歡迎光臨
| 10月27日 |
02:01am
|
| 無奈 今日唔知為乜一班人走左去元朗食完飯, 跟住因為主辦單位溝通有問題, 意見不合就散...., 唔只一次la, 點解成日都係咁ga, 一班 friend 出黎玩大家抱住無所謂的心態咁就易搞啦! 唉........ 回想起以前又真係好似爽 d wor, 自問一向多多意見的我(好聽d就係有主見la^^), 無論實際定唔實際, 好多時真係唔經大腦就去做, 反而好似從未試過有這種事情發生wor, 記得有次星期六就收工, 收到個電話就無端端由灣仔去左沙田踩單車, 有次唔知約出黎行街定吹水, 突然間去左食海鮮, 有次夜媽媽冇野搞, 突然想去釣魚, 即刻出去買魚餌工具, 有次明明諗住o向市中心食飯, 突然間去左燒野食, 仲有次突然去行山, 仲有次突然.....太多太多, 始終我都喜歡這沒有準備的驚喜 ^_^! 時間, 距離 有好多人話真摰的感情係經得起距離同時間的考驗gei, 但不嬲我都唔認同ga, 點解? 可能係對方的生活圈子唔同左, 又或者感情生活而改變左的性格, 大家的話題因時間而出現差距,...... (今天遇見一個曾經交換心事的好友, 都因為距離同時間而變得陌生) 早幾日克勤o向雲妮鍾情傾計, 佢同我的想法都是一樣, 係wor...點解我唔記得左ga, 比佢提醒我已忘記的想法tim, 所以我就知道我應該要提一提我怕會因時間而忘記自己的好友(你), hehe! | |
| 8月27日 |
15:05pm
|
好得意呀! 巴斯光年個 friend 鄧梓光年呀 ^_^! | |
| 8月14日 |
11:35pm
|
| 救星 這兩個星期真係難涯, 客人要求一d 我地自己冇能力做的事, 連日左搵右搵, 用盡辦法都好似冇希望咁.... 你的堅持, 佢的出現, 終於有一線生機la, 總算暫時鬆一口氣, 所以今朝好悠閒去睇早場, 睇"活死人地帶", 點知去到戲院買飛, oh...得番 6 個單丁位, 我見到有個卡窿位, 即刻買啦, 入到場見到有人坐住個卡窿位, 我緊係問佢介唔介意啦, 點知個男仔好怕醜咁坐左埋場, 突然間有個咁正o既位, 真係唔係幾好意思, ^_^! | |
| 7月8日 |
14:35pm
|
| 傻瓜 今朝我諗約5:00am鐘左右, 天都未光我就醒左, 咦...點解佢未訓gei, 佢同我講佢剛剛哭了兩次, 我好緊張問佢咩事, 佢話睇完嘉怡日記"一個會令人看完後感動落淚的的故事!!"之後哭了, 我聽完之後先發覺平時 hehehaha 的佢完來都有另一面! 傾下講下笑下, 就係咁就天光la!!! | |
| 6月14日 |
12:08am
|
| 大大步(纜)過 老豆入醫院, 細佬逃學離家出走, 公司一大堆的工作, 好不容易先捱過上個星期, 對於我黎講這星期發生的事實在太大太多, 而每件事我都處理唔到, 上星期老豆o既病情嚴重, 當醫生講比我地聽不太樂觀的時候, 各人的情緒都激動起黎, 這個情景令我永遠不能忘記, 好彩手術成功, 老豆而家鬼咁生猛, 阿媽又唔洗咁辛苦, 成個人都輕鬆哂! ^_^ | |
| 6月5日 |
11:30pm
|
| 虫虫奇遇 尋日冇乜野做又唔想郁, 咪留番o向屋企玩下電腦law, 同阿妹一齊睇緊電腦d搞笑 movie, 突然有d野跌左o向我背脊, 我(樣)下件衫, 跌左d 野出黎, 嘩嘩嘩! 有兩條虫o向地下, 仲好生猛tim, 我咪即刻用阿妹部相機影低佢law, 比老豆睇完都唔知咩虫, 又唔知佢咩途徑入左我房wor, 慘啦...如果有其他同黨夜晚爬入我個口點算......好彩暫時未有發現其他同黨 | |
| 6月1日 |
4:30am
|
| 第一次 好累呀!去完個客度做野o岩o岩先番到屋企, 途中回想番過去一年在我身上原來有好多好多o既第一次發生左, 剛剛公司成立一週年, 第一次傾到咁大o既客, 亦第一次損失左咁大o既生意, 第一次有自己o既office, 第一次出糧比人, 仲有好多好多......, 終於捱過左第一年, 我面前o既障礙好似面對得比以往輕鬆, 每次客人對我o既稱讚及認同, 我就會成個人都輕鬆哂, 冇哂壓力, 好明顯今日比人讚過先令我打咁多字啦! | |
| 5月26日 |
11:30pm
|
| 絕情谷聽後感 尋晚聽完絕情谷大Joe 讀出一位聽眾的 e-mail, 令我有深刻的印象, 佢提到中國人從古至今都存在婆媳糾紛問題, 因為大部份阿媽會覺得錫左個仔二三十年永遠都係輸比個仔識左3, 5年o既老婆或女朋友, 一般奶奶都會對媳婦的態度惡劣, 媳婦往往會與奶奶展開爭鬥, 老公亦往往會為左阿媽而導致同老婆嗌交, 媳婦如果能夠把握機會在奶奶面前加分, 老公亦同時會對你加分, 聽眾有一些加分經驗比大家: 1. 老公當同奶奶講:[阿媽, 同你去飲茶la!] 即時要同老公講(聲線要比奶奶聽到):[同奶奶去ABC酒樓啦, 奶奶最鐘意食果度D叉燒包ga la!] ***冇乜功夫,輕易加分*** 2. 探奶奶時老公買生果送禮, (預先執起一袋奶奶鍾意食的生果) 見面時就對老公講:[大頭蝦, 奶奶鍾意食提子ma, 你又唔記得買, 要我行番轉頭!] ***唔洗比錢有得加分, 老公又唔洗扣分*** 3. 多向奶奶了解老公的事(扮唔知道老公的喜好), 切忌同奶奶鬥對老公有幾清楚 ***未必會加到好多分, 但如果鬥清楚, 會嚴重扣分*** 我聽完之後就覺得好似我一個好朋友, 我lee個朋友對於捉心理, 逗人歡喜係專家, 諗番佢逗人歡喜o既方法真係比較突別, 絕對同以上聽眾有得揮! 之前有人問我點樣先可以同女朋友夾, 在我心目中"夾"lee 個字, 同其他人的見解有d唔同, 有唔只一個人同我講覺得我同女朋友唔係好"夾", 諗諗下又好似真係wor, 無論係嗜好, 生活習慣, 思想層面, 全部都唔夾wor, 但原來對方能夠同你o既屋企人, 朋友, 相處得好的話, 比以上的更困難! 完來我心目中"夾"就是佢要o既野我比到佢, 我要o既野佢比到我, 就算大家要o既野唔同, 嗜好, 生活習慣, 思想層面唔同都好, 只要符合以上 兩點, 咁就已經足夠la! | |
| 5月24日 |
11:30pm
|
| 急症 尋晚老豆個頭部突然劇痛, 十一點左右即刻同佢去睇急症, 去到急症室睇到個牌要3個鐘輪侯時間, 心知不妙! 去到分流站, 我已經吹大d, 七情上面, 但係都冇用, 足足等左四個鐘, 四個鐘o既急症, 搞到老豆辛苦多四個鐘, 上次又係咁, 今次又係咁, 下次都係call 白車先得! | |
| 5月18日 |
3:30pm
|
| 成身散哂 上個星期六, 節目豐富的一天, (14/05/2005 Fayma 的生日) 一訓醒就同 POPO&JOEY 去行街, 話明一齊去揀生日禮物, 點知兩位女仕見到lee樣又鍾意果樣又話鍾意, 仲要買左野比自己先law, ~_~! 仲有時間梗係打陣機啦, 打完機就去左 Fayma o既生日 Party, 又包場, 又有一班猛男同佢影相, 威哂! 玩完都未夠喉, 我地再落 Bar 飲野, 玩完一輪之後, 我地又玩"碧桂園問答遊戲", 我就最鍾意咁樣傾計, 將平時冇乜機會問, 冇乜機會講o既野一次過出現在lee個game入面, 正! 好累呀, 玩夠la, 番屋企途中約3:40am收到一個可怕的電話(POPO 叫我同Joey去唱k), 最後我地唱多兩個鐘K, 食埋早餐, 結果7:30AM先訓覺, 最搞笑係我番到屋企一見到老豆背影, 即刻衝入廁所, 跟住老豆問POPO我番左未, POPO就答:佢去左廁所! (老豆以為我柯夜尿) 咁都過到骨! | |
| 5月6日 |
11:30pm
|
| 搬遷 煩左咁耐, 又要搵地方, 又要搬寬頻同電話, 今日終於搬哂D 野la, 好累呀, 不過睇到D 野搞掂哂都開心番, 雖然今次LEE 間office細左又貴左, 不過都叫做搬過下office, 希望好快可以實現下一個目標啦! | |
| 4月17日 |
11:55pm
|
| 伸展筋骨 其實我唔應該出街gei, 不過訓左咁多日, 真係好想郁下! 今日o既節目都唔錯, 首先去左look ling, 當然我緊係冇失水準啦...(開頭)! 今次我又提議少出冇得飲, 好彩我唔係少出! 講到今晚o既晚飯真係好豐富, 九個,又有芝士焗龍蝦, 又有紅燒雞絲翅, 每人都唔洗六十蚊, 正呀........(包括個阿姐)! 有人話想食甜品, 我見到廚窗有好多糕點, 咁我就話:有好多pat pat wor! Joey 就問 pat pat 係咩黎ga? 都唔知點答佢好, 我唯有答左佢:入面有屎果d law!!! | |
| 3月11日 |
14:35am
|
| 唱K團 好耐都冇試過咁多人一齊唱K la, 雖然LEE個組合有些少怪, 但玩起上黎又冇咩問題wor, 唱左7個鐘都好似唔夠, 最好玩都係思敏教我地玩gei新game, 原因係教我地玩果個輸得最多lor! 相已經upload左la, 至於全新演繹的"女人味""會過去的"同埋其他幾首精彩MV, 好快有得睇la, 密切留意!!! | |
| 3月2日 |
12:35am
|
| 說不出的興奮 今日阿KEN(公司Partner)同個客傾完電話, 跟住FAX 機即刻響, 應該係個客訂貨掛, 但係冇理由一收線就 FAX 過黎, 跟住阿KEN一睇, 原來唔係佢O既! 咦!.......原來係個新客簽左張單 FAX 番過黎, 太好la, 睇到張 FAX 就好似叫我比D心機一樣, 加油呀! | |
| 1月8日 |
15:15pm
|
| 2005年1月1日 今年冇去倒數, 冇去同人迫,去左一個好特別o既地方食飯, 就係近住建生o既鄉村飯店, 回想起住山景果陣, 成日都會一家人走去楊小坑果間鄉村飯店度食野, 突然間好想番去試下tim! 今年最特別的就是我地夜晚去左look ling, 阿君去排ling果陣同人講: 唔該我地要 4 條ling! 即時嚇親個收銀! 其實我覺得節日都未必一定要去咩特別地方, 我就覺最緊要係熱鬧!!! | |
| 12月30日 |
23:15pm
|
| Master Mind 好凍呀~~真係唔想郁呀! o岩o岩沖左壺熱辣辣o既香片, 我哂杯出黎準備斟果陣, 有一個步驟係必要做的, 就係"蚊"開個塞, 點知發生左意外, 個塞竟然分開左一半, "頂"...好日都唔會自己沖茶, 依家想飲都冇得飲...番入房上下網,咦...比我搵到lee個game, 所以整比大家玩下! | |
| 12月29日 |
01:15am
|
| 聖誕節04 今年聖誕冇特別去邊度玩, 24號收工時間收到個客o既急call, 所以去左個客度, 之後思敏,Fayma過左黎食飯, 叫到成檯都係野食, 開左支私火紅酒, 配合埋d野食, 又包左場, 真係好好feel, 係衰在冇音樂! 原來過一個平靜o既平安夜, 感覺真係唔錯! 26號晚去左一個中學同學o既聚會, 見番好多好耐冇見o既同學, 有d係7年冇見過tim, 時間真係過得好快, 今次見到佢地覺得自己真係一把年紀la, 因為佢地傾o既話題主要都係結婚ga 野, 再諗一下...嘩!原來自己已經25la, 唔通...... 跟住果幾日都係打下麻雀就過左lu, 有個傻瓜唔知自己叫四非, 自摸左打番出去, hohohoho....跟住有人出沖, 唔洗我比錢慳番好多,hehe!!! | |
| 10月26日 |
10:15pm
|
| 大尾篤單車團 上個星期五係重陽節, 主辦單位搞左個"大尾篤單車團", 雖然約左十二點正大埔火車站等, 係人都知阿Joey 姐"立"嫁啦, 我咪九點幾叫佢law, 點知都搞到11:15am先出得門口, 我諗住遲硬tim, 點知我地去到上水, 團長話佢仲o向市中心, ......原來佢地架車"好糯"壞左, 最搞笑佢地連壞果架車o既車牌都影埋! 今次靚景就多la, 不過路程太短, 唔夠喉tim! | |
| 9月24日 |
21:33pm
|
| 公司 今日好開心, 因為又簽到單la, 聽日又簽單la, 11, 12月仲有3張單等住我去簽, 咦...諗諗下之前定左好多好多好遠o既目標比自己完來近左好多, 雖然睇唔清楚, 但係我已經望到la, 唔知邊一個目標會最先達到呢? | |
| 9月24日 |
20:03pm
|
| 怪事 尋日有件怪事發生左, 係咁gei, 我見冇野做, popo又話想download d 鈴聲落佢個電話道, 咁我咪幫佢搵law, 佢聽到"鬼來電"o既聆聲幾得意咪叫我整law, (如果你冇睇過"鬼來電"請睇故事簡介) 鬼來電 (全)》內容簡介 由美的朋友，陽子的手機突然發出了一個未有聽過的來電令聲。電話液晶燭幕上的來電顯示竟然係"自己的電話號碼"…打開電話一聽，卻聽到自己慘叫般的聲音…通話紀錄的來電時間竟然是兩天後的未來！！ 這是「死亡預告來電」嗎…!?由美到底能不能而來的離奇死已事游渦當中脫身呢───! 咁我幫佢download 左之後, 佢如常番工, 番工途中我都有同佢通過電話(佢分左我第二組聆聲), 之後當佢行到一條冇人的街上時, 電話響出"鬼來電"的聆聲, 當時她並不覺得有什麼奇怪, (因為聆聲係我幫佢整gei) 拿電話出來準備聽的時候, ............................電話液晶燭幕上的來電顯示竟然係"自己的電話號碼", 佢唔知聽唔聽好, 佢諗左一陣, 終於聽左, 點知係.................................................... "留言信箱" *_*! ........................... (因為和記當有留言果陣, 會用自己的號碼call 自己黎覆留言) | |
| 8月25日 |
00:03am
|
| Creative Link System Company 不知不覺原來我已經離開左POINTSOFT 2個幾月, 而家lee個地方就係我番工的新地點, 雖然地方好細, 不過我地OFFICE麻雀雖小，五臟俱全嫁! 搞得成lee間公司真係要多謝好多人, 冇左你地真係有排都搞唔掂呀! 特別鳴謝: 舊公司Pointsoft老闆-EDWIN 阿姨JENNY,CONNIE (提供多方面指導及意見) 阿神 (提供公司部份硬件及軟件供應商, 公司D 板,MON,MODEM,咪佢提供law) 機標 (提供超級技術支援服務) 柏林 (現時公司O既名同咭片標誌咪係佢設計law) 思敏 (現時公司O既咭片咪係佢幫我搞law, 仲免費幫我上photoshop的 Training tim!) 苦苦 (法律及衛生顧問) 小玲 (法律及文法顧問) 祖兒 (文書技術顧問, 美術指導) 美寶 (提供精美早餐, 清潔及按摩服務) 林生 (康樂事務顧問, 及提供生猛海鮮主管) 林太 (秘制湯水, 營養師) | |
| 5月1日 |
12:43pm
|
| BB 女 舊同事Venus 生左la, 佢個囡囡好得意呀! 今日佢已經唔係以前傻更更的Venus, 而係囡囡個媽咪, 聽到佢講一切一切為個女做o既野, 原來一d都唔簡單, 這一個轉變令佢長大左好多! 見到佢地一家三口d幸福滿到瀉哂, 真係令人羨慕!!! | |
| 3月7日 |
22:43pm
|
| 珍惜 尋日星期六, 係我廣州表哥的大喜日子, 所以尋日全家人一早就起程番廣州飲, 但由於姑媽(阿爸個家姐,即結婚表哥個阿媽)入左醫院, 我地要先去醫院探望姑媽再去飲,去到醫院見到姑媽, 比我o既感覺就係佢個病一d 都唔簡單, 相信... 當時與她感情相當好的爸爸竟然沒有流露一點悲傷, 情緒亦出乎意料的平靜, 只跟我說:個阿媽病成咁, 擺酒跟本冇意思! 離開醫院之後, 我地仲周圍行街tim, 由醫院, 行街, 食下午茶, 再到酒樓, 我覺得老豆都冇乜野, 甚至老豆在酒樓突然間流鼻血, 大家都只係覺得小意思, 阿媽就同佢去左間房休息, 我地當然繼續飲啦, 過左接近半個鐘, 婚宴亦多開始左一段時間, 焦急的心情令我唔可以再等, 當我跑到他們休息的房間, 老豆依然未止到血, 我見到膠袋內所有染有血的紙巾竟然沒有空白的位置, 可想而知事件的嚴重性, 一向自認多主意的我, 頭腦變得空白, 我們唯有即時送他到就近的醫院, 跟住就趕搭火車番深圳,番到香港立刻去屯門醫院睇急証, 雖然血係止左, 但夠竟係咩事大家都未知, 估唔到尋日一日之間發生左咁多事, 亦因為咁而令我今日諗左好多野! | |
| 3月1日 |
11:56pm
|
| 私人珍藏 原來我有lee 張相我都唔知tim, 絕對係"私人珍藏" | |
| 3月1日 |
11:56pm
|
| 發呆 今晚我準時收工, 番到屋企又冇野做咪攞部相機出黎睇下law, 點知原來d 相(牛)左一個月有多, 所以今晚upload左 d 相, 上面o既靚仔知唔知係邊個呀? ^_^ | |
| 1月1日 |
4:51pm
|
| 新年快樂 尋晚(除夕03)去左龍鼓灘燒野食, 跟住去左look ling, 果條友又發癲, 你地睇下第二行最尾果格, 係TRIPLE X 呀! | |
| 12月29日 |
10:58pm
|
| 平安夜03 今個聖誕節估唔到一班前所未有o既組合可以玩得咁開心, 識左FAYMA佢地之後每年聖誕節都有交換禮物的習慣, 當然今年亦唔例外啦! 最勁就係我影到香港Michael Jackson o既相呀!!! | |
| 12月28日 |
4:18pm
|
| Twins 演唱會 詳情請到以下網址瀏覽 http://www.oocities.org/hk/andy31127hk/twins.htm | |
| 12月16日 |
11:19pm
|
| 屯門流浮山海鮮一天團 今次o既活動可算是完滿結束, 整個旅程亦發生左好多趣事, 驚險事, 有人跌落水, 有人擦傷, 有人傷風, 有人鞋穿loan, 最唔好彩係有人踩屎tim, (佢對鞋都唔知點算), 由於今次的路比平時唔同, 最大分別係冇任何指示應該點行, 大家都係靠估, 行到天已經開始黑, 但依然未搵到出路, 時間已經去到五點幾, 前面係河流, 已經唔可以再前進, 但由此回程又唔夠時間, 大家o既心情開始焦急起來, 既然水路唔可以再前進, 我們就嘗試由山路進發, 一步一步向前, 見到一些水管, 一間破屋, 再向前行終於見到馬路, 全程行左接近6個鐘, 總之一句講哂"好玩!" 行山相在此 | |
| 12月8日 |
11:19pm
|
| 本站活動新消息 屯門流浮山海鮮一天團 ----- 時間暫定2003年12月14日星期日下午12時30分於屯門良景村巴士站  門口等集合, 參加者可於本站留言版報名!由於要訂位食海鮮, 煩請大家最遲星期四答覆! 詳情請到以下網址瀏覽 http://www.oocities.org/hk/andy31127hk/hiking/hiking1.htm http://www.oocities.org/hk/andy51127hk/hiking/image.htm | |
| 12月6日 |
06:38pm
|
| 再見! 我...我終於同佢分開左, 轉眼間, 已經同佢相識左十一個月, lee段日子以黎, 佢比左好多回憶我, 以前o既日子無論佢想去邊, 我都一定會陪住佢, 仲記有一次我帶左佢去睇煙花, 真係好靚, 有一次我仲同左佢一齊上山頂睇日出添呀, 雖然當晚真係好凍, 但係只要有佢o向身邊我一d 都唔覺得凍! 係...無錯, 我地一齊o既日子真係好開心, 但我知道自己冇用, 唔可以比你好食好住, 成日都冇時間陪你, 一個月最多只可以陪到你四五日, 所以我決定左分開! 再見 la KW6859! | |
| 11月27日 |
12:32pm
|
| 本站活動新消息 由於將近12月份,又係大家想玩gei時間, 本站將會舉辦一連串迎聖誕賀新年o既活動,大家勿切留意本站最新發展! 現有活動如下: 1) 自助邊爐賀生晨 ----- 為慶祝阿樂生日, 將於星期六(29/11/03)晚上 7:00 在屯門建生村福旺海鮮酒家打邊爐, Fayma 屋企麻雀耍樂, 參加者可於本站留言版報名! 2) 屯門流浮山海鮮一天團 ----- 時間暫時未確實 | |
| 11月17日 |
02:49am
|
| 多謝大家支持 今晚o向屋企無聊開個Report黎睇先知雖然我成日都冇update, 但完來你地都依然咁支持, 多謝多謝! | |
| 09月11日 |
02:49am
|
| 中秋節快樂 今晚唔知有咩玩呢?訓唔著所以upload左新相! | |
| 06月08日 |
10:23pm
|
| 沙倉釣魚 6月7日 尋日去左釣魚, 估唔到沙倉都幾多魚(端), 不過釣釣下落大雨, 搞到我冇攞到果幾斤魚番屋企tim!hehe! | |
| 05月08日 |
2:03pm
|
| 和民居食屋 5月1日 和民居食屋開始用我公司的電腦系統, 我去舖頭幫手, 和民 d 同事重請我食野tim! | |
| 04月06日 |
2:10pm
|
| 西貢滿記 3月22日星期六晚去左飛蛾山同埋西貢滿記, 好耐都冇同嘉儀佢地去玩la,所以lee晚影番張相先! | |
| 02月17日 |
22:59pm
|
| 睇風景 星期六晚去左大帽山, 勁大霧勁大霧勁大霧, 上面張相絕無添加ga! | |
| 02月08日 |
04:06pm
|
| 遊車河 ~夜闖流浮山~ 日期: 2003年2月1日(年初一) 時間: 10:00p.m.-1:00a.m. 地點: 流浮山 o個晚我地一車五人包括有我, 弟弟, 小玲, Fayma同佢個Friend海迪一齊夜闖流浮山, 入流浮山o既路係單程路, 周圍o既環境又黑又靜, 仲一個人都冇tim, 當我地行左一段路o既時候, 發現大家o既電話都已轉收中國移動, 當時都有些少驚驚地o既感覺, 不過我地大家都想睇下盡頭有d乜, 所以繼續向前行, 我地越駛越入...越駛越入...越駛越入...穿過左一片草林之後, 忽然大家都"嘩"一聲, 真估唔到有咁靚o既海景, 馬路旁邊就係海, 而對面岸就係"蛇口", 仲見到蛇口果邊放緊煙花喎, 幾勁呀!!! 我地睇左一陣煙花之後就開車繼續向前行喇, 行左一段路之後估唔到比我地o係d咁 荒蕪o既地方見到個"爆釣魚場"喎, 幾型呀!!! 日期: 2003年2月2日(年初二) 時間: 下午3:00至晚上7:00 地點: 稔灣 & 煤灰湖 話說,o個日我地成家人(連埋我隻狗在內), 一齊去我老豆成日講o既湖, 傳說中o既煤灰湖, 起初諗住d乜湖物湖就緊係好正ga la, 去到果時, 我老豆先話比我地聽煤灰湖係咩黎, 原來lee 個湖比人倒左好多廢棄物(包括發電廠用完o既煤同灰)落去, 所以叫做煤灰湖 o_@! 下面張相就係途中經過一個小樹林影ga, 絕無添加! | |
上一頁 下一頁
| 【把本站設成首頁吧!!】 【將本站加到我的最愛】 |
|
Andy的信箱
andy1127@netvigator.com 歡迎來信喔!!!
Copyright© 2000 Andy's HomePage
All Right Reserved |
