23 Disyembre 2003

Mula sa aming hanay ay nakikiisa kami sa hinagpis at hinaing ng ating mga kababayan ng nag-hunger strike diyan sa Riyadh. Ito ay isang paglalarawan ng katotohanan kung sino ang pinaglilingkuran ng ating embahada. Nawawala ang tunay na kahulugan ng institusyong ito na mag-lingkod at protektahan ang interes ng mga mangagawang Pilipino. Manhid, bingi at inutil na maituturing ang mga taong responsable na kumalinga at sumagip sa ating mga kababayan na humihingi ng tulong sa kanila.

Sa kadahilanan ng mga pangyayari ngayon sa ating mga kasamang manggagawa sa Riyadh nanawagan kami sa lahat ng ating mga kababayan dito sa kaharian ng Saudi Arabia na maki-isa tayo at mag-samasama sa pagpapatanggal sa mga walang silbing mga kawani ng embahada. Hindi ganitong uri ng mga Embassy officials ang dapat nariyan sa Embahada ngayon ... na pinasusuweldo ng ating mamamayan subalit ni hindi makatulong sa mga suliraning kinakaharap ng ating mga kababayan.

Muli, mula sa aming hanay kami ay lubos na sumusuporta sa mga hinaing ng ating mga kasamang OFW na makauwi at makapiling ang kanilang mga mahal sa buhay ngayong darating na Pasko.

Rene Valenzuela
Tagapangulo
Lakas Mangagawa sa Silangang Probinsya
LMSP