wyman*kingdom

係九九七大奇蹟入面, 阿y好少有咁寫左2個故仔, 講左我地聽...
我仲記得, 0個次佢去左日本, 去日本之前錄既...
我錄起左, 於是, 寫返落來... 大家睇下啦
其實我好鐘意呢2個故仔...尤其係一個島的誕生 (日常失格)
唔知你地又點呢? 阿y又點呢?
唔.....

故事一

話說有一個女仔, 得到某個人好卑鄙好恐怖o既對待, 可能呢, 真實黎睇, 對於觀眾, 或者所有提供收視率黎睇, o個件事唔係咁卑鄙咁恐怖架o者, 但主角覺得係卑鄙同恐怖就係卑鄙同埋恐怖架啦. 然之後佢懷恨在心, 決定做D野. 咁一般比較積極o既叫做"活得比你好", 冇咁積極o既, 的確要搵D仇報, 佢聽人講話落降頭最冇事, 最乾手淨腳, 最甩得身, 最唔犯例, 因為法律未規定落降頭係唔俾落, 要拉人o既.

但係佢唔知降頭響邊, 只係知泰國. 有個朋友講俾佢知, 你想搵泰國野, 去九龍城行一行, 聽講話九龍城o個頭呢, 有好多泰國超級市場, 泰國o既乜野都有得賣. 佢真係去左九龍城o既超級市場, 然後佢入到一間, 同一個人講話:"我想要降頭呀!" 有個人問佢"羅"左16蚊, 然後就俾左一包野佢, 上面竟然有中文呀o下, 你唔好問點解, 呢一個係一個故仔黎, 上面寫住"泰國微波爐即叮即有降頭", 躉入微波爐叮三分鐘就有. 結果佢扐住o個包最後會點呢?

坐緊小巴返屋企o既時候, 卒之忍唔住, 佢決定搵開o個一包"泰國微波爐即叮即有降頭"睇睇係乜傢伙. 佢見到裏面寫住"你將你唔介意o既人o既名左字寫左落去, 然後躉入微波爐, o個度入面係包左六粒好似皮蛋未拆o既野, 就會有降頭o既效果架啦!"

搭車途中佢盤算緊o個盒皮蛋狀o既物體, 究竟點樣發揮降頭o既作用, 令到負心人得到報應o既同時, 佢聽到小巴司機隔離個收音機報左一則新聞, 響吐露港公路有交通意外, 佢o個個負心人, 死左喎.

好多時都係咁樣架, 當你千辛萬苦練左一樣野之後係冇用武之地; 千辛萬苦去o個一間餐廳, 以為可以食到o個餐, 餓左個禮拜, 或者心諗一個月, 我做人o既目的就係食呢一餐, 結果去到係執左o既.

所以有D時候呢, 一個人太有計劃, 總係可以好有問題, 因為... ...(下面省略三千字啦!)
襯仲有得最好盡快.

故事二: 一個島的誕生

佢"渣"住架車響隧道塞緊車o既時候心諗, 一定係頭先個電話有問題, 平時佢會一直響Office做野, 直至某一個人打電話黎, 通常會偈兩分鐘, 有時長D, 不過一定唔會超過三分鐘, 通常佢會講o既第一句說話會係一個答案:"有呀, 好掛住呀!" 然後佢會問返: "你依家響邊呀?" 對方三分鐘後又會講一D野, 然後無論地點遠近, 佢一定會話:"我三十分鐘之後響樓下等你O丫." 每日都好準時. 雖然, 有時佢已經做起哂o個日o既工作, 有時未. 雖然佢從來都唔會記得係準時九點鐘, 但係講完呢個電話之後, 佢就一定會拉開右手邊第一個櫃桶, 即係唔知點解每一張書檯都有一個特別淺o既櫃桶. "ling"起入面o個個黑色長方形盒仔, 同連住o既車匙, 當然仲有佢隔離o個個銀包, 銀包上面o既Sony CMD21手提電話, 離開佢個位, 離開佢間房. 離開公司, 離開八樓, 離開柏譽商業大廈, 離開豋打士街, 離開旺角, 去到隔離o個區o既超級市場, 買一袋今晚要同某一個人要食o既野, 直到呢度為止佢都係每日都好準時, 準時趕得切響超級市場某幾個counter開始將o個日一定要賣哂出去o既鮮"送"菜o係臨收工前減到羊價之前買到佢地. 雖然佢知道樣樣要俾多一倍o既錢去買同樣o既野, 但係佢寧願趕一D, 貴一D, 都堅持咁做.

(a)佢認為令到D本來新鮮而且興志勃勃O既哈密瓜, 燒鰻魚, 栗子蛋糕, 或者係青紅蘿蔔煲牛"展"o既湯料覺得自己要變成特價品之後先至賣得出係一件好唔忍心o既事. 將心比己, 佢唔介意舉手之勞, 搶救到一件得一件, 成者意識裏面佢都以為呢種係一個理論上算得上係幸福o既人, 對任何一件不幸o既人同埋事應該盡o既少少義務.
(b)覺得自己有能力買到D非特價品, 感覺係好o既.
(c)佢覺得自己o係一分鐘前買到D一分鐘之後突然就要收去光采o既物品, 實在有0.0004毫克mission impossible感覺. 好以係一架聯合國維持和平部隊o既直升機救到響險境入面o既塞爾維亞難民一樣, 算得上係平靜生活裏面一D驚險o既感覺.
(d)係最重要o既: 由於佢好清楚呢D食物稍後同邊個分享, 所以即使係同樣o既野, 本質冇變, 即使只係早一秒鐘同遲一秒鐘o既分別, 但係佢又點捨得佢最鐘意o既人食到o既係特價品, 而唔係佢能力範圍裏面搵到o既最好o既野呢?

然後佢即刻離開呢個超級市場, 佢捧住一袋感覺上係當日新鮮o既食物, 走返上車, 經過公路或者隧道, 轉入大街或者窄巷, 每一日, 如常地, 總好準確咁. o係對某個人發出"我三十分鐘之後響樓下等你o丫"o既半小時之後停響某個人面前, 烏低身, 打開另一邊o既車門, 露出佢自從當日下午以黎第一個, 真心o既, 笑容, 以上o既情節佢今日o係隧道口塞埋車o既時候諗番起, 都有少少奇怪, 究竟係自己響速度同時間方面係咪真係有少少天份呢? 定係佢對當日o既交通情況原來係有一分敏銳o既第六感, 總之以往o既每一次, 唔知點解無需要兜路, 又或者行捷徑, 平和咁樣, 保持均速咁樣, 唔特別心急, 又唔特別"咪摸"咁樣, 響三十分鐘之後o個一秒鐘準確無誤咁樣將車駛到某個人半小時之前先至開估o既某一個特定o既接載地點. 最後, 自己o既結論係: 一定係愛情. 愛情, 的確不可思議. 今日, 1998年10月26號, 呢種不可思議o既神奇力量, 以朱不辭而別.

佢清楚咁記得, 響Office一直寫直寫直寫, 以乎寫足一世咁長, 卒之, 佢終於忍唔住需要抬高頭望一望牆上面o既鐘, 7點26分, 為左安全起見, 佢double check下自己手上面o既submarina, 7點36分, o丫係, 佢通常會將自己o既錶校快10分鐘, 雖然佢好少睇, 然後為左更安全起見, 佢打開寫字檯右手邊第一個最淺o既櫃桶, 睇下Sony CMD21手提電話上面顯示o既時間, 伸個頭出房望出面個鐘, 問唯一未走o個位同事依家o既時間, 甚至行過自己隔離o個個位借電話連續打去電話兩次, 中英文報時各一次, 7:27, 7:28, seven twenty-nine, 七點半, 所有野所有人o既時間都好準確, 只有佢o既時間失去正常, 因為佢今日仲未得到一個叫佢放工o既call. 就係呢一個少少o既差誤, 令到佢o既生活, 秩序大亂. 好似一"岳"高頭, 就竟然發現自己響一個陌生o既荒蕪o既, 周圍只有地平線o既平原上面, 個天o個種藍色藍得好怪, 唔知道係由深轉淺, 還是係由淺轉深之中o既一種藍, 係夏天特別長o既日頭, 定係冬天特別早o既黃昏, 當佢發現以乎流落到一個人類時間概念似乎唔再適用o既空間o既時候, 試問, 佢又點能夠相信呢一度呢一點係就係叫做7:31呢? Sorry, 已經係7:32啦.

就係呢個時候, 佢聽到一下怪聲: BBB...呢下怪聲將佢拉番去燈光照得特別白o既Office, 時間仍然唔可以相信. 佢用左兩下深呼吸o既時間, 直到怪聲再之響起, 先至醒起, 係佢o既call機, 一個如果有咩事都可以唔駛當面講o既小道具, 一個佢以為已經先至從背囊o既底部, 舊戲飛, 信用咭存根, 大量超級市場失据中間, 搵番佢個傳呼機, 一個連讀起上黎都有D寸你o既名, 再次見面, 仿如隔世. 因為好耐都冇用呢種曲折o既方法去搵一個咁容易俾人搵到o既佢啦, 你有一個新訊息, 某個人話 M I S S, miss, 竟然係miss. 某個人通常係打電話黎問: "你有冇掛住我呀?" 而佢通常講o既第一句說話係: "有呀, 好掛住呀!" 今次竟然係一個call, 或者應該話一個message, 一個訊息, 某個人話miss, M I S S, 響一秒之間, 佢覺得自己變左另一個人, 因為佢知道某個人, 反常地miss佢, 因為佢知道某個人已經離開佢.

佢仍然"渣"住個車響隧道口塞緊車, 從某個人決定要miss佢, 至到呢一秒鐘究竟發生左D乜野事, 超級市場o既新鮮食物有冇好以一個忠心o既情人一樣堅持要等佢而拒絕特價品, 呢一秒鐘之後, 佢, 同埋佢架車, 同埋呢個世界, 會變成點, 要等過幾日先可以繼續講, 到時我或者會打個電話俾你, 提你響電話等我, 又或者call你, 我會miss你架.

日常失格1號--一個島的誕生
諗, 寫, 講--Wyman
錄, 剪, mix--Karl
過幾日, 997大奇蹟仲有一號A.