|
Billy Lau Ho-Him's
Home Page |
|
|
2004年 7月 Newsletter (這分享是由 Billy在10月24日十一/信心奉獻見證編輯以成.)
常聽說...弟兄姊妹的十一/信心奉獻見證, 如何信心擺上, 神如何打開天上窗戶供應他們生活所需. 每一次聽到呢D分享, 自己都被他們對神那份愛心所激勵, 同時又教我越發感謝神的奇妙供應.
我自己的奉獻(金錢上)又如何呢? 2004年, 奉獻稅前 (gross) 收入的 15-16%. (收入包括人工 和公積金, 10% to church, 5-6% to organizations)
炒車 今年 6月中至 7月 8月, 經歷左人生最「黑仔」的兩三個月: 6月11日, 撞左架車, 仲好唔好彩咁撞倒架 Porsche, 係 Porsche, 唔係陂樹, 仲唔死;
一個禮拜之後, 我屋企部豬腦壞左, 整唔番, 要買個部新; 一個禮拜之後, 我屋企第二部豬腦又壞埋, 唔止, 部數碼傻瓜機又壞埋; 一個禮拜之後, 我部新豬腦到左, 點知又壞, 重新 reinstall過個 Windows, 都係唔惦; 一個禮拜之後, 我去<<未來商店>>買隻 anti-virus software for 我部新電腦, 點知 install 唔到;
一個禮拜之後, 我問老細: 點解我做野同識野比人多, 人工卻低過人. 佢話: 要等我考到牌先. 即係冇得加啦. 一個禮拜之後, 我沖涼果陣, 唔小心跌爛左個眼鏡, 我唯有用舊眼鏡; 一個禮拜之後, 我沖涼果陣, 個舊眼鏡鬆左粒螺絲, 又跌爛埋; 一個禮拜之後, 我知道我 CGA's result - failed, 即係冇得加人工, 雖然後來公司加左我15%人工, 但再冇 OT paid, 打和.
這些事以後, 我收到稅局的信, 內容大慨話: 佢地收唔到我的奉獻收據, 所以, 將我的奉獻打回完「零」, 做個屬「零」人, 追收我幾千蚊稅款. 我當時望住張稅單, 雖然知道最終應該都唔洗比, 但腦中仍然一片空白, 大拿拿幾千蚊, 去邊度嘔出來呀?
有人話: 錢解決到的問題就唔係問題, 6月中, 除左 $ 的問題外, 仲有好多其他事發生, 令我好唔開心, 不過, 因為唔 relevant to 呢個 topic, 唔講太多.
果一個月真係好約伯 feel, 所謂怪事年年有, 今年特別黑, 一個月之內, 晴天霹靂, 冇左幾千蚊, 甚至可能係萬幾蚊, 對於我來講, 係一個大數目. 加上七八月, 票市跌到全年最低點, 要從抽幾千蚊出來, 好傷.
感恩是: 賠錢總好過賠命, Porsche 唔同陂樹 , 如果個車主要求換左道門, 一定賠死, 但佢冇咁做. 又如果真係要納稅, 又係惨.
無論如何, 冇左幾千蚊己經足夠令奉獻成為一個沉重的決擇和負擔, 掙扎指數進一步擧昇到四年新高, 應唔應該維持稅前 15-16%? 真係有D, 非常, 極其 15/16.
黑足九個半星期, 個人開始冇乜自信心, 覺得我惦乜就壞乜, 揸乜就撞乜, 摸乜就爛乜, 曾經有一段頗長時間, 我唔敢楂車, 每次用PC/DC, 都形往佢會突然間壞, 個人好似被人condition左咁, 如果再有乜野行差踏錯, 可以點算?
禱告 當我部新豬腦壞果陣, 我真係好唔開心. 我 reintall過個 Windows, 佢都仲係死, 對住佢 真係唔知點算. 我好想去鬧果個買機比我的人, 又好想怪自己點解咁低能, 好想大喊一場, 又好想係街邊捉住個人打佢一身發洩下,
當時, 我祈禱, 雖然好想喊, 但卻欲哭無淚:
當世界上在什么天災人禍發生, 我地都好鐘意問: 「點解係我?」又或者:「點解神會容許呢D事情發生?」 通常我地都會從一些信仰立場去解釋一輪, 又或者叫他們做一些消極的感恩.
原來一個正在苦難中的人, 係唔會問呢 D問題. 淨係想知道呢個世界上有冇一種力量, 可以支持自己, 支持自己係呢種惡劣的情况下繼續存活, 積極咁面對問題, 面對明天.
如果神肯撑我, 我就繼續行落去.
打機 神係聽禱告的神, 他所賜的平安, 除左出人意外, 有時都幾別開新面: 這事以後, 我去 WalMart 買一排 3A電, (一D都唔誇張, 我連買電都逼切祈禱. ) 估下壞唔壞?
壞!! 仲唔止, 去 exchange; 再壞, 要再 exchange. 我到依家都諗唔明: 即使我唔祈禱, 又或者神唔聽我祈禱, 一排電都冇乜可能會壞. 仲要 exchange完都仲係壞喎! 一切只會發生在電影的橋段和故事, 有乜可能會發生在我身上呢?
我開始意識到, 呢一切唔係淨係「黑仔」, 又或者巧合咁簡單, 呢個係一個特別, 可遇不可求的經歷. (邊有人會咁樣求?) 感謝神, 佢讓我一生人裡面遇到好多可遇不可求的經歷, 係眼睛未曾看見, 耳朵未曾聽見, 人心未曾想過的.
我可以點形容一下今次聖靈係我身上的工作呢? 我最近玩緊一隻 game, 叫<<Lord of the Ring: the Return of the King>> 當我遇到最多怪獸, 又或者, 最難打贏的對手果陣時, 通常係最快升 level同過關的時侯.
對於唔係成日打機的我, 個 game 其實幾高難度. 打唔贏, 但又好想過關, 點算呢? 我求問左一個成日打機, 又打埋同一隻 game的朋友, 佢叫我上網睇攻略本. 結果, 我睇左網上面所有關於果隻 game 的攻略本s, 經過不斷嘗試, 鑽研同失敗過後, 終於去到 Black Gate, 尾二果關. 並於2005年一月廿三日打爆機, Yeah!! 感謝神!!
打機過唔到版唔洗死, 冇攻略本亦未必唔惦, 人窮則呼天, 當人生攪到一團遭, 兜左好多個圈, 都係過唔到版果陣, 我地又可以求問邊個呢? 乜野係我地人生的攻略本呢?
轉機 7月1日 同 8月14日, 分別去左 Montreal 同 Vancouver散心, 平時冇乜機會讀多D聖經的我, 只好趁住放假, 又或者考試果陣讀 double la. 頭尾廿日, 讀左大約三分一本左右, 因為分左D時間睇其他書, 所以唔可以再快 D, anyway... 呢個係我一直以來 "reinstall"個過我自己部"視窗"所用的方法, 到依家唯止, 冇一次係唔 work, 如果你有興趣, 都可以試試, 反正你如果係咪都死機, 試下可能仲有一線生機 :>
神讓我思想到瑪拉基書: 「撇開天上的窗戶, 傾福於你.」 我發現, 原來聖經有三處地方提到「打開天上的窗戶」: 瑪拉基書 3章 只係其中一處, 另外一處在創世記 6-8 章.
一尾一頭, 同樣係打開天上的窗戶, 一個講傾福, 另一個講傾覆, 同音但此福同彼覆, 一個講風調雨順, 另一個講洪水氾濫, 我發覺神越來越幽默, 越來越叻同我開玩笑.
究竟創世記 6-8 章講乜呢? 聖經點樣去報導呢一場世紀大災難呢? 同今日的傳媒有乜野分別呢? 同我地所關注的死亡人數, 又或者經濟損失等數字又有乜野唔同呢?
首先, 睇下那段經文, 一 D同數字有關的資料:
呢段經文, 讓我有三方面的體會:
一. 所謂「天有不測之風雲, 人有旦夕之禍福」, 耶穌形容挪亞的世代, 係當人想不到的日子, 還以為「應當一毋掛慮, 有出人意外的平安」時, 洪水就來到. 一份危機感, 對神常存敬畏是重要而且係必要的. Q: 工作四年, 日子似乎太平安定, 我唔係追求苦難, 但會唔係安定當中失去了一份警醒, 一種對神的敬畏呢? 「想不到的日子, 洪水來到」, 我仍然吃喝耍樂么? 吃喝耍樂又係咪可以令我平安喜樂呢?
二. 降雨四十晝夜, 水勢浩大, 在地上共一百五十日; 水退要一百五十日, 地乾又要過四十日; 原來, 苦難可以非常漫長, 即使祈禱, 即使神施拯救, 苦難離開亦唔一定係即時. Q: 我何必急於即時的拯救呢? 不如安靜地在「方舟」中等待太陽的出來.
三. 無論苦難有幾漫長, 神由開始到末了都保守著挪亞一家. 神給人悔改的日子, 七日前的預警, 親自關上方舟的門, 記念挪亞而使風吹地, 再立約.... 整個過程, 神都係度. Q: 人的 focus 可能係金錢損失, 家人的厭煩, 以及某些朋友s的冷漠, 呢D都係真實的感受, 但可唔可以用另一個角度去睇成件事呢? 我又睇唔睇到神的保守呢?
玄機 我想, 瑪拉基時代的人, 聽到神要「撇開天上的窗戶」, 一定會聯想起創世記 - 洪水, 以及彩虹下的約定.
原來, 神的傾覆是轉眼之問, 傾福卻是一生之久: 由創世到瑪拉基, 整個舊約歷史, 彩虹下的約定. 由洪水到秋雨春雨, 洪水係一次, 秋雨春雨係生生世世.
原來, 傾福 - 早在人曉得同捨得十一奉獻之前就己經顯明. 如果早知道神的心意, 那份從創世以來的心意就是傾福, 點解咁唔捨得呢? 點解奉獻令你個心不安呢? 陳糧缺乏了, 擺上了, 難道明年今日, 雨季就不再來么?
若把主的恩典從頭數一數, 有洪水, 但有保守, 有秋雨春雨, 我又有冇感恩呢?
|