Artiklu minn Joseph Muscat, membru tal-Parlament Ewropew

IL-KUMMISSJONI EWROPEA QED TEŻAMINA T-TAXXA FUQ ID-DIXXIJIET TAS-SATELLITA

It-Tnejn, it-12 ta' Lulju, 2004

Il-Kummissjoni Ewropea qed teżamina l-liġi li permezz tagħha l-Gvern Malti qed jintaxxa Lm25 fis-sena lil kull min għandu dixx tas-satellita.

Id-Direttorat Ġenerali tat-Tassazzjoni tal-Kummissjoni Ewropea informa b’dan lil Membru Parlamentari Ewropew tal-Partit Laburista, Joseph Muscat.

F’ittra li bagħat lil Muscat, il-Kap tal-Unit responsabbli mill-implimentazzjoni tal-liġijiet Ewropej, Richard Van Raan, qal li bħalissa għaddej eżami tal-liġi f’dan il-qasam.

Van Raan qal li l-Kummissjoni Ewropea għandha tieħu pożizzjoni dwar din il-kwistjoni hekk kif tispiċċa teżamina l-liġi.

Van Raan ħeġġeġ ukoll lil min qed iħallas din il-liċenzja biex jara jekk għandux juża' mezzi legali biex jiddefendi d-drittijiet tiegħu.

Il-Kummissjoni Ewropea irreaġixxiet wara li Joseph Muscat bagħat ittra lill-Kummissarju għas-Suq Intern Frits Bokestein dwar dan is-suġġett.

Fl-ittra tiegħu, il-Membru Parlamentari Ewropew Muscat ġibed l-attenzjoni għal Komunikazzjoni tal-Kummissjoni Ewropea maħruġa nhar it-2 ta’ Lulju 2001, li fiha jintqal li individwi privati għandhom jitħallew fil-libertà li jużaw dixxijiet tas-satellita mingħajr ostakoli tekniċi, amministrattivi, ta’ ppjanar jew ta’ taxxa. F’din il-Komunikazzjoni, il-Kummissjoni kienet qalet li hija kontra taxxi mmirati fuq l-użu tad-dixxijiet tas-satellita.