LAH CAMPANAH DEL LUGAL

¡Campanah palrerah,
Qué querel boh tengu!
Sonahtih a groria
Al mi nadimientu
Y, el úrtimu día,
Tocaréih a muertu.
Campanah galronah,
El son palranderu,
Andiquia qu' ehtoy,
Me relinda drentu.
Eha el ehquilón
Un soníu frehcu
Que hadi olbial
Loh ahogaeruh.
Con 'ah pahcuelehah,
La groria a comuelgu,
S' arrama en 'oh campuh,
Imbay loh güertuh.
Si sona la gorda,
amagulla el cuerpu
Con el ton soleni,
Con el socotréu.
La mediana embita,
Con toná de hierru,
A misa de arba,
A recohimientu.
La chica, trihtona,
Moh palra d' intierruh;
Moh tray loh himíuh
De loh ciminteriuh.
¡Campanah palronah,
Qué hondu boh llebu;
Boh quisía oyel
Sempri, bibu y muertu;
Boh quisía oyel...,
Poh, tantu boh quieru!