|
Billy Lau Ho-Him's Home Page |
|
Home |
大時代.小人物.有用人
三月底買了一本楊牧谷弟兄寫的書 - <<做個有用人>>.用了兩天時順ˍ爭�,書中提及如何做一個: - 進入"有用期",而避免"過期"的人; - 能夠接收/分辨市場真實/虛假信息而又能帶給市場有價值信息的人 (The message is similar to the course that I am taking, how to increase the decision usefulness of the financial statement to the investors in the market.)
我和C C F的John弟兄談及這本書.於是自四月起,我倆分別訂購了<<Time>>和<<Economist>>兩本雜誌. 一方面希望了解我們身處的世界,另一方面又想學好D英文. 值得一提是:我中一離開香港,中文是由金庸同<<壹周刊>>兩位老師教我的. (其實我從<<壹周刊>>中學會不少知識和時事.) 孩子想,我用了五年時間讀小說和雜誌學會中文,從前我生命沒有神,現在我有神,我更可以用五年去讀雜誌學會英文.
問題是:當我成為一個"有用人",跟現在流行講提高兢爭力/自我增值有什么分別呢?我要怎樣才能活出一個超越"今世有用人"的生命呢?即是說,不但是個"有用人",同時是神合用的人. 另一個問題是:我如何知道一個"今世有用人"幾時是和神在我身上的計劃掛勾,幾時是背道而馳呢? 這本書似乎解答不了這兩個提問.
孩子要問神,我睇雜誌為乜呢?是提高兢爭力嗎?有冇更高貴的使命在其中呢?
有誰去為我們身處的城市/國家/世代去焦急和求平安呢? 有誰可告訴身邊的人耶穌是我們這個世代的盼望和靠依呢? 有誰能因現今世代邪惡而愛惜光陰和時刻警醒呢? 是那些一心只望提高影響力的"有用人",還是一個不單顧自己,懂得為神為國為民呼求的人呢?
講出來容易,但係點樣可以有一個持久而實在的動力去真正活出來,同時又抵受到做"有用人"所帶來的試探呢? 點解我地基督徒往往俾人睇成為一班善良而工作效率低的生物呢? 為名為利為發展自我潛能都可以十分具體地給我們滿足感/成就感. 但係救恩呢? 點解我地成日話為主而活係寶貴呢?我地的心靈真的這樣滿足同自豪嗎? 若如此,為什么我們連讀完一次聖經,每日祈禱和父神交通也會感到厭煩和長久"軟弱"呢? 我地講到天下無敵,為何比其他人更加有心無力呢? 如果我地落在兩個主人之間,生活就變得吃力不討好,永遠只能站在中間做磨心,費盡心智去弄平衡,又或者分身做雙面人,那裡還有餘力去把所交託於我們的事情做好呢? 於是我們唯有用什么屬靈不屬世,因信稱義而不是律法,人有軟弱云云的說話自己安慰自己.可是,這些真理係咪真係咁用呢?會唔會斷章取義呢? 咁點算呢?我地做屬神的有用人點樣可以有力D呢? 又或者問點先可以實際地(不嘴頭)由服事兩個主人變番做服事一個主人 - 父神/主耶穌基督呢?
大時代.小人物.狂想曲
四月,又是另一個quarter ended.今次又遇到一件不快的事. 事緣我們這間加拿大分公司和Atlanta分公司在settle某client的帳目上弄得非常混亂,我計出他們還欠我們2000年的錢,他們反說我們要比錢佢地.另外,year2002年到底需要accrual幾多呢? (我老細在reconcile inter company account時,因為態度問題,和Atlanta亙不咬絃,人家唔肯放料.)
我老細和我在這兩個問題上爭論了足足一星期. 我說有D inter company的數唔會affect bottom line,佢死都話會;我話有D數連cash都booked左,再accrual就會overbooked,佢又唔肯聽.一味同我講什么"正確"方法(即一向以來的方法),每一次都被她奚落一輪. 我為這事多次禱告神,究竟孩子應該息事寧人,還是據理力爭呢? 如果據理力爭,又會被她哦多一兩小時,又要聽她自吹自擂,真係好難頂喎.
於是我寫"依貓"比一個當時較理志的supervisor,把條數現在的book法如此如此,構成的bottom line affect如此如此一一寫明,多個人幫下口點都好過一個人去"食". 同時不斷旁敲側擊,希望老細自己發現問題所在. 這種方法果然有效,最後fixed左大半problems,我老細自然又自吹自擂一番.我只求bottom line be reasonable,采頭誰屬也罷,神總算聽左我的祈禱,俾我智慧解決. 後來2nd quarter Atlanta有新料到,原來D cash settlement係base on premium process而contact係base on client report,亦即係話根本唔可以照減,要用inception to date去計先最準.(我老細在去年底我用itd base曾罵到我半死,話我book錯云云.)2nd quarter,我老細又回到老accrual方法和我們爭論,但其實今次要用itd base了,個個quarter都係咁真係好慘,佢永遠都唔肯聽人講.而這種態度亦越來越利害,有同事話以前佢唔係咁,孩子剛入去的時侯都唔係咁.
這事以後,孩子反覆思想,其實我老細經驗比我多,accounting concept也不見得比我差,為什么(多次)在咁基本的問題上出錯呢? 另一個唔明係點解我老細英文比我好,又比我更會講說話,反而人際關係會差過我,又令到身邊許多人get hurt同feel bad呢? 孩子唔想變得咁politic同是非精,如果孩子有朝一日做manager,求你救我脫離這個樣式.就是如今做組長,寫home pages,亦求你提醒我,免得我得罪你,令身邊每一個人吃不消,亦為自己加添不必要的愁苦.
有時侯,我會睇下卡通片. 有一類型的卡通片是講到幾個人(通常是小朋友,有時會係年輕人)擁有某些特殊本領/幫手,加上小圈子的手望相助,為和平和正義與邪魔外道周璇.而最重要係,在越來越激烈的爭戰之中: 世人,就是小圈子之外的所有人都是無能同幼稚的,只有這個小圈子能夠拯救世界/宇宙.大爭戰過後,人們就會照常生活,把種種恐怖和各位英雄都忘記得一乾二淨.反觀那些本領高強的主角s,每次當主角回到現實生活之中(那個因為他們的犧牲而得到和平的世界),就顯得無所事事/有心無力/錯漏百出. 這類卡通片佔有一定的市場,我最近睇過的有<<龍珠Z>>,<<美少女戰士>>,<<Digital Munster>>etc.
孩子發覺現實生活中也有兩種人,把自己當成這類卡通人物. 我老細成日同我講呀邊個點,呀邊個又點.在她眼中,彷彿公司裡面每一個唔係低B幼稚,就係奸狡同懶惰.(某程度上係真,但係唔係個個人都咁唔惦.) 佢認為自己係唯一一個知道發生乜事同埋敢說話的人,她要付起糾正同保衛公司的重任,好似孫悟空要獨自對付千幾個魔人布歐咁.好可惜在現實世界中,我們只係那個一口氣能劈十四塊瓦片的撒旦先生,只能夠同布歐握手做朋友這個法子先work out,否則只會把自己弄到精神緊張,最後變左塊餅乾俾人食埋落肚. 世上有好多咁樣的可憐人,好需要耶穌. 當我諗這裡,本來恨惡我老細的心就減少了,因為神要孩子為他們禱告. 唯有主耶穌的愛才能拯救撒旦手底下無數的撒旦先生s.
另一種人就係我地 - 基督徒. 我地在世上係「天國」戰士,on behalf of the Christ, we punish the evil and rescue the souls.某程度上係真的,但係有時我地D愛心變得好task oriented/好people oriented:「我關心對像係A君, B仔同C女, 至於阿D呢?唔關我事喎.」完全唔記得基督徒之所以謂「基督徒」係因為Jesus oriented.
更糟糕是:我地好似要「變身」才能發揮力量. 無論變身做咸旦超人,還是Sailor Moon,敵人都會等佢地變好身,擺完個款先至攻擊.但係現實生活中,我地身心永遠都疲累/鬆馳到一個地步係無法找機會「變身」的. 點解只有覺得有需要,有感動,感覺到神存在,又或者迫切呼求的時侯,神的能力才可以在我們身上彰顯呢? 點解神冇能力叫我地好似孫悟空同孫悟飯咁,無時無刻都保持在超級撒亞人的狀態(應該話<<基本信仰 超凡生命>>的狀態)在真正作戰的時侯就冇咁易burn out. 我地唔係救世主,不可能救/關心到每一個人,我地的責任係領人到主耶穌面前,一齊經歷衪的愛同享受安息. 問題係:點先可以由靠「變身」的戰士脫胎成一個有主生命,真情流露的精兵呢?
大時代.小人物.呼喊聲
我轉念想,究竟人生的意義何在呢?為什么要努力工作,忙到頭昏腦脤又是為什么呢? 神在我生命中的計劃,又或者說在這份工的心意又是什么呢? 當我越發認識到自己不足同虛惘的一面,又察覺到身邊人的軟弱同加給孩子的衝擊,孩子還可以每日仍然活得有力量和喜樂嗎? 我點樣日日對住我老細,繼續聽佢講是非同毀謗,各樣的苦毒而能釋放怨恨的同時,又能出於污泥而不染,繼續那種純良像鴿,靈巧像蛇的生命呢? 神點解要呼召我做accountant,點解要呼召我在這間公司呢?點解我會有工做唔洗失業?
「耶和華啊,我曾求告你,求你快快臨到我這裡!我求告你的時候,願你留心聽我的聲音!願我的禱告如香陳列在你面前;願我舉手祈求,如獻晚祭.耶和華啊,求你禁止我的口,把守我的嘴.求你不叫我的心偏向邪惡,以致我和作孽的人同行惡事;也不叫我吃他們的美食.」(詩141:1-4)
這封newsletter落筆至今有個半月,現在已是七月中旬,大概表達出Billy的工作現況,對工作的種種提問,在神裡面的出路等等的思想. 在這期間,孩子寫了七篇靈修分享,三個查經on主日崇拜,和三首詩歌分享. 工作方面: 五月去Miami training卻無奈地捲入我老細同總公司之間的政治漩渦之中. 六月考CGA, 老細卻要求我分開三個禮拜去放四日假(同唔放冇乜分別.) 六月尾某天,老細話要明天前趕起個budget,我加班加到通底,跟住告左日假,後來我老細竟然話:「你放左日假,點解仲claim OT錢呀?」 (我幫佢連續做左廿四小時,佢補番七個半小時比我就當乜都冇發生過,在人事部面前亦可以好好睇睇.) 計埋去年佢在我的CGA working experience's evaluation form要我刪去曾經做過的幾項工作,話我根本冇做過云云.(這是最令孩子氣忿的事.)
神啊!求你為我伸冤,願你速速報應那些飛跑行惡的人,好叫他們知道你耶和華是神,傳揚你的慈愛.
於是,神吩咐我尋求工作,要我曉得衪恩手的帶領. 因為神知道Billy甚怕interview和適應新環境,又記念他老細經常取笑他,意思要叫他因自卑而不去找工作,其實Billy通曉公司各樣數目和報告的運作,在會計和電腦知識都比同事優勝. 固此Billy大膽呼求神,在經濟低迷時給他interview同offer的機會,這原是他所懼怕的.
大時代.小人物.尋求者
四月廿七日,我和C C F的John弟兄去探C C F summer camp,當中亦談到工作,和Peter分享創世記的工作觀,引發起孩子許多反省. (那次探營只半日,但神依然恩待CCF,又恩待我們,讓我們和兩位弟兄有分享和彼此勉勵的機會.但願神堅立我們手所作的工.) 七月二日,教會小組組長有個小聚,孩子坐巴士番教會,又默想到創世記的神學思想. 篇幅過長,關於創世記的工作觀默想會擺在新增的<<工作篇>>裡面.
在retreat當中,我們亦談到:
首先讀神學唔等於一定要去做傳道,做傳道也不一定要讀過神學. (好似讀會計唔等於一定要去做會計,做會計也不一定要讀過會計, anyway.......)
Peter提到,如果我地的知識,學歷,經驗都去到成人水平,我地對於我地的信仰同愛我們,造我們,贖我們的神也需要有成人水平.讀神學係一個進深認識神的有效途徑.
阿柱弟兄卻有另一個睇法,神學究竟係要我地研究人地點睇神,學好多地上的skills,還是真正認識神呢?為交功課,寫bibliography去生存,還是為主而活呢?我地何必面對新神學(自由派神學,有人甚至稱他們作"不信"派)對我們信仰的衝激/危機呢? 例如有認為摩西五經係四個不同時代寫成的的底本論,把四福音耶穌的"真"言"真"行從門徒的傳釋中抽出來的分體式釋經法等.
孩子想神學同屬靈生命就好似學校同教育咁係兩回事.有入學讀書唔等於能得到好的教育.但學校始終係獲得教育的有效同普及途徑之一. 關鍵反而係,我幾時適合讀神學呢?正如我有冇OAC的程度入大學呢? 信仰的衝激,正如一個有程度的學生面對功課測驗的壓力一樣,係可以承受到的,我們還有神聖靈幫助我們認識衪,唔洗咁驚. 咁點先算有程度呢? 我想必需有穩建的讀經,祈禱同教會生活,在教內外有好名聲,好見証就可以. 對我來說,主若許我,讀神學是必然的,但神要我先完成CGA 課程.
大時代.小人物.會計師
六月尾讀到箴言,讀到一處說: 「寧可住在曠野,不與爭吵使氣的婦人同住.」(21:19) 爭吵使氣的婦人?!
究竟神要我在這間公司有乜深意呢?除左傳福音/奉獻/關心人之外,這都是些邊緣意義,點解神要我食會計呢行飯呢?
會計師(no matter public or corporation) 的責任係要把公司的各項數據(data)透過procedures/reporting變成具分析力和表達性的資訊(information),以致管理層同投資者能夠作出明智的決定/明智地更改舊有的決定. Information的可信性(reliability)同相關性(relevance)是非常重要的.這亦是為何電腦不能取代會計這個profession的原因,因為太多information係無稜兩可,要depend on 專業意見.
Enron, Global Crossing, Qwest 同WorldCom的企業報告醜聞令全球投資者大失信心. 無獨有偶,四間公司都係Anderson D客仔.除了反映呢間公司專業操手好唔惦,核數同顧問之間的利益衝突之外,係咪代表今日的會計守則已經過時,而企業又有定期轉換核數公司的需要呢?(World Com的問題係Anderson破產後,KPMG接手而揭發的,跟Enron唔同者係WorldCom違反US GAAP, 而Enron係巧妙地收埋左D債.)
這是一個渴求會計師的年代. 這個世界正需要一群有智慧,明辨是非,被聖靈充滿,按著正意分解真實數據的會計師; 一班比C.A. (Chartered Accountant)更C.A.的C.A. (Christian Accountant). 神要用我們雙手揭力去保護今天的經濟市場和置身其中的我們(影響唔單止係股民),免受那些貪得無厭的大鱷欺騙和傷害.
與此同時,我地要提醒自己係個會計師,唔係救世主. 點謂之一個爭吵使氣的婦人呢? 原來人有所能為,亦有所不能為.我們只能處理神所交託給我們的事,關心神所交託給我們的人,我們管唔到的事就交託比神/神在那事上的代表權柄.如果飯飯管,唔會成為救世主,亦唔會係代表神發言的先知,只會變成一個爭使氣的婦人. eg. 戲院有人食煙,穌哥show有小朋友大叫,應唔應該管? 如果管,要點管呢?出聲可能會比人打,亦可能會引起更大的紛爭.明智的方法係叫場地負責人去處理,佢地都唔理亦唔洗生氣,因為佢地要向神負責. 會計同事奉都一樣: 公司做假數點呀?弟兄姊妹唔追求神?點呀? 我地身邊(唔好講得太遠太偉大,身邊都夠晒.)太多忿忿不平,又或者令人傷心欲絕的事了,樣樣都管,唔洗等到主返來都死得了.
咁究竟點先知道我呢一刻係爭吵使氣的婦人還是屬神的先知呢? 咁就要讀箴言啦!(六月尾箴言的靈修分享快將推出.) 但如果閣下嫌箴言卅一章經文都唔夠喉,讀埋傳道書啦! 前者教我地在能處理/關心的事/人之中敬畏神; 後者教我地在不能處理/關心的事/人之上敬畏神.
大時代.小人物.養生主
七月十二日,拿了Joanne姊妹讀廣東話班的materials來讀,讀到一篇叫<<庖丁解牛於文惠君前>>,這是<<莊子>>第三篇<<養生主>>的第二段. <<養生主>>有D似傳道書,它提到有限的人為追求無限的知識和名利而筋竭力疲,生命如同一個低級屠夫用刀宰牛而不得要領,劈在骨骼之上,磨損度高,那刀用不到一個月得鈍了,要更換了. 一個高級屠夫在宰牛的時侯,心思與道契合,舉手投足之間包含真理,能刀刀劈在骨與骨的隙縫,一把刀就可以用上十九年依然鋒利如昔. 人生之中有許多磨擦,叫生命受虧損. 有誰的信心能與真道調和,在曠野行走四十年,衣不破,腳不腫,進入所應許的安息呢? 希伯來書話:「神的道是活潑的,是有功效的,比一切兩刃的劍更快,甚至魂與靈,骨節與骨髓,都能刺入,剖開,連心中的思念和主意都能辨明.」(來4:12) 神就是那個高級的屠夫(聖經稱為祭司,中國人則叫他們謂宰相),我們就是牛,真道就係把牛肉刀. 所有被造的沒有一樣在衪面前不顯然的;原來萬物在那與我們有關係的主眼前,都是赤露敞開的. 祭司怎樣剖開牛犢獻祭給神,神同樣用真理把我們剖開,把我們帶進施恩座前獻給衪. 牛在低級屠夫手中,不過是肉食,如同生命落在世上小學之中不過是虛空捕風. 但我們在大祭司耶穌基督之下,就如高級的屠夫刀下的藝術品,成了一台戲,在君王,天使和世人面前上演.是高級,是低級也罷!被宰殺一定是痛苦的,但所不同的是:倘若現在的苦楚能帶來將來要顯於我們的榮耀，就不足介意了. |