Billy Lau Ho-Him's Home Page
Email address: hohim2000@yahoo.com

9月 newsletter 千尋

(簡述: 這是Billy九月尾 去日本一行以及參加婆婆安息禮拜裡面, 同聖靈之間的對話記錄和所見所聞.)

奇幻旅程

Billy將香港既一切交託比神, 9月1日就啓程去日本 - 名古屋.

今次, 可以講係第一次, 自己一個人去旅行.

到了赤鱲角機場, 地勤人員叫所有人去另一面 counter 排隊, 因為呢邊果排 counter要 close.

我唔知, 照排, 結果佢話:「算啦! 比埋你啦!」

埋到 counter check in, 忽然聽到個服務員同我講:「依! 你係咪 Billy啊?!」

我抬頭一望, 一時之間唔知講乜好, 心諗:「係咪我遲到, 依家上唔到機, 所以佢知道我個名呢?」

服務員對我茫茫然然既反應報以一笑, 問道:「認唔認得我呀?」

心諗:「乜我識佢?」不過, 把口就好興奮咁話:「啊! 係你呀? 好耐冇見啦.」 (佢係邊個呢? 佢叫乜名呢? 神啊! 救我.)

「都好幾年啦!」

「Stephen!! (唔好叫錯呀!) 估唔到咁都撞得番喎! 仲有冇同佢地聯絡呀?」(我究竟係邊度識佢?)

「都係大象佢地 lor. 間中都有出來食下飯.」

「乜大象都返左香港么?」(原來係南非朋友, 終於記得佢係邊個, 感謝神.)

世界真細小小小...上帝真奇妙妙妙....八,九年冇見, 咁都撞得番都幾有趣, 都出晒身啦, 乜都唔同晒.

我同佢映左張相留念, 交換左電話, 食少少野, 就步入侯機室, 出發去日本.

所謂「有緣千里能相會, 無緣見面不相逢, 縱使相逢不相識.....其實, 相逢又何必曾相識?」

一個小小經歷, 為呢次奇幻旅程牽起了序幕.

到一個人生路不熟, 言語不通既國家, 拿著兩袋行李旅行, 的而且確係一個有趣既經歷.

當中亦承蒙友人 Cindy幫我在網上搜集一切資料同旅遊指南, 如果唔係, 或者我會流落街頭, 瑟縮荒野, 飢寒交逼, 切齒哀哭.....

一到步, 好唔容易先至去到旅店, 一放底行李就出街遊蕩, 行去名古屋市既購物區 - 榮, 食左個天津麵.

聽講日本物價係貴到想嘔, 但唔知點解我覺得日本平過加拿大喎! ¥5,880 旅費一晚, 包早餐.

一碗麵或者一個餐亦只係¥400-500 (= CAD $4-5 包稅), 我洗乜排長龍逼入<<味千>>食 $7.99 + tax 既豬骨 + 麵?

(因為機票貴同埋要搭十幾個鐘仲耐過排隊 lor. 你去得幾多次日本食?)

坐 subway 唔算貴, ¥100-200, 不過, 我怕快「落」不知時「站」過, 唯有行啦! 行得到既地方都行lor!

加上 underground shopping mall 勁大, 街上既交通網, 店鋪同公共設施都同港加兩地不同, 更可以話係大異其趣.

有時侯, 走得快, 未必好世界, 因為走得摩, 可以睇風光嘛!

黑漆漆既<<地下鐵>>即使能帶你到目的地, 但睇唔到身邊既人, 事, 物, 又有何意思呢?

我諗: 「跟旅行團就要趕鴨仔, 走馬看花;

自由行又怕瞓到黃朝白晏, 百無聊賴.」

為免走向呢兩個極端, 所以定出左一個既輕鬆又緊凑既行程.

第一日, 到步, 去遊覽 shopping area - 榮

第二日清早, 去左名古屋(古)城觀光, 之後, 坐火車去温泉勝地 - 下呂, 住温泉酒店嘆温泉;

第三日清早, 在下呂市觀光散步, 再返回名古屋市, 入住只款待男生既膠囊酒店, (只款待男生但冇色情成份, 床位卻有如停屍間 / 蜂巢.)

第四日全日都係去博覽會

第五日, 亦即最後一日, 會去市內既大需觀音廟, 再去機場.

無涯の鐵路

今次旅程, 最難忘係去温泉勝地 - 下呂.

下呂, 位於名古屋以北, 百多二百公里以外, 岐阜縣既鄉村小鎮, 「呂」即係泉源咁解.

聖經出埃及記記載以色列人去西乃山豫備迎見神既途中, 在曠野經過一地, 名叫以琳, 當中有十二般泉水, 久旱逢甘露亦係神既恩典; 士師記裡面迦勒既女兒嫁比攻陷希伯倫城既英雄俄陀聶果陣, 曾經要求自己 daddy送左上呂同下呂比佢做嫁妝, 可見, 當時既泉水比錢更有價值; 詩篇詩人形容去聖殿朝聖, 神既恩典好似湧泉咁由殿裡面流出來, 滋潤全地, 對冇自來水同乾淨食水既古代, 即係話: 神既慈愛比生命更好更寶貴咁解. 911事件當日, 飛啟加拿大境內既航機都必須折返, 有些航機就降落在名古屋, 搭客被送到下呂市温泉酒店中暫宿. 每日睇住電視台整日重播一段酷似何李活電影橋段, 控動全球既片段, 搭客既其中一位, 就係 Billy既媽咪.

我將行李寄存係名古屋果間旅店, 只帶著兩日既衫褲, 日用同貴重物品, 就到火車站.

去到火車站, 先發覺果個唔係火車站, 而係地鐵站 (短程).

「陰功!! 咁究竟真正既火車站係邊呀?」

地鐵站票務員淨係叫我行番出去, 我唯有走去果度既一間旅行社問問.

一位英文有限, 但禮貌十足既小姐話, 我要行番出大街,

向左邊走, 直到我見到一舊圓錐形螺旋狀既物體(因佢不停做腦冲厠既手勢)就轉左, 就係火車站.

我問果位小姐:「腦冲厠....啊唔係, 果舊圓錐形螺旋狀既物體, 即係點呀?」

於是, 佢畫左一舊酷似<<I Q博士>>小雲同小吉經常把玩既小玩意比我, 仲話, 只要我一見到果塊米田..., 行多兩分鐘就到.

我懷住半信半疑既心情, 照住禮貌小姐既指示, 先發現原來腦冲厠係指一塊米田...狀既迴旋處.

之後, 入左一個大型而極度人山人海既商場, 原來呢個就係真正既火車站.

入到火車站見到自動售票機, 好開心. 因為唔洗同人講野就買到票, 點知....

路線圖有東京, 有大板, 連扎晃都有, 但係, 下呂係邊度?

我問企係閘口既票務員, 佢嘰哩咕嚕一輪, 又指番我去自動售票機.

氹氹轉左十幾分鐘, 感謝神, 比我攔途「截劫」左一位日本太太幫忙.

經過一輪遊耍往返, 起初, 那位太太同樣比票務員老點, 氹氹轉左幾分鐘, 終於問到個清楚明白.

原來票務員手指指, 方向的而且確係指岩, 只可惜上帝做人既手指, 唔識轉彎.

而佢講「直行再轉右」, 我又唔識聽, 無計啦!

原來真正既售票處, 係一間旅行社, 在此, 再三多謝果位日本太太, 為佢路見不平, 扙刀相助既行為致萬二分既謝意.

上車之前, 曾經問過票務員, 大概幾點會到達下呂市.

佢同我講(寫紙仔): 「普通車要幾個鐘, 特急(express) 7點半就到. 6:30開車, 8號月台.」

我搭自由席(冇指定座位, 亦即要霸位/爭位坐), 原來要係月台指定地方等位.

至於我, 未算太遲發現, 感謝神, 坐唔到窗口位, 行到尾尾, 找到個邊位, 同一位伯伯坐.

7:30到, 不過, 班火車走走停停卻遲遲未到.

我趁票務員來 check飛, 見到前面果家人張飛亦係去下呂, 佢地大安旨意咁坐係度,

我雖然大膽 assume仲未到, 但個心依然好不安.

火車有時一個站停五分鐘十分鐘, 有時甚至係路軌上停上十來分鐘, 而我個心卻未有一刻停下來, 亦好彩冇.

最慘係: 每個站都見唔到站名, 車廂內亦冇報告板顯示<<下一站.....下呂>>.

要知道下呂站只不過係高山本線裡面其中一個站, 兩頭唔到岸, 如果過左, 就真係天知地知你知佢知, 但我真係唔會知嫁.

我心諗:「呢班車唔係特急(express)么? 點解成日停架? 究竟特急係用來形容火車既速度, 定係形容我呢一刻既心情呢?」

熱鍋上既螞蟻, 逼於無奈, 唯有問坐係隔離窗口位個伯伯.

伯伯佢好好人, 每一次聽到司機報告, 佢都會好詳細咁解釋比我聽我地依家身處既位置, 佢仲講比我聽點解架火車會走走停停添.

不過, 伯伯講既全部都係日文, 我「聽是要聽見, 卻不明白, 心蒙脂油, 耳朵發沉, 沒有明白的, 連一句也沒有.」

我好似一隻沉默既羔羊, 被帶到不知明既牧場;

又好似一個迷失既姑娘, 三分徬惶加三分悽涼.

神冇比我講方言既恩賜, 我算;

佢冇比我翻方言既恩賜, 又算;

我唯有求佢至少明白老伯伯做既每一個手勢同表情.

我當時諗, 人生既呢一班列車豈唔係就係咁?

即使我地好唔容易撲到張飛, 好唔容易上到台, 甚至有機會上到車, 上到位, 幾時到下一站, 下一站係邊度我地都未必知.

讀完 C.G.A., 下一站又應該係乜? M.B.A.? C.F.A? C.P.A.? 地產? 神學?

而神既聲音往往又好似伯伯既解釋咁, 「聽是要聽見, 卻不明白, 看是看見, 卻不曉得.」

好多人以為有了新約, 自此, 人就清楚明白神既心意; 計我話人連下一站下呂幾時到都弄不清,

世間既種種是是非非, 人生去向既南北西東, 又有邊個咁話自己了如指掌呢?

就係呢點點「未知素」令我地對神敬畏, 亦係「未知素」令我地人生平凡中充滿歷險同剌激.

而神既聲音何嘗唔係好似果位旅行社小姐, 售票站既太太, 又或者火車上既伯伯咁, 循循善誘, 連說帶比, 帶我去到目的地呢?

如果神與我同在, 驚險剌激, 而又帶點茫然失操既旅途又會唔會添上一份温馨同暖意呢?

原來日本好多地方都只係鋪一條路軌, 要同對頭車 share. 對頭車使用中, 自然要等, 等到對頭車走左, 先可以繼續前行.

對一直撘開地鐵/TTC既我, 真係諗都冇諗過要 share, 仲要係日本.

直到我最近睇番宮崎駿既<<魔女宅急便>>, 我先至 confirm到呢個事實, 而當時我只係從伯伯既手勢以及對頭車經過而依稀 assume.

結果, 8:30. 火車終於到下呂, 伯伯同我講, 我當然千多萬謝, 同佢揮手道別, 繼續上路.

酒店係位於車站隔離既水明館.

晚餐到酒店樓下既日本料理, 榮幸是: 得到料理長齋籐洋先生(Hiroshi Saitou)親自熱情招呼.

佢知我唔識日文, 而我地 D英文又水爆, 特別叫了位中國留學生女侍應陪我傾計.

係計在南非過著帝皇式享受以來, 最嘆世界既一次經歷.

頭盤係三小碟: 炸鰻魚壽司, 大蝦玉米, 甜蕃茄; 最特別係果碟甜蕃茄, 係當地新鮮蕃茄, 去皮, 再浸糖水, 特別開胃;

餐湯係鰻魚薑絲矮瓜湯, 矮瓜冇味, 所以通常煮矮瓜一係煎一係炸, 否則要用濃湯/濃汁喂過先會有味, 呢個湯, 清澈見底, 食到鰻魚既鮮同滑, 薑既辛辣, 又嘗到矮瓜既清同甜, 幾特別;

第一道主菜 - 剌身: 除左烏賊之外, 其餘兩種魚剌身我都未食過, 我問過料理長係乜魚, 不過之後又唔記得左 :<

第二道主菜 - 牛柳; 特別是: 能親自將牛柳鋪在燒熱左既樹葉上面, 同正在加熱既麵鼓撈混, 味道似我地食開既蒜蓉豆鼓炒牛肉, 料理長話 D牛柳係用當地最靚既飛彈牛, 飛彈係地方名, 因為以前果個地方做飛彈喎!

食完一道火葉麵鼓牛柳肉, 當然要飲番杯海膽乳酸汁, 清下個口個陣濃馨既麵鼓味, 再等下一道菜;

第三道主菜 - 上湯冬瓜雞, 同之前碟牛肉係口感同味道上形成強烈既對比, 一個有咬口, 一個入口即溶, 一濃一淡, 一咸一甜.

食完三道菜才上米飯, 係紫菜同上湯浸即湯米飯. 係日本人未學懂稻米既保存方法之前, 米係貴族士大夫既食糧, 平民百姓食魚食薯仔蕃薯, 所以, 今日剌身加飯變魚生係當時係名貴又係貴, 同今日任食魚生「走飯」係兩個唔同既世界同心態

米飯之後係甜品, 小麥布甸, 好似係加拿大都試過, 唔太甜, 岩我, 亦幾有麥既香味.

飯後節目, 當然係更衣沐浴, 穿上日本沐浴用既和服, 浸温泉.

根據酒店派發既英文指引, 原來浸温泉係日本既傳統, 係一種 祈求手潔心清既表現, 因此, 整個程序都有講究:

1) 沖身; 2) 浸兩分鐘温泉, 適應水温; 3) 再上水冲身同冲凉, make sure要冲走晒所有沐浴露, 因為日本人相信肥皂會令泉水不潔; 4) 浸温泉十至十五分鐘, 可以適緩疲勞, 礦物質對皮膚同身體都有益, 所以, 浸完温泉係唔 recommand再冲身.

我第一次唔係太識規矩, 唯有睇住三個剝光豬, 同我一齊入去, 係對面冲身既男仔, 佢地做乜我做乜.

當我剝左眼鏡, 世界好似回復伊甸園時代一樣, 就算眼金金咁望住三隻剝光豬既佢地都唔覺得羞恥.

原來, 日本人認為一班朋友一齊浸温泉係團契相交既方法, 幾時又約下一班人出黎游水? 當然唔玩剝光豬啦!

水明館一共有三個温泉, 包括係頂樓望到下呂市景觀既飛泉閣, 係地下既臨川閣, 同埋露天温泉既山水閣.

至於我, 當然係去晒三個, 第一晚浸飛泉閣, 朝早浸臨川閣, check out前再浸露天既山水閣.

每次浸完温泉, 再做 20分鐘腳底按摩, 先夠嘆世界.

我心諗:「其實, 平時忙裡偷閒係咪真係咁難呢? 係咪真係要係呢 D咁既場合先有得嘆, 有得靜落黎呢?」

踏破の藍鞋

9月 4日, 一早撘地鐵去博覽會. 今次博覽會既主題係自然的智慧 (Nature's Wisdom).

地球只有一個, 係神, 除左佢自己之外, 賜比人類同萬物最好既禮物, 神將地球交比我地, 所以, 我地要好好管理同愛護佢.

博覽會分開兩個, 一大一小既會場 - 長久手會場同賴户會場.

一出地鐵, 只見撘去長久手(大會場)既磁浮火車條龍長到連個火車站都見唔到, 仲要等十五分鐘先有一班, forget it.

我決定撘巴士去較少人去既賴户會場, 遊一圈之後再撘覽車去長久手 會場.

果日係星期天, 有十九萬人次入場, 到處都人山人海, 每個展館都打幾十個蛇餅, 單係撘覽車就排左廿分鐘.

去到長久手會場, 好似其他遊人咁, 當然係即刻走去一眾高科技展館.

我於是去左以未來世界, 水, 光, 風三種天然能源為主題既東芝館排隊.

排左廿分鐘, 心諗:「我得一個人, 如果肚餓, 口渴又或者人有三急都唔走得開, 更何况我已經排左廿分鐘, 都止係 move左兩三行, 前面仲有廿幾卅行, 至少都要排多三四個鐘先可以排到入去, 我入黎博覽會究竟係排隊? 定係周圍行周圍睇呢?」

於是我問神:「神啊! 我已經排左廿分鐘, 我應該離開, 應該放棄, 定還是貫切始終, 堅持到底咁等呢?」

果一刻, 我隨著內心深處, 聖靈既聲音踏出足下既第一步, 放棄左醉人吸引既東芝館, 離開左高科技林立既企業展區, 大踏步邁向全球每一角落既共同展區, 以及位於東面既世界花園, 同森林動感區. 既然買左入場券, 既然入得黎, 就要用我呢雙脚行完整個會場, 咁先算得上不枉這次日本之行, 不枉廿年一次係日本舉行既世界博覽會.

我係度諗:「呢個豈唔係我人生既縮影嗎? 或者係身邊人既聲浪, 又或者係人有我有果種無形壓力影響, 人生有好多決定都係人云亦云.」例如揾女朋友咁, 就好似排隊入展館, 繼續揾? 定還是一個人繼續走呢?

有人話, 神仲緊張同關心你既婚姻戀愛, 計我話, 未必.

不然, 點解聖經冇乜點教你追女仔同拍拖? (除左雅歌之外)

反而, 叫你用追女仔, 拍拖既瘋狂同死癦爛打既手法去追求神, 用婚姻同戀愛去形容神對我地不離不棄既經文就多的是.

Seek te First 似乎先係聖經既教導, 拍唔拍拖重要, 但反正唔係一個人可以 control到既事, 等?

不如繼續走該走既路來得實際同有意義.

又有人又話你要寫個 list出來云云.....

問題係: 比個男仔/女仔中晒又點? 但係你偏偏唔鐘意, 咁點? 或者有個男仔/女仔乜都冇, 但係你好鐘意喎! 咁又點算呢?

愛情係咪可以咁理性既呢? 神出來去尋找拯救失喪既人, 又唔見佢寫個 list, set 條件喎!!

神用理性, 用六日創造左世界, 創造左地球,  創造左天地萬物, 又悄悄賜下「愛」比每一個人.

創造過程係理性, 創造本身以致降生, 釘身十架, 同再來都非常之唔理性.

愛本來就唔係理性, 如果係咁理性, 又<<何必愛我>>呢?

(So far 我個 list, 神只要求我填兩個 items, 一個希望佢接納/欣賞我既讀經 concepts 另一個係接納/欣賞我既 financial concept)

我越來越覺得一個肯愛上我同需要我既女仔都幾偉大嫁,

將晝夜思想等同悶既人多的是, 居然願意同我呢個晝夜思想神話語既讀經人一生一世.

我唔知道對神話語既認識係咪 Billy最強既優點,

但可以肯定係佢最大既缺點. 而神卻用呢個缺點將佢從所有人當中分別出來.

我不斷去祈禱, 唔係為有冇女朋友祈禱, 而係為教會可以興起一班蒙神喜悅, 能作無愧工人去祈禱.

我亦求神興起我, 用我去成就佢既旨意. 改變教會呢種「不良」既風氣, 叫所有人明白聖經同唔討厭讀聖經.

當越來越人覺得我對聖經既認識好強好利害.

我越來越覺得自己對聖經既認識太膚淺同皮毛.

(呢個係事實而唔係謙稱, 我係個鐘意認叻而從不自謙既人.)

一個禮拜一次聽道真係唔係好夠喉, 不如讀神學.

有好多人讀神學為左做傳道, 我唔係.

我淨係為左更加認識神, 同埋幫更多人去認識神.

可能你會覺得呢個理由唔夠偉大, 但你有冇諗過你讀書讀到中學大學, 花十幾年進修為左 interview一份工.

點解我地唔可以為認識神而進修幾年呢? 即使係進修一生一世, 又有乜奇怪呢?

係博覽會裡面, 買野食都要排餐死, 又貴到嘔. (咁你食唔食丫?)

感謝神, 令我有智慧地鑽左入一個叫多明彌加共和國, 冇乜人行既展館入面.

只係排左五分鐘, 用¥350($24.5蚊港紙) 買左枝茫果雪糕甜筒做午餐.

係博覽會裡面遊花園, 日本亭園, 行森林, 走山徑, 照左好多照.

係樹影花間之下, 回望湖既另一面, 各個大大小小, 琳瑯滿目既展館,

以及懸掛半空既覽車, 一幅有田園氣息, 又不缺時代感既視覺境觀.

又點會係一味排隊, 一味等, 為左睇高科技/玩機動遊戲既人能夠欣賞得到呢?

我由北走到東, 遊覽佔會場三分一面積既花園/森林, 再走到中心展區同南面展區, 開始落起大雨.

於是, 我在南面西班牙同德國展館門口避雨, 避左十分鐘, 發覺咁樣等唔係辨法, 決定冒住雨, 再向西行.

走到最西面既成長村莊, 同埋地球市民村, 裡面有一個類似太空館半圓形既天幕.

無數既大人同小朋友瞓晒係地下度「夜觀天象」, 我都入去瞓左一陣.

令我記得幾年前我去 Miami Science Center「夜觀天象」瞓教瞓到跌左本聖經落地下呢件趣事.

市民村隔離有個酒吧, 有用竹製樂器演奏既音樂人表演,

又有天然鮮搾, 但唔知係乜野果既果汁售賣, 顏色卻酷似綜合性節目<<Fear Factor>>參賽者品嘗既果 D飲料.

南北西東, 兩大會塲, 由十點行到六點, 行足八個鐘.

雨越落越大, 落雨又冇得擔遮, 唯有死衝, 唯有提早走佬, 都天黑啦!

走既人龍好長, 露天, 落雨, 打左三四十個蛇餅.

我感謝神, 因為我早一日買左來回巴士 + 地鐵飛, 果 D冇買飛既人冇得上巴士, 要係一邊等.

站長將有飛同冇飛既人分別出來, 大家都有三四十個蛇餅, 但我地不停咁行, 佢地就要罰企.

當我經過佢地條隊, 見到前排個班人絕望既眼神, 疲累既面容同發酸既雙腿, 我除左有三分慶幸同幸災樂禍 :P 之外,

又令我諗起十童女比喻有準備同冇準備主再來既人既分別, 又令我有離開集中營, 大難不死, 劫後餘生既感覺.

千の千尋

從日本返加(家)不到幾天, 就聽到比比離開既消息.

果日零晨三四點鐘左右, 接到 Daddy 電話, 話比比己經唔係度, 心電圖已經停左, 醫生亦巳經宣布佢死亡.

不過, Daddy話: 如果我同佢講野, 佢會聽到喎, 個心電圖仍然會有反應.

我當時好眼瞓, 可能因為係零晨, 加上好傷心(雖然巳是意料中事), 根本諗唔到講 D乜, 只係一味叫住比比個名.

眼淚亦忍唔住, 不斷咁流出來, 心電圖果然有反應, 不停咁跳, 聽講跳到高過 60點.

(60點代表乜就冇人知, 總之係有反應啦!)

只可惜, 無論佢點跳, 我今生今世都再見唔番比比,

一個最鍚我既親人. 只可以將佢永遠藏在我既心懷意念之中.

媽咪爹地要返工, 由細到大我都係同婆婆一齊住.

雖然寫呢篇文章既時侯, 已經係十二月, 可能我比較慢熱,

有時諗起比比, 仍然唔眼濕濕, 好唔捨得.

發夢既時侯, 自己仍然係醫院裡面不停咁喊.

(唔知點解, 現實生活卻又欲哭無淚.)

再飛唔飛返香港奔喪成為左另一個考慮問題:

1) 仲告唔告到假? 2) 已經見到在生既比比, 有冇必要返去出席葬禮? 3) 返一次香港, 精神, 體力, 同時差都好傷, 返來仲要 即刻返工, 執手尾; 雖然係咁, 最後, 我依然決定返港幾天, 參加比比既喪禮,

因為我知道呢次可能係唯一亦係最後一次所有親朋戚友聚首一堂既日子.

當然辛苦啦, 幾日往返加港, 對一個係飛機上完全瞓唔到既我的確係好辛苦.

但凡係難得既都係值得.

一個人既離世, 有時侯唔單止會帶來傷感, 仲會帶來無謂, 而又無窮無盡既爭鬥.

無論係名流富豪, 又或者升斗市民, 遺產既分配總係一個令人頭痛既問題.

錢多同少唔係最重要, 爭寵, 爭大小, 爭排名, 連主耶穌既十二個門徒,

當耶穌臨死之前, 依然愛爭, 耶穌乜都冇, 都爭餐死, 何况其他人呢?

究竟分遺產點先至「公平」, 先至令所有人「心服口服」呢?

點先可以維繫到一班兄弟姊妹既感情呢? 唔分, 又係咪可以减少紛爭, 减少分歧呢?

如果有人用盡心思, 洗盡手段, 又係咪值得呢? 唔知, 我真係唔知.

希望唔會發生係我地當中啦!

最近, 睇左一套<<千の千尋>>既日本卡通片, 裡面有好多體會.

故事講述千尋跟父母去左一個靈異世界, 千尋父母因為貪食而被一個開大型既幽靈浴場既巫婆變成豬. 為左生存同拯救變左豬既父母, 千尋唯有簽左賣身契, 係浴場幫巫婆打工, 化名小千. 最後, 千尋憑住佢對人對物, 與別不同既果份氣質同言行, 贖回自己同父母三條生命, 重返人間.

人點解會變成豬, 豬點先可以變番人? 返工點先可以唔被剝削同奚落?

我可唔可以同時成為 1)寒酸但心中富有, 2)有錢但係寂寞 3)被寵壞而唔知世界艱難, 4)貪錢而不顧一切, 呢四種人既真正朋友, 幫佢地揾返自己呢? 金錢好似一塊照妖鏡咁, 睇到人性既真面目. 而神既話語又好似粒藥丸, 令人反璞歸真.

Billy所有既錢都放在 investment account, 而 investment account既所有錢都係屬於神(係Billy既理財觀).

所以, 原則上 Billy係冇錢., 正因為咁, 所以 Billy可以賺錢而唔貪錢.

唔貪錢就唔會同人有利益衝突, 亦可以 利用佢係finance/account/insurance既知識幫更多人, 今次返港都唔例外.

我明白每個人為左生活既掙扎同困難, 無論係打工/做生意, 投機炒作, 或買保險也好,

係發錢寒, 係貪小便宜, 係失去理智, 定係要一份安全感?

為左個家付出同犧牲左好多, 但埋怨同怪責就更多, 本來求一個温暖既家, 無奈反令這個家變得更加冰冷同乏味.

點解有咁多人, 為左賺多 D, 為左不勞而獲, 為左貪小便宜, 為左看風駛理, 而令自己迷失, 健康痛失, 親友得失, 金錢損失?

唔明, 我真係唔明. 就正如冇人會明白我既 bible reading concept 同 financial concept一樣.

我從來都唔扮清高, 話錢係冇用既(自己又去賺), 話洗錢有幾唔好(自己又去洗);

同時又話儲錢唔洗係冇用, 係積財寶在地......

唔洗得, 又唔儲得, 但又唔會真係奉獻所有, 呢 D自相矛盾既說話, 我唔識講, 亦勸人唔好再講.

我係「屬靈人」心目中太屬世, 係「屬世人」眼中又太屬靈既邊緣人, 或者呢個就係我既問題罷!

<<千の千尋>>同一個人, 兩個唔同既名.

究竟我地既生命係在教會同社會兩個界面不停咁 shift, 不停咁變臉, 定係始終於一呢?

「你們得救在乎歸回安息, 你們得力在乎平靜安穩.」(賽 30:15)

但聖經跟住講:「你們竟自不肯, 你們卻說, 不然, 我們要騎馬奔走, 所以你們必然奔走....」

唔係歡然奔路, 唔係快跑跟隨, 而係逃跑, 而係比種種無奈追逼之下, 身不由己咁, 落荒而逃.

「你們得救在乎歸回安息, 你們得力在乎平靜安穩.」(賽 30:15)

來呀! 我地唔再扮乖, 扮清高, 扮屬靈, 認認真真咁, 讀好我地本聖經.