EL DESAHUICIÁU

¿Ándi ehtán, Calihtra?
¿Ándi ehtán lah huerdah?
Toitu me s' á íu,
Cuasi na me quea.
Tengu un rehcozol,
Polque uguañu ehtáh sola en 'a siega,
Que me hadi máh mal, qu' ehti mal
Que me comihquea.
¿Ándi ehtán loh mih braduh rebuhtuh
Hundeándoli el pulsu a cualquiera?
¿Ándi ehtán, si uguañoti truhierun
Elluh, na máh, esah tronconerah?
Ya no pueu, Calihtra;
Ya no tienin huerdah
Pa tumbal en 'a runcha a Hilipi,
Ni la resih hierral en 'a hesa.
Ehtán paliúchuh, garetinuh,
Engurríuh, comu tetah de bieha.
Na máh hadin na,
Y, una temblaera,
M' anda pol lah carnih,
Que m' ahina y desasosiega
Alúu, el dolol...
¡Qué rehuerti, qué hondu m'aprieta!
Paíci que mil perruh,
Tengu, en 'a entretela.
No me pongu pirongu, Calihtra;
Ya no güelbu contigu a la siega
Ni a huricheal
En el cachu ' güerta.
Ya no me se quita
Ehta denguerreta,
Ni, me eha sanal d' una beh,
Ehta gomitera
Que me hecha el banduju en 'a boca
Y me hurta el alientu y me quea...
Dehmangahaítu
Com' una pelleha.
No me igah que baiga a otru meicu,
A otra curandera,
Pol qu' ehtoy hartu ' calduh y polbuh
D' endicionih, y parchih, y bendah,
Y boticah, y unturiah, y ungüentuh,
Y de bagatelah
Que no hadin na
Y que, máh derringáu, me quean.
Yo sé otru remeyu:
Tra p' acá la cheira
Y cuerta, bien hondu,
La hería embahu la teta,
Y me sacah el higau y me plantah
La yerba lobera
Con güebu y adeiti
Y mucha manteca;
Y m' añúah, rehuerti, una bilma,
Y beráh si, lo malu, s' almienda.
Ha la cataplahma,
Tra p' acá la cheira,
Que le cuerti el gambeti a ehtuh perruh
Que me royin y me comihquean.