Pawl lutang(Chairman) Thu puak
Washington D.C Area sung aom Zomite kipawlna "Zomi Innkuan D.C zong kum 4 sung hong cing ta a hih manin i biak Pasian leh mimal khat ciat tung lungdam hong ko masa nuam ing. A beisa hun sungah kicin lohna kisapna a om leh zong nong maisak ciat nang hong thum ung.
USA gam sungah Zomite a kuam a kuam in i om ciat hangin dahna, nopna i tuah ciang a hi zongin, minam vai sepkhop ding i neih ciang a hi zongin kipawlna kisam a, Zomi Innkuan D.C in D.C kiim a om Zomite sungah biakna, pawlpi, beh leh phung deidan lo hong ding to to kipawlna khat a hi hi. Zomi innkuan D.C ii motto a hi, "Zomi sungah innkuan khat i hi hi" i cih mah bangin ciimnuai pan a piang Zomite si khat, sa khat, beh leh phung khat i hi a, Zomi sung bek ah i kipum khat thei ding hi.
Tu kum pen a beisa kum tawh kibang loin, Zomi Innkuan D.C nasep silbwal zia te hong taangzai tektek leh hong thupi tektek a, nidang a i thoh ngei nai loh Zomi D.C newsletter zong thot zo ta i hih manin lungdam huai sa mahmah ing.
Malai hun sungah zong i sang tangzai zaw leh a pi cing zaw dingin khut kilen in mapang khawm ciat ni.
Pa Ngo Cin Thawng
Chairman
Zomi Innkuan D.C |
