"AL XEITU DE NENYURI"
Tarañu
L'Aguañaz 2004

Debú discográficu d'una de les bandes moces que más ta sonando nel branu del 2004. Nun hai meyor escuela que l'escenariu, nin meyor "representante" qu'un bon direutu y parez que Tarañu tien bien deprendíes estes másimes. Depués de participar y algamar perbonos resultaos en dellos concursos de folk (Jameson's Celtic Fest y Cuartu Los Val.les), depués de ser ún de los grupos con más conciertos esti añu, a la fin, aporta un discu de presentación penriba la media.

De xuru que della xente va manga-yos l'estigma de ser otro grupín acústicu, otra semeya, más o menos borrinosa, de Llan de Cubel. Pareznos qu'eso diba ser un error mui grande, una cosa ye que toles bandes moces amosen una influencia descomanada de los Cubeles o Felpeyu y otra, perdistinta na mio opinión, qu'un grupu acústicu intente facer un son propiu y personal. Nun ye una xera fácil, pero parezme que Tarañu, ensin renegar d'influencies, ta más por alcontrar una llinia estilístico de so. Esto asoléyase nuna nidia apuesta pola música composición propia, que ye'l 90% d'esti álbum, y nunos mui personales arranchos de los temes que dexen un tastu a música bretona que nun-y conocemos a otres bandes.

En resume, un bon discu d'una banda que ta obligada a desendolcar esos plantegamientos equí esbozaos si quier medrar musicalmente... Y un difícil llistón pa Niundes, banda que ta por asoleyar discu y que, quieran o non, van ser comparaos con Tarañu pola crítica y los aficionaos.