EL EMBOHILÁU

-¿Ándi ehtá el dagal, Calihtru?
- Éhalo, Sabel, qu' angora,
Ehtá meyu embohiláu.
Idi que tie trafagola
Con esu ' lah delecionih.
¡Ehtá mal de la chinohtra!
Mía tú, el otru día,
Lo enhallé de ciringonciah
Elantri la luna 'l cuartu
Y no paicía presona.
Ehtaba ehpeluhaítu,
Con ehpumah en 'a boca.
Na máh hadía que palral;
Idía na máh cosah bobah,
Regolteandu lah manuh
Comu si ehtubía en 'a horca.
Endi que se hue a Madril,
Paíci que tie corcoma.
Ehtá sequinu, gutinu...,
No tieni máh que camolla.
Peru alúu, no le riñah,
Polque saca mil ehtoriah
Pa idilti alúu, al final:
"Mamá yo andu en cata groria"
¡Mía qué groria pue dali
Esa clasi 'e retólica!
Na máh sabi maturrangah
Y bobáh, y metel trolah,
Y engañal con palracionih,
Y con labiah adulonah.
¡Mah bali que baiga al guertu,
Pa que le güañi a la potra,
Forrahi, que telarañah
Ban a salili en 'a boca.
Y que, alúu, a loh lechonih,
Le hechi un pihcu ' bellotah.
Lah delecionih, son esah,
Son lah qu' enllenan la boca.
L' otru..., moh importa pocu.
Muestra casa, eh, lo qu' importa.