Malate

今日係行程最後一日，我地一早8:30 就收拾行李上旅遊車，由於之前冇跟團，所以有團友以為我地上錯車，真係攪笑。

我地第一站先去酒店附近食早餐，去一間好普通既中式餐館食白粥炒麵，Ｄ團友話日日都係食呢Ｄ野，食完野又上車，餐館外既小販把手工藝品那上車賣，Ｄ手工藝品都幾靚，雖然冇得講價但係價錢唔貴，團友都樂於購買。

* 我地既酒店位於 Malate 區，係比較休閒既地方，離商業中心 Makati 約 25分鐘車程。

迷你動物園

跟住就去迷你動物園 (Zoological & Botanical Gardens)，動物園好近酒店，就係位於 Harrison Plaza 隔離，呢度好細且舊，但係動物種類都唔少，有大象，猩猩，老虎，蛇，河馬，馬騮等等，入面仲有個人工湖比人扒艇仔添！

行左 45分鐘就參觀完畢。 去下個站 美軍紀念公園。

美軍紀念公園

由 Malate 去紀念公園，大約需要25分鐘，途中菲律賓攝影師把之前幫我地影既相帶黎比我地選購，Ｄ相用木架包裝好，而且影得好靚，250 PHP一張，我地買左兩張。

紀念公園位於 Makati 既高尚住宅區段，只批准外國旅行團參觀，菲律賓人要申請才可入內。

公園面積頗大，綠油油既草地滿遍排列整齊既十字架墓碑，好似香港既赤柱墳場。

Makati 購物區

約 11 :00 我地就到達最後一站，Glorietta (又稱 Ayala Mall) ，係 Makati 區最出名既購物中心，連接 Landmark 及 SM 百貨公司，鄰近好幾間 5 星級酒店。由於今日係星期日，所以非常熱鬧。

Makati 係馬尼拉既商業及購物區，遊客必到，好似香港既中環，銅鑼灣，及尖沙咀一樣。

我地先行 Landmark 百貨公司，好大又多野賣，有Ｄ似吉之島，地庫係大型超級市場及美食廣場，我地買左Ｄ野後就嚮美食廣場食飯，70PHP又一餐，好抵！

Ayala Mall

之後去行 Ayala Mall，呢度設計成八抓魚一樣，中間係大廣場，名牌商店林立，Esprit，Mark & Spencer，United Colour of Benetton 等，亦有好多好靚既食店，由於人太多及唔夠時間，所以行左一陣就去左 SM Department Store，呢間 SM 雖然大，但係比較舊，冇酒店對面果間咁好。

3點我地就上車去馬尼拉機場準備回港喇！由 Makati 去機場好近，只需 30 分鐘，領隊及導遊亦都於途中收取每人 $420港紙既小費，另收 580 PHP 機場稅。

馬尼拉機場

機場保安嚴密，進入機場大樓前先要過 X 光機，機場唔係好大，禁區內外都冇乜野行，禁區內只有一兩間小食店及幾間小商店賣馬尼拉特產，好似芒果乾，手工藝品等，最特別係可以買有特別包裝既馬尼拉雪糕返香港食。

上飛機前，仲要查一次手提行李及搜身，連鞋都要除埋 (不過唔駛除衫)。

飛機餐係叉燒包 (用西餐包)及雪糕，好好味！約 7:30p.m 安全回港啦！

$1300 (連小費) 住足三晚五星級酒店，坐CX早去晚返，去馬尼拉 shopping 食野，真係好抵！惟治安唔係太好。