Century Park Hotel

今日都冇跟團，原本係去大高地睇火山 (Taal Volcano) - 2小時車程 ，生果街，吉普車廠 (Sarao Motors Jeepney Factory) ，竹風琴教堂 (San Joseph Church) 及侏儒吧。

一早女友去左酒店泳池游水，酒店有兩個泳池，一個係細直身池 ，另一個係右圖既大泳池，仲有一個按摩浴池，全部響室外，都幾靚架！

*每日都需要放 20PHP 於電視機頂，作為"打賞"給整理房間既職員架！

下圖 - 酒店全景

呢間酒店係由日本 ANA 集團經營，地下及高層各有不同種類既高級餐廳，如日本料理，Coffee Shop及馬尼拉最高級中式酒樓"世紀酒樓"等 ，Coffee Shop 自助晚餐約 120 港紙。

酒店地點都幾方便，隔條馬路就有 2 個 shopping center "Harrison Plaza" 及 "SM Department Store" 又有一個新飲食中心 "HP Village"，附近冇乜高樓大廈，人流唔太多，治安都幾好，幾有度假 Feel，步行十分鐘就可以到達 馬尼拉海傍散步。

坐的士到大型百貨公司 Robinsons Place只需15分鐘。

Harrison Plaza (HP)

接近中午，我地就去酒店對面既 大型 Shopping Mall (HP) 度行街及去左入面一間叫"超群"既快餐店度食中式午餐，味度唔錯架！

HP 有兩層高，入面裝修雖然舊，但有好多各式各樣既商店，廣場中央 (下左圖)有類似香港女人街既小販 (賣冒牌貨)，地下有好多快餐店及小食檔 (下右圖) 售賣馬尼拉食品，仲有 全馬尼拉最高級百貨公司 Rustan's Department Store 及 Rustan's Supermaket (大型超級市場)，HP 連接隔離 SM mall。

Rustan's Department Store

Rustan 係馬尼拉頂級百貨公司，位於 HP 一樓係分店之一，入面裝修時尚，感覺高級，人流少，與外面 HP 成好大對比。好似去左日本既高級百貨公司一樣，大部份係入口貨，部份貨品價格更高於香港，所以只係行左一陣冇買野。

Rustan 地下係大型超級市場，食品超抵，大部份價錢係香港一半咋！

行完 Rustan ，我地發現地下有一間好得意既食雪糕檔，1 set 有 5 個迷你雪糕筒，不同味度，只係賣 25 php (約 4蚊港紙)咋！非常好味！

馬尼拉其中一樣出名美食就係雪糕啦！

Shoemart (SM) Department Store

我地食完下午茶就到相連既 SM Department Store 行街，呢間百貨公司裝修好新淨，有 3層高，幾大幾多野賣，有男裝，女裝，玩具，電器，運動裝，名牌 Polo 專門 counter ，家庭及旅行用品，馬尼拉最出名芒果乾，菠蘿乾等食品及手工藝品。大部份貨品都比香港平好多！

買左野仲可以上三樓包裝部，如果貨品唔超過某個 size，就可享有 免費包裝服務，包裝得好靚架！

行完 SM 我地就返酒店休息一陣喇！

Hotel Taxi

到黃昏我地就響酒店門口搵職員幫我地 call 的士到 Robinson Place 度繼續行街，點知原來馬尼拉既酒店係唔會幫你 call街車，而係用酒店私家車載你到目的地。

酒店職員會一早講明價錢，大約係普通的士既一倍價錢，不過始終比較安全，呢次車程約15分鐘，收約140披索 (20蚊港紙)。

馬尼拉的士收費好平，來往市內一般只需約 60至80披索 (十零二十蚊港紙) 。

Robinsons Place

我地主要係行入面既 Robinsons Department Store，呢間百貨公司都好新好大，類似日資百貨公司，有男裝，運動裝，手工藝品，女裝，玩具等一應俱全。亦有免費包裝服務。我地響度都買左Ｄ衫，玩具及手工藝品。

之後，我地去左商場入面既中式餐廳"唐城"度食晚飯，環境清潔，Ｄ野食好好味！

夜晚 9:00，Robinsons Place 關門，我地就到的士站等車回酒店，夜晚 Robinsons 周圍非常之多人又多車，我地等左好耐都冇車，惟有邊行邊等，行左一陣搵倒一架的士，點知比埋地圖佢睇都唔識去酒店。

跟住我地繼續行，行到去一間叫 "Diamond Hotel"既高級酒店，酒店大堂極之豪華，識員衣著光鮮，好似去左"半島酒店"，呢間酒店鄰近馬尼拉灣。

我地就響度 call 酒店的士回 Century Park Hotel，途經馬尼拉酒吧林立既地區，非常熱鬧，沿途非常塞車，約10幾才回到酒店。