 |
|
|
Yr 2002:\> <<July>> <<August>> <<October>> Yr 2003:\> <<May>> 31.5.2003 抗炎大事回顧 話咁快考完試一個月啦，亦都話咁快，抗炎大使呢份暑期工亦都係今日圓滿結束。回想番一個月前，廿八號考完試，番來都已經好支力啦，跟住同敏婷傾左一陣，大家都有意搵工，就去勞工署個網頁睇一睇，又會咁岩，見到抗炎大使呢份工，話請"大量”人，仲要係新鴻基請，雖然第二朝要一早起身，但都決定左去IN，試下嘛！ 我地十點去到，已經勁多人排隊，嚇親呀！全部都係F.7既，好難爭喎！我地排左三個鐘先有得IN，最后我同敏婷同Hilda都得左，真係好意外，好開心，第日睇番報紙，原來有二千五百人去IN，我地打低左二千人呀！即刻唔理三七廿一，一定要做！人地仲要唔錯喎，真係一個好好既機會！ 跟住果幾日都係度整班之頁，通左三晚頂（日頭訓），原本要去CAMP，點知病左，唔去算啦，好驚SARS呀，好好保持抵抗力！ 第一日番工係Training，一去到唔識人，竟然坐左去Habour Centre，我係新鴻基中心架嘛，係果度見到Anthony，都好，有個伴呀，唔使咁悶！完左個information session，就派衫，套野有點兒那個，算啦，都唔會有人認得。係果度第一個識既係個金毛，好串，話要短裙仔制服先肯著，好驚呢D人，即刻唔睬佢，跟住就識左呀蚊啦，仲同佢一齊坐車tim去沙田個誓師會∼不過好醜怪呀，我落車果時竟然唔認得佢！好彩後尾搵得番∼呢日其實幾無聊，仲有錢收，果然係大公司！好勁！之後就同敏婷，Hilda，Rebec，大舊，小虫同另一個Karen食左個Tea，估唔到咁多華英人下∼跟住就番屋企啦∼好期待第日真正番工！ 第二日番工，我搭三就番到，以為好早，點知D同事已經到得七七八八，好驚！換完衫落去大堂集合，想搵番呀蚊，有D困難下∼好彩後尾冇認錯人，搵到佢呀！佢二十號，我十六號，可以係同一組，好開心！我地第二組，負責Zone 2 D lift，16-25樓，CS代表係呀玲，佢好好人架！經過葉生同姚生簡介後，我地就要開工啦！好緊張，唔知D客係點架呢...最後到左lunch前，我地先有機會自我介紹，我地Zone有蚊，我，Aggie（妹妹），Yanly，多多，Bruce，欣（文生），Alice，張同埋Fion，記左好多日先記到！ 頭一兩日番工真係好辛苦，D客唔睬你，自己又企得支力，上上落落又頭暈耳痛，好想唔做，不過都堅持落去！過左幾日，我地開始熟啦，點知呢個時候Fion要調Centre，Bruce同Yanly又被調組，好可惜呀，跟住我地就有新組員，係Ruby同Annie（文太），大家都合作無間，除左Yanly好鍾意番來第二組，Annie成日走去第三組，Bruce同妹妹"咁快"有緋聞，文生文太咁快結婚之外，都冇乜特別。過左幾日，大家都慣左企啦，冇咁辛苦，D客又會同我地傾下計，幾開心呀！最難忘就係可以見到郭生，嘩好勁呀！ 我地第二組有等別轉間措施，就係有十分鐘走戔，要多謝呀玲，呢十分鐘對我地好重要！由初時既走戔一兩分鐘，到后尾用盡十分鐘，都幾攪笑！最記得有一日第一三四組都要briefing，懷疑係比人投訴，我地竟然唔使，所以果日唔敢早走，到六點五先敢出lift，第日就比姚生讚啦，呀玲都以我地為榮呀！由始至終，我地第二組都冇比人投訴過，勁呀！ 時間一日一日咁過，有好多傳言話就快炒人，我地理得佢地咁多啦，傳言來既，多數係假。後來呀Bruce要去中大做Research，辭左份工，我地同佢攪左個Farewell，仲係當中救左隻小貓，係度唔講咁詳細，想知問我啦∼ 新鴻基果然係大公司，D經理好好人架！我地既待遇又好喎，番工好似番學咁∼一個月好快就過，出左通知話做到三十一號，我地四十人會留番十七個，Yanly因為表現出眾仲被建築部搶先請左去做探熱大使tim！妹妹就做衛生大使，我同呀蚊就應該做神秘人，多多同Ruby就做收樓人，好攪笑囉∼其實我地好好彩，一開始IN得成，到後來派來新鴻基總部，再到派去Zone 2，唔係我地都冇咁大機會留低呀∼真係要多謝神！知道就來冇/有得做之後，我地就開始發癲，勁蛇王，組組都係咁（包括D組長），癲狂時間九樓（休息室）竟然有三十人到，痴線架！嘈到發癲，一出lift都會聽到有人係度哎... 最後一日，我地一早送左張多多畫既卡比呀玲，佢勁開心囉∼十一點幾，新鴻基又顯大公司風範，請左我地去中環場食Buffet，有三文魚果D架，對住個泳池，勁High Class囉∼！我地"唉"蔡生比我地上七十五樓睇下，估唔到佢咁易應承我地，食完野就上左去啦！要轉三次lift先到呀！到左果度，香港好似屬我咁架喎，大地在我腳下∼大家勁影相，咁都岩既，一生人冇乜機會上來，全靠蔡生好人ja∼我地一定要努力，有朝一日可以係Office度獨攬香港全境！今日總共查左三個字lift，番來係新鴻基半日遊，仲有錢收喎，勁爽！畢業一定要入新鴻基做呀∼放左工，我地打埋卡上左去五十三樓參觀，靚到爆，有空中花園，有個大魚池，可以游水咁濟，又有總統式會客室，經理餐廳，上金既厠所，有錢真係好，多謝黃生肯帶我地入去見識下∼ 咁就完左啦∼好唔慣，日日要番工，日日要對住同事，突然間冇得成日見，好掛住你地∼大家一定要keep in touch呀∼！ 呀蚊：好多謝你咁信我，同我講咁多野，好鍾意同你傾計∼希望我地兩個可以做落去啦∼ 妹妹+Ruby：你地真係好得意呀！ Alice：我地要靠自己能力入想入既系！唔好比人睇死呀！ 呀玲：多謝你一路以來咁睇住我地∼ For photos : http://karenfan.uhome.net/shk
|
|
No Copy Right Karen 2002 |