2004年貓貓日記

2004年貓貓日記

January	February	March	April	May	June
July	August	September	October	November	December

4月了~~時間過得真快~~又到BUILT EXPO了~~大家加油呀~~

April

四月二十四日	甜蜜戀愛	今日朝早同老公去左奧海城食粥,食完去左睇<救命>既早場囉~唔...我覺得套戲都OK好睇啦,唔太差既,始終係港產片,都算係咁啦! 之後我地去食米線,好錫我,我想食咩佢老公真係都陪我讓我,又唔會無啦啦發脾氣鬧我,有啲人唔係呀嗎,鍾意就無啦啦鬧自己個女朋友,又諸多挑剔,真係賤呀,自己又唔照下鏡,不知所謂! 老公今日陪我去剪頭髮,真好,這才是戀愛,好過有啲人偷偷摸摸,似偷情多過似拍拖,我係光明正大的人呀,我仲好ENJOY添~~ 後尾我地去左漫畫王睇漫畫,好開心咁就過左一個下午,夜晚去左黃埔食飯,本來約左老公啲朋友,不過後尾因為佢地太夜先食飯所以冇去到~!下次啦~
四月二十三日	超級無賴	大家知唔知咩叫三"無"?咪就係好似有啲人咁,"無聊,無知,無賴"囉~ 哦,無他既~話說今日我兩位好朋友分別幫我問賤男叫佢比番啲野我,問到我張學生相果陣,有啲CHEAP精唔攞番出黎仲話已經掉左囉~ 哈哈,信你先奇囉,白痴仔~ 只有白痴低能先會仲信你,你啲衰野賤野人人都知啦,唔該唔好再扮野啦,收皮啦,唔該~ 我張相掉左?呵呵,好呀~睇下點?? 你最憎人"呵呵呵"同"哈哈哈"?? 呵呵呵,偏偏我又最鍾意呵呵呵喎,你吹咩?吹我唔漲,又抆我唔長,真好笑~
四月二十二日	搞笑的採排	今日上APP,最後一堂依然唔係好知佢做咩,哈哈,算啦,遲啲溫書自然會明白! 同嘉寶佢地係課室食飯,食完之後LOUIS係電腦播左啲短片出黎睇,好爆笑~~!仲有BUILT EXPO果啲短片,居然影到我同家豪,真搞笑呀~! 之後同佢地採排英文囉,阿成好搞笑,成日都唔記得幾時要講野,嘉寶同小諾一個POINT都拗左好耐,阿華做DIRECTOR,真係好DIRECTOR囉,好開心咁就過左一日~
四月二十一日	何其灰...	本來應承左嘉寶佢地去唱K,後尾有野做去唔到,好灰呀... 唯有等下一次啦~!
四月二十日	好到極!!	朝早上左COMPUTER RENDERING,夜晚唔洗上,太好了!!
四月十九日	人都顛	今日全日都係屋企,勁做SITE MANAGEMENT,真係太好了,只係用左一日已經做好~!THANKS GOD! 真係人都顛呀!!
四月十八日	狹路相逢之恩愛夫妻VS餚底王"賤男"	今朝十點就起左身啦,因為下午要上普通話堂呀,又約左家豪返CITYU食飯,肥豪又遲到啦...!!真係懶瞓呀~~ 食完飯,行出CITYU個道口,呵呵,真係寃家路窄,比我地撞見果個賤男,呵呵,狹路相逢,有人餚底囉~~ 仲話打我地,呵呵,真係不知所謂~~咪又係餚底~哈哈,啲人真係低能,果然係庸人自擾~ 家豪一見"餚底王"就大聲問"喂!果個咪係餚底王?" 哈哈哈,賤男攞住個電話講緊扮笑緊扮睇唔到我地,呵呵呵,好心你慳啲啦,你啲戲好假呀~~!白痴極都冇人信你啦~收皮啦,唔該~! 呵呵呵,我同家豪今日好開心呀~我地真係愈來愈恩愛了,簡直係模範夫妻啦~~!啲人想插針都插唔入啦,唔好妄想了! 上完堂去左釣蝦,今次釣左7隻咋,不過唔緊要啦,同你一齊已經好開心了~! 之後豪豪又同我去食我最愛既米線~食完之後家豪同我一齊搭巴士送我返沙田,好開心呀,家豪送左隻便利商店精裝版比我,有埋速食店同埋火鍋店,好好玩呀~ 多謝老公~~!
四月十七日	玩玩玩之戀愛盒子	今朝好晏先至起身呀~~尋晚玩ONLINE既<戀愛盒子>玩得太夜了!! 今日真係開心,咩都唔做,一起身食左早餐就開始玩啦~~呵呵呵!! 仲有3份功課未做,下星期一定要超級努力去做啦,如果唔係就折墮了... 玩到下午,家豪就黎到我屋企裝電腦啦~呵呵呵~~好開心呀~以後有得玩ONLINE GAME了~~! 夜晚家豪係我屋企食飯,肥豪果然係肥豪,食左兩大碗飯!!!好厲害呀~~!我四日共埋先食到兩碗飯,你仲食晒成枱餸!!勁呀! 今晚你走左之後我先醒起自己唔記得比隻<戀愛盒子>既碟同埋ACCOUNT你,聽日一定要比你先得!我好想同你一齊玩呀~!
四月十六日	寧死不屈	今日12:00已經返左學校,因為應承左GINIA一齊食飯呀,我去左佢課室門口接佢~ 其實呢,我初時係有啲衰人,不過呢,我又覺得,如果我怕左果個賤精,佢咪仲得逞!我先冇咁蠢呀!結果都冇事,果然係咁~! 今日上JAPANESE ARCHITECTURE呀~!KEVIN講得非常好,好開心同埋好留心咁上左一堂!好會努力讀好呢一課去考試啦~放心啦~~! 夜晚又同媽咪去左深水埗食米線了~好辣呀~!
四月十五日	悶死了	今日朝早上DEREK既APP堂,悶死了!!佢講野愈來愈快了..好煩呀! 上完堂同GINIA去左旺角同佢男友一齊食飯~食左意粉,好耐冇食過意粉了,好好食呀~! 食完回CITYU做EDO問卷調查,之後回家了~!收到媽咪既4次未接聽來電,但係打電話比佢又唔聽...做咩呢...?唔理啦,返屋企先算啦! 原來佢去左做FACIAL,哈哈哈~媽咪返到黎就叫左我一齊出去食米線~! 真搞笑,又一次好無目的咁出左去一次~!好彩剛好做完功課姐~!
四月十四日	最後復活	今日係最後一日復活節假期了,真掃興!! 哈哈哈!!!好野!!!收左啦!呵呵呵!!!!!收左咩?呵呵,如果係我既朋友,一定會明白的!
四月十三日	心涼	今日要返學校補課呀~!14:30的TUTORIAL,發生左一件事,雖然同我冇咩關係,但係我覺得有啲人係應有此報囉! 相反,另外的一位就比較慘,好可憐呀... 唉,不過呢,有啲野叫近朱者赤,近墨者黑,咁當局者迷,她中毒太深,救不了,我都冇辦法,算了,日後她自然會明白邊個係衰人了!
四月十二日	咁都得!?	今日做左半日HISTORY REPORT,終於做好了! 之後勁完GAME BOY ADVANCE既牧場物語,好玩呀~! 之後同家人去左街,有樣野好想買,DADDY買左比我,好開心呀~~呵呵呵!以後有得玩ONLINE GAME啦~呵呵呵! 夜晚去和民搵細佬,去左果度食飯,順便等埋細佬放工,好開心又過左一日!
四月十一日	復活節假第四日之天作之盒	今朝好早起身呀,因為家豪訂左戲飛去睇<天作之盒>~ 今朝同家豪食左牛肉粥呀,好好味呀~ <天作之盒>好好睇,有幾次都睇到有D想喊,不過最後都係死忍住! 之後家豪同我去影BUILDING,就行左去大角咀食米線,食完米線去左旺角釣蝦,今次釣左18隻,好多呀~呵呵呵~後尾我地又去影左張好靚既咭相~ 因為我的GAMEBOY ADVANCE既金手指咭唔識用,家豪陪左我去深水埗問下點用,果個好似唔係好想答我,好彩後尾都解決了~ 之後家豪帶左我去黃埔食馬來咖哩,好正呀~我今日又破例食左咖哩啦,今次一定肥死...! 食完飯,我同家豪去左吉之島SUPERMARKET行下,我地好似兩公婆,好開心呀~呵呵呵~~ 好開心又過左一日啦!
四月十日	復活節假第三日之明日復明日	今日又瞓到十點幾,唔...好唔想做功課呀,諗起D功課就煩,食完早餐,做左一陣HISTORY REPORT,又比阿媽引左我出街,照舊又去深水埗食米線呀~呵呵呵~ 之後去左西九龍中心行左一陣,買左芝麻糕食,好好味呀~又去左波仔飯COUNTER買多幾盒,再上左去行左一陣,之後返左沙田! 返到沙田,阿媽去百佳,我要去圖書館攞書,分頭行事好了~嘩,我BOOK果兩本書好重呀! 今晚返屋企食飯~我今晚死都唔做功課啦!懶呀~~呵呵!
四月九日	復活節假第二日之繼續懶	今日瞓到十點幾就起身啦,好攰呀,瞓黎瞓去都咁眼瞓,仲日日都頭痛,唉! 食完早餐開始做功課,唉...冇MOOD呀,放緊假呀嗎,要人地做功課,煩都煩死! 阿媽想引我出街,呵呵呵,最後我都係頂唔順,拿拿聲做完英文份功課,同左阿媽出左深水埗行街~! 今次係我今個星期以來第四次黎深水埗!點解成日黎??呢度好呀,食辣米線加辣唔洗加錢呀嗎,又有得行黃金買GAMEBOY既野,又可以去長沙灣買衫,正呀~! LUNCH同阿媽去食米線,我叫左腐皮竹笙米線,D餸太吸湯啦,辣到我想死,簡直情緒低落! 之後去左長沙灣買衫,阿媽買左一條裙一對鞋比我,佢就買左兩件衫一對鞋,好開心呀~! 買完野,阿媽話不如又食米線囉~梗好啦,求之不得~!不過去左行黃金先,阿媽又買左GAMEBOY金手指咭同埋金手指密碼書比我呀~開心開心!! 再去左西九龍中心,哈哈,果度有波仔飯COUNTER,我同阿媽買左六盒波仔飯呀,因為我爹哋都鍾意食呀嗎,不過好重呀! 今晚都係返去元洲街食米線,食左腐皮豬肉米線,我都係叫特辣呀,呵呵,原來豬肉米線好食呀,太好了!! 返到屋企睇陀槍師姐大結局,車!!搵笨既,都冇結局,害我用左成個鍾睇電視!早知打機啦!哈哈哈...
四月八日	翻舊賬	今日第一日放假呀,早排太忙,冇時間處理好多野,都係時候要翻舊賬了! 有D人真係又無聊,又低庄,正式係"庸人自擾"~! 早排好慘呀,我同家豪都比某人"恐嚇",又話唔好比某人係CITYU再見到家豪,如果唔係就見一鑊打一鑊咁話~! 大家都知啦,我地係大學生,又係"良好市民",梗係驚D嫁啦~ 有見及此,我地今日真係愈諗愈"驚",我地攞埋D証據去左警署報警備案啦~~因為我地真係"好驚"比人打~~梗係要報警啦,萬一我地有咩冬瓜豆腐或者少咁條毛,警察都知去拉邊個吖嗎~! 今日真係妙呀~!
四月七日	充實得不能再充實!!	今朝一早約左家寶同埋小諾,做咩?做英文份功課囉,要影一影石硤尾村,所以一齊去影呀~ 好開心呀,我地相處得好愉快,去左好多地方,影左好多野,10:00搞掂了,之後我地都冇咩好做,我就提議食米線做LUNCH,小諾就話想去買糕點同埋去黃金,家寶就好開心,話今朝好充實,要食好多野同買好多糕點返屋企做手信咁話!哈哈~~結果我地全部都做過了,真係好充實!! 12:30上英文堂,好悶地又上完了,之後同佢地傾番份英文功課,我今日要等15:00! 因為15:00約左IVE既師妹呀,同佢地傾下DESIGN咁啦,都幾好,佢地既DESIGN都幾好呀,不過,時間太少,又好似慢左D啦...但係冇法...LECTURER既問題,佢唔急反而個學生急,通常如果比著係我,我一定唔會理個LECTURER嫁啦,自己做埋個DESIGN佢,個DESIGN係我嫁嗎,做咩要聽佢講,除非我真係好錯啦,否則,CONCEPT對我黎講好重要,我唔會信服LECTURER既DESIGN呀...! 之後幫師妹去圖書館搵左D書借左比佢地,我諗佢地太少參考人地既DESIGN啦,係時候要消化下~~ 大約19:00回家了!
四月六日	烏龍貓之麵包篇	今日本來唔洗上SITE MAN,但係尋晚收到個EMAIL,薛老師要我地返去上HISTORY,唉,冇法啦,返去算了... 返去前去左A-1買左個麵包,返到去就去左薛老師OFFICE問野,好衰唔衰,入到去電話又突然間響,搞到我手忙腳亂,拿拿聲CUT線,可能我騰雞,問完野唔記得左我袋麵包,即刻返左去STUDIO,見到D同學,開始傾計傾到失晒魂,我完全冇發覺自己唔見左個麵包! 同學們問我做咩今日咁有陽光氣息,哈哈...我都唔想嫁...可能尋日去踩單車晒傷左,黑左少少姐... 入到課室,正想搵個麵包出黎食,弊!!唔見左,諗下諗下,先記得自己放左個麵包係薛老師OFFICE唔記得左攞,哈哈...搞到BREAK果陣要問薛老師借KEY去佢OFFICE攞番! 今日我好勤力呀~我去左圖書館借左好多做HISTORY功課既書,不過入去太耐了,唔記得左約左家豪,搞到佢打左11個電話比我,唔好意思呀...我太大意了,令你擔心... 我愛你~
四月五日	下一站...大埔墟	今日真係好,風和日麗,我同家豪去左踩單車~ 真係好耐都冇踩過單車啦,今日有得玩,好鬼開心!! 我同家豪係大圍租左單車,由大圍踩到去大埔墟,沿路的風景好靚,好後悔冇帶相機!! 踩到入大埔交車,好攰呀!! 之後係大埔舊墟食野,D野都唔係太好食呀,不過,算啦,當入黎行下街囉~ 我帶左家豪去大埔好出名既糖水店食野,家豪叫左"雲石豆腐花",我就叫左"紫晴湯丸",好好味呀~ 之後出左大角咀食米線,今日唔夠辣呀...點解唔"心狠手辣"D?? 食完野,因為我同家豪都好攰,早左回家了! 照下鏡子,發覺自己的鼻子紅左,可能今日曬傷了...! 好奇怪呀~~!
四月四日	我是笨貓,你是笨豪!	今日好搞笑囉,我同你都真係笨笨,原來今日係假期,我地居然都以為要上普通話堂,點知唔洗上,呵呵~BONUS啦,我地又可以一齊去食LUNCH,食米線先~~ 好辣呀!食左個肚有D痛,不過係正常既,辣吖嗎! 之後又去左旺電睇下有冇"牧場物語攻略",都係冇...好失望呀...! 晏D同DADDY媽咪去左拜山,之後又去左深水埗,DADDY媽咪同我行左西九龍中心,之後DADDY知我想搵"牧場物語攻略",同左我去黃金搵多一次!哈哈哈!!比我搵到!超開心!終於搵到!有得玩啦!呵呵呵~~!
四月三日	緊密的行程!	今日去左好多地方,同家豪返CITYU,因為想帶家豪去睇BUILT EXPO,想返去支持下D同學,他們企足兩日好辛苦呀..順便帶家豪見下"街坊"~! 去到BUILT EXPO,又同左D同學影相,我又介紹左家豪比佢地識,大家都好開心呀,阿LOUIS仲唔知做咩攞個DV出黎影我地,哈哈哈~~ 之後我地去左深水埗買野,我都仲係搵唔到"牧場物語攻略"呀... 之後去左長沙灣買衫,好攰呀,冇咩心機行,買左一條裙走了.. 出左旺角,依然搵唔到"牧場物語攻略"..夜晚去左"夏銘記"食左碗"魚蛋米"~ 之後因為太攰,所以都係走了...因為我個頭好鬼痛呀..返到屋企,食左粒PANADOL,沖左個熱水涼,冇事了,冇去瞓覺反而去左整理網頁,太亂了,我的網頁簡直像"廢墟"!!幾個月冇整理冇UPLOAD,有了決定!我決定將網頁大裝修~! 好開心呀~又有假放了!
四月二日	超級感動的BUILT EXPO 2004	尋晚同GINIA講電話,BUILT EXPO我都會回CITYU~ 話說因為某D原因,我冇出BUILT EXPO,咩原因就唔好講啦,我怕有D人話我"講是非"啦!總之我係DEADLINE前完成左同埋交左FYP,對得住天地良心同埋自己啦! 今朝係CITYU食完早餐,打比家寶,再去惠卿JOIN埋GINIA,LOUIS佢地,今日我同佢地一樣都著左SUIT,一齊影左D相,之後入左惠卿睇BUILT EXPO 2004 OPENING CEREMONY~ UM,可能係開幕典禮啦,所以開頭覺得有D悶,不過,到頒獎果陣,就覺得幾好睇啦,因為終於知道邊三組同學攞左獎! 雖然唔係自己攞獎,但係都好開心呀~因為睇番三組的作品,真係好有水準,恭喜你地呀~ 12:00,BUILT EXPO 2004終於開始,我行左去GINIA個COUNTER,哈哈,企左5分鐘都冇,居然比JOSEPH拉左我去幫BST做STUDENT HELPER,幫BST COUNT VISITORS既人數!要做到14:00! 14:00,去左CANTEEN食LUNCH,食完返左去BUILT EXPO,因為應承左好多同學仔,等我食完LUNCH返去同佢地一齊影相同埋睇佢地既EXPO,影左好多相,我地仲攞左BUILT EXPO既場刋一齊玩簽名添呀~ 好開心咁又到左16:00,同GINIA去完LOCKER擺野,之後去左CUT PRICE買野飲,之後諗住返BUILT EXPO同D同學講聲BYEBYE就過銅鑼灣中央圖書館借書,做功課~ 點知返到去,比家寶拉左我過去,介紹左四個女仔比我識! 原來佢地係我的IVE師妹!好開心呀,同佢地傾左成個鐘,之後介紹左DEREK,ANNA同埋IVAN比佢地識,佢地有意思想報ARCHI,但係過左DEADLINE,我幫佢地問DEREK,DEREK話叫佢地寫信去BST比佢DIRECTLY申請!好野!!又幫到人! 我仲同四個IVE師妹交換左電話同埋ICQ,睇下以後有D咩可以幫到佢地啦~! 之後去左圖書館,好彩搵到我想要既書姐~~! 夜晚同家豪去左旺角打邊爐,21:00後,好平呀~D雲吞同水餃好好味呀~!
四月一日	超級大整蠱	今日真係好攰... 正確黎講,我尋日8:30返到CITYU趕COMPUTER RENDERING份功課,通頂到今朝8:30,好辛苦,完全冇瞓過覺,簡直眼瞓到想死... 今朝係CITYU食左個早餐,之後搭火車返屋企,好求其咁沖左個涼即刻瞓! 瞓到13:30,唉...DEREK打比我,話收到EMAIL,GREENWICH比左OFFER我,YEAR 3喎...哈哈...真係好...不過我收左線後又瞓唔返...個頭好痛...!! 食左D野,一直上網到夜晚,好攰... 夜晚係ICQ同一個"不知所謂"既人鬧交,其實諗諗下,我都根本冇必要同呢D咁既人嘈啦,因為呢個人都"完全未夠班"同我講野,無他既,有人想攞番個彩姐! 經過呢件事之後,我唔會再咁易原諒三番四次令我受傷害既人,由其是係果D咁既人,笑裡藏刀,真係比佢害死左都唔知發生咩事,永遠要同呢個人保持距離!! 家豪幫我教訓左呢個人一餐,好彩有家豪保護我,多謝你呀~!我好愛你!