Adulces foi algamándose'l cuntar con un Festival Intercélticu curiosu n'Asturies, el poco sofitu de les alministraciones, yera dica agora una de les razones, pero tamién los fatos localismos tienen parte importante de culpa. Con too hai dellos héroes y heroínes que siguin puxando por algamar esa fin que ye la de toos nós, dende equí queremos sofitar a esa xente falando del so silente llabor. Tamién tener en cuenta que dalgunos festivales o nueches celtes, qu'equí amosamos nun podemos saber al díi si sedrán a cellebrase en prósimes ediciones, polo tanto dalgunos d'ellos pue qu'angüaño nun esistan.

FESTIVAL INTERCÉLTICU D'AVILÉS Y COMARCA

L'Asociación Cultural Esbardu entama dende 1997 esti festival, que foi superándose colos años. Cellébrase n'Avilés nel branu (aveza a ser la cabera selmana de xunetu), y tamién tien actividaes nos conceyos de la comarca de so. Cunta con invitaos d'Escocia, Eire, Bretaña, Gales, Galicia... Ye'l festival más importante del país, nel que amás de les bandes de gaites y grupos de baille, el so programa complétase con deporte llariegu, grupos folk y esposiciones de temática celta.

Nes caberes ediciones cuntó, a la fin, col sofitu del Conceyu d'Avilés que dica agora nun lo fixera decididamente, amás, tienen la promesa de que l'aportación del Principáu medrará de forma considerable. Dende l'añu 2004 esi sofitu económicu extra yá se notó na calidá de les actuaciones contrataes. De continuar estos sofitos, a la fin, caltendríemos n'Asturies un braeru Festival Intercélticu dignu de nomase asina como ye l'avileso.

http://www.esbardu.org

FESTIVAL INTERCÉLTICO D'OCCIDENTE (TAPIA)

Festival que tien como sede la capital astur del surf, Tapia, nel mes d´agostu. Cola del 2007 son yá 11 ediciones. Yera un festival al que los problemes económicos faien tar pel filo la navaya, pero nos últimos años foi afitándose nuna medría bultable. Ye una de les meyores cites del branu n'Asturies pol so ampliu programa.

http://www.festivaldoccidente.com

LLANES AL CUBO (FOLIXA DEL TARDÍU)

Nesti festival amás de música folk tienen espaciu pa esposiciones de llibros, meses redondes o proyeiciones de cine asturianu, siendo de fechu la cita cultural de mas sonadía del oriente'l país na seronda, dende l'añu 2002. Na so cabera edición, acabante de cellebrase, participaron grupos perafamaos comu Altan, Felpeyu, Flook, Urban Trad, Acetre... y la so programación abrióse a "otres músiques del mundiu" (sic) que tuvieron representaes por Raimundo Amador, El Bicho y Chambao, lo que munchos interpretamos como una apertura a la música puramente comercial que nun tien sen nun festival dedicáu a la música de raigón atlántico y a la cultura propia d'Asturies.

http://www.llanesalcubo.com

FOLIXA NA PRIMAVERA (MIERES)

Dende hai unos años vien cellebrándose en Mieres esta folixa de Primavera que tien como protagonistes a la sidre y la música tradicional. Tien un programa llaráu d'actos que finen nos conciertos de grupos folk de primera llinia internacional y ta afitándose comu una de les feches más esperaos polos aficionaos d'Asturies y de les comunidaes vecines.

CONCURSU FOLK CUARTU LOS VAL.LES

Ye un concursu de música folk d´ámbitu estatal, que se cellebra nel pueblu de Navelgas (Tinéu), y que ta coyendo sonadía nos caberos años. Balbarda de Madrid foi'l ganador de la final del añu 2004. Pa prósimes ediciones igual ye que se convoque a nivel internacional. Suel cayer pa finales del mes de xunetu.

La organización amás tamién asoleya un CD con temes de los grupos finalistes de cada edición del concursu.

http://www.navelgas.com

ALCUENTROS TRADICIONALES DE TREBOLGU (UVIÉU)

La del 2000 foi la so primer edición, los sos entamaores tienen l'envís de que seya'l primer pasu pa que Uviéu vuelva cuntar con un festival folk y, pasu ente pasu, edición tres edición van algamándolo. Cellebrase durante una fin de selmana del mes de xunu cola participación de grupos de gran calidá artístico y con una riestra d'actividaes culturales complementaries.

http://www.trebolgu.com

FESTIVAL FOLK DE L'ASCENSIÓN (UVIÉU)

Cellébrase a fines de mayu, n'Uviéu aprofitando'l tradicional mercáu de ganáu. Nesti festival podemos atopar aparte de los acostumaos conciertos de música folk (nel 2004 ye la so primer edición), esposiciones, mercáu astur y desfiles con bandes de gaites. Los conciertos faense na llábana de la Estación de Renfe.

XERMANDÍA CELTA DE CORVERA

Ya va pola cuarta edición esti festival entamáu pola Banda de Gaites de Corvera. Nesta cabera edición cellebróse en parqueAstur pol nulu interés de la corporación corverana na música tradicional. Cuntaron comu ye la so costume con bandes de gaites, grupos folk y rock.

ALCUENTROS COLA CULTURA ATLÁNTICA DE CANDÁS

Otro eventu entamáu por una banda de gaites, nesti casu la de Candás n'andecha col Ensame Xuvenil Trisquel. Nesti casu les bandes de gaites son les grandes protagonistes.

FOLIXA NEL BRANU (SALAS)

Ye un festival folk que cellébrase a mediaos de xunetu (repartíu ente'l vienres y'l sábadu) nel pueblu de San Esteba de las Dorigas (Salas), y qu'entama dende'l 2002 la Asociación Cultural Sierra Sollera. Suel contar con afamaos grupos asturianos y gallegos, amás d'otres actividaes complementaries (tonada, deportes, etc...). (Nun se cellebró nel 2004)

NUECHE CELTA DE LA FOGUERA DE SAN XUAN (CORVERA D'ASTURIES)

Dende hai dellos años, el Conceyu Corvera na comarca d'Avilés vien entamando la qu'hasta agora yera la "nueche celta" meyor afitada d'Asturies. Nesta nueche cellebrense nel pantanu de Tresona una riestra d'actividaes culturales alredeor de la máxica nueche de San Xuan, una más d'eses actividaes ye la música folk del país y d'invitaos foriatos de gran sonadía comu Fred Morrison o Dervish. Cola llegada al poder del PP y la USPC la vida cultural d'esti conceyu desanicióse dafechu y la Nueche Celta foi otru de los oxetivos de l'actual corporación, que tuvo que recular énte la movilización popular alrodiu d'esta folixa.

NUECHE CELTA D'AYER

Cellébrase en Soto d'Ayer na primer selmana del mes de Setiembre, aprofitando les fiestes del conceyu dende 1996. Cunta con participación de grupos asturianos y foriatos. Siempre participen bandes de primera llinía: Glaz, Llan de Cubel, Russel's House...

NUEITE CELTA DE XEDRÉ (CANGAS DEL NARCEA)

La del 2003 foi la quinta edición y ta entamada pol grupu de bail.le tradicional La Ordaletsa y la Asoc. Cultural Las Xanas. Cellébrase a mediaos del mes d'agostu y quier ser un homenax a la Asturies rural que conservó los vieyos raigaños celtes del nuesu puelu. (Nel añu 2004 nun se cellebró)

NUECHE + - CELTA DE BAÍÑA (MIERES)

Nun-y falta orixinalidá a esta Nueche Celta que se cellebra tolos años nel pueblu de Baíña. El so compromisu col mestizax ta tamién garantizáu con esi encabezamientu, yo, si soi ellos, rexístrolu darréu.

NUECHE CELTA DE GRANDA (XIXÓN)

Una de les nueches celtes col escenariu más afayaízu, la Carbayera de Granda nel Conceyu de Xixón, pa disfrutar de la música y del sitiu onde se cellebra.

NUECHE CELTA DE CANDÁS (CARREÑO)

Nel añu 2004 volvió cellebrase esta nueche celta qu'apruz y desapaez del calendariu braniegu ensin munches esplicaciones lóxiques. Cola del 2007 lleven yá 10 ediciones entamaes pol Grupu de Baille San Félix, cellebraes nel prao Gervasia.

A NOITE CELTA DE PORCÍA (EL FRANCO)

Nel Conceyu El Franco, dende l'añu 1983 l'Asociación Cultural Alameda entama l'últimu sábadu d'agostu esti alcuentru ente'l folk d'Asturies y Galicia. Ye la decana de les nueches celtes asturianes, y equí ta xustificáu falar de héroes como facíemos enanties.

http:/www.oocities.org/es/noiteceltaporcia

NUECHE FOLK DE FITORIA

Vien cellebrándose dende´l 2001 aprofitando la folixa n'honor de San Antón de Padua en branu, cola participación de grupos folk (con esi nome que raru ¡eh!) y bandes de gaites asturianes.

NOITE CELTA DE TOL (CASTRIPOL)

La otra gran cita folk del Occidente asturianu y del vecín oriente gallegu, música folk y barbacoa al llau del Eo.

NOITE CELTA D'IBIAS

Una de les últimes cites en sumase nel occidente del país. Cellébrase en metada'l branu na capital del conceyu, Santantolín. Amás de les actuaciones suel cuntar con un mercáu tradicional, y dispón de zona d'acampada.

NUEITE FOLK DE TUÑA

Nel conceyu de Tinéu, vien cellebrándose nel pueblu de Tuña esta nueite celta, nel qu'amás de los conciertos a la nueche, complétase'l cartel con delles amosances etnográfiques y culinaries de la comarca. Suel cellebrase'l primer sábadu de xunetu. La so primer cita foi nel 2004.

http://www.nueitefolktuna.es