¿QUÉ YE ASTURCELTA?
Asturcelta ye un proyeutu, ensin ánimu de lucru
(nun arrenda la ganancia),
que tien como envís l'atropar tola información posible sobro la música
folk contemporáneo d'Asturies; ordenala por estayes, pa facela más
comprensible, y ufiértala a la opinión público. Al que se-y pretende
faer ver el descomanáu llabor desendolcáu por muncha xente al rodiu de
la música de raigón, de la nuesa música, un llabor munches vegaes
ignoráu pola prensa convencional y, tamién, pola
especializada.
Esti proyeutu ñaz en
1998 y lleva trabayando nesi sen dende entós, frutu del trabayu
desinteresáu de los sos dos creadores: Hugo Xabel Lavilla y Aspra y Vítor
González.
¿QUÉ AIDANCES PÚBLIQUES O PRIVAES SOFITEN EL LLABOR
D'ASTURCELTA?
Asturcelta nunca nun percibió fondos públicos o
privaos pa desendolcar la so xera, nin siquier los solicitamos. Tolo
que ye Asturcelta vien del trabayu personal de los sos
dos creadores y de les sos propies cuentes corrientes. Nun se recibe
dinero (nin público nin privao) pola promoción de la música asturiano,
nin pol usu de la llingua asturiana y los discos reseñaos
n'Asturcelta tan pagaos col nuesu dinero (sacante tres
esceiciones: "Awen" de Bran, "Revolución Celta" de
Fardaxu -discos que mos fixeron llegar los sos autores-
y la maqueta d'"Inda ya ceu" de N'Arba que mos pasó
Miki, a toos ellos gracies fonderes).
¿POR QUÉ N'ASTURIANU?
Quiziás la entruga más
repetida a lo llargo d'estos años. Asturcelta remana
n'esclusiva l'asturianu como llingua vehicular poles razones que
vienen darréu:
-
Camentamos que los
dos fechos más visibles de la cultura tradicional asturiana anguaño
son la so música y la so llingua, son les nueses dos ayalgues y nun
hai que escondeles, tan ehí y vamos remanales.
-
La música folk
asturiana remana mayoritariamente la llingua, nós que falamos d'esa
música tamién.
-
La llectura de les
más de les llingües romániques del estáu español ye bastante
comprensible pa un castellófonu, polo que la llingua asturiana nun
ye un pilanco insuperable pa daquién d'Alcobendas que tenga interés
por conocer la biografía de Llan de Cubel. Esi mesmu
esfuerzu estra fadra-y decatase de que n'Asturies esiste otra
llingua, una ensin drechos, que los asturianos siguimos remanando
pesie al llabor de represión que desendolquen les dixebraes
alministraciones.
-
La cabera, somos
asturianos y falamos n'asturianu ¿en qué vamos escribir? ¿En
finlandés?
¿QUIÉN YE L'AUTOR DEL LOGU?
L'autor del logutipu
d'AsturCelta y de los debuxos d'Arte Celta, les
caricatures y demás pih.aes qu'alcontraréis na web ye Vítor González
y, si queréis saber daqué más sobro la so obra, nun tenéis más que
visitar la so web
http://www.keltia-art.com
