| 「壽眉丫唔該。」 唔好問我點解鍾意飲壽眉，正如，你有無問過你自己，你做乜今日要著呢件衫，而唔係著第二件？ 如果你俾到我一個完整而又合理0既答案，我或者會俾面你，今日轉飲菊普。 飲茶0既口味同做人一樣，都係一種感覺、一種選擇、一種態度。無分高低無話好壞，最重要0既， 係自己要承誓選擇0既後果。 「伙計，咁難飲0既，係咪壽眉唻0架？」 「唔好意思，阿生，調亂0左，你飲緊0個壺香片，係隔離檯呢位小姐0既，你0個壺0係佢度。」 「呢位先生，真係唔好意思，飲0左你壺茶。」 「唔緊要，香片0既味道都幾特別。」睇落，呢壺香片都幾好飲。 「幫你沖過壺啦。」 「唔使啦......」 「咁頭先你又話難飲！」 「咁我而家話好好飲咁得唔得丫？」 「算啦，忠哥。」 「係，陳小姐。」 說時遲那時快，呢位陳小姐已經坐0左過唻我張檯。 「呢餐茶我請。」 「又唔係你錯，點可以要你請呢？係都佢請啦！今時今日咁0既服務態度唔得0架啦！」 「陳小姐，我......」呢個忠哥已經一副急樣，驚死被人炒咁。 「得0架啦，你去招呼其他人先啦。」「我班伙計有錯，當然係我負責啦。」典型長髮披肩，黑色 套裝，白色V領TOP，再搭個小巧GUCCI，OL味極濃！清得唻又台型十足，斯文得唻又帶點硬朗。 「呢間酒樓我DADDY開0既，係啦，我叫JASMINE，多多指教。點稱呼？」 JASMINE咪即係香片？佢話未講完，一隻手已經伸過唻。我下意識縮一縮，差D唔記得佢問我點稱 呼。後來先知佢係想同我握手。 「小姓馬。」 「馬生，頭先真係唔好意思。」 「客氣客氣，飲茶飲茶。」 「你唔鍾意飲香片咩？」 「都唔......唔係，不過飲開壽眉，突然間味道唔同，冇心 理準備，有少少唔慣。」 「你唔覺得咁樣好刺激咩？」 我都唔識點答佢。跟住佢已經「飛象過河」伸隻手過我 WEAK SIDE，囉我壺茶，自斟自飲。我冇問准佢，就聞0左一 下佢身上0既香味。雖然我唔識係咩牌子香水，不過，隻味的 確好刺激。至於我手0個杯，係香片定壽眉，我都攪唔清。 「馬生，馬生......馬生！」點解周圍幾張檯0既人都望過唻 呢？ 「喂，佢嗌你呀，懵佬！」後面張檯個肥佬咁樣稱呼我。 「我走先啦，你慢慢飲，張單我會埋，你隨便嗌0野食。」 「咁快？」話口未完，佢修長0既身影，已經0係蝦餃腸粉聲中消失。 我一路飲，一路都覺得後面個肥佬不停「超」住我。我唔忿氣，於是飲飽茶之後，鼓起勇氣，大力 深呼吸，然後擰轉身，大嗌一句：「懵佬！」 點知，後面張檯已經換0左一個阿婆。 「你講咩呀，麻甩佬！告你非禮丫啦！」 飲完餐咁刺激0既茶，精神為之一「震」，總之問佢囉卡片啦！ NEXT>> |
 |
 |
 |
 |