قد الحب اللى اديتهولك ** قد الشوق واللهفة اليك
قد كلامي اللي كتبتولك ** قد السحر اللي ف لياليك
قد دا كله واكتر منه ** باعلن كرهي وحربي عليك
***
لو كان حبك كل حياتي ** أو كان بعدك سر مماتي
أنا فضلت التاني عشانك ** ولقيت فيه شطي ومرساتي
ياللي مليتني بحزن وحيرة ** ومليت قلبي بنبض آهاتي
تعند تجرح تقتل قلبي ** خليت كرهي لنفسي وذاتي
***
لو كان فكرك إني ح اجيلك ** أطلب ودك وانسى .. ياويلك
بكرة ح تندم ع اللي عملته ** بكرة تشوف الويل بعيونك
خليك فاكر لما تشوفني ** شوف لك أي مكان تلاقيه
روح وادارى وابعد عني ** لاحسن قلبي النار تكويه
***
لكن كل طريق تمشيه ** ح تلاقي شوك وجراح وأنين
أي مكان راح اقابلك فيه ** ح تلاقي نار وعذاب وضنين
كنت فاكرني ح ارضى بحالي ** لما أشوفك تلعب بيا
ولا فاكرني ح ارضى بذلي ** واطوي الجرح ودمع عنيا
مش رايح اندم مهما جرالي ** مش راح اسيبك تفرح فيا
***
واللي انا شوفته واللي جرالي ** خللى القلب مالوش احساس
خللى اليأس طريقي لبكره ** خللى الوحدة عندي أساس
بعد عمايلك بعد عذابك ** أنا حرمت الحب خلاص
ولا عاد عندى اللي أصونه ** ولا عاد عندي وفا وإخلاص
***
مع تحياتي
عاشق الورد