十一月 NOVEMBER







十一月卅日 星期六 

冇乜特別的一天!唯一特別就係夜晚一家人出o左街食飯... 去食咩o野菜?自己睇o下喇~ 之後再同'Eric'去食糖水,又係有相睇o架~~呢款就係我最鍾意食o既糖水之一~~




十一月廿九日 星期五 

'康爺',對唔住呀!今日好衰咁叫你陪我上堂,重累你俾人當面咁話... sorry, 都係我唔好,如果我唔問你咪乜事都冇喇!

好o野!我終於transfer到d相落電腦喇~大家可以再到我個相溥睇睇,較得意的相有我近兩日的十一月廿八日的午餐及十一月廿九日的午餐,係咪有好大分別呢...=P
其他新相重有:

  1. 估o下邊到
  2. 星期三晚@TST
  3. 情深擁抱?!
  4. 身在何處??

夜晚收到一個測運氣的game,真係純粹測玩者運氣,只不過係用一個遊戲形式表達.

夜晚十二點出o左去食宵夜,不過呢餐宵夜我只係飲o左杯凍奶茶咁大把!因為我當時都未肚餓... 平時食宵夜o既時間係凌晨兩,三點呢...=P

勁勁...勁,凌晨兩點幾竟然有人話要打電話搵我求救,重要係長途電話呢!咁我唯有行開一陣"解決"人地o既疑難喇... 就係咁,我就"放棄"o左同'康康'&'小師妹'傾偈喇,sorry~(今日已經係第二次同呢個'康大人'講sorry喇!<-- 呢次已是第三次呢^^)




十一月廿八日 星期四 

今日初次見到手術後的'康康',起初都冇乜事,點知見佢一行就恍如見到一個老人家一樣!真估不到平時行動迅速的他竟然咁快就要搞到個老人家咁... 不過幸好聽佢講佢已經康復中喇~~




十一月廿七日 星期三 

寫於凌晨二時正:夜晚無聊地覺得自己好tired,(因對住部電腦做功課太耐喇!)唯有做返自己喜愛做o既o野o黎輕鬆o下... 於是就趁呢段"無人時間"去搵歌.又唔錯喎,咁夜果然被我搵返到一首我好想要但又一直download唔到o既歌!大家知我喇,當我聽(搵)到一首我認為好o既歌,而我又得唔到佢就會好辛苦,急得簡直係熱鍋上的螞蟻咁~~~=P 而今次我所講o既歌就係'徐懷鈺'隻"分飛"喇!!係,呢隻歌係好舊,不過佢以前新出o個時我唔識,記憶中我只有幸聽過一次,幸得前排與友人唱K時經常聽到呢隻歌,咁先被我知道原來呢首咁好聽o既歌就係"分飛".唔知大家對我所講呢首歌有冇認識呢??冇就真係要download落o黎聽聽喇~~

今日下午破了自己的個人紀錄,我終於能夠做到"即堂交功課"呢樣o野!話說今日上Java時要我地做埋今年度最後一份功課,當阿sir講解完功課要求後,我就一如以往咁起勢咁做...但係今次竟然被我在短短十數分鐘後完成了大半的功課.雖然最後仍遇到一些小障礙,不過我最後都能夠即堂完成及交埋+阿sir改埋俾分~~~~開心^^

由於一早做完電腦Java,於是決定早走... 如是者就走出旺角等我班"老朋友"會合,再約定去食晚飯.是次"老朋友聚會"的出席者有'Eric','老牛','魚文','Dav'& his gf~基本上所有人都到齊,可惜'Felix哥哥'仍身在澳洲~~唉~~(Felix,係咪好羨慕呢....=P) 講講o下我地就去o左"東京一番"食飯... 其間發生一段小插曲:事緣呢個'老牛兄'就叫了一道"金茹雞球倦定食",點知出來我是青椒雞球定食.由於'牛兄'不喜青椒,所以要求更換...但抵死的是佢同個侍應講:"請問d金茹o係邊?" 呢句說話既幽默,又抵死!!(可惡,我竟忘記了用新相機影我今晚o既晚餐!>.<)

吃過飯後,由於我呢個酒鬼癮起,於是就提議落酒吧一聚.(好讓我在徐夕夜時作好準備,同酒吧老闆訂位先~)隨著我的提議一出,'牛兄'&'魚文'立即閃人...但後來'Eric'又話冇錢喎,咁就唯有另作決定--- 就係去尖沙咀"試機"!行行行...行到去尖咀北京道時,大家又入了"北京道"(機鋪)懷念一返!玩玩o下我地玩到一隻"打拳"的遊戲... 基本上係測試大家能打出的力度是多少... 起初我都以為好易玩,我應該會打到心目中的力度,點知頭兩半只分別打到108kg 阪118kg力度... 比起'Eric' & 'Dav'的150kg少了許多!慶幸我最後一o下用了直拳打出了165kg~~ 但接著'Dav'已打出了172kg......

"參選完"北京道後,我地就去到天星碼頭影相... 但好可惜地我影了數十張相都係因手震問題而影得朦朦朧朧... 駭人非常!幸好我地最後影的某幾張團體相都影得不錯~~~我重錄o左一段"精彩"的片段...哈哈~(Sorry,暫時未得閒住,d相遲d補返上網~) 總結今日的都過得十分開心!!唔知今日有份出席的大家又開唔開心呢?=P




十一月廿六日 星期二 

今日終於整埋十二月的日記連結,今年最後呢個月o既background我覺得整得唔錯,呵呵~~(賣花讚花香!)<寫於凌晨三時>

<寫於晚上八時>今日返到屋企開ICQ,第一個收到o既message就係一句"強烈遣責,天地不容!" 起初我重以為係話緊前排某周刊o既事,點知睇真d原來係遣責緊我!!原來我十二月o個background係同我朋友七月o個homepage background一樣喇,於是乎我就再一次被人話我係"賊仔"~~ 我當然唔會為o左一個少少o既 background而同人吵架喇,最後我唯有轉過十二月o既background!不過我唔明一樣o野,background個個人都係一樣o架喇... 既唔係你整出o黎,亦唔係我整出o黎~~衰d講句只係大家一齊抄(借)人地d background o黎用喇~Anway, 一切問題已解決了~~~ 而最新o既十二月background同今個月係接近一模一樣喇,不過都有少少分別.有乜唔同?自己入去睇睇咪明喇~~補充:其實我係有追妳本日記,只不過當時為了"洗脫嫌疑"而說沒有罷了~在下在此為說謊一事而道歉~

今日又upload了兩大張相上o黎,大家不防去我個相溥睇睇~~其中一張重係同歌手葉佩文一齊影o架!

夜晚同'Felix'&'Eric'兩位哥哥傾o左一陣偈,好開心!雖則只係傾o左一陣,但係好有以前o既"快活日子"o既感覺!三條友,有個重係o係澳洲打o黎... 我地主要所傾o既內容已經係講到聖誕假d日子點慶祝喇... 哈哈~(又係玩,果然重保留住以前o個種幼稚!不過咁先係真我呀嘛~~~)




十一月廿五日 星期一 

人就係咁好奇o架喇!o係到寫少少o野就吸引到好多追問... 我只係寫得"比較含糊"d咋嘛~你個'阿牛'就o係到不停咁問...(從今日起唔再叫'鄰居阿敏'...=P)

經過一日o既努力研究,我終於開始識得點操作部數碼相機喇~~~ 而家只係未識USB接駁埠,整埋之後第日就可以不停咁upload相上網喇~~第日影相scan 相都唔洗再求人,方便得很呢!^^

有交代!今日測驗解答案時起初的確令我有點開心,因為我只係錯了兩,三題~不過到最後的五題,我卻竟然錯多了三題... 唉,失敗!始終都過唔到80呢個分數.(不過都已經好過第一次,都叫做有交代喇!)

古有禍不單行,今我有好事成雙!日前我已達成我今年主要的心願-- 買Digi.Cam..今日傍晚當我補緊習o既時候,我收到一個電話亦都令我好開心~就係我個舊同事打o黎喇~佢話我前排八月尾返工o個陣賺到o既佣已經有喇,遲一,兩日就會過入我戶口.Yeah~有o左呢筆錢,又可以減輕我買Digi.Cam. o既負擔~~~@_@




十一月廿四日 星期日 

傍晚同'Eric'&另一個朋友去行街,在旺角中心時友人決定買一個斜揹的袋(其實睇落又真係幾靚,搞到我都有d想買~~),但又覺得價錢略貴.於是我咪去嘗試去"講價"~ 點知問口第一句人地已經肯減價... 搞到我好冇癮,好冇成功感!(雖則最後都平o左少少~)

今日終於都決心買Digi. Cam.,走去旺角格一格價... 真係唔睇唔知,一睇嚇親... 原來水貨平行貨足足一千大元!!最後我比我心目中更平o既價錢買o左Digi. Cam. 同所有裝備~~開心~~ 夜晚玩o左成半晚都發覺自己唔太識玩,睇怕都要花一段日子先可以玩熟呢部機呢~~~(不過我聽日重要測驗,而我只係讀o左... 哈哈!)




十一月廿三日 星期六 

昨晚同'Eric'行經尖咀時曾到某間酒店"借個方便",點知被我發現原來呢間酒店d保安都係麻麻... o個廁所竟然可以通往一間好大好大o既conference room... 昨晚呢間conference就正值擺酒,如果我衰o既話,我諗我真係可以走入去食返餐飽先走都得呢!(最衰當晚係食完飯先行去喇...=P)

今日用了一個下午,終於完成埋management presentation 的powerpoint... 這份powerpoint我已經避了數多天了!因為我成日都覺得要做好耐先做得晒!雖然最後都用o左我半日,不過我已經覺得好快o架喇~~

下午睇到友人的日記話佢今日要做手術,重要留院呢.雖然唔知佢要做咩野手術... 不過希望佢手術順利,聽日精精神神咁出院喇~~~(唔知住院對呢位友人算唔算係一件好事呢?因為我還記得他近日曾說想住一住醫院呢...=P)




十一月廿二日 星期五 

悲!兩點半放學後走到電腦室努力o左三個多小時做Java,最後竟然都係冇法順利完成功課...唉!最重要係由心情高漲的我搞到我冇晒心機,全都係拜呢份功課所賜喇!不過都好,被我發現點解呢排自己成日話無聊,覺得冇乜意義o既原因... 原因就對我長時間對住部電腦喇!無論做功課或玩都成日望住佢,就係咁搞到我精神同眼睛都好疲倦,試問之後又點會再有心情/精神做其他o野呢?

傍晚同'Eric'+兩個佢o既朋友仔行街... 點知'Eric'話要去"信和"買唱片,點知行到去o既時候,竟然被我再一次証明到呢個世界真係有歧視o架!你話呀,我地大家一齊行上三樓,點解d人竟然會同我d朋友講:"妳買有8折!"呢番話呀!我諗當時呢番說話一出,一定令好多男仕好後悔...後悔點解唔帶埋個女性朋友"入貨"呢!(嘻嘻~~~=P)




十一月廿一日 星期四 

勁勁...勁!今日我地2:30開會,我地只係用o左短短幾個"字"時間就開完.更勁o既係我用短短一個鍾內搞掂埋個powerpoint!都真係不禁要讚o下自己~~~嘻嘻~~~




十一月廿日 星期三 Eric之回歸!!

o係到同'魚文'講聲生日快樂先!遲d同你再慶祝返呀o下...(最好就去Shooters 52, 再由你去簽卡喇...=P) 另一樣開心o野就係'Eric哥哥'今晚就會返香港喇~~期待...期待住你o既歸來~~

話說下午同'老B'食完飯行"又一城",我地o係扶手電梯到撞到一個好有禮貌o既人... 基本上係禮貌得有d過份,我地離扶手電梯好遠佢都等埋我地先上.點知近身一看,原來...!原來係'蔡X樺'!!(好驚~~~咁都被我撞到~.~) 見佢遊手好閒咁行商場,令我諗到原來"冇o野做"o既人就係可以咁"休閒"呢...=P

開開開....超開心!!今日係'Eric'之回歸,從此我就會玩得更開心喇~~當然,更重要我是我又可以毫無保留咁暢所欲言!!見見我這位"心理醫生"~~ 好讓我這個"病人"的"病情"暫時得到舒緩~~^^

夜晚睇newsgroup睇到一段"可愛的"文章,收文人稱之為"溝女辭典",大家不妨睇睇...好得意~


 我們還是當朋友好了 ---> 其實你還是有多餘的利用價值

 我想我真的不適合你 ---> 我根本就不喜歡你

 天氣好冷喔,手都快結冰了 ---> 快牽我的手吧,大木頭!

 我覺得我需要更多一點的空間 ---> 我不太想看到你啦...

 其實你人很好 ---> 我不想跟你在一起

 你人真的很好 ---> 我真的不想跟你在一起

 你人真的真的很好..... 真的 ---> 豬頭, 離我遠一點

 我暫時不想交男朋友 ---> 閃邊啦 !!! 你還不到我心中帥哥標準的一半

 我不想傷害我們之間的友誼 ---> 我們之間也永遠只會有友誼

 你這樣讓我感到很尷尬 ---> 我無法強迫自己說我不想說的答案

 我的心中牽掛著一個人 ---> 那個人是我特地虛設用來擋像你這種人的

 我們現在的關係很好ㄚ ---> 你再給我得寸進尺試試看 !!! 豬頭

 朋友才是長久的,不是嗎?---> 想當我男朋友,自己不照照鏡子

 我從來沒想過這個問題說--->這根本是不可能的嘛!別做白日夢啦

 我不適合當個情人--->廢話,沒有人會適合當你情人的啦

 你給我個時間考慮--->沒給我時間,我怎麼跑得掉....

 我不可能變班對的--->雖然理由很爛,不過擋你措措有餘啦

 我們的距離太遠了--->當個朋友就不錯了,還想有的沒的

 你的條件真的很好--->你的條件真的還沒好的我想要的地步

 可是...這樣好怪..真的很怪--->你這醜八怪..怪成這樣還想吃天鵝肉?

 我覺得男女之間是真的有純友誼的---->對,沒錯,我如你之間就真的只可能有純友誼

 坐妳的機車可以呀,騎機車很方便的--->窮小子,沒汽車還敢來接送我

 但你的溫柔我會銘記在心的--->情聖!!光溫柔是沒用的,還需要錢錢..

 其實我一直沒有勇氣接受你-->看到你差點嚇死...哪裡還有勇氣?

 你真可愛-->你真幼稚

 你真的很可愛-->你真的很幼稚

 你真的是超級可愛耶-->豬頭!!不要像小朋友一樣黏啦!!!

 遇到你,總會讓我重溫童年的快樂-->感覺就像阿姨遇到小弟弟一樣

 我覺得你很乖耶-->穿得俗不拉基的,一看就知道跟你出去不好玩

 我們應該給彼此一點緩衝時間-->給你時間滾!你再不走,我真的會翻臉!

 上次遲到真的很不好意思-->先遲到給你看,下次我絕對不會到!

 別人都說你條件不錯耶-->我從來沒這樣認為過。

 如果我們早一點認識就好了-->說不定你會早點覺悟。

 別急嘛,我們可以先作朋友-->我可以趁這個時候找男朋友




十一月十九日 星期二 失敗失敗~

今日由於太早起身的關係,於是乎諗住訓多一陣... 點知一訓醒已經係11:21分,(而我就11:30就要上堂喎)咪唯有即刻趕返學... 最後都好彩只係遲十分鍾,不過就此就有個不良紀錄喇... 家因本人我(返學)係從未遲過到o架!失敗失敗~




十一月十八日 星期一 

今日下午去了CSC用電腦,期間'魚文'借用我部電腦o黎print一張紙.點知堂堂一個讀o左成年幾o既人竟然擺紙落printer擺錯o左位!重唔只一次喎,而係足足四次喎... 最後原本諗住慳返一張紙o既佢都係要用多兩張紙...>.< (希望當事人唔介意喇~不過介意都冇法喇,都刊登o左喇...=P)

開心~今日收到朋友寄俾我的相!事緣係八月十六日我去了睇演唱會,但由於我與'大亨'都冇帶相機,最後唯有硬著頭皮去搵人幫我地影相...真係要多謝妳呀,Wylie!不枉我當日搵妳!(其實o個晚我亦都有叫過d娛記記者寄返d相俾我o架!但係對比之下,班記者哥哥應承o左之後又潛晒水,真係差勁!)>'大亨',見到此段請聯絡我以便拿回你的相片<

夜晚被"鄰居阿敏"拉o左出街,正當苦思緊有乜好去處之際... 竟然又被佢成功咁呃o左我去花墟...=P 不過都好,coz'今晚去花墟呢d空曠o既地方可以睇到星星,而且今日係第一日有獵戶座流星雨o既日子!其實今晚睇到流星真係算好彩喇!因為今晚o既天氣真係好鬼惡劣,我地都係睇到幾粒咋...之後o個天又被密雲所掩蓋~不過anyway,睇到流星咪得o羅~理得佢多定少呀!再講多一樣o野,我地去蔥墟o既原因係因為呢個大小姐要玩韆鞦,其實我細細個到而家都驚玩呢樣o野,因為驚掉下來會發生意外!(尤其係掉下來後還要再被韆鞦撞多一o下!)




十一月十七日 星期日 

今日整日都很忙碌... (辛苦命~)起來後便一值做功課,連續做了三,四個小時才休息一會...最後都完成晒CCIV(中文)的功課~~不過由於時間關係,到了晚上八時起我便休息下來,休息並不是因為我懶!而係我細路亦都要用電腦,為了公平起見,我只好放棄我的晚上時段給他...>.< 不過正如我說整日都好忙碌,我便將我的時間放在電視上... 一邊睇TVB 的"玻璃樽",一邊睇TVB明珠台的"美麗有罪"(但最後才記得原來我是曾經看過的!)再見埋ATV國際台的"The Mask of Zarro (黑俠梭羅)",好不快樂呢~~




十一月十六日 星期六 

是晚同'康康', '納爺', '祐哥哥'&'佳哥哥'去了觀塘"福X"酒家打邊爐,本來大家未上去之前都睇到係$35位... 但埋單時竟然係$70,足足是原本數目的兩倍!!茶錢另計,芥醬另計,乜o野都另計,又要加一...可見這是一個多麼卑劣的騙人技倆!




十一月十五日 星期五 

今日做Java功課比自己預期的快,雖則最後都不能在一小時內完成,但我都只係用o左一個鍾零十五分鍾就完成,都算幾快呀,係咪?^^

夜晚走o左出去唱K,估唔到冇唱一排(實質只有兩,三個星期罷了),又出o左好多新歌... 忽然間覺得自己好out添...=P 講返先,今晚唱o左好多首合唱歌,例如:"心寒", "來到今天", "不知不覺"等等... 不過我列出呢幾首o既原因係因為我呢幾首我覺得大家都唱得好"合拍",好有默契,好難得可以唱合佰歌唱到咁正...開心開心~~~~




十一月十四日 星期四 

今日覺得一切都很不順利,先有我想食o既飯賣晒;再有歷時三小時"完美的討論";最後還被我知道流星雨原來係下星期二先係最多的一天!加上近排的煩惱~~~ 更加令我煩上加煩!唯一令我較為開心的是今日我排隊拎到"雞蛋布丁"~~~ 同埋知道我d好朋友已經逐一返香港喇....^^"(真不知這天是可熹還是可悲)

討論完同'邪邪'去聯合"替天行動"(即搵人挑機)... 但係我地唔係單純咁去立亂挑機o架喎!而係根據'邪邪'o既"壞人理論"而行動的.經過良久的等候,'邪邪'終於向佢所認定的"壞人"郁手...不過佢果然係正義o既代表,o係三盤兩勝的遊戲中,即使佢贏了第一局,佢亦會讓返一局,以示公平... 如是者,'邪邪'最後就連輸多鋪!但值得一讚o既係佢o係有極大勝出的機會下(三盤兩勝中贏了第一局),佢依然照讓局,呢種"正義精神"唔係人人做得到o架!在下十分佩服佩服~

橫掂講開,又講多一樣o野喇!話說曾經何時有友人問我點解我每天的日記都不是第二天才登出,而是即日(不是晚間)登出呢...日記應該係每晚寫返"每日的回顧"呀!雖則我的朋友說得頭頭是道... 不過其實我寫這個日記只不過是讓懂我而關心我的朋友一起分享我每天的感受,及了解我每天所體驗;更重要的是我只是留給多年後的我細細回味"以往的我",就是這麼罷了!但可惜的是我發現自己的記性愈o黎愈差,所以我只好把所想到的以第一時間記錄下來,免得我忘記記錄低,他朝回味時發現什麼都沒有,令自己飲恨.知冇!=P




十一月十三日 星期三 

今日又有新文章,題為愛要互動才長久.可能大家會問點解呢排會有咁多文章出現... 因為我呢近排成日整理我個電子郵箱,(coz'就爆)咪一次過post返d我覺得幾有"味道"o既文章,同大家一齊分享o下喇~ 下午又有搵多一個舊game,其實就冇乜特別,只係呢個所謂o既game係用excel整喇... 佢可以媲美"歲數神算"呢...=P

今日終於被我諗到點樣利用今日呢5個鍾"空餘時間",就係去6/F電腦室打D2X~~~XDXD 不過當我去到裝緊o既時候,就發現o左有好多問題喇...首先係我冇1.09Patch, 因為隻game要用返呢個patch先得先架!第二,就係我竟然冇帶個crack file返o黎... 最後,我又再一次裝唔到隻gme喇...激氣>.< 如是者,唯有睇o下d功課喇,點知原來我係未做完功課o架.咪即刻做埋去...好彩有再返睇咋!唔係都唔知點算!




十一月十二日 星期二 

今日又一次偷入DCO Lab,再一次得到DCO的yr2哥哥指點,終於改良兼完成Java喇!開心~~又少一樣牽掛~~

唉,好慘...又一個人食飯喇!不過呢幾日都應該有好多準畢業生o黎城大影相,睇怕一個食都可能係一件好事呢,至少唔洗同人迫,一個人又冇咁難搵位呢...(自我安慰中~) 聽日重有成5個鍾break呢...都唔知點算好呢!

夜晚又收到朋友的E-mail... 又係一遍文章,唔知大家重有冇興趣繼續睇呢?=P




十一月十一日 星期一 

今日又再上載了好幾張相相!不過好多都好正,其中一幅係Photo Hunt~~~~而且又有彩虹喎!=P

下午,我又去了聽CCIV的講座,真係估唔到原來今次呢個先係聽得最辛苦o個個,個教授重要好好人咁同我地"加時"呢!>.< 之後就去o左DCO Lab.做功課,點知一做又做o左成三個幾鍾喇,最後放棄走o個陣即刻覺得好肚餓同埋要第一時間去廁所... 証明頭先我係幾咁埋頭苦幹咁做功課,d意志幾堅定呀... 可惜呀,份功課都係做唔完,只做得七八成...=(




十一月十日 星期日 

12:30 今日update o左: 這刻心情的分頁... 大家不乃去睇睇,睇o下有冇聽過呢隻歌喇,我個人覺得好好聽o架!(我一向都有介紹d好歌俾大家聽喇,信得過我就應該去download o黎聽o下喇~~^^~~)

16:09: 今日其實係我以前間學校的Garden Fe^te(即開放日),只可惜今年Eric重未返,而且又冇人陪我上去...暇後我當然又錯過了一年一度的開放日... 不過算喇,後正上到去又係冇乜意義.因為桃花依舊...所有我識得o既人都已經唔o係到喇!

凌晨01:27: 收到好朋友的一封電郵,睇到一遍好好o既文章,大家要去睇睇呀!勁鍾意信入面一開頭的一句"沒伴侶的,可當分享;有伴侶的,也可當文章."




十一月九日 星期六 

今日係心思紊亂o既一日,好似不知不覺的又過了一天咁,簡直可以用"渾噩"o黎形容今日o既情況!唯一叫做有d意義o既o野就係終於完成晒CCIV的網上練習,就係咁多!

今晚o個天好光,搞到我連一粒星星都睇唔到...>.




十一月八日 星期五 

唔知係咪因為就o黎有流星雨睇呢(天文台話月中16-18號會有流星雨~),凌晨行返屋企o既時候我竟然又再次見到好多星星,足足有成11粒咁多!(比起上年我見到七粒o既重多!)不過我今晚不但見到11粒星星,而且有幾粒重係閃閃o下o架!超正~~~

去朋友仔o個網頁見到一個超正o既gmae叫Air Hockey,大家一定要試試呀!!

今日落堂後'邪邪'同我講起'濃妝',咁o岩我上網又見到一個"濃妝"!只不過呢個係淡妝與濃妝的分別,大家去睇睇喇~~好似玩緊photo hunt咁~~大家又搵唔搵到兩幅相o既分別喇?~~ 講返呀,'邪邪'講o既'濃妝'同呢兩幅相o既妝真係"冇得揮"呢~ 若真係要比較起o黎,呢兩張相只不過係"超淡妝"呢~~~~=P 呵呵~ 不明者,不需明;明白者,亦不需問~答案在心中~




十一月七日 星期四 

今日上lecture同同學仔傾開電影,講講o下又講返一套我覺得好好睇o既戲,但我又講唔出中文戲名喎!只知道英文係Sweet November... 不過經我今日一查,終於搵返套中文戲名,不來叫偷心之約,呢個中文譯名比起我亂講o既更有feel~~ 講o左呢套,順便講埋另一套喇,佢就係"兩棵絕望的心"(Leaving Les Vegas)呢套戲好勁o架!以前拎過好多獎o架...我勁鍾意佢其中一段講男主角送一隻耳環俾女角o個段,而且係由影帝"尼古拉斯基治"(Nicolas Cage) 主演o架!~~~

今日夜晚返去同返個舊同事食飯,見返以前的同事,今次的感覺好好多喇~~至少都有傾有講...(都係多得阿Pat肯應酬我~) 之後去o左西灣河食飯,去o左一間好細o既台式飯店食~都唔錯喎...碟頭飯 + 餐湯 + 紅茶/綠茶都係$30,加多一蚊就可以將飲品轉做大杯!要讚一讚o既就係佢個餐湯好墳相好正... d湯係用一個中茶杯裝住o架,有別於一般茶餐廳的碟仔,好特別!而且個湯都好有水準呢~~~(對唔住,大家睇緊呢個唔係廣告.我亦都冇收到人地老闆o既錢,純粹係我對呢間餐廳o既評語喇~)




十一月六日 星期三 

今日收到一個感人的url,唔知大家睇完有冇少少感動呢?

原來CityU真係唔錯喎,除o左影印唔收錢之外,color printer又任用,實在太正喇~今日我趁住有d時間,上o左去upload o左d相~~係前排我去返工+近期去唱K的相.好可惜,唱k大合照d相全部都係失敗之作,所以冇upload上去lu...~.~

開心~昨晚由於我報了名上CSC的電腦堂,一上就要上到十點,足足近四個小時呢!所以我咪叫屋企人食飯先,而我自己就食飽算數.不過大家唔好以為我食普通o既麵包,(呢幾日咁凍再食凍冰冰o既o野我會死o架...=P)所以夜晚我所食的飽係"大飽"!佢唔係一般的叉燒飽的size,而係大好多好多的!入面d料更加可以用豐富o黎形容...有菜有肉,更加有鵪鶉蛋呢!好味好味~~

夜晚因過度集中的睇BST notes的關係,睇到對眼睛都好辛苦,唯有走去睇o下朋友友的網頁輕鬆o下喇.點知被我睇到一遍友人的文章,文章內容太致明白.但磁鐵不是異性相吸,同性相拒的嗎?^^ <~嘻嘻~~小師妹,妳錯了~>




十一月五日 星期二 

送給我的讀者朋友

夜晚收到一個爆笑作文,其實呢d文章我多年間已看了不下數十次... 但今日還是要介紹給大家睇,係因為太佩服能作出此文的人的膽量及其靈感之恐怖呢!

夜晚聽到小春的"該我的愛"(國語歌),又係因為呢首歌有假音而聽...嘻嘻~不過睇睇o下歌詞,我發現到我原來係解唔到"該我的愛"呢買個字係點解喇... 唔知有冇人識得解呢?(唔係睇完歌詞的意思,而係齋呢四個字的意思)

節錄自該我的愛  陳小春

該我的愛 會不會再來 我一直不明白
傷心算什麼 我就快要習慣遺憾




十一月四日 星期一 

大家係咪開始覺得有d寒意呢,因為係我水瓶座o既寒氣太勁喇...呵呵~冬天o黎喇,大家要加多件衫喇,唔係凍親就唔好喇...~.~ 查實冬天都唔錯,至少對我呢個多夜間活動o既人o黎講又多個活動,就係睇星星!可能係因為冬天冇乜雲o既關係,冬天睇星真係清楚好多o架!就連平時我指住都睇唔到星星o既friend都睇到星星,而且冬天o既星星又真係好似大粒d同光d,唔怪之得所有天文學會都係o係呢段時間舉行觀天營喇!想睇星星o既朋友千其唔好放過呢幾個月o既機會喇...=)

今日收到一個url叫Mind Reader喎,睇落佢就好似好勁,不過都唔你太準喇...=P(可能我唔夠集中喇~)

夜晚勁趕功課... 途中'康康'要我還返部計數機俾佢.但我聽日又冇(需要)咁早起身喎,但係為o左令佢有計數機用,我就搵o左第二個朋友借cal.機俾佢,點知最後竟然係因為時間不合而幫不了他!<~可惜~> 不過都好呀,再一次証明我要"幫手"o既時候總會有人幫我的~~~我真幸福+幸運~^^"




十一月三日 星期日 

嘔心瀝血咁終於都出o左一份中一的數學卷,原來出MC題目比答題目係辛苦好多o架!出MC題目不單要要知道點解答題目,重要估計答題者會答d咩o野錯誤答案而出呢...=P

前兩日掛係做BST功課,upload了兩張相都唔記得俾大家睇睇添...=P
Photo 1
Photo 2
呢兩張相係2001年同一日拍o既,係同一個對象,不過d顏色係咪好唔同呢...=)

夜晚,本想平平安安,安安靜靜咁過返一日.點知又... 唉!諗諗下又令我諗返起呢首歌...(唔知點解唔太開心o既時候都會諗起呢首歌)

深淵  草蜢

漆黑之中不斷去想 
昨日現在實太抽象 
我已覺大疲倦
這晚滿腦凌亂
點起香煙不再想

呼出的煙圈在擴張
活著像夢沒法想像
彷彿如霧裡
消失我的方向

失蹤記憶心中暖意漸凍
我放棄以前追憶添悲痛
彷彿一生都變空
這刻晚空 飄飄冷雨亂踫
那裡有笑容更是冰凍...




十一月二日 星期六  

經內心幾許掙扎,我決定要向一位知己死黨PY講句"對唔住!" 因為我忘記o左同你講"生日快樂",雖則一句好普通,(而且你今年都唔記得我生日...=P) 不過唔知點解好有罪惡感,呢幾日內疚到勁唔開心,又覺得事後補返生日卡好cheap, 郵局又已經截止了.最後,到了今天決定在這日記內向你說聲sorry, 希望你可以睇到及原諒我喇!

今晚去了尖咀一間茶餐廳食o野,當一個侍應問我要咩野飲品時,我就照上次佢教我講的方法落單,叫了一杯"涼茶"(即凍奶茶).但唔知點解,佢呆o左一陣...好似聽唔慣咁,不過大家要知道"涼茶"呢個名係佢(同一人)呢個人教我o架喎...=P (可能佢出奇地覺得點解有人識得講佢地d"術語"掛~)

夜晚睇o左一套戲"魂魄唔齊",冇乜特別感覺,只知道係一套估到o既戲... 好彩係唔洗錢睇呢,嘻嘻~ 之後又由尖咀行返屋企.唔知係咪呢排捱得太多晚夜呢... 一到o左凌晨兩點幾就有少少"心絞痛"咁o既反應,唔係體外o既痛,而係由內臟發出o既痛... 辛苦>.< 睇怕之後o個幾晚要早d訓先得喇!(唔係多多錢都補唔返呢!何況我而家又冇錢~)




十一月一日 星期五  

今日的我好像行屍走肉般... 既沒精神;也沒靈魂.我只意識到自己拖著驅殼走動,而今天的我累得很,(一早8:30重要連上3個鍾堂!) 我我身心又"五內如焚",因為我昨晚只睡了一個小時!這一小時的睡眠時間可說是又愛又恨,愛是因為感謝上主給我一個小時的"充電時間";恨的是這一個小時的時候實在太短了,正當我有培養出睡意的時候,又是另一天的開始了.

哈哈,奇蹟又一次發生在我身上了!我在昨晚凌晨一時後才開始BST的功課,在這交4小時的工作中,我竟然可以寫了一個足7頁的網頁.(難怪經常有人說可以在廿四小時內學識用+寫HTML) 不過做/寫這七頁當西的代價也不菲,我不但要放棄自己的睡眠時間,還,3影響今天的精神.再講,捱到凌晨4,5點係一個極限(對我而言),既眼訓,又肚餓...感覺到身體出現很多問題,辰繼續捱落去一定要有d o野去克服及維持.(如:不停食零食填肚以分散睡覺的慾望) 不過,昨晚的我用了另一種方法去捱到5點,就是"化悲憤為力量".幾好呀!原來"悲憤"呢種力量都很大的呢!至少可以將我的功課做完... 因為我本身冇諗過一晚內可以完成.更加冇諗過自己可以捱到咁夜!

昨晚同友人慶祝呢個萬勝節,竟然要從家�堸蔑s出街慶祝... 哈哈~呢個萬勝節都算古怪喇!(不過點都好,又可一嘗酒精...=P) 邊飲邊傾偈,又講o左好多有關感情的話題... 嘻嘻,我就o黎可以去申請一個"戀愛治療師"o既牌照,因為太多人同我講/討論呢方面o既問題呢...呵呵~(大家要記住喎,我呢個治療師絕對係不懂自醫,不過我根本就唔會有呢方面o既"病"呢...=P 因為由此至終都冇對手呀嘛~苦笑~) 好,講返正題,傾談中我用了一個我同友人都覺得好正的比喻.這比喻就是-- 砌圖.酒後瘋瘋癩癩的內容大致如下:"若想和一個異性朋友開始一段感情時,大家不防把自己和心儀的對象想想,睇下自己諗唔諗到一幅砌圖." 而呢幅砌圖係咪完整的呢?係就恭喜晒喇!不過若然唔係,大家又見到差幾多塊砌圖呢?一塊,兩塊...定係根本大家所幻想到的就只有一塊砌圖而已...如果只見到得一,兩塊"碎片"的話,咁咪即係自己都睇唔到呢段感情o既將來,咁不如唔好開始算喇! 打完呢段覺得自己d表達能力始終麻麻,唔知大家明唔明呢?











         <---back  我的資料  簽個大名啦 !