun仔係大帽山咁向ｄ狗大喝一聲，哈～ｄ狗即刻走夾唔抖，我地以為冇事la~點知...........

隻狗呢頭走個頭班馬，結果來多左五隻狼狗，其中一隻重係都柏文！睇來今獲唔係扮野人就可以甩身，我同Fun仔用個身擋住LingLing 同Fanny，一步一步咁退，ｄ狗近到可以掂到我條褲，仲不停狂吠，好彩我地行遠之後冇再追我地，如果唔係就真係大獲！

最後我地只好出番迥旋處，係路旁有小路避過間屋，先可以去到沙灘．

呢個就係有海星海膽睇的沙灘，而不過今日水漲冇得睇，而且個天好濛．我地留左一陣就走．

冒住比狗咬的危險來到竟然冇野睇，真係吹脹．

呢幅係灣仔西營地全景圖，可容納千人，仲有?所同浴室，交通方便，想人多熱鬧去呢度就最正，以前呢道冇水源，所以好少人係度camp，好寧靜，係我喜歡的營地之一，依家就.........

食完午餐就行下灣仔郊遊徑，由於成個灣仔都係人工植林所以其實冇乜特別野睇，除左ｄ大大隻草蜢同大大隻蜘蛛．沿住郊遊徑可到達南營地，然後再由沿路出返海下村，搭小巴走人～

後後記( by 基 )：唔知係咪同ｄ狗有仇，成日比狗圍，真黑仔，而海下村ｄ人都幾差，係我地比狗圍時，LingLing向村中人求助，而ｄ人竟然無動於衷！而且屋主又唔睇好ｄ狗，我地比ｄ狗圍咁耐，嘈到拆天都唔出來管下ｄ狗！過份！！

夜晚同班老友去左食飯，雖然食完就散，但係都好Happy~