M' acuerdu que, cuandu chicu,
Harta mondongu beníah,
Sempri, besuh, me trayíah,
En 'a frol de tuh hocicuh.

Dihpuesinu, t' aseabah.
Mentrih la cena hadíah,
Loh suorih d' aquel día
En 'a lumbri, me contabah.

Dihpuéh..., cayíu el beranu,
Pardagueandu, en'a puerta,
La tu arma, pa mí abierta,
Me palraba, en el seranu.

Yo, en 'a halda, acibarráu,
Oyía tuh palracionih
Y un mundu 'e figuracionih
Me queaba encandiláu.

Toa la mi bía ehtá llena
De ti y toah lah tuh orah.
Mi coradón atesora
Toitu lo tuyu con pena.

Con pena de que te huihti,
Sin sabel yo que te íah,
Mentrih tú mehma ehcondíah
La pena que me truhihtih.

Angora qu' ehtáh lehoti,
Quiciáh en arguna ehtrella,
Mairina, míami endi ella,
Comu hadíah uguañoti.

Y emberina, mu emberina
Ehtaráh, pol me 'sa ehtrella,
Tú de mí, y yo, pol me d' ella,
Tamién te beré, mairina.