酒店早餐

8:00 到頂樓餐廳食自助早餐，餐廳好細，得兩個服務員，僅可以應付我地一團人，早餐選擇少，只有火腿，煎蛋，麵包，白飯及白粥，salad ，橙汁/奶茶等，但整得幾好食。(右圖 - 酒店)

8:45a.m我地又出發。下圖係旅遊車，幾舒適，行得好慢好安全。

真珠養殖推廣中心

約 9:15 來到真珠推廣中心，一入場就安排我地聽講座，同日本既田崎真珠唔同，呢度推廣既係食真珠粉既健康及護膚產品，唔係手飾。

講座大約用左20分鐘，然後就有好多推廣員帶來少量真珠粉供各人試食及 猛 sell 產品，導遊亦落力推消。真珠粉係冇味道。

約有一半團友有買真珠粉。真珠粉係即場用機器由真珠磨成粉，你可以隔住窗睇住成個過程。

最低消費 500 台幣一小瓶。

推廣中心冇野睇，只係有幾個飾柜放左少量真珠手飾，唔靚又冇標價。

中正紀念堂

10:45 到達中正紀念堂，樓高二層，外觀雄偉，地下擺放左好多蔣公時代既文物，坐過既汽車，上層恭置巨型蔣公銅像。

我地嚮度影左團體相。遇到好多日本遊客。

紀念堂入面有咖啡室，紀念品店及郵局。

紀念堂係中正紀念公園既一部份，公園仲包括有一座國家戲劇院及一座音樂廳。外觀一樣有中國特式。

(捷運-中正紀念堂站)

烏來溫泉街

約一小時車程，1:00 p.m 來到台北其中一個出名既溫泉區 "烏來"，溫泉旅館及食店都集中嚮烏來村既 烏來街，旅行社安排我地去一間叫"東風溫泉"既旅館浸一小時溫泉，兩人一房。

我同女友冇浸，去左行街食午飯，我地食呢度出名既竹筒飯 (70台幣)及石板烤肉(100台幣)等。雖然份量少，但係好好食！女友買台北特飲"山粉圓"解喝。

溫泉街唔太長，有好多土產店，有一間樓高三層既泰雅民族博物館，冇特別野睇。烏來風景唔算靚。

天祿藝術中心

離開"烏來"後，導遊開始導人迷信，話自己係基督徒，但又大談名字對個人運程既重要性及展示身上既"貔貅" / "泰國金佛"等吉祥物，慫恿團友買"貔貅"及測字。

約 4:20p.m 到達呢個應該叫"貔貅推廣中心"，又再安排我地聽術士講座，個女術士一輪咀猛咁講幾多筆劃為之好名，點為之凶名，然後幾個女術士圍住我地，sell 皮獶，不過好少人有興趣。領隊有買貔貅，請貔貅時，術士對佢講一Ｄ吉祥說話及叫Ｄ人拍手掌。最後台灣政府托旅行社送左每人一包(一公斤)台灣米。包裝得幾靚。

呢個鐘行程最浪費時間，入面又冇野睇。

士林夜市

今日係中秋節，旅行社安排左我地同其他團到市吉林路，東樂台菜海鮮餐廳一齊食飯做節，送每人一件台式月餅，大約有十幾檯人，食龍蝦水果餐，質素一般，中途有抽獎，獎品係燈籠一個，餐廳同普通酒樓一樣。

我地 9:30回到酒店休息一下，10:00又坐的士到士林夜市行街，主要行購物區，我地食左甜品，逗留到差唔多12點至走，呢度仍然好熱鬧。(士林夜市約營業至零晨 1:00)

坐的士回酒店約10分鐘，約140台幣。(夜晚11時後，加 20%收費)