appetizer at side dressing

kung pinalad kayong nakakuha, nakabili, nakahiram o sa mas madalas ay nabigyan (ko) ng kopya ng tugmaang walang tugma, batid mong di ganito ang nilalaman ng bahaging ito ng aklat. gayunpaman, maari n'yo pa ring matunghayan ang orihinal na teksto sa nakalimbag na aklat. eto: paki-klik. maliban sa appetizer at side dressing at sa ilan pang dagdag upang maging angkop para sa pagpa-publish ko sa internet, wala akong binago sa nilalaman ng aklat.

 

sinadya ko na ring baguhin ang bahaging ito, para sa gayun ay makapaglinaw na rin tungkol sa aking aklat. sa tutoo lang - simula nang mai-release ang aklat noong mayo 9, 1999; gamedyo masalimuot na rin ang inabot ng pagbabakasakali kong ito.

 

unang paglilinaw: hanggang sa ngayon ay 200 kopya pa lamang ang lumalabas. may natitira pa sa imprenta. di ko pa rin mailabas dahil sa suliraning pinansyal. ang tutoo nya'y gamuntik na akong mademanda dahil dito. kaya paumanhin sa mjc press corporation, lalu na sa may-aring si mon mojica. (aayusin ko pa rin ang atraso ko sa 'yo.)

 

ika-2: dahil wala naman akong intensyon ibenta ang aklat (ipamimigay lang sana), wala akong natukoy na outlet upang paglakuan nito. maliban sa white mountains, isang outdoor shop sa makati cinema square, di matatagpuan ang aking aklat sa anumang bookstore. salamat caloy at karen. una kong sinubok na ilako ito sa bookmark, inc. nakapasa na sana at handa na silang i-distribyut, lamang ay wala pang isbn number ang aklat na isa nilang rekwayrments. noon namang naikuha ko na ng isbn no. bigla namang nagbago ang desisyon ng kanilang editorial board. ewan kung dahil sub-standard ang aklat o di nila trip ang nilalaman. malaking opurtunidad sana ang goodwill bookstore, dahil talagang aprubado na ang aklat para sa distribusyon, katotothana'y isinasali na ito sa book fair nila noong nakaraang setyembre, ang siste - wala akong mai-deliber na kopya sa kanila kasi nga'y di ko matubos-tubos sa imprenta ang iba pang kopya.

 

sayang.

 

ika-3: may ilang nakompromisong tula dito sa bersyon niya sa internet. dahil di ito naitulad sa pagkakalimbag sa aklat. esensyal na bahagi pa naman ng tula kasi'y nagsubok akong mag-eksperimento sa porma at anyo ng mga ito. sanhi na rin ng aking limitasyon sa web publishing. ganito sana:

depresyon / ikalawang linya - patiwarik na daigdig:  literal na nakatiwarik ang linyang ito sa orihinal

salamin: ang buong tula ay naka-reverse ang printing. kung kaya mangangailangan ka ng salamin upang mas madaling mabasa ito.

si bojo...sa kaharian ng bungang tulog: di ko magawa ang orihinal na porma nito. dapat sana 'pag itinagilid ang aklat (o kung iti-twist mo ang iyong ulo pakaliwa habang nakatingin sa monitor), may mabubuong hugis ang mga letra. kaugnay rin ng tula ang hugis na makikita.

ganunpaman, may ilang akda namang nag-benepisyo sa internet bersyon. tulad ng:

pre-marital seks: ito'y matagal ng tulang ibinigay ko sa aking kapatid at hipag. kaya lang noong ilalathala na ang aklat, di ko makita ang orihinal na sipi. at dahil gusto ko pa ring isama, nilagyan ko ng kung anu-anong laman. dito sa internet, nahiram ko ang sipi ng aking kapatid at nailagay ko na ang orihinal na tula.

tugmaang walang tugma: ito ang pinakamahalaga sa lahat. paano'y noong mailimbag ang aklat, di ko pala kursunada ang pagkakalay-out ng pahina. mahirap sundan, mahirap basahin, di gasinong readable at maliit masyado ang font na aking ginamit, kung kaya para sa aki'y di nito nakamit ang impact na nais ko sanang ihatid sa mambabasa. ito pa naman ang kumbaga'y carrier single ng aklat. sa pagkakataong ito - ihanda nyo na ang sarili ninyo!

sumbi sa tungki ng ilong (isang limot na epiko): gamedyo pahabol na rin ito sa aklat, kung kaya kahit nais ko sanang magpalikha ng guhit o drowing sa ilang kaibigang dibuhista para doon sa mga bakanteng espasyo ng aklat, di ko na nakaya. nagawan ko na ito ngayon ng paraan.

at higit sa lahat, dito sa internet bersyon, nagkaroon ako ng pagkakataong itama ang ilang maling ispeling, grammar at mga teknikal na problema sa nakalimbag na aklat. di pa rin ako nakakasigurong syento porsyentong maayos na ito ngayon. lalu pa nga't di naman din ako tutoong bihasa sa web publishing. pero ang titiyakin ko sa aking mga kaibigan at mga bagong kakilala, lalu't higit ay sa mga nais makatunghay ng aking mga akda at nagre-rekwes din ng kopya ng tugmaang walang tugma: ang bersyong ito sa internet ay halos walang pinag-iba sa nakalimbag na bersyon. maingat kong binitbit ang puso't kaluluwa ng aking aklat upang masuyong maisanib sa bersyong ito.

 

tutal ay muli na naman akong napasubo sa pagtatangkang ito, pangangatawanan ko na. ito na rin ang magsisilbing venue para sa aking mga bagong akda at ng mga akda mo rin. oo! di ka nagkamali ng pagbabasa - inaanyayahan kitang makipagpalitan sa akin ng iyong mga akda (kung meron). susubukan kong maglaan ng lugar para sa mga akda ng aking mga kaibigan, kakilala at mambabasa. naniniwala akong ang unang pagkabigo ay ang di pagtatangka.

 

napapanahon lang naman sigurong bigyan natin kahit na kapirasong puwang ang literatura sa ating buhay. at titiyakin ko sa 'yo. cool ito!

 

baklasin na natin ang kaisipang, baduy ang isang tao kapag nagbabasa siya ng literaturang pilipino. o kaya'y korni at weirdo.

 

sa pagtatapos, inaasahan ko sana ang inyong mga puna, opinyon, reaksyon o kung anuman hinggil sa website kong ito. ang tutoo niyan, ang inyong mga puna ang pinakamahalagang konsolasyon sa pagbabakasakali kong ito.

 

maligayang pagbabasa!

ika-14 ng nobyembre, 1999
 

Balik sa Main Page