Il Joppi, su la fonde di testemoneancis documentâls, nus fâs savê che a Udin "ogni cuintîr al veve la sô bandiere cui colôrs dal comun, blanc e neri, cuntune fasse rosse ad ôr" e che "ator di chê bandiere, al sun de cjampane a martiei a vevin di dâsi adun i riclamâts a lis armis". Se sul bianc (o miôr sul arint, viodût che in araldiche no esistin ni blanc, ni zâl, ma dome arint e aur) e neri di Udin tancj a an scrit e fevelât, sul ros al somee che nissun al vedi dite la sô.

O provarai alore a dâ une interpretazion su la fonde dal ûs dal ros tes bandieris o tai simbui di cualchidune des nazions minorizadis europeanis. La bandiere basche (Ikurrina) e à une crôs di arint suntune crôs di Sant Andree verde il dut in cjamp ros; si trate di une bandiere resinte, nassude tal secui passat dal cjâf dal pari dal moderni nazionalisim basc Sabino Arana Goiri, e il ros al rapresente il sanc intindût tant che etnie e popul. La bandiere nazionâl de Catalunie (Senyera) e à cuatri traviersis rossis in cjamp di aur. La tradizion e vûl che la Senyera e sedi nassude tal IX secul daspò che Vilfrêt il Pelôs cont di Barcelone, ferît in bataie, al veve maglât cul so sanc il standart: il ros al rapresente duncje il sanc dât in difese de patrie. Ros al è ancje il dragon (Y ddraig goch) passant in cjamp tolpât di arint e di vert dal Gales. I tescj nus contin che il dragon ros al vignive puartât in bataie di Sant Dubric (plui cognossût cul sorenon di Merlin) ai timps des vueris arturianis (V-VI secul d.d.C.) cuintri dai invasôrs sassons. Chest standart al larà, daspò de sconfite dai Oms dal Nord (clans britans de Scozie meridionâl), cun lôr ta chel che al è il Gales di vuê. Il dragon al jere il simbui de regalitât galese intindude come vuide e cjâf dal popul (Pendragon, il non de cjasade di Artù, ai vûl di fat dî Cjâf dal dragon): te storie e te leiende i Britans a jerin rapresentâts dal dragon ros. Stes colôr al à ancje il leon rampant in cjamp di aur de bandiere sovrane di Scozie. Si crôt che al sedi il simbul de regalitât scozese di divignince pitiche, ven a stâi chê plui antighe. I Pits a vevin une tradizion ereditarie matriliniâr e cussì i clans scozês che ancjemò in dì di vuê a rivendichin la divignince de linie des regjinis pitis a puartin su la lôr steme un leon ros (i clans reâi di ete plui tarde a an ancje lôr il leon, ma di un altri colôr), tra chescj o ricuardi i MacDuffies, i MacPhees, i MacLareris e i MacGregors che a doprin come sproc "Is rioghal mo dhream" (il gno sanc al è reâl). Leade al sanc e a la difese de tiere e je ancje la mari rosse dai O' Neills vuê usurpade de bandiere inveritade dai inglês pes sîs conteis dal Ulster ancjemò sot di lôr. I O' Neills a son ducj chei che a an par von Niall Noigiallach (IV secul d.d.C.) e la rame di chest clan dal Tir Eoghain e à tant che sproc "Lamh dearg Eirinn" (la man rosse pe Irlande).

Di chest curt viaç o podìn cirî di gjavâ fûr cualchi conclusion che e sedi valide ancje pal nestri câs. Il ros al è il colôr dal sanc intindût come etnie e popul (ancje se al è chel dai rapresentants dal popul) e come difese de tiere e de sô int. O crôt che chest al vali ancje pal ros des bandieris dai cuintîrs di Udin, bandieris che in timps di pâs a rapresentin il popul e in timp di vuere a sburtin il popul a difindi la sô tiere e la sô int.

Viodût l'ûs istituzionâl che il ros al à ta chest câs, o crôt che nol sedi spazi par leâlu a chel altri cjamp di significâts che chest colôr al mene daûrsi, veri a stai chel di riviel, di rivoluzion e di sperance intun avignî plui just. Lis bandieris rossis cun chest significât di fat a son un grum plui antighis di chel che par solit si crôt. A lôr si riferive il grant rivoluzionari furlan Zuan Minut cuant che al scriveve "Us saludi, o flamis di fûc,/ e us invidi a disfâ tun moment/ el sisteme dal sior e dal pu(a)r/ e po ?l mont sarà calm e content". Ma cheste e je za una altre storie...

CARLI PUP (studiôs des nazions minorizadis de Europe ocidentâl)