|
Billy Lau Ho-Him's
Home Page |
|
|
11月 Newsletter 11月30日, Billy第二次考 CGA Professional Application Exam, 亦即係最後一個考試, 以下是 Billy 11月在這段日子的體會:
瘦分男女 CGA 最後一個考試, , 6月果陣肥左, 今次捲土重來, 唯有進行一連串<<天堂式瘦分計劃>>, 只要捱得過, pass, 就脫苦海 la! 為左「瘦分」, 嘔左成 400蚊血, 上一個兩日的「雞精」班課程, 希望 get 到 D 獨家瘦分貼士. 點知「雞精」班講員除了大派定心丸之外, 真係冇乜貼士:
佢講到天下無敵, 但我真係無能為力, 所謂 this, this, this & this 原來就係咁多年來所學過的一切. 「咁多點讀呀?!」 「吹水 lor.」 「點吹呀?」 「Good Question!!......唔知!! 不過我....
所謂天無絕人之路, 神的恩典永遠都係夠用, 在班中識倒個叫 Brian的同學 - 書友仔, 約埋一齊讀書. 我係果 D 考試唔係點想讀書, 一日讀一份 past paper就算 果D人. (希望瑩光幕前面的小朋友唔好學我咁.) 從來唔會讀到夜半三更, 更加唔會唔食三餐. Brian:「你讀到邊?」 Billy:「讀到2000年果份lor, 我一日做一份 past paper.」 Brian: 「做一份Past paper四個鐘之嘛! 一日有十個鐘, 咁你其餘果六個鐘做乜?」 Billy (有口難言): 「.......」 (一齊讀書可以起到鼓勵作用, 尤其係對我呢 D 懶人.)
記得我地交換email果陣, 過程都頗為有趣, 值得分享. Brian: 「你有冇 msn account?」 Billy: 「有啊! 我寫比你, 你可以 add 我.」 (billylovesbible@hotmail.com) Brian (半信半疑): 「......」 Billy (滴汗): 「個 email好特別? 我朋友幫我改, 佢話我讀得多喎! 哈」(唔知講乜好) 原來 email都可以為你製造一個傳福音的話題.
其實, 我真係唔介意讀書, 但係我好唔鐘意考試果種壓力, 不過, 如果冇考試, 我又唔會讀書, 真係矛盾. 繁忙同壓力會隨著考試的結束而消失, 考完試之後, 做 D乜野好呢? 去唱 K? 打機? 食餐勁? 總之, relax 乜都好 la.
最近, 讀經讀到一段經文, 大致上咁講: 「以色列人要到神面前守收藏節七日, 用七日時間, 用住棚的方式去記念神領他們出埃及的拯救. 」(申 16:13-17) 收藏節唯係以色列人先有的節日, 乃是任何一個農業社會為慶祝收成, 以及慶祝一年農事之結束的節日, 唯一的分別係, 以色列人在忙碌的秋收後, 用七日時間, 唔係狂歡, 而係一齊咁親近同感謝神.
如果代入我自己的處境, 一年之中, Year End, Exams 就係我一年最忙的日子, 忙完一輪, 我又點慶祝呢? 神用呢段經文提醒我, 考完試之後, 玩, 唔係唔可以, 休息更加係天經地義, 但係, 要親近同感謝神, 唔係一陣, 而係一段長時間 (for 以色列人係七日, before 佢地一連三個月的寒假). 「主啊! 求你幫助我, 叫我在忙碌同休閒的日子裡, 和你獨處的時間都唔會减少.」
青葱歲月 告左五日假去讀書, 本來諗住去 Seneca 温書, 可能因為懶, 唔想郁, 結果日日都係係屋企樓下個小型圖書館温書. 一天晚上, 又碰到果位住十七樓的 auntie. 原來十五樓有隻牛牛, 十七樓有位 Auntie, 而十九樓就有個 Billy. 呢個Auntie唔係一個普通的Auntie, 係一個好特別的Auntie, 因為佢成日認錯左我係佢個仔:「唔好意思 Auntie, 我係 Billy, 唔係 Jacky 呀!」:P
果位 Auntie同埋佢識得果班 gym友, 全部都以為我係佢個仔. 王伯: 「最近成日見到你個仔落來做 gym 喎!」 Auntie: 「冇理由呀! ......呀! 果個唔係我個仔, 係人地個仔黎, 我個仔, 佢如果肯落黎就好.」
唔知係咪我個樣太有魅力 :> 成日有人「扮」認錯我, 想同我搭訕, 同我交朋友. 有一次係 subway, 有個女仔咁樣識左我: 當時的情境, 就好似電影中的橋段咁樣, 就在上車同落車的時侯, 交換的一個眼神, 不約而同的一個點頭, 以及有感而發的一個微笑, 彼此間沒有什么特別的對話, 就咁樣識左. 已經唔記得佢叫乜名, 只記得當日佢正在睇緊一本書, 叫<<每日與主同行>>, 而我, 當然係讀緊聖經.
後來, 我在1st Markham Place 碰過佢一次, 當時 1st Markham Place 仲未係好旺, 為左攪 promotion, 佢地請左個女仔去 food court 處彈琴. 仲記得果日, 果位女仔彈的是台劇<<燕雙飛>>的同名主題曲, 如果冇記錯, 應該係 2000年 8月 9月咁上下, 星期日, 完左 church.
女子:「咁岩!!」 Billy: 「喂! 又係你, 咁岩呀!」 女子:「冇呀! 來食野之嘛! 第一次來呢個 food court, 有乜好介紹.」 Billy: 「唔....第一次? 呢間 la, 佢 D菜肉雲吞幾好, 皮薄得來 D料夠多, 但由於佢菜多肉少, 清甜得來又唔覺"漏", 對於食慣鮮蝦雲吞的我地, 又有另一番滋味, 唔錯, 值得一試 lor.」 女子: 「Thank 晒啊!」 Billy: 「唔洗客氣, 我個飯 ready la, 下次再見 la.」 之後, 又碰過一兩次, 就再冇見過佢. 人生就係咁, 好多時侯, 擦身而過的人和事, 都值得我地回味.
口痕友(細細聲):「你地唔好聽 Billy 講到好似好浪漫咁, 其實佢連諗都未諗過, 只不過鐘意記埋晒 D無聊野咋!」:P
最近果次陪靈會(04年), 我去買書, (見到書我會有點失控), 點知有個人走來同我講: 某:「嘩! 好耐冇見喎!」(好熟咁 lor) Billy: 「ok la! 忙嘛!」(順口) 某:「你爸爸最近點呀? 身體幾好嘛?」(好誠懇) Billy: 「ok la! 身體都係咁, 周身骨痛 lor, 不過佢返左香港, 有心.」(唔通佢真係識我?) 某:「同我問侯下佢, 原來返左香港, 唔怪得知咁耐冇見啦!」 Billy:「等陣先, 乜你見過我 daddy? 你又點解會識得佢?」(本來唔好意思問, 但真係忍唔住.) 某:「唔好講笑啦! 我點會唔識你爸爸呀? 係陳生租個鋪位比我地, 我地成個 office D人都識佢啦!」 Billy: 「ok......我走先, D朋友等緊我, 下次再傾 la.」(原來你真係唔識佢, anyway.) 某: 「拜拜, 記住同我問侯下佢喎!」 Billy: 「ok, 我會.」(無奈)
十七樓的 auntie 因為我似佢個仔, 所以, 一見到我就捉住我同佢傾計, 又通街話比人聽我點似法. 有一次我同佢傳福音, 講左成兩個鐘, 原來我除左可以靠個樣揾食, 仲可以傳福音添, 感謝神. 佢又叫我帶佢個仔返 church, 因為佢覺得 church D 人好D, 好似我咁, 肯去做 gym. (ok!!) 雖然攪笑, 但不失謂一個識朋支, 傳福音的機會.
Auntie 個仔係個三失青年, 失學, 失業同埋失望. 因為失望, 佢 quit 左大學課程, 因為失望, 佢 quit 左份工, 又因為失學同失業, 佢更加失望. 我在諗:「如果基督永沒變改, 如果這信念沒錯」, 咁, 福音點樣幫到佢呢? 當我地乜都好似有, 又乜都好似冇的時侯, 究竟仲需要 D乜呢? <<與神和好>>? <<四定律>>? 定係 cell group 呢?
邊個可以話比我聽, 點解我要讀書, 要打工, 要生存呢? 在尋找到「天空海闊」之前, 我究竟仲要走多少寃枉路呢? 如果 cell group 只不過係一班人一齊去走寃枉路, 我地同其他人有乜分別呢?
點解主耶穌會邀請凡勞苦重擔的人到他跟前? 點解佢話他的担子是輕省而易負呢? 主耶穌行十字架的路, 真的輕省? 真的易負么? 我地今日的路應該點走呢? 我地點先可以幫到身邊的人找到出路呢?
高分美麗 放假期間, 除左遇到一個認錯仔的Auntie之外, 仲遇到一個以前做差人的伯伯. 一晚, 係 library 讀到悶悶地, 打開本<<輪到我當家>>睇, 那位伯伯走過來, 問: 伯伯:「小朋友, 我見你成日落黎喎!」(差人, 身份證) Billy: 「Ok la!!」 伯伯: 「讀緊書? 定做緊野?」 Billy: 「account....」(阿蛇, 我係 良好市民黎架.) 伯伯: 「依, 咁你咪要考脾 lor?」(邊個知?) Billy: 「係呀! 我下個禮拜考, pass就係會計師.」 伯伯: (伸隻手過來揭) 「你睇緊乜野書呀?」 Billy: 「.....<<輪到我當家>>, 楊牧谷.」(慚愧, 比阿 sir發現左我唔係温緊書添.) 伯伯: 「佢寫 D 書幾好喎!」 Billy: 「係呀! 我覺得佢寫 D 書令人好有希望 lor! 」
我地唔係瀾泥, 就算係瀾泥, 都可以成為貴重的器皿, 醉翁都可以跨鳳成龍, 我地都可以活得更精采. 伯伯: 「小朋友, 你叫乜名?」 Billy: 「Billy.」 (ST 1234567, Sir!!)
就咁樣, 我就識左呢個伯伯, 原來佢都係基督徒, 返美堅華基. 考試之後, 又見到呢個伯伯, 佢問: 伯伯:「考成點?」 Billy: 「唔知, 但係好過上次 lor.」 伯伯:「咁咪好 lor, 我有為係祈禱.」 Billy: 「Thank you (Sir)!! 我又温緊下個 exam la.」 伯伯:「襯後生讀多 D書好啊! 唔洗咁快有女朋友.....」 於是, 伯伯用左足足半個鐘去解釋同分享佢的見解, 我唯有不住點頭, 不停講 「係! 係!」「我都明.」 點解佢無端端同我講 D 呢個 topic 呢? Anyway, 幾有趣.
放假果幾日, 就係咁樣, 同人搭下訕, 行下 mall, 睇下書, 讀下經, 煮下飯咁, 就係冇乜心機讀書. 我唔知點解, 成日都想讀, 又唔想讀, 唔想讀, 又好想讀, 都唔知係 D 乜野心態. 不過, 考 case study, 又可以點讀呢?. 我讀晒所有 past papers同 notes, 背晒一切可以背同記到的 theories, 仲可以點?
死 la! 二月就派成績表 la !! 希望唔會肥佬啦! 如果又再肥, 點算? 記得有首歌歌詞好有意思:
如果話合格同肥佬都係神比, 又似乎有 D唔負責任, 話讀書係純靠自己, 又好似好冇安全感, 不如話合格同肥佬, 係神要話比我地聽, 我地果一科夠唔夠料. 夠料, 感謝神, 繼續努力, 唔夠料, 加把勁, 神支持你. 但無論如何「計分牌太細 難評定你我一世」.
|