夜 晚 送 佢 去 巴 士 總 站 搭 車，我 o地 一 路 行 都 冇 傾 偈，我 就 撟 埋 隻 手 行，
怕 佢 失 驚 無 神 拖 隻 手 埋 o黎 咪 死 ... 我 都 好 難 講 自 己 會 唔 會 又 再 一 次
好 順 勢 咁 拖 住 佢，不 過 其 實 姐 夫 照 顧 o下 自 己 個 姨 仔 都 好 閒 o架 o者 o下 話！
...... 不 過，我 為 o左 等 佢......應 該 係 等 大 家 都 唔 好 再 胡 思 亂 想，
o係 站 頭 等 開 車 果 陣，咪 同 佢 講：
*〔在 " "中的字，語氣較重〕
我：（突然開聲，打破沉默）妳有冇散銀搭車呀？"姐夫"有喎！
君：我用八達通...
我：咁"姐夫"幫妳拎住個袋呀！（佢果本 F4 畫冊乾番，不過有
o的用 sign-pen 畫o既畫就溶o左）
君：你又想好似今朝咁樣呀？（妳仲想o黎，唔同妳玩啦！）
我：（見佢冇乜反應，咪試o下直接o的同佢講o羅）...其實我係
妳"姐夫"...妳又係我個"姨仔"喎，如果妳有o的乜o野事...
我意思即係有好多o野我做"姐夫"o既，幫到妳o既我一定會
幫...）
〔巴士門打開，開始上客〕
君：（開始有o的唔耐煩）...你係度up乜o野呀？
我：（橫掂都係，再直接o的）"但係有o的o野真係幫唔到就係幫唔
到o架啦！"...
君：......（呆o左咁企o左o係度，幣o勒！我心諗係咪我真係直接
o左o的呢，搞到佢受唔住呢）
我：我"老婆"即係妳"家姐"近排o既事，已經搞到佢"老公"即係妳
"姐夫"我頭都大晒...（好似有o的格硬o黎咁，不過好難先可
以講到咁流利，之前o係個心入面採排過幾次先敢講出o黎）
君：（仲犀利過京劇果o的變面，話喊就喊）嗚嗚！..."如果你唔
肯幫我o既話，就冇人可以幫到我o架啦！嗚嗚嗚！"...
（嘩！成晚最直接o既就係呢句！）
我：唔係咁o既意思...不過...如果...真係咁做...會好對妳家姐
唔住o家o麻！（唉！如果我o係睇 Twins 果陣都識得咁樣諗，
就唔洗有咁多事發生）
最衰我又講到口疾疾咁（我最怕有人o係我面前喊），我估
佢都未聽晒我講完呢句，就一枝箭咁閃o左上巴士，可能係
佢怕醜（話晒人o地都係個女仔o黎o家嘛），佢上到車都冇
同我示意拜拜，就連個頭都唔敢拎過o黎，巴士亦慢慢駛離
車站，我一路行番屋企，一路諗，今日自己係唔係好過份
呢？好似傷害o左一個好單純o既女孩子咁，我驚佢真係會
自殺...唉！近排咁興...
點知番到屋企仲驚，簡直係一場大逃殺！原來阿欣佢可能
係猛掛住玩 Winnie the Pooh，我又疏忽o左啦（又要睇住
阿君），一時唔記得o左食葯時間...阿欣佢o既情緒變得好
唔穩定，大吵大鬧，整亂晒又打爛o左好多o野都不特止，
仲要我同佢玩打交...係用o的公仔o黎玩o者！ 佢自己拎住
果隻 "暴龍Pooh"，好似李小龍咁郁，又叫我抱住另一隻
"Pooh" 唔准郁係咁被佢打，（喂妳打得準o的都話俾妳打
幾o下，但係佢唔知係尊登定無心...下下中心口面口咁，
仲鬼死咁大力o添！ 我試過放低隻 "Pooh" 唔玩，佢又大
叫大喊咁！我幾經辛苦先用一隻手夾住隻 "Pooh"，另一隻
手就餵佢食葯，結果o係毫無防避之下仲俾佢伸多幾腳...
不過都係我唔好搞成佢宜家咁！算啦！
玩o左都有成粒幾鐘，o的葯力開始令阿欣o既情緒稍為正常
番o的，但係我依然唔可以放低得隻 "Pooh" 住，因為佢話
隻 "Pooh" 應該傷得好重，叫我好好地咁照顧住佢（總之
我遲早就俾佢搞到癡埋），佢玩到人有三急，就去o左廁所，
呢個時候我突然又諗番起阿君，由屯門出番去荃灣（佢屋企）
最多咪半個鐘九個字，而通常阿君習慣每次都打番個電話俾
我o地話自己已經返到屋企，但係今次等o左好耐都冇，擔心
佢會有咩事，咪打去佢度問o下o羅，我都估到o家啦！真係佢
阿媽聽...（最憎佢阿媽，因為一路以來之所以搞出咁多事，
唔多唔少都係o係佢屋企度發生，唔係為o左佢，我就唔洗上
去，我同阿欣就唔會"分居"，而阿君又唔會...唔會咩我...)
我 ：喂！阿媽呀！（嗌自己老母都未有咁親切）阿君佢返o左o黎
未呀？（單刀直入，費時同佢講咁多，諗住佢一答話返o左
呢就話咁下次先講啦）.
岳母：你有冇搞錯呀你，搞完一個又一個呀你...（嘩！乜搞搞聲
咁難聽呀！講到自己個女婿成個色魔咁），你咪以為我真係
老懵懂到乜都唔知先得o架!阿君宜家成日都入去你度住係唔
係呀？！（o車！問非所答，九唔搭八！仲有呀，有幾晚我
見太夜先留阿君係度過夜o者！果幾晚我都係睏廳咋！掂都
冇掂過妳個女呀！）
我 ：......如果阿君o係度，俾佢同我講兩句呀唔該！（又要忍
住度氣，又好擔心阿君）
岳母：唉！果時見你個人幾忠忠直直又傻傻慒慒，戇戇居居咁，諗
住你都唔會蝦我個女咪俾佢嫁俾你o羅，點知你宜家蝦完個
大又蝦埋個細...呀！天冇眼啦！...(口若懸河，字字鏗鏘！
唉！唔怪得阿欣個醫生話思覺失調呢家o野係會遺傳，宜家
就活生生咁有兩件人板o係我身邊啦...咦！唔係唔係，係三
件先o岩！)我聽到電話旁邊有把女仔喊聲，仲越喊越大聲，
原來真係阿君o黎o架，咁我先至冇咁擔心）
君 ：（在電話旁邊一路喊一路講）...阿媽呀！唔好咁啦！算啦！
我 ：...阿媽呀，我想同阿君講兩句先呀，不如一陣先聽妳講啦！
岳母：...唉！女怕嫁錯郎...佢o地兩個個老豆又死得早...（抵死！）
...我一個人辛辛苦苦咁湊大佢o地兩個...（唔該晒喎！）
...垃圾我又執過...（死垃圾婆！）...膠花我又摛過...
（痴膠花婆！）...係果樣o野未做過o者！...(唔係o下化?!）
...佢o地自少就缺乏o左父愛，冇人同佢o地傾偈，
由細到大有親乜o野事都收埋o係個心度...（關我鬼事呀！）...
唉！苦命人o羅！苦命人o羅！...呀！天冇眼啦！...
（突然好大聲喊）嗚嗚嗚嗚嗚嗚嗚嗚！！！
君 ：（在電話旁邊一路喊一路講）...阿媽呀！唔好再講以前o的o野啦！
（突然放聲嚎哭）嗚嗚嗚嗚嗚嗚嗚嗚！！！嗚嗚嗚嗚嗚嗚嗚嗚！！！
由於太大聲同太突然，我都俾佢o地嚇o左一跳，立即將個聽
筒拎離開耳仔邊，我掛住講，一直唔記得o左原來自己隻手仲
夾住隻 "Pooh" 一個唔小心連隻 "Pooh" 都跌埋落地，咁o岩
得咁橋，阿欣呢個時候又o係廁所度走出o黎， 俾佢見到我掉
低o左隻 "Pooh"落地......
我：...o拿！o拿！o拿！唔好喊呀！唔好喊呀o拿！
欣：（突然放聲嚎哭好大聲喊）嗚嗚嗚嗚嗚嗚嗚嗚！！！
嗚嗚嗚嗚嗚嗚嗚嗚！！！嗚嗚嗚嗚嗚嗚嗚嗚！！！
嗚嗚嗚嗚嗚嗚嗚嗚！！！嗚嗚嗚嗚嗚嗚嗚嗚！！！
如果喊o左出o黎真係可以舒服o的o既話...咁我都喊啦！...
...................（喊唔出！因為"欲哭無淚")...嗚！
(20-04-2002)
