六年喇！我很想妳

作者

無名

仲記得o係中二既下學期時候，因為搬屋，我就入o左一間男女校讀書。

而o係果陣時，我就坐o係妳後面隔離果行。 自始我地就有傾有講，我

仲記得妳送o左一隻妳親手織o既蜻蜓俾我，同埋妳親手織o既手繩。

可惜因為某o的原因，我整唔見o左！對唔住！

 

到o左中三，真係估唔到我可以同妳同一班喔！好開心啊！有o的o野仲估唔

到，就是我同妳坐埋一齊，簡直無得頂！開心死我喇！同時間，

o的同學就開始傳—我同妳係一對。可能係o的同學

o係度傳，定係我早就被妳灑下情苗呢？我都唔知點解，

或者係無得解釋喇！o係果陣時開始，我就開始鐘意o左妳！

 

到o左中四，又係同妳一班喔！妳問我開唔開心？我緊係開心喇！

又可以同妳一班。我同妳o既傳聞越來越多，甚至有時o的

人問：「你老婆呢？點解唔見o既！」表面上係好唔開心，

其實我內心係好開心嫁！其實我有好多次想同妳講：

「我鐘意妳，妳可唔可以做我女朋友啊？」但係，

當時我無o甘o既勇氣同妳講！我真係好失敗。o甘又過o左一年喇！

 

話o甘快要會考喇！o係中五果年，班主任再次按排我同妳坐。

其實我都好想同妳坐，但係果陳時我真係好唔開心，

因為聽到妳同同班o既一個男仔拍拖。依個就係我提出調

到單丁位o既理由喇！直至畢業前o既Camp，總記得果晚o係，

球場剩返我同妳，我終於鼓起勇氣同妳表白。估唔大家對大家都有feel！

會考過後，再無妳o既消息，直到依幾年先聽到一o的妳o既消息！

 

最後，到o左依家我經常想起妳，想起妳長長o既秀髮、想起妳o既笑容、

想起妳甜美o既笑聲，妳知唔知有時我o係街度見到個同

妳差唔多樣o既女仔，我以為果個就係妳！

每次以為撞到妳，卻每次失望而回！六年喇！妳知唔知

我好掛住妳？雖然遲o左六年，但係我都要妳講—我愛妳！

 

         
Next      Back