| 逢假期休息，我都鍾意去自斟自飲。因為，成班人一齊飲，你永遠冇機會一個人食哂成籠蝦餃。我 佔有慾好強，如果係我0既0野，我一定會要哂。或者我做人冇安全感，所以咁肉緊自己擁有0既一切。不 過，有0的0野，我永遠都擁有唔到，亦因為咁，永遠覺得0個0的0野係最正！ 「嗨，早晨。」 「早晨。」 「你今日條呔幾靚喎。」 「多謝，我阿媽買0架。」 「AUNTIE真係有品味，幫我問候0下佢丫。」 「多謝多謝，有心有心。」呢種對話，冇幾耐就會出現一次，最密試過一個禮拜三次。雖然有D悶， 但每次都傾得咁開心。 「陣間一齊食飯丫。」 「好呀，勝記等，我去霸位先。」 「嘩，好呀，我最鍾意！記得叫埋你班同事喎。」 「一定一定，咁陣間見。」 佢係ROSANNE，十二樓Managing Director，DEREK SHUM個秘書，亦係我中學同學。以前佢住我隔離 座，返學坐我隔離位，上堂膊頭黐膊頭。不過而家，我同佢0既距離，垂直計有十一層，即係百幾呎；佢 每日對住一個老闆，我就要招呼大大話話十個八個阿叔師奶，因為佢0地都係我米飯班主，如果佢0地唔 落盤，我就聽乞食。 「馬仔，871好唔好唧？」 「871？黃師奶，你問過我好多次0架啦，我次次都話你知，871係賊唻0架，你唔好入貨呀。」 「但今朝好似去得好勁喎。」 「我有幾何累你輸錢先？啦啦啦，話口未完，即係插番落去啦。」 「咁我入咩好呀？」 「黃師奶，今日Ｄ大戶做0野，睇0下好啦，唔係下下都要入貨0既。」 「算你啦，抵我醒你0既，後生仔，囉個潮州柑番去食，你0地D後生，湯水又唔多，蔬果又少，食柑 啦，無核0架。仲有呀，金呀，好意頭呀。」 「咁多謝呀，你睇住機先，我過去招呼陸太，你知啦，黃師奶，佢冇你咁醒丫嘛。」「陸太，我唻 啦。」 「阿Mark，你點攪0架？成個月turnover得咁少？Phillipe多你三倍幾喎！ 你再唔搏Ｄ，好難保你0架。」 「知0架啦，下個月我會做番俾你。」 「你邊次唔係咁講丫...唉...係呢，有冇探過佢呀？」 「有，佢幾好，你放心。我得閒就會去睇佢。」 「阿Mark，唔該哂。」Eugene既係我老細，亦係我老友。佢同我之間 有個秘密，亦係佢繼續留我響度0既原因。 「今晚得唔得閒？」 「Excalibur 等啦，老細！」 做左八、九年0野，乜都麻林哂，而家Ｄ時間好易過。每日返工，都係 諗放工有咩節目。Excalibur 係公司附近一間酒吧，若果無約，我都會落去 打躉。一年三百六十五日，我起碼有四分一0既晚上會0係度過，簡單講， 即係冇節目。 Bar裡面，我識到好多好朋友，比起返屋企對住四面牆，好得多。我鍾 意坐0係門口轉右死角張細檯。呢個「蠱惑位」，令我一眼可以望哂全間 Bar 所有人，我可以睇清楚先至出動。 可能呢個位實在太光猛，好少人夠膽坐埋唻。頭頂的燈光直射落唻， 令我0係呢個昏暗0既空間，顯得更加寂寞。不過，世事無絕對，偶爾都可 以搵到知音人。 「請我飲杯酒好嗎？」 「俾個理由我。」 「我會令你覺得，今晚0的酒會特別香、特別醇。」 「小姐，你飲醉啦。」 「醉？我好耐冇試過。不如今晚就試下？我諗一定會好Romantic。」 「小姐，酒係用唻嘆，唔係用唻劈。何況家陣Ｄ酒稅好重，咁劈法，我不如借把開山刀你劈我。」 「咁唔飲酒，不如傾偈丫。」 「你想傾咩？」 「不如都係叫杯酒先？」 「小姐你真無賴。」 「你驚我冇錢俾咩？我最憎Ｄ人咁孤寒。叫你請飲酒，響度阿芝阿佐，你知唔知我係邊個？我屋企酒 窖Ｄ酒，多到可以浸死哂你Ｄ衰男人！」 「我屋企Ｄ特價粟米油，都一樣多到可以浸死人。老實講，我真係唔知你係邊個，我淨係知你就唻會 被人帶走。」 說時遲那時快，小姐後面兩個戴住黑超0既西裝友，已經一左一右挾持住佢，帶離現場。登上門口一 架，已經準備好的BENZ。「麻甩佬，我唔會放過你架！」 Eugene剛剛唻到，佢問我頭先發生咩事，我話我被人企圖性騷擾。但Eugene忽現露出既淫賤、又衰格 0既眼光，並向我講出一個，難以相信的事實。 「你到底知唔知頭先果個係陳大潔？」 哦，原來係鼎鼎大名的「娃魚女」。整埋哂Ｄ乜丸物丸，攪到全城無論係瘦骨仙定係肥豬扒都買唻食 ，0徒哂佢地Ｄ錢。我問我老細：「佢都唻呢Ｄ地方？乜唔係應該去Ball場0既咩？」 「你唔係呀嘛？你有冇睇名人版架？佢被阿邊個個仔飛左丫嘛！」 「即係邊個？」 「咪邊個囉！」 我冇再追問究竟係邊個，因為就算佢係邊個，又或者係邊個個邊個，都唔關我事，我最憎Ｄ沽名釣譽 0既人。 不過，我點都估唔到，0係唔夠十二個鐘頭後，呢位被邊個個邊個飛左0既小姐，竟然坐響我 Office 會議室，同大老闆傾緊偈。 「阿Mark，入唻丫！」 NEXT>> |
 |
 |
 |
 |