|
Billy Lau Ho-Him's
Home Page |
|
|
零到靈之間 (2006 年萬民福音堂全教會退修會營歌) 作曲: Sandra Wu 填詞: Billy Lau
忙了 沒了完 每天怱怱忙歲月 賽 30:15-16 忙亂/安息 無數上帝恩典 錯過 未發現 時針 走一轉 在每日裡歸回安息 主那妙愛不止不息 教我學會珍惜
副: 煩惱絲 誰不會皺著眉 多困倦 賽 40:27-28 迷失/察驗 聽不到未看穿 流水作業渡每天 0 到 1 誰可以再由靈開始 靜聽 留心 察驗 迎合 上帝的心意
長街 走多遠 難免俗氣 風塵僕面 賽 40:31 風塵/高飛 主那妙愛賜我生機 振翅又再高飛
副: 煩惱絲 誰不會皺著眉 多困倦 賽 40:27-28 乏味/回味 聽不到未看穿 流水作業渡每天 0 到 1 誰可以再由靈開始 高低起落變幻人生際遇 回味上帝恩典處處
副: 如跌倒神安慰 縱軟弱主勉勵 賽 40:29-30 跌倒/信靠 測不透但我知神的信實未變遷 0 到 1 誰可以再由靈開始 靜聽 留心 察驗 迎合 上帝的心意
聯想:
第一課 零到靈之間 9 月一共有 3個 essays (MBS), 1 個exam (LLQP), 加埋另外一些 side jobs, 都幾忙. 公司做 budget, 做 SOX test (公司內在管冶能力的查核), 加埋 IFRS(國際會計制度), 仲有 section 3855 (新會計指引)........好煩, 好多野做.
當一個人忙到不亦樂乎既時侯, 歸回安息實在非常自然. 正如用車多, 自然入油多, 勞動多, 都會扒多啖飯. 冇勞動, 當然亦唔會唔洗食啦. 不過, 覺得「親近神」係生活的附加稅(GST)既人, 比當佢係入油, 係食飯既人多好多. 呢個都算係一個幾有趣但又十分可悲既現象.
呢首歌就係要寫出呢種忙碌都市人生活既點滴. 忙了, 沒了完......忙個不停的讀書, 工作, 家頭細務. 時針走一轉........對對錶, 等午飯, 等放工, 等出糧, 等加薪, 周而復此. 長街走多遠.......食 lunch之後散散步, 放工行去 subway, 由巴士站行返屋企. 係每一個生活片段之中, 我唔知你有乜野感受, 流水作業, 會唔會好 lost?
當我地將石屎森林換上青草地, 溪水旁, 入到 retreat, 似乎先可以有一刻安靜, 同神親近多一點點. 不過, 再步入石屎森林, 寫字樓的「豆腐」方格, 又或者在快要成家立「圾」既屋企之中 那裡談得上歸回安息呢?
好多詩歌, 由頭到尾都係讚美, 復興, 在主裡好得無比.....又或者, 第一段講在世界好慘好幽暗, 第二段/副歌回到神身邊好得無比, 接著是去傳福音...... 呢首歌唔同, 或者, 同所有詩歌既格式都唔同. 呢首歌既 setting由始至終都係石屎森林呢個都市人場境, 冇過份去否定世界, 亦冇認定一切在教會以外的人, 事, 物都是虛無/冇意義可言. 連同副歌在內, 梅花間竹咁, 一共五對/五段歌詞道出都市人(基督徒)既種種掙扎/困擾.
歌詞問到: 邊個願意由靈開始? 0 到 1既進步其實唔多, 所以, 唔會好難, 但卻代表著從無到有既無限進步:
由唔明到明, 由陌生到親密. 由 0 到 1, 由靈開始, 一步一步, 在都市人既生活之中靜聽 x 留心 x 察驗 x 迎合 => 上帝係我地身上同係現今世代既心意.其實幾有趣. 好多人做唔到, 係因為停留左係度諗: 「做唔做到呢?」「做定唔做?」 「做左有冇用?」等等無聊既扎掙, 停留係「零」同「靈」之間呢?
呢個係呢首歌字面/1st meaning. Retreat既時侯亦曾粗略地分享過.
第二課 祈妙旅程 今次Retreat 找我寫這首歌, 叫我 base on 賽 30:15 「你們得救在乎歸回安息, 你們得力在乎平靜安穩.」
故明思義, 死下死下係因為冇歸回安息, 乏力係因為冇平靜安穩. 我地成日話忙, 冇時間親近神, 寧願拿住個電視機搖控不停轉台. 到得閒既時侯都係唔會親近神, 煲帶可以煲通宵, 講到煲聖經仲快過煮杯麵; 行街 shopping可以快樂不知時日過, 到親近神既時侯, 會成日望錶, 誓願咁度日如年? 一個「靚仔」打機既時侯, 阿媽喝佢食飯, 佢可以有如老僧入定般充耳不聞, 點解親近神又咁知聲? 難道魔鬼真係咁多攪擾? 所以, 段經文幾有趣咁話: 「得救.....得力.....你們竟自不肯. 你們卻說, 不然, 我們要騎馬奔走.」
不過, 有時我亦真係唔知點解, 自己對神會咁反叛同厭煩. 點解會咁?
Retreat主題經文 turn out卻是賽 40:30-31, 哈哈!! 一段係 retreat由始至終冇公開諗過的主題經文 :P 「等候耶和華的, 必從新得力, 他們必如鷹展翅上騰.」 跟據 27節, 當時既以色列人為左前路不明, 於是, 埋怨神. 所以, 神同佢地講: 等候 => 從新得力, 因為神係創造天地萬物既主, 前路不明本身亦係 under神無窮智慧, 奇妙既心意之中...... (vs28)
等候既功課係生活裡面其實多的是: 巴士站排隊等巴士; 停車場等車位; 學生等畢業; 打工仔等出糧; 有左仔女又等佢地長大成人; 老左又等抱孫; 仲有 D人一直等運到. 都市人越來越心急, 等唔切, 所以有即食麵, 快餐, 仲有 high speed internet既出現. 個地球轉得太慢, 要快 D. 但究竟邊個阻住個地球轉呢?
當然, 祈禱既慣性動作就係嫌神出手太慢, 甚至唔肯出手: 我要考試合格嘛......我要揾工嘛......我要果個人信主嘛......我要果個人長命百歲嘛........ 如果佢係阿拉丁.......唔係.......如果佢係神, 點解佢唔理我, 要我等運到呢?
點解聖經話:「等候耶和華的, 必從新得力, 他們必如鷹展翅上騰.」 <<祈妙旅程>>呢首詩歌裡面話:
等左六年, 先小學畢業, 再等五年先捱完中學, 又要四年大學, 做野又唔知做幾耐先至成家立室同退休? 唔講咁長, <<大長今>>七十二集, 每個禮拜兩集, 做左大半年先至大結局, 又好唔容易咁等到<<萬家燈火>>做完. 無線劇集可以淨係睇頭睇尾, 睇廣告(香港果 D)有時仲好睇過佢, 但係睇<<紀嘵嵐>>, 睇<<神鵰>>你會唔會斬頭斬尾呢? 我地既一生係套鬧劇, 定係經典? 更重要既, 神, 世界/世人既主宰又係咪無線班編劇? 如果我地相信神, 過程肯定精釆過淨係睇結局, <<Lord of the Ring>> extended version 我都睇 2 次. 何况神找我參演小配角既<<Lord of the Christ>>? 豈不更要回帶, 回味再回味神不止不息既愛以及高低起落變幻既人生際遇? 仲要放長雙眼, 伸長條頸, 等聽日果集出街.
等侯!!! 在都市人既生活之中靜聽 x 留心 x 察驗 x 迎合 => 上帝係我地身上同係現今世代既心意.
第三課 你知道我在等你嗎? 一個字詞會令人聯想到某節經文, 一節經文會令人聯想到某章聖經, 一章聖經會令人聯想到某卷書卷, 所以, 就有 3rd meaning既出現. 究竟「歸回安息」, 「等候耶和華」對以賽亞書當時侯既讀者有乜意義呢? 七日靈修? 返教會唱詩讚美神? 定係傳福音呢?
以賽亞書 30章, 猶大國因為北方強國亞述的威脅寢食難安, 求助於只會隔岸觀火既南方強國埃及, 結果, 反而惹怒了亞述, 十八萬大軍壓境, 橫掃全地, 攻到耶城門口, 幾乎亡國. 「你們得救在乎歸回安息, 你們得力在乎平靜安穩, 你們竟自不肯. 你們卻說, 不然, 我們要騎馬奔走.」 當初, 神同以色列人立約, 只要佢地謹守遵行, 就應許佢地國富民強, 有聖殿(神既同在)同埋迦南地既寄居權. 「歸回安息」係指回到神既約, 回到神既應許裡面生活, 不過, 以色列人唔肯, 唔肯左幾百年, 結果, 終於惡貫滿盈, 遭滅國. 所以, 歸回安息本身係一個祝福, 亦同時係一個警告. 如果神昔日因為以色列人既剛硬, 唔愛惜以色列人, 用外邦既「神」, 用外邦既軍隊審判佢地, 今日佢同樣可以因為我地既頑梗, 唔愛惜我地. (羅 11) 小小事就唔返 church, 平時冇親近神, 冇叫人係我地身上睇到神/得福, 行事為人衰衰咁, 社會冇公義卻又闊佬懶理........後果自負. 呢個<<零到靈之間>>呢首歌既隱藏信息, 呢個手法同樣出自以賽亞書, 第 6章第八節之後.
以賽亞書 40章, 猶大亡國後 70年, 巴比倫被瑪代波斯毁滅, 以色列人回歸. 70年, 足足等左 70年, 上帝足足沉默左 70年. 70年有幾長呢? 就好似由伯特利走到希伯倫, 由親子組既BB仔去到咁年長團契咁長 lor :P 當時回歸既路唔容易走, 人, 己經係巴比倫落地生根, 何必返去? 新既政權係好係壞仲係未知之素, 仲有, 經過左 70年, 耶城依家等如一個廢墟, 返去做開荒牛? 「等候耶和華的, 必從新得力, 他們必如鷹展翅上騰.」 唔知道呢段經文, 係當時安慰左幾多人. 一個考試肥佬, 一個 project/job攪唔惦, 個衰仔頂兩頂嘴, 個朋友一唔信主, 我地就好似世界末日咁對神失去信心. 猶太人兩次聖殿被毁, 係萬國萬民中流亡二千多年, 又係乜野令到佢地堅持信仰到底呢? 猶太人從歷史裡面學乖了, 知道離開神只有死路一條, 所以, 佢地學曉等候神. 無論身在異鄉, 又或者故地重臨, 都立定心志, 歸回安息, 回到神同佢地既約當中, 謹守遵行. (當然, 變成律法主義又唔好 la) 原來有時等候未必可以亦未必需要睇到 result, 睇唔到既 result, 亦唔代表冇 result. 70年都等唔到 result, 但人既心早就係呢 70年當中歸回安息了, 又或者, 從另一個角度去睇, 神等左幾百年, 終於等到 D results.
「煩惱絲 誰不會皺著眉 多困倦 聽不到未看穿 流水作業渡每天」 前路茫茫, 有時真係好 lost, 不過, 最尾一段副歌話: 「如跌倒神安慰 縱軟弱主勉勵 測不透但我知神的信實未變遷 」 對將來仍然係個問號, 不過多左對神果份信念.
原來每日親近神, Follow神, 0 到 1, 再由靈開始唔係一個喜好既問題, 而係一個「生與死之間」既决擇. 有左呢個歷史背景, 歸回安息, 返到神既應許, follow主咁過活, 對我地又會唔會多左份決心呢?
第四課 零與零之間 或者有 D人都發現, 首歌既歌名同某首流行曲既歌名係好似, 歌詞當然完全唔同啦!! 用流行歌歌名作為 message 既一部份係 Billy 慣用既填詞手法之一. 批評既人會覺得係抄襲, 肯欣賞既人會揾到歌詞另一個 meaning.
<<零與零之間>>呢首歌既歌詞寫得靚, 不過, 有 D不知所云. 大約係講一個人好任性咁同一個本來好合襯既人分手, 諗番先知道, 後悔愛得太遲, 可惜, 己經冇得返轉頭, 留底既只係一段記億.
對比起我地同神既關係, 我感謝神, 我地仲可以重新由靈開始, 歸回安息. 昔曰, 神願意接納一班叛逆之民既回歸, 今日, 佢同樣願意聆聽我地每日既認罪呼求. 趁仲未<<愛得太遲>>, 歸回安息, 由靈開始.
我地話要有青草地, 溪水旁先可以安靜, 先可以親近神. 其實, 詩篇廿三篇既青草地, 溪水旁一 D都唔係我地一廂情願果種 retreat feeling. 呢個係牧羊人既工作場境, 野地裡面有獅子, 有狼羣, 仲有蚊蟲鼠蟻, 危險到了極處, 亦唔見得浪漫, 但牧羊人因為親近神, 可以平靜安穩, 歸回安息, 亦可以感恩頌讚, 不怕遭害. 點解? 因為「祢與我同左........」
青草地, 溪水旁係昔曰既豆腐方格, 係昔曰既職場.....股票市場....... 係都市小人物既場境當中, 人可以平靜安穩, 歸回安息. 正如<<風靈頌>>既歌詞話:「生活的每個劇場, 都是屬靈的牧場.」 真正既聖靈充滿, 真正既歸回安息同等侯係係石屎森林當中發生.
問題係: 「你肯唔肯?」「你信唔信?」
後記 以賽亞書信息既對像係以色列民族, 昔日既信仰群體, 而唔係一個人. 亦即係話「歸回安息」同「等侯」係指住整個信仰群體 - 教會(如果用今日既理解). 社會公義, 扶貧, 外交政策係以賽亞書既主題, 亦係「歸回安息」同「等侯」既內函, 不過, 係呢首詩歌都冇表達出來.
呢首詩歌嘗試盡量去淡化個人味道, 以致跟以賽亞書係呢方面一致, 不過, 詩歌唔個人化就冇辨法叫好叫座. 畢竟, 今日社會既意識形態就係崇尚個人主義. 要像<<同夢同心>>那樣, 信息連同意境都跟腓立比書相似係辦唔到, 哈哈! 就算辦得到又如何?. 從來唔 expect 弟兄姊妹會睇到我寫詩歌既 3rd, 4th, 5th........meaning, 知道 1st & 2nd meaning大概已經 get 到 70-80% of message. 呢個係 Billy同神之間既遊戲. 係 Billy既 believe裡面, 填詞係釋經既手法, 係明白神, 係同神對話既方式.
|