|
Billy Lau Ho-Him's
Home Page |
|
|
眼紅紅 (後傳) 呢個係<<眼紅紅>>系列, 同一個經歷所分享的第三版本.
「第三個? 洗唔洗呀?」 在聽慣轟轟烈烈見証的人心目中, 這的確是小兒科, 也許只有未經風浪之人才會煞有介事的大講突講. 如果要<<人比人>>, 比起非洲生活的飢民, 又或者在中國飽受逼迫的信徒, 這自然係小毛見大毛, 蚊比同牛比的分享了!!
連我自己都會問:「撞車唔見得係太大件事? 點解要我在這個題目裡大做文章喎?」 正如聖經唔單單係一本為歷史而寫歷史的歷史教科書, 它是記載與神的作為同說話有關的歷史事件; 同樣, 事無大小, 在我生命當中與神的作為同說話有關的經歷, 我都盡量把它們記下. 能夠在生活裡一絲一彷中找到神的腳印足跡, 短訊留言係我每一日致力追求的. 我希望好似摩西咁樣, 在天崩地烈, 翻雲覆雨之中經歷神的降臨; 也想能像以利亞一般, 在和風細雨, 微小聲音背後聆聽神的耳語. 神可以在唔同的場境, 用唔同的排場出現, 在乎你有冇注意得到.
明日恩典 上回講到 Billy 撞左架車, 之後壞電腦, 壞相機, 考試肥佬, 老細走佬, 連跌爛埋個眼鏡, 禍事接踵而來. 短短兩個月, 我勇奪左超級霹靂無敵黑仔龍虎榜冠軍寶座的殊榮, 令<<小黑與我>>呢首新歌連續兩個月高居榜首. 遇到了一連串「反常的黑仔遭遇」 (簡稱反黑「糟」專員), 呢個信仰除左比我有出人意外平安之餘, 仲可以點呢? 如果淨係平安, 咁呢個信仰同所謂的阿Q精神又有冇分別呢? (係 lor? 有乜分別嫁?)
有人問:「你係咪犯左 D乜野罪, 以致神要罰你呀?」 坦白來講我經常犯罪, 若淨計行為上冇No的罪, 三日一小罪, 五日一大罪. (思想上同行為上冇Yes到的係冇得計) 要罰一早就該罰到死, 何必等到今年今日呢?
祈禱唔係無所不能, 讀經亦唔係無所不知, 苦罪永遠都係一個迷, 一個奧秘, 有無數的人來安慰我, 我當然感激, 然而神沒有跟我提半句, 我只好默然不語, 而唔敢胡亂猜測. 當然, 苦難係一個反思已過同決心改過的好機會, 值得把握它. (其實人隨時都需要 同可以悔改.)
正當我為到果部新豬腦壞左而發愁, 欲哭無淚地向神呼求的時侯, 神用哥林多後書激勵我, 要我唔可以放棄, 勇往直前, 無所懼怕, 堅持到底, 要信得過神 亦信得過自己. 神係可信, 我要相信神, 因為神亦相信我, 佢相信我可以堅持到底, 順利過渡.
有 D人遇到苦難, 好似一條死魚, 瞓左係到永遠都爬唔起身; 耶穌卻勝過死亡, 好似翻生咸魚, 常與我們同在到世界未了; 有 D人遇到苦難, 好似敲經木魚, 為了目空一切而否定事實; 基督徒要學堅持, 好似花生柴魚, 火侯十足自然是滋味無窮.
當我覺得頂唔順時, 神知道我仲頂得住; 當我覺得冇人幫時, 神仍然係我的盼望; 當我覺得前路不明, 神依然掌管著明天. 今日! 我要堅持到底!!
假如有一日, 你覺得好辛苦再也頂唔順. 要放棄, 但唔係今日; 假如有一日, 你覺得冇人可以幫到自己. 要絕望, 但唔係今日; 假如有一日, 你覺得前路有許多未知素. 要逃避, 但唔係今日; 今日! 你要堅持到底!!
從今天起 (蘇佐揚牧師話以下呢段經文, 原文係試煉而唔係試探, 姑且咁樣譯一次.) 「你們所遇見的試煉, 無非是人所能受的. 神是信實的, 必不叫你們受試煉過於所能受的; 在受試煉的時候, 總要給你們開一條出路, 叫你們能忍受得住.」 (林前 10:13)
a. 揸車 撞車主要因為自己揸車經驗不足, 加上果日冇精神唔小心, 條路又黑, 所以冇得怪人. 多謝 Daddy佢都冇鬧我, 之後佢教我學車同練車其實都好花耐牲同精神. (雖然我的確覺得佢果一排好煩.) 感謝神, 經過一輪苦練, 克服左一切, 到04年 9月終於考到豬牌, 揸車仍然打醒十二分精神, 但卻可以鬆一口氣. 我的得獎感受係: 多謝 Ronald同 Jamie係交錢手續上面幫忙, 多謝果個波子人高抬貴手, 同埋多謝每一個當面關心過我又或者靜悄悄為我祈過禱的人. 可能因為我手車比好多人都差, 所以, 我每次揸車都會祈禱求神賜平安, 亦可以解釋點解我要比其他人更長時間去平伏果份揸車的心理障礙. 此外, 保險因此減左 40%, 間接幫補到 D撞車費, 再一次感謝神, 多謝大家, thank you.....
b. 家電 部相機其實唔止壞過一次, 至少捱到我去完 Montreal先壞都算比面, 整番之後, 多謝 Ronald細佬係 E-Bay度幫我賣到個好價錢. 我最舊果部電腦都七年, 死機係意料中事, 只係估唔到佢地會好似禽流感咁樣腦傳腦, 一齊死. 次舊果部電腦四年, 死 hard drive, 換過一個 80GB的 hard drive就 ok. 至於果部新腦, 死機原因係個 over clock set up 仲有個 anti-virus software 有 conflict, 調校一番之後, 一切大致正常. 多謝阿 John幫我找到死機原因, 至於又平又靚的新腦係幫 Tommy介紹的公司買. 係我現金周轉不靈之時, 多謝晒用錢收購我部 laptop的 Rachel, 同埋肯精神上同金錢上 support我買新腦的 Daddy.
c. 考試 考試合格同肥佬對我來講一直都唔係好介意. 有好多人以為我要求好高係出於對我的某程度上的誤解, 當然, 高分自然開心 D啦!! 04年 6月個考試因為遲左報名, 到 4月中先收到 materials開始讀, 我讀書要用好長時間, 唔可以臨尾力谷, 唔夠時間豫備, 肥佬係合理. 不過, 肥佬代表冇職升, 冇人工加同冇 reimbursement, 在出現財赤困難的當口都幾傷. 人可以錯一次, 但最好唔好係同一個位再衰另一次. 12月重考, 今次壓力是: 如果再肥的話, 下次就要在考之前交四個難到嘔的 assignments. 加上考 case同天氣預測一樣難以遇料. 考多幾次唔代表你下次會惦 D, 唯有盡力而為啦! 多謝同我一齊讀雞精班, 又肯同我 share考試心得過我知的 Brian. 05年 2月尾收到成績, 感謝神, 用左三年考晒 C.G.A. 我終於可以<<自由行>>, 可以讀其他野同做其他野啦! Yeah!!
d. 打工 我一直唔忿氣: 「點解我做野同識野比人多, 學歷比人高, 而人工又要比同級的人低?」 係我貪心么? 係我唔識感恩么? 係我心態上有問題? 即使從任何一個角度睇我都覺得新老細(個 CFO)唔公平. 了解問題的本身好重要, 佢令我唔會將不必要的罪疚感加在身上, 唔會否定自己的感受, 同時間又唔會顧影自憐, 孤方自賞, 至於解唔解決到問題, 反而係次要. (雖然都好重要, 但控制唔到可以點? let go 同埋為自己製造機會走佬 lor)
04年 9月, 內部升職, 補了 Tax Analyst這個空缺, 雖然未係 CGA, 但係升左職, 又加左薪. 不過再冇 OT補水, 即係打和, 冇加人工. 就連年尾例行加薪, 新老細都唔想比, 呢件事當時令我幾唔開心. 轉左去一個冇人 care同讚賞的 position, 加上D Sales攪到 D GST/PST一團糟. Contract 有問題, 改唔到, 但 D tax做唔到, 隻鑊又屬於我喎!
你可能會問: 「冇人工加, 冇讚賞, 有鑊粥, 有問題, 咁你做乜要升職 呢? 」 我係呢半年裡面學埋 corporate & premium tax, PST & GST就係好處. 更重要係如果我要轉工, 底薪高 D, apply高 D position就易D, 新工人工又可以叫高 D,人家都會對你有信心 D. 如果你本來份工人工低, 即使你唔介意, 幾低薪都肯做, 反而覺得你太 cheap, 唔請你. 好奇怪, 但商業社會就係咁運作.
感謝神, 05年 4月, 轉新工, 薪酬加左 30%, 比 03年多 55%, 終於加到同 market一樣. 我見工係好唔惦, 加上冇 management經驗, 唔 suppose會請, 居然請左, 唔明, 但感謝神.
e. 財寶 讀過<<眼紅紅>>外傳(第二篇)都知道神曾經答應過 Billy, 要祝福佢. (資財方面, not just only 心靈滿足.) 因為 Billy順服神, 放棄賺錢的機會, quit左 Primerica, 又唔肯做基金經紀. 但神卻容讓 Billy遇上<<小黑>>, 在這事上 Billy亦冇逃避, 敢於承認與賠償. 於是神又對 Billy重申祂必要傾福的意念.
「你做乜開口埋口都話祝福呢? 我又冇求過你賜 D乜, 你何必要開咁大個頭, 咁大張空頭支票你點收科?」 「我索性乜都唔做, 豐足定食粥, 我睇你點祝?」
唔記得仲有冇漏到, 不過, 神係一年裡面一口氣送左六件禮物比我. 任何一件都足夠 cover所有意外的所有支出費用有餘:
短短一年之內, 資產比去年升左一倍. 出來做得越耐, 資產倍增所需要的時間就越長. 已經做左四年野的我, 下一個倍增年應該係三年之後先出現, 一年倍增係冇可能, 但係真係發生左. 果份懼怕的心情遠比興奮大, 和那個遇到咁多黑仔經歷s依然坦然無懼的心態形成左好強烈的對比. 因為實在太可怕, 驚到一個地步我將手頭上可以放走的股票都放掉, 再升都唔敢賺. 情况就好似彼得打成晚魚都冇收獲, 耶穌開句聲就多魚到隻船差 D沉, 多魚唔得人驚, 值得懼怕係主耶穌自己. 照樣, 我唔係錢多, 亦唔足以曬命, 而係我發現左耶和華神原來真係大而可畏. 好彩係祝福, 你話得罪佢就真係唔知點算好.
舊日足跡 在傾覆的日子死唔放手, 係傾福的歲月曉得收手, 一連串的測驗總算是順利通過了. 呢一年裡面發生左咁多事令我諗起一段耳熟能詳的詩篇廿三篇:
呢段經文係咁解: 詩人大衛話佢好似比重重殺手追捕的逃亡者, 走到<<和平飯店>>裡面住宿一宵, 受到保護同熱情款待. 按近東規矩, 當有人肯收留逃亡者, 殺手係果一日係唔可以郁手, 第二朝早當佢繼續逃亡時, 回頭一望, 發現背後窮追不捨的唔係一班殺手, 而係上帝的恩惠同慈愛. 係生命當中我又有多少次將上帝的祝福誤會為「黑仔」遭遇呢?
耶和華果然係叫我不缺乏的牧者, 青草地溪水旁, 考牌轉工, 投資退稅, 樣樣都充足; 我若偏離你就管教, 令我生命得以復原, 引導我走在正途之上; 當我走過死陰幽容, 一條黑過墨斗的街角, 唔需要你顯現亦唔需要有神蹟, 單憑你的杖同你的竿已經足夠成為我的安慰.
我地跟隨住呢位大而可畏但又愛我地到底的神, 生命唔單止唔阿Q, 生活會變得越來越 qute. 當一切都事過境遷, 好似沙灘上的貝殼咁隨著漲潮不見之前, Billy寫左呢篇見證, 又同 Adam弟兄作左<<寒流實驗室>>呢首歌, 去述說同感謝神豐富的恩典, 以及家人同朋友的慰問.
(呢段日子, 讀左唔少聖經, 係我一生之中令 我能堅持到底亦係我最堅持到底的就係同神透過讀經而建立的這段關係.)
|