RUIHHLO MIHRING TE HMELMA

V.Lalnghaka Fishery Demonstrator, Saiha.

Ruihhlo awmzia: ‘Ruihhlo’ tih te, ‘Drugs’ tihte hi kan sawi ngunin kan hrebel hle tawhin a rinawm a. A awmzia tak chu, DAMDAWI emaw Damdawi kher lo pawh, mihring tâna ruihtheih chi. Rilru leh ngaihtuahna leh taksa thlenga a tha lo lama tidanglam thei chi apiang chu ‘RUIHHLO’ or ‘DRUGS’ kan ti thei ang. Entîrna. Damdawi hman dik loh avângain miin ‘RUIH’ a chîn phah a. Reilote hnuah a ngawl a vei phah ta thîn a ni. Hetiang hi ‘DRUGS NGAWLVEI’ kan tih ang chi hi a ni.

A dang lehah chuan, miin Zû a ina a tîrah chuan tlêm tê tê-in a in a. A intam tial tial a a tâwpah chuan a taksa zawhloh khawpin a lo inin a lo rui ta thîn a ni. Ngaihtuahna fîm pawh hmang hleithei lo khawpin a awm a. Chutianga Zû a in fo thin avângin a tâwpah chuan, ZU NGAWL VEI a lo ni ta a ni. Hetiang bawkin thil dang pawh a ruihtheihin a ngawl a vei theih a ni.

Ruihhlo mihringte hmêlma anihna :‘Ruihhlo mihringte hmêlma’ a nihna hi sawi tûr tamtak a awm a, a vaia kan târlan theih dâwn loh avângin tlêm a zâwng chauh han târlang ila.

1. Ruihhlo  chu  Mihring  nun tichhetu a ni.

2. Ruihhlo   chu  chhûngkua tibuaitu leh ti tlarantu a ni.

3.  Ruihhlo chu, Ram leh Hnam tichhetu leh ti mualphotu a ni.

4. Ruihhlo chu, Khawtlâng tibuaitu a ni.

5.  Ruihhlo  chuan  rûk  a rûk tîr thîn.

6.  Ruihhlo chu tualthah tîrtu a ni.

7. Ruihhlo chu Mihring nunna suattu a ni.

 Hêng lo pawh hi sawi tûr tamtak a awm a kan sawi sêng vek thei lovang a, hêng kan han târlan ringawt atang pawh hian ruihhlo Mihringte hmêlma anihna a lang chiang hlein alang. Chuvângin, Ruihhlo hi khawvêl Sawrkâr hrang hrang ten an buaipuiin tihbo an lo tum tawh thîn a. Mahse, vawiin thlengin he Ruihhlo hi khawvêlin a tibo tak tak thei lova, chuvângin khawvêlin a buaipui tak meuhvin, keini Mizoram zîmteah pawh hian lo lûtin nasa takin sawrkârin a buaipui mêk chu anih hi. Tichuan, Khawvêl Sawrkâr hrang hrang tena tihbo an lo tum tawh thin dân tlêm han sawi leh ila.  

Kum 1912 khân Hague khawpuiah inhmukhâwmin DRUGS or RUIHHLO tihbo dân an ngaihtuah a. Chumi hnuin kum 1924 khân Geneva khawpuiah conference neiin an ngaihtuah leh a, chumi hnu, 1936 khân Geneva-ah bawk inhmukhâwm lehin rorêlnain a ngaihtuah leh a. Mahse, Indopui II-na a lo chhuah leh tâk a vângin an buaipui chhunzawm thei ta lo a ni. Indopui II-na a tâwp hnu khân, Remna leh Muanna kawnga hmala zêl tûrin U.N.O. a lo piangchhuak ta nghâla. Tichuan, U.N.O meuh pawh chuan hnapui ber pakhata hmang chhovin 1961-ah khân New York khawpuiah “Single Convention on Narcotics” tih thupuia hmangin râl hlauhawm ber phiarin an lo phiar ta hial a nih kha. Drugs or Ruihhlo hmang thîntute heti khawpa khawvêl sawrkâr lian leh ropui tak tak ten an buaipui anih chuan, mihringte tân a hlauhawmin mihringte hmêlma lian ber a ni tih a chiang hle a ni.  

Khawvêl ram ropui ber leh thiltithei bera ngaih, America ramah meuh pawh khuan, Drugs/Ruihhlo ngai an tam ve hle a. Chûng zînga 80% vêlin thilsual lian tak tak khawihin Sawrkâr leh Mipui tân mi hnawksak an lo tlingpha ta a ni. Hêng zînga 80% chuan case lian tak tak an awrh a, 20% te erawh chu mi pângngai hnuailam an niin an nunna chhanhim tumin enkawl mêk an ni. Malaysia pawh khu Drugs lamah chuan zahpuiawm ve tak an ni. Drugs/Ruihhlo ngawlvei 70% vêlin thilsual lian tak tak tiin Jail bang an zût a. A bâk 30% te chu rualban pha ngai tawh lo tûra Drugs/Ruihhlo eichhiat an ni. Hetiang a nih avâng hian, keini Mizo hnam tlêmte tân phei chuan a hlauhawm tam meuh meuh a ni. Hetiang khawpa Drugs/Ruihhlo in a mi a eichhiatzia leh Ram leh Hnam hmêlma anih hre lo hian, kan |halaite chu Drugs/Ruihhlo chuan a eiral mêk a ni si a va pawi tak êm. Hetiang khawpa kan |halaite Durgs/Ruihhlo ngaia an awm hi HNAM MUALPHONA A VA NI TEH LUL EM.

Indopui II-na lai vêl khan, German Sawrkâr ropui leh chak tak, khawvêl Sawrkâr ropui leh lian leh chak inti te pawhin an hneh loh tûr leh an ngam loh tûr khawpa chak pawh kha, Drugs/Ruihhlo avângin an tlâwm anih kha, ava pawi tak êm. Hetiang khawpa hlauhawm leh Mihring nunna tichhe theitu leh hmang thîntute hrem nân Kum 100 liam daih tawh atang khân DAN chi hrang hrang siam a lo ni ta a.

 Chûng an DAN siamte chu hêngte hi a ni.

1)  Kum    1930 khân Dangerous Drugs Act siam a ni.

2) Kum 1950 khân Drugs Cosmetics Act siam a ni.

3) Kum 1952 khân Narcotics Drugs and Psychotropics Substances Act siamchhuah a ni.

4) Kum 1878 khân Opium Act siamchhuah a ni.

 Hêng DAN hmang hian Drugs zuartute leh leitute, kawltute leh chîngtute, siamtute leh lalûttute chu, kum 10,20,30 thlengin Lungina tântîr theih a ni tih DAN an lo siamchhuak ta a ni. Chubâkah, a pawisa faiin Rs 1,00,000-3,00,000 thleng chawitîr theih a ni bawk. A bîk takin, DRUGS khawihtute tân bîka DAN an siam , The Prevention of Illicit Traffic in Narcotics Drugs and Psychotropics Substances Act 1988 hi a khauh in pâlzût mai mai theih a ni lo. Chuvângin, miin a hmanchhin Nî hmasaber Nî chu Lungin lam a pan Nî hmasak ber nî a nî dâwn a ni.

 1. ANIH PHUNG LEH HNATHAWHTE:- Drugs or Ruihtheihthilah hian chi hrang hrang a awm a, chûngte chu an nihphung leh hnathawhdân a inang vek lova chuvângin an nihphung leh hnathawhdân chi hrang hrangte ka han târlang ang a. Chûngte chu:-  

1) NARCOTIC ANALGESICS:-Hei hi NA CHHAWKNA CHI KHAT A NI A, ruihtheih chi a ni. Poppy thlai zînga chikhat, ‘PAPAVER SOMNIFERUM’ atangin a hnai, ‘OPIUM’ an la chhuak a. He Opium atang hian DAMDAWI HLO chi hrang hrang  an  siam  chhuak  leh  a. Chûngte chu  :- (i) Morphine (ii) Codeine (iii) Heroin (iv) Pethidina (v) Mathadone te an ni.  

2.STIMULANTS (HRIATNA TITHO THEI CHI):- He Ruihhlo atang hian HRIATNA TITHO THEI CHI, 4 a awm leh a, chûngte chu:- (i) Benzedrine          (ii) Dexedrine (iii) Methedine (iv) Cocaine te an ni.

 3. DEPRESSANTS. (Hriatna timu thei chi):- He Ruihhlo atang hian Hriatna timu thei chi, chi hrang hrang a awm leh a. Chûngte chu:- (i) Marijuana  (ii) Hasish.        (iii) Ganja (iv) Charas. (v) Bhang (iv) Barbiturate te an ni. Hetah hian chi hrang hrang 2500 lai an la awm a ni.

 (Awm zêl tûr).

Up | Next

A TALE OF TWO CITIES

RC Hnialum

    Hmangaih ten malsâwmna an chan theih 

 nân Hmangaih tun a tuar a tûl thîn rêng a ni.

He pa hi chu ka ngaisâng hrim hrim Hmangaihna a han chawhleh dân atang rêng hian. A suangtuahna lairil atang a lo luangchhuak Hmangaihna lairil târlanna ‘A tale of two cities’ hi chu a ropui dangdai teh thlâwt e.

A thawnthu laimu Sydney Carton’an Lucie a hmangaihna hi a makin a ropui teh e. Lucie-in a tân thinlung biangnona rêng rêng a nei lo tih pawh a hria, a beiseiin a phût hek lo, a hmangaih theih loh vânga thinlung nat a hnêkin a hmangaih theih loh avâng chauh pawhin lâwmthu a la hrilh thei leh zêl a. Chumai a la ni hleinêm, Lucie hmangaih ngawih ngawih a bialpa tân pawh a nunna a la thâp thei leh zêl hi chu Vân rim nam Hmangaihna a tel ngei ang.

 Keiin ka bialnu ka hmangaih dân nên hi chuan tehkhin rual ni hian ka hre thei lo. Engvângin nge ka hmangaih tih hi ka in zâwt fo thin a. A tâna ka tlinlohna zawng zawng te chu sîrah hnâwlin, ka mualphona tûr chenin anin min hliahkhuh thîn a. Ka tân hian a duhawmin a pârmawi a ni. He khawvêlah hian mipa khat tân a piang a ni tih a in hria a, chu chu keima tân a ni tih a theihnghilh ngai rêng rêng lo. Ka hmangaih a ka hmangaih zual deuh deuh ang, a ni pawn min hmangaih si a. Ka thu rêng rêng a dodâl ngai lova, mahse ama’n min pawm theih chin bâk hma ka sawn thei chuang miah lo hian min duh zual tir thin. Ka hmangaih chhan hi sawi dâwn ila beng muka sawiliam zawih zawih ka sawi thei ang. Mahse kan Sydney Carton an Lucie a hmangaih chhan erawh ui hûm pawh sawi tûr ka hre lo.  

Chhan neiin kan in hmangaih theuh a ni a, Sydney Carton-a pawh hian Lucie hi chhan neiin a hmangaih ngei ang a, mahse mak tak maiin Pu Charles Dicken-a hian zuhan târlang miah lova. Lucie-i hian that rûkna riau a nei chu a ni phawt ang a, Behind the scene lam hi Cartona hian a lo hre chiang riau a ni ta ve ang. Lucie a hmangaih dân êm êm hi chu a mak a ni, hmangaihna mak tak, hmangaihna na ngawih ngawih a ni. Lucie bialpa aia a nun a hlan a, a thih dâwn pawh khân hlimna leh lâwmnain a thinlung a khat a nih kha. A lâwmna leh hlimna chhan pawh kha hmangaihna pasaltha tân lo chuan hriat thiam chi pawh a ni lo. A thih hnuah a hmangaih tak Lucie thinlungah hmun a chang (hre reng) reng dâwn a ni tih a hriat chian êm vâng mai a ni. Chu tak chu a ni hmangaihna dik tak chhân lêtna chu a ni.

 Pu Charles Dicken-a hian Carton-a hmang hian hma-ngaihna dik tak a sawi kûr dup lova, mahse a takin a hrilhfiah tlat thung si a ni. Hmangaihna thiltih tel si lo chu hmangaihna tluantling a nih loh zia alang chiang hle a ni.

Up | Next

HLIMNI KAWL A ENG NGEI ANG

F.Lalsangkima

1.       Ka dâwn thîn lungrûkah,

          Hmâna kan Pi Pu nunhlui zawngte,

          An nun mawi leh chhuahtlâng hmun phei duai;

          Rual el leh rûkrûk dawngdahna te,

          Puan ang hnâwlin lungrual ten an lêng,

          Chhûn ni tin sâwmfâng lamtluang zawhin,

          Sial ang in zui e, zai hla sa chungin,

          Lêngi hlim nui ri thangkhâwk vêl nên.

2.       Sâwmfâng hmun hringdup no nghial an thlen meuh chuan,

          Riantuan zai an rêl, lâwm rual nên,

          Chhûn ni lo tlângsânin chawlh zai an rêl, Bûkthlâm a’n,

          Lêngi a saw râltiang au ve, Lelte iangin,

          Chhuihthangvâla’n lo chhâwn, Rengchal iangin.

          Tlaikhua lo nguiin tîn zai an rêl a,

          Sûllam haw in Sial ang in zui e,

          Hlimten vângkhua an lût, mahni Rûn an bêl.

3.       Vângkhua i nghaakchia le hna nih, cawn naak Siang an kai,

          Val upa nih an cawn ter, ziaza tha.

          He inzirtîrna tih loh chu inzirtîrna dang an nei ve lo,

          Mahse an rilruah chi ang tuhin a lo tiak a,

          Entawn tlâk hialin an khawtlâng nun a mawi a ni.

          An khârtung kalh nân suk mai a ni an hman,

          Khualah rei an thang pawhin, Artui pumkhat pawh a bo ngai lo.

          Rûkru lakah râlvên tûr an nei ve lo.

4.       Hun leh kum te lo thar zêlin thang kan lo thar zêl a,

          Tûnah chuan nunhlui zawngte puan ang hnâwlin,

          Hnam dang, Mirâng te tihdân kan la chho zêl a,

          Kan Pi Pu te dinhmun nên han thlîr chuan, Râltiang kan ang viau,

          Mahse thangthar ten mi puan pho, lo seng khalh lamah tan kan la a,

          Kan Pi Pu ten mi puan pho tla an bân thatsak thîn ang kha chu,

          Tûnah chuan tih ngam chi a ni tawh lo, chu a nih hi,

          Tukverh atangin emaw, Bangawng atangin emaw kan in enthla a,

          Engvânginnge puan pho kha i lâk, kan ti tawh anih hi maw?

5.       Chungkhuanu malsâwmna changin, mahni ro in rêl nên,

          Kan hnam hming chawi ngeiin, Autonomous District Council kan nei ve a,

          |hangkhat lian mai pawh ni lo, thang hnih lian zet kan kal ta a,

          Kan din rei ngaihtuah chuan, chanhai te tanpui tu ni vek tawh âwm tak;

          Mahse, a bul A AW B atanga kan tan a ngai leh ta,

          Chaw rum ni lovin, Buhhâwp, Hnute tui kan in pêk a ngai leh ta,

          Hei hi kan ngaihtuah chian chuan hnam dang te hmuhsitzia rêng

                                                                 kan lo nih hi ka ti thîn,

          Engtikahnge, Ram leh hnam tân hlim nî kâwl a êng ve tâk ang?

6.       Auhkîr thei chang se aw, Pi Pu nun kha, auh ruai ruai ka nuam,

          Sîrva iangin thlâwk thiam ila an Rûn In sumtual ngeiah tum in,

          An kiangah zai hla sain, tual lên ka nuam ngei ang.

          Tûn a Nau ang ka tahna hi, tawnmang iangin a bo ngei ang,

          Mahse auhkîr theih chang si lo maw, nunhlui mualliam hnu,

          Duhthu sâm mai maw ka chan tâwk lo ni,

          Ram hmangaih tu i fa chan tûr hi min dâwnpui ve lo em ni?

          I fa hi a ngûrnun iang a ka lên ve theih nân, hna i thawh a ngai ta.

7.       Ami iangin theih ka nei ve si lo, i hrai lêng te hian,

          He ka tah hla hmang tal hian harh zai rêl la,

          I chhûng a chêng Laifa zawngte hi-

          Lungngaihna chirhdûp a kan pilbo hma hian,

          Khuanu malsâwmna i dawn, i finna ngei hmang khân,

          Nang leh i u leh fa, i ram, i hnam chhan la,

          Tichuan i chhûngkaw natna leh, Ram leh hnam natna a dam anga,

          Hmangaihna zawn chhuah, Laifa te tân

          HLIM NI KAWL A ENG NGEI ANG.

I DIN THAR LEH ANG U

F.Lalsângkima

Lawngtlai-V

1.       Chhingmit lênin ka hawi vêl ruai a,

          Ka thlîrvêl kan chhuahtlâng hring dîldêl,

          Ava mawi êm siamtu kut chhuak ropuizia hi

          An mawi ngei e, kan Lai tlâng ram.

          Chu ram khuanun duhtaka a siamah chuan,

          Keini a chhûnga chêng Hringfa leh nungcha tinrêng ten.

          Mahni intunnunna tûrin rian kan tuan;

          Lênlai chênin dârang kan lêng nui hiauvin.

2.       Mahse, tûnah zawng kan ram hring dîldêl chu,

          Thliah hnu chhâwl ang maiin, uaiin an chul zo dâwn,

          Chul mai tûr an inphal mai dâwn em ni? Kei zawng

                                                   (ka phal thei mawlh lo

          Chuailopâr iangin vulzêl zâwk se, ka va duh êm.

          Enteh saw, thlangkawr vai an lo len tâk saw

          Eng thliin nge rawn lên chho hlawm le?

          Kan ram hausakna tinrêng an rût zo dâwn ta e,

          Zah pawh dâwn lovin kiltin an hrût a nih mai saw.

3.       Haiang thangin harh a hun ta e, zuangin tho rawh le,

          Tui lianin chhâwl a lên bo ang mai a, min len bo hma hian,

          Muang lova thawh a hun ta a nih hi.

          I finna leh i theihna, i chakna hmang rawh le,

          Ânka mai a thawh a hun tawh lo a nih tawh hi,

          Nang, thiamna rûnsângkai, i finna kha, lo utawk tûr

                                                          (vawn mai suh,

          Ram hruaitu, nang pawh i dawhkân mawm ngawt kha kil suh.

          Kan ram leh hnam chhan tûrin ke i pên zâwk ang u

                                                                  ( hmiang.

4.       |halai huaisen nang pawh kha engatinge ruihhlo tih

                                                (buaia i la awm cheu,

          I chakna leh i hriatna thazâm kha thlangkawr vai

                             (chuan tih boral hi, pawi, a ti hleinêm!

          An dawibûr i lem zo ta em ni? a van pawi tak êm!

          Mahse, thalai huaisen, chhuahna hun i la nei, a la tlai

                                                          (rêng rêng lo.

          An phuarna che kha hrui ni lovin, an finnain ni, an                                                           ( phuar che.

          I châwnbân kha han en chiang teh, i taksa phu lovin a

                                                          ( lian lo maw,

          I pheikhai kha han en leh teh, a lutuk tawh lo maw, a                                                            ( van pawi tak êm.

          Thlankawr vai tih buma awm chu, i finna ngei hmang

                                                      (khân tho rawh le.

5.       Kan thlang a chêng, Sâppui mingo, ngai lovin tual

                                                ( kan lêng kan ti maw;

          Sîrtiang lêng ve tûr chuan tûn atangin i thawk ang u.

          Mahse, chutianga ti chung si chuan, an tihdân kan la,

                                                (la zêl zawng a nih hi

          An ianga lêng ve tûr chuan tûn atangin i thawk ang u.

          Hnam dang kan Unau ten zah pawh hre lêk lovin,

          Dân lo Dânah neih tîr tumin, Nau chaw barh ang                                          (maiin min barh luih tâk hi.

          Zuam awmin kan awm ta em ni? a va pawi tak êm!

          Ram mipui te kan za a, harhin, min dotu a piang i

                                                          (dolêt ve ang u.

6.       Kan tânna bawih a ta, chhuak theuhvin,

          Kan chênna ram ngei hi tungding leh tûrin,

          Kan chakna leh theihna zawng zawng sâwmkhâwm i la,

          Nehemia’n “I tho vang u khai; i din teh tak ang u” a                                                                  ( tih ang khân,

          He kan ram tluchhe mêk dinthar leh tûr chuan,

          Kei hi ka pawimawh a ni, tih hi in hre thar leh i la,

          |hang lo thar leh zêl tûr ten kan ram pârzu an dâwt                                                                  (theih nân;

          Lai ram leh hnam tân, Lei KANAAN siam tûrin

                           (hnutiang hawi lovin, i thawk zêl ang u.

Dt.5.6.2003.

Up