|
Billy Lau Ho-Him's
Home Page |
|
|
06年 1月 newsletter - <<Call of Duty>> (決戰時刻)
Boxing day用半價 $29.99買左隻 1st person shooting game - <<Call of Duty II>>. 買 - 完全係因為佢平(其實並不平), 同埋一份 boxing day爭個你死我活既衝動同搶到手既成功感.
自從玩過<<Star War: Battlefront>> 之後, 對射擊 game都感怕怕. <<Star War: Battlefront>>係圍繞住星戰前傳 I 既劇情, 扮演 Republic, Rebellion 同 Trade Alliance其中一方. Battlefield, Sound, Graphic都冇得頂, 應該好玩, 不過...... 你唔係扮演功夫了得既絕地武士(Jedi knight), 亦唔係有成班步兵/機械人保護既 Commander, 你只不過係個行先死先既無名小卒, 唔會有特別照顧, 亦冇強化裝備.
試想像星球大戰 D戰爭場面, 幾百人對幾百人, 無遮無掩, 任指任點. 睇好過癮, 誰不知當我自己真係企係個戰場度, 係一 D都唔過癮嫁. 殺左唔夠三個人, 唔知發生乜事, 無辜辜咁就比流彈擊中死鬼左. 再 restart, 再玩, 每次都逃唔過橫屍街頭既命運. (唔係, 係橫屍星球既命運至岩) 實在太慘不忍睹, 玩左十次左右就冇心機繼續玩落去. 今次再玩<<Call of Duty II>>, 算吧, 不如 Refund啦!!
本來諗往買個 $89.99既 MPIO MP3 + $29.99既 game. (因為壞左果個 Creative MP3好貴, 才三個月, 實在唔想再花太多錢買過新既, 唔甘心.) Samsung $169, 實在太貴 lor, 買佢, 我就要 refund個 game去 balance條數. (Billy既古怪 financial concept) 結果, 我用 $119買 Samsung (512MB) + game, 同埋應承神同自己: 一定要玩完一個 game先可以再買第二個新 game, 一人退一步啦!
有時侯, 我係唔係太明自己, 投資股票可以毫不猶疑, 當機立斷咁做交易. 對於價位一上一落大起或大跌, 可以毫不動容, 不慌不啦咁做分析. 一個 game/買邊個 MP3既婆仔數, 連股票買賣既 transaction cost都未夠比, 反而婆婆媽媽, 反來覆去咁計來計去, 點解咁奇怪?
縮頭烏龜 14日 Refund 期未過, 我嘗試鼓起勇氣拆開個遊戲盒. (一拆就冇得上訴, 冇得 refund.) 感謝神!! <<Call of Duty II>>的確好 玩過<<Star War: Battlefront>>, 至少有得做縮頭烏龜, 有得避. 仲有, 唔洗幾百人對幾百人, 蠱惑仔劈友? 幾百人. 個 game一開始就己經好打仗 feel, Training 唔會好似 <<Rainbow 6>>咁一條友去練靶場攪好耐唔知做乜咁.
故事講述德軍入侵蘇聯, 快將攻到首都莫斯科. 我係一個初初參戰既俄軍卒仔, 離鄉別井, 被送到前線負責守住莫斯科附近一個鎮仔, 敵人就係幾公里以外逼近. 佢地坦克車隆隆駛近既聲音亦隱約可聽. 個 General 係咁依教左我點開槍, 點描準同擲手榴彈(用道具, 係擲薯仔至岩), 讚我兩句 "Good", 就叫我去「送死」. 我既感受係: 戰爭裡面, 人命真係賤過泥, 我都有阿媽生嫁, 你企係後面, 就叫我向前衝. 我退後, 你就射死我, 變態.
人在槍林彈雨之中, 條命仔最緊要, 殺敵又好, 向前衝都好, 其實都係為左自保. 上得戰場, 就要當自己已經死左, 因為只有一個死人先會唔怕死. 太過貪生怕死, 反而死得更快, 仲累死埋你班戰友添. 不過, 每個人總有第一次, 而我既第一次就係隻縮頭烏龜, 躲在牆後面透大氣. 嚇到面青口唇面, 似乎已經聽唔到隊長叫我跟住佢向前衝既命令.
敵人有三個, 一個揸輕機 (我都係), 在對面街不停掃射. 衝上去既同伴, 巳經有四個倒地身亡, 另外三人亦中槍, 有低聲呻吟, 亦有高聲喊痛. 見到咁慘烈既場面, 激發起潛藏在我內心深處既俠義心腸, 以及唔再做縮頭烏龜既勇氣. 我大喊一聲, 一個箭步(唔係衝出去送死), 伸個頭出去射死 D敵人. 見到同僚壯烈犧性, 實在冇辦法控制自己傷痛既心情, 揸住輕機不停咁射. 「呢下係 for 呢個 town每個人民所流既鮮血既! (呯! 呯! 呯! )」 「呢下係 for 整個國家同民族既, (呯! 呯! 呯! ) 仲有呢下, 係我自己送比你.(呯! 呯! 呯! ) 死啦!!! 」
見仲有人未死, 躲在牆後面, 再補一槍, 「死未? 仲唔死?」 (好似打烏蠅咁.) 「走呀? 想走, 你夠我枝輕機快? 避? 射死你, 仲唔死?」 「死左!! Yeah!! 」 唔該 Restart!! What?! 原來射錯自己人, 做左「賣國賊」.....
睇番我既人生, 都有好多做縮頭烏龜既時侯. Christmas 果陣, 因為公司條數好亂, Year End一定做死, 最慘唔識做. 令到自己好大壓力咁. 後來某一晚, 我諗:「死咪死, 最多咪比人炒.」 神帶我由一個冇工作經驗既小伙子做第一份工, 過第一個 year end. 當時個 analyst走左, 冇人能夠真正教我點做盤數. 老細 theory好多好強. 但個 file係邊? 唔知!! D backup係邊? 唔知!! 咁做乜? 做手指? 呢 D日子都捱得過, 何况依家? 神帶我初初入呢間公司, 個 manager同 team leader走左, backup係邊? 唔知!! 個 file所有數全部 hardcore, 全部 calculation 都係一個 cell裡面做晒. 要遂個 cell, 遂條 formula tie back番個 system, 先可以開始 start, 再將佢 document番, 仲未計之前果手 plug數. 到第三個 quarter先將整個程序 automate同埋 document晒. 呢 D日子都捱得過, 何况依家? 主耶穌話:「不要為明天憂慮.」憂慮亦無補於事, 不如心口一個勇, 向前. 「衝呀!!」
以弗所書六章提及屬靈爭戰, 信徒要作精兵, 穿戴神所賜既全副軍裝: 真理束腰, 公義既護心鏡, 平安福音鞋, 信德既籐牌, 救恩既頭盔, 聖靈既寶劍, 就是既神既道, 仲有隨時多方禱告. 不過, 我既好多時著唔齊全副軍裝, 就衝去「送死」, 又或者將本聖經當飛劍咁插, 唔係插敵人, 係插自己人. 最可惜係, 個 game好似冇得 restart. 玩<<Call of Duty II>>令我學識左一樣野, 開火之前睇清楚對方係乜水先. 神係一個好善厭惡既神, 我地對付罪, 作善工, 同時憐憫罪人, 愛弟兄姊妹, 不過我地好多時都敵我不分.
煙霧彌漫 我自問玩槍玩左十幾年 (應該話Billy 打 Keyboard同揸 mouse十幾年.) 估唔到第一次面對面, 對住敵人果一刻, 我仍然係情不自禁咁抖震. 點都好, 第一關總算係通過左, 我已經漸漸習慣左軍人既生活, 然已第二關又要開始. 今日, 我地要繼續向北推進, 自從 9月入 town 以來, 第 13小隊死傷無數, 單係渡過盧格河一役, 就損失慘重. 我亦數唔清我已經殺左幾多個敵人, 但試問要再殺幾多先足夠平息戰爭既風煙呢? 幾時先等到<<和平日>>既來臨?
雖然已經冇咁驚, 但我依然唔可以完全克服心理既障礙, 完全當自己一個活死人. 我仍然係縮下縮下咁跟住隊長宜戰宜走. 走到一處, 德軍係對面大廈, 同我地駁火. 雙方爭持不下已經六七分鐘, 我隨身既彈藥亦所餘無幾, 再係咁樣唔係辦法. 冇彈藥係一定死, 唯有衝上去, 先有一線生機. 我發現移動著既身影以及之字形既前進係手槍同來福搶打唔到. (如果對方冇輕機就冇有怕.) 我衝到兩楝大廈之間既石牆處伏低, 之後其他隊員亦跟住衝, 終於奪取左果楝大廈
我地繼續逼近德軍該鎮既總部, 對方有三枝重機, 火力好猛. 衝左幾次都要退番落黎, 前仆後繼既隊員數之不盡. 既然唔可以一味咁衝, 就用煙霧彈. 係煙霧彌漫當中係咁衝, 實行搏大霧. 槍火係矇矓既霧色之中顯得特別剌眼, 趁住濃霧未散, 又立即伏低, 找棵樹, 找舊石頭做掩護. 再擲一個煙霧彈, 如是者攻入德軍既總部. 煙清霧散, 突然發覺敵人就在咫尺之間, 嚇到唔識開槍, 好彩佢同我有同一個反應. 鬥快, 對準佢個頭, 一槍了恩仇, 再補一槍, 跟手兩頭望, 注意「交通」情况. 其實唔係乜野深仇大恨, 同生共死亦唔見得有乜野情密關係, 大家都係逼於無奈, 戰爭就係咁, 唔你係死就係我亡, 猶疑一秒鐘或者已經令你斷送左一生.
玩左兩關<<Call of Duty II>>, 咁岩讀到約書亞記, 令我對它有更深刻既體會. 一直以來教牧解釋約書亞記 - 以色列人攻佔迦南地, 都會避重就輕. (冇辦法唔避重就輕) 將攻佔迦南地既血肉戰爭靈意化. 迦南人係<<十惡不赦>>既千古罪人, 係罪, 係魔鬼, 而基督徒一定要好似以色列人攻佔迦南地咁對付罪. 迦南地係應許之地, 聖潔, 聽神話就傳福音無往而不利, 未得之地遲早手到拿來..... 個原則本身冇問題, 但係用呢段經文, 呢卷書咁解法. 唔知, 我覺得好有問題 lor, 何必用約書亞記呢? 但係個個都係咁解. 但唔係咁解又可以點解呢? 我又唔識答喎! 我覺得有問題, 但就算比我上台, 我 end up可能都係咁解, 冇計 la.
牧師唔係個個都打過仗, 想體驗軍人戰爭意識/心態可以去台灣軍訓兩年. 嫌麻煩同體力不支, 不妨花 $59蚊買<<Call of Duty II>>玩, 玩兩關就學到好多野. 原來戰爭唔係投考皇家香港警察, 唔係揾工跳槽, 係冇 choice, 係逼於無奈嫁. 你既然唔想係埃及做奴隸獸, 又唔想係曠野飄流四十年, 要入迦南, 就預左打仗, 唔係你死就係我亡, 一場又一場既仗. 睇番民數記同約書亞記, 河東既米甸/摩押, 亞摩利王西宏, 巴珊王噩, 河西南面耶路撒冷等五王, 北面夏瑣王為首既聯盟陣線....... 都係首先向以色列人宣戰同發動攻勢, no choice, 唯一可以做既, 係 依靠神同埋勇往直前.
人生之中, 有好多時侯係唔可做縮頭烏龜, 亦係冇 choice. 老細踢個波比你, 你接定唔接? 開會你乜都唔識, 但你要 lead, 你 lead唔 lead?
公司有個 manager, 講野都好有趣. 最初我完全唔識做 IFRS, 同佢開會, 問佢識唔識做, 佢咁答我: 「如果你問我一支針上面可以企到幾多個天使, 我仲可以答你. IFRS? 我真係唔知佢(總公司)想點.」 公司做 pension plan條數從來冇人 reconile過咁, 亂爆 + 三不管. 我知佢有 asset side D 資料. 於是問佢知唔知個 account發生乜事, 有冇人 reconcile? (因為大老細要我負責.) 佢答: 「如果你想知個 account發生乜事, 你一陣落樓下買個 pizza......」(做乜? 請食飯? 你肯教我唔介意請.) 「望住前面, 將個 pizza大力咁擲埋果幅牆, 然後你可以開始研究, 呢個就係你個 pension account, Good Luck!!」
老細要我做 05 vs 04 balance sheet, income statement & cash flow variance explanation. 有關 investment既 accounts, 我又走去問個 manager, 點知佢咁答我: 「我唔識答喎! 我地成間公司 D業績都係 market driven, 你知嫁. D auditors想點? 咁蠢! 」(咁總比 D answers佢地) 「市場會變, 魚會游, 蘇州會有屎, 呢個就係答案. 跟我講一次.」(雙手舉高, 搖頭擺腦好似指揮咁.) 「Markets move!! Fish swims!! Shit happens!! 就算係個 auditor同大大老細來, 個答案都唔會變.」 (Ok!! 咁我點同老細講)
做人唔易, 好多掙扎, 好多無奈, 但係原來即使去到生死存亡既果一刻, 好似約書亞記咁, 係戰場上上帝都係你我人生既依靠同隨時既幫助. 即使你未必見到明日既太陽, 未必睇到努力掙扎求存既成果, 又或者上帝保守你「敵人」條命多過保守你. 但係, 上帝仍然係絕處之中, 未必係唯一, 但一定係由始至終可以信靠既對象同力量. <<紅天灰雨>>既日子可以係一日, 可以係輾轉數載, 有生之年亦未必見到<<和平日>>. 如果「死」係任何人都避無可避既人生進程. 咁生存, 無論係一日定係一個禮拜, 都係一份 bonus, 一份恩典. 而我地既生活仲未去到一個流血既地步, 與其怨天尤人, 又或者杞人憂天. 何不咬緊牙關, 係呢個決戰時刻靠往神勇往直前. (當然, 約書亞記可唔可以成為掌權者/我地無法無天既籍口.)
勇往直前 自從玩左<<Call of Duty II>>之後, 有幾位弟兄亦來我家中參與「保家衛國」既行列, 透過「當兵」既生活, 令我地可以打成一片. 我地(盟軍)成功潛入左德軍既堡壘, 一路以來, 德軍既<<沙漠之狐>>氣勢如洪, 將我地由利比亞逼到埃及固守. 捱打左咁耐, 亦係時侯採取主動, 向敵人反擊. 今次行動, 係一次閃電攻擊. 目的係要攻下德軍既係東, 南, 北面既三個雕堡, 同埋炸毁德軍既軍火庫. Action!! Go, go, go, go....
見到前面果位仁兄一開始就起勢衝, 揸住支輕機見人就掃, 真係擋者披扉, 百萬軍中來去自如, 如入無人之境. 支槍快要冇子彈, 就即刻 reload, 又隨地執槍執手榴彈繼續搶攻. 係冇敵軍既情况之下, 我走埋去請教佢: 「點解你可以咁勇? 你可唔可以教我?」 佢話:「我初初當兵果陣, 都好似你咁, 縮下縮下. 不過, 後來發覺先發制人, 後發者制於人既道理. 「你一衝出去, 見到敵人, 如果縮, 佢就有左防備, 支槍就描準你企個位, 當你再伸個頭出來, 以為安全 D, 點知又打唔到人, 亦更易比人打中. 如果你唔停, 一出去就掃, 你最多只會中一槍, 就算有三個敵人, 最多中兩槍, 但因為你出奇不意, proactive, 你咪可以打低 D敵人 lor.」
所謂「聽君一席話, 勝打十場機」 整個人好似脫胎換骨咁, 衝出去殺個片甲不留, 盡顯英雄本色. 為既唔係要建立乜野豐功偉績, 亦唔係夠 man夠威, 我只係唔想死. 聖經講得岩:「有人憐惜生命反而喪掉生命, 有人捨棄生命反而執番條命.」 成為一個活死人, 我終於做到.
由一月頭至今不到一個月, 我由貪生怕死既縮頭龜進化成可以同<<朋友仔>>並肩作戰既活死人. 由被動變成主動, 由 reactive變得 proactive. 原來人生唔係淨係等死, 原來灰暗既日子係可以好有意義. 如果我可以用一個月去克服一個 game, 我又可唔可以克服對英文, 對學結他既恐懼以及過去既挫敗, 但如果我肯一鼓作氣, 係可以 break through, 係可以做事/令人生再有突破, 再創高峯. 而我係應該 refund? 還是拆開份禮物, 勇往直前?
|