Andy's HomePage

Hi!各位朋友

歡迎光臨

2007年3月31日

轉變後的約會
好耐都冇試過同你單獨約會, 可能係因為咁, 今朝好早已經準備好, 心情仲有 d 緊張tim! 未夠 2:00pm 我已經到左黃金, 周圍行周圍睇野, 咦 lee 個野都幾得意個 bor, 就係咁我就買左黎作為記錄今天約會既小禮物! 去到一間餐廳食下午茶, 坐左響露天茶座, 好肚餓呀, 吓...點解... d 野咁細碟架, 我未食野架, 係咪想餓死我呀... 當然為左唔好破壞氣氛, 我梗係冇講 lee 幾句啦! 邊食邊傾, 印象中你把口從來都打唔開架, 好難得今日可以盡訴心中情, 雖然在你聲線表情中見唔到你有幾唔開心, 但最後你果 d ...... 出賣左你! 趁未夠鐘, 周圍行下, 估唔到日頭行先發現有 d 咁架地方, 唔錯唔錯! 上謝生謝太屋企, 經過恆福花園平台, 原來我 5 年前黎過 lee 度, 落去食飯果時經過 7-11, 公廁, 都有好幾年冇黎過la, 我就係咁架la, 成日諗埋 d 無謂野, hehe! 成班人玩 wii 玩到傻左, 我就入左書房打牌, 點解...個位咁黑架, too bad! 十幾人熱熱鬧鬧玩左一晚, 相信謝宅會係我地新既俱樂部!

2007年3月30日
西鐵搞笑事件上完堂去搭西鐵, 響西鐵我成功催眠左彤彤, 佢仲感覺到頭痛tim, Janice 就同阿健玩唔好掂到手果個 game, 阿健超勁認真law, 做左 20 下, 其他搭西鐵既人都響度笑, 佢個尷尬樣真係...hehe!

2007年3月25日

舊生聚會
十幾年沒有見面的同學, 今天都見面了, 大家都好似冇乜變, 點解咁多年個樣都可以冇乜變既呢? 我竟然唔記得左間中都會見面既同學名, 咩喎, 咁多年都係叫佢花名丫ma, 唔記得有咩出奇wor, 不過真係好尷呀! 最開心係咁多人都記得我, 十個有九個既開場白都係果句, "喂! 你瘦左呀!", 唔通我中學果陣真係咁肥, haha! 我同幾個八掛人講番讀書果陣既八掛野, 講人是非, 好好笑! 個個都結婚la, 但係我就越黎越想做多 d 其他野, 婚姻同我既距離好遠la, 可唔可以由得我自由自在呀~

2007年3月23日
我唔得la 我今日仲嚴重左, 焗住要去睇醫生, 今日林太生日, 睇完醫生去左買右買, 買到一抽二lung, 終於捱到番屋企, 一食完藥就訓到 7 點, 鼻水終於停左la! 晚餐係大食會, 份量多得滯, 食唔哂tim, 今年林太既生日願望亦係我既願望, 每年簡簡單單齊齊整整咁過就足夠la!

2007年3月22日
著火我頂唔順la, 個鼻停唔到, 4 點已經番到屋企, 食藥即訓, 點知 8 點起身都冇好轉, 唉~個鼻真係辛苦到爆, 但比左錢冇理由唔去家ma, 唯有帶住口罩去排舞室, 環境都算唔錯, 原本得 3,4 個人, 唔知點解突然間咁有 8 個人, 搞到有點混亂, 我仲燥得滯嚇親大家tim, 唔好意思, 下次我會收下把火!

2007年3月21日

Melo 生日飯
6:30pm 已經到左市中心, 自己一個周圍行下, 個人浮浮下有 d 暈船浪, 應該係感冒菌打到黎! 我地去左間越南餐廳, 其實都唔係為左食越南野, 係因為貪佢少人, 可以慢慢坐, 傾下計, 講下大家近況, 原來佢近排發生左咁大件事, 真係好勁, 真係要讚下先得, 但下次可唔可以都講比我知呀! 真係過份!!! 乜我真係變左做第二個我嗎? 咁邊一個好 d 呀? hehe

2007年3月15日
休閒的一個上午尋晚搞掂左大埔個 JOB, 今朝同老豆媽子去飲茶, 一籠漲卜卜既蝦餃只售 $6.8, 其他野點解咁多都係 $4.8, $6.8架, 真係好底, 搞到我叫左勁多, 一個好休閒既早上, 食豐富既 BLUNCH (啫係 B+LUNCH), 真係正! 今日收到寶既電話, 失望, 只有失望, 距離遠到做朋友都有點困難, 點解會咁?

2007年3月14日

幽靈車神
收工好趕時間去左買飛, 噢, D 好位已經冇哂, 諗左一陣之ma, 連中間果兩張都冇埋, 頂~唯有坐梗頸位啦! 趁未夠鐘去左 Suzuki 食野, 見住 TATA 響條長電梯上緊黎, 我叫佢望後面果兩個人, 點知佢話望會好樣衰, 大聲得滯law 唔該, 果兩個人望住我呀...樣衰! 入到 Suzuki , 我地坐左響露天果個位, "唔會落雨架", =.=, 似乎 FEDEX 禮物都岩用實用丫! d 野食麻麻, 溫泉蛋, 生番茄應該係唔會有腥味架wor, 咖啡三文魚冇味架, 不過個 cake 就好好食!入到戲院先發覺原來個位置都唔錯wor, 我地睇幽靈車神, 估唔到比想像中好睇, 當幽靈車神發現幽靈騎士之後, 一齊變身果一下真係有 d 龍珠 feel! 都唔明 TATA 點解變鬼果 D 位都可以係咁笑, 係咪比人點左穴... 去左大埔做野, 一齊搭車, 做完野仲要搭兩程車先番到屋企, 竟然由大埔笑到番屋企個笠口, 夠la, 我受夠la!

2007年3月13日
唔識 say no! 推人其實真係好難開口, 但今日我忍唔住la, 因為實在太......一放學我就send 左 sms, 點知收到一個咁得意既回覆, =.=! 接著我傾左一個電話, 感覺到開始番黎la, 我地係同類黎架, 大家都咁鍾意發夢, 記住呀, 離離合合我已覺討厭架, 哈哈!

2007年3月11日

見証婚禮的感想
天色陰暗, 參加朋友婚禮感覺有點不快, 準時到達中環, 下車時雖然只是微雨, 但氣溫冷得要命(這時唯有運用在跳舞堂時學會的熱身運動, 邊行邊跳), 心情指數處於低點, 與友人集合後乘的士到紅棉道婚姻註冊處, 從未來過這裡, 大家都有點迷失方向, 終於找到了! "新娘今日真係好靚呀!" 遠遠的見到她帶滿幸福的笑容, 新郎放下平日傻傻乎的樣子, 今天認真的他, 真的好 man! 他們對對方出自真心的每一句承諾, 相信已觸動在場每一位的心靈, 一對戀人向著同一個方向走, 經過漫長的路途, 在目的地向對方作出承諾, 再定下新的目標, 相信將來的路有多艱難, 只要對方一個眼神肯定, 一定可以走下去! 真的很欣賞他們那份勇氣, 堅持! 再一次多謝他們帶給我溫暖的一天, 衷心祝福謝生謝太!

我呢? 潛在的陰影未過嗎? 你.好嗎?

婚禮完畢, 一行 9 人, 劉妃, 陳妃, 劉太, UNCLE, 小玲, 浩龍, 樂樂 & 歐兒去左唱 K ... 6 點唱到一點, 唔知係唔係好耐冇試過咁既組合唱 K 呢? 氣氛唔夠 HIGH, 跟住我開始黎料, 我要全部人都又唱又跳, 下次我一定要跳京華春夢, 佢地幾個 SAMMI, KELLY 上身, 真係好耐都冇試過咁好玩咁開心, 係咁食係咁食係咁食, 係咁唱係咁唱係咁唱, 仲有酒飲, 埋單都只係位位百五蚊 ... 真盡興 !!! 唱得 K 多塊面會瘦D, 唱得 K 多偶像都變你粉絲, 哈哈!

2007年3月10日

我唔可以怕醜架咩...
政捉左我去同佢 d fd 唱K, 我唔識佢d同事架, 其實都有d奇怪(真係怕醜架), 不過我又冇乜野做, 所以都有去, 識多左幾個新朋友(特別令我深印象既新朋友就係好淋, 比人洽果個), 感覺唔錯! 唱完去左行 LCX, 睇 fashion show, 之後再食個 TEA, 都未見過女仔食 TEA 叫咖哩雞飯, 呆左!!! 其他人走哂, 同政由尖沙咀漫無目的行去旺角, 傾左好多, 好似將收埋響我心入面既問題攞番出黎, 其實我知我既思想係有問題, 但又唔覺得有人可以解答我應該點樣行, 點都好啦, 依家都唔錯丫, 真架!

2007年3月6日
我唔得架又要番學la, 今堂岩岩開始教 Rumba, Rumba 比以往的舞種較消耗體力, 雖然暫時都未覺得吃力, 但姿勢還要下多點苦功! MISS, 師姐問我有冇興趣做 Partner, 請不要跟我開玩笑, 距離初級賽還有好遠路, 不過有人睇得起自己, 又好鬼開心架, 哈哈!

2007年3月5日

咦...咁岩既!
收工悶悶地去左行 MK, 仲叫埋祖兒, 左搵右搵都叫做搵到少少我想買既野, 佢就勁, 買野睇野時間既總和應該係多過我架! 行行下又講緊佢媽咪同我媽咪D 野, 越講就越混亂, 一般人係未必聽得明既! 回家途中, 巴士撞到..., 真係想好娘咁講句"咦...咁岩既...", 咁耐冇見, 估唔到今日響巴士撞到, 真係有緣la!

2007年3月4日

戒毒
同親友食飯, 餐廳隔離就係戲院, TAMMY 話悶想睇戲, D 野食未到我行左過去買飛, 番黎就岩岩好有得食, 當我啖飯響個口度果時, 我阿媽問"你係咪同TAMMY拍拖呀", 跟住我咬爆左粒飛茲, 個口流左好多血, 真係唔知好嬲定好笑, 我淨係知好痛好痛, 仲要咀唇腫腫地, 啤!

今日睇左《門徒》, 以毒品作題材真的要有充分資料搜集才可有逼真效果, 除古天樂外, 每一個角色都佔有重要的位置, 好多個畫面都好震撼, 爾冬陞既片係有一定既水準既, 睇完之後真係令到我個腦諗好多野, 在片中尾段, 主角提到人在這空虛感中, 會找些東西填補這空虛, 這一刻更不懂分析對與錯, 令我解開一直以來心中的疑問! 曾經有一段長時間我的愛情比任何事都更重要, 但當感情變質後, 流動在我身體血液內的毒素開始支配我靈魂, 我用了很多決心, 時間戒掉這情毒, 過程有幾痛幾苦都好, 都總算叫做成功! 過去幾個月轉變很多, 每一次談及這些話題, 莫說別人, 就連自己都感到驚訝! 有喜歡那一位女孩子嗎? 有, 但可以只是喜歡嗎? 我不感到孤寂, 身體語言帶我接觸不同的世界, 認識不同的朋友, 似乎是完結的開始!

2007年3月3日
食物中毒阿媽整左 d 羅白糕, 唔知係咪尋晚食得太多, 食左十幾件, 今日我中左毒, 中左羅白糕毒, 個肚成日都痛, 去廁所時仲 feel 到 d 羅白出番黎tim, >_

2007年3月2日

手腳不協調
收工拿拿林番屋企變身, 準備一個全新形象去上堂, 大TEE, 小癩S褲, 金色軍牌, NY帽, 自己對住塊鏡都覺得有 d 怪, 當我入電梯見到有其他人, 我即刻唔敢亂郁, 行去 VAN 仔站途中, 我都行得好唔自然, 上 VAN 仔的一刻, 我個頭撞到車頂... 呀......!!! 終於去到元朗, join 埋佢地之後開始正常番la, 影完相上完堂, 似乎開始適應, 不過其實帶帽真係熱架!

2007年3月1日

堂哥的婚宴
原先同阿展打算今日著西裝, 但最後我著左另一個組合, 番到公司仲忍唔住自拍左幾張, 比人睇到實樣爆! 去到酒樓我幫手做接待員(順手收保護費), 一路做梗係一路睇野, 我同祖兒勁"目及"勁講, 當然好多笑料啦, 笑完辛苦完就開餐, 唔知點解無啦啦打思噫, 以往既經驗係我打親思噫都係好耐都唔識停, 結果...親友同我傾計...噫...羅爆, 食食下鮑魚...噫...羅爆, 飲緊紅酒...噫...羅爆, 總之就係咁噫,係咁噫, 去到個炸子雞先冇事, 激死! 今日全家都好靚, 老豆就特別底讚啦, 著左咁耐西裝都 keep 到咁好笑容, good!

2007年2月28日

開年飯 07
劉妃, 陳妃, 劉太, 神, 沛, 樂樂, 芘芘, 冰人, 敏兒, 小玲, 浩龍, 新娘子, 新郎哥一齊去左泉將車食飯, D 野幾好食丫, 而且價錢都 OK, 最好食係大腸同豆苗! 大家又黎la, 成班人響度 0459, 得架la, 下次我會同 d 朋友講"喂, 你近排有冇留意果隻 0459 呀?" 哈哈! 好早就食完la, 同敏兒一齊搭車, 傾傾下先發覺原來佢係台灣人, 我同阿妹成日講既"很屌","很讚","有像","傻眼","碎碎念" 佢明哂law, 兩條友勁講台灣野, 超正! 下次一定要一齊睇 show 先得!

2007年2月24日

點解睇笑片會發...夢
今日同阿詩佢地去左睇戲, 睇《翻生侏羅館》, 全程都冇乜冷場, 個故事好有創意, 最 like 果兩個細粒仔, 睇完戲時間真係好早, 大家企左響度一陣, 最後怕政眼訓, 所以就各自回家, 點知佢番到去打比我報平安仲傾左成粒鐘, 最好笑既係果句"我都唔眼訓", 真係...啤...! 夜晚發左一個好奇怪既夢, 我同某某相擁, 仲有幾句難以至信既對白, 講番比夢入面既主角聽, 一定會嚇死佢, 因為我醒左果一刻都呆左!

2007年2月22日

波叔出城
今日係年初五, 收到 call, 去左德福做到 6:30pm 搭番去油麻地睇戲, 其實我都唔係好知睇咩戲架, 只係新年都冇出過街, 所以就出黎見下人啦! 一路向目的地進發既時候, 我覺得今日好似特別輕鬆, 可能係一個人既生活已經過左咁耐, 忽然 lee 兩個幾星期, 成日都要被迫傾電話, 尋日既冷淡態度另今日一切回復原狀, 好似特別自己咁tim, 我真係有 d 擔心自己唔識再拍拖... 響 Paris Cafe 飲杯野, 打左陣 NDS, 出發去電影中心睇"波叔出城", 套戲真係有好多地方令人感到低俗, 不過佢用真實既種拍攝手法, 令人分唔出是真是假, 而且用咁樣既方法去譏諷不同類型既人, 你會覺得特別好笑, 我睇完之後不段重複一句"玩到咁盡係咪痴線架!"(入面有 d 位真係笑死你) 睇完去左旺角食咖喱, 辣死人, 聽日肯定爆瘡!

2007年2月21日

平淡是福
一早老豆同媽子講話發左個惡夢就出左街, 仲要話係跳樓既先兆, 擔心死, 番到黎捉佢傾左一大輪先知道咩事, 唉...真係嚇死人呀! 好夾硬咁話佢執"東", 問佢坐邊個位, 跟住夾佢打麻雀, 真係幾好笑, 就係咁又打左唔知幾多圈, 希望麻雀可以醫到病啦! 平平淡淡其實已經好幸福架la! 好耐冇試過講電話既態度咁差, 今日試左!

2007年2月19日

年初二, 齊齊整整
親戚唔多, 今日已經冇地方去la, 家明上黎拜年, 劉妃又話悶, 所以今晚餐飯好熱鬧, 飯前梗係要開心一下啦, 我同妃partner玩十三張, 揸左幾鋪 4 條,同花順, 做左大贏家! 今晚好多送, 飽到我...飽到我..., 之後去妃屋企玩, 係咁比人話"割禾", 我都唔想架, 不過又真係約好左丫ma, 最多聽日乖乖地響屋企打牌啦! 阿樂突然唔黎, 唔夠腳開檯, 我係咁打 NDS, 搞到芘芘悶左成晚, 都係我衰, 你打番我啦, 你鬧我啦, 唔好嬲啦!

2007年2月18日
豬年快樂! 新年快樂! 咁快又一年, 一早去到大舅屋企食齋, 開齋丫ma, 每年必有的一個環節黎架! 食飽之後都係打下牌, 鋤下啤咁law, 冇得燒炮杖氣氛係冇咁好架la, 再加上人越大, 越覺得自己個人好沉悶, 成個悶旦咁! 新一年又要搵新既目標先得!

2007年2月17日

年三十
今日係年三十, 全部人都走哂, 得番我一個響屋企, MEMEMOMO 搞到 5:00pm 先出門口, 收到 TATA 電話, 佢問左我一個問題"有冇掛住我呀?", 我答"有", 佢講左句"真既?"然後就講佢既野, 其他說話我都不太在意, 可唔可以遠遠咁, 間中有一點會心微笑既感覺呢? 去食團年飯, 怕夜晚會有人約, 仲著到紅當當, 點知都係冇地方去... side左!

2007年2月15日

拒絕-難以啟齒
原本今日約左 K 去睇戲, 其實唔多想去, 不過又唔知點推, 所以應承左, 4點幾 TATA 叫我今晚陪佢, 唔知點解我個腦開始諗藉口推 K, 仲夠贍死話約左..., 原來我個心如果冇野推動既話, 永遠都會答"哦/是旦啦/ 好/ 去law之類, 好怕推人之後要面對的感覺, 但只要有一股適合的推動力, 又會好自然諗到辦法去拒絕人, 真係好奇怪! 最後都係同左 TATA 食飯, 今日先知原來佢咁夠彊架, 大佬都夠贍打, 勁!

2007年2月13日
不可思議的一天寫作中......

2007年2月12日

團年飯07
同 NDS 團友食團年飯, 心情指數極低, 成晚都冇乜講野, 竟然有一個人感覺到, 真係細心! 食完同左 ICEMAN, ICEMAN朋友, 奀妹, 奀豬, 靜兒飲野, 發生左一件怪事, 就係佢地話我比人搞, 話我比人(M)睇中左, 仲摸我塊面......都唔知應該開心定唔開心好! 原本我好想好想講野, 我真係好想大叫一下, 不過黎到 lee 度都係飲飲飲架啦, 最後我同奀妹走先, 仲送埋佢番屋企, 最衰佢聽日要番工, 如果唔係...我真係想捉佢陪我飲杯野!

2007年2月11日
情緒病好似係一年前開始, 我患上情緒病, 今晚我心痛得如刀割, 自己都唔知係咩原因, 痛到...我停唔到..., 忍唔住打比珊, 熟識既接電話對答, 埋 MIC 既講電話聲線, 都依然冇變, 真係太好! 但我真係講唔到野, 對話內容近乎零, 希望你唔好介意, 多謝你陪我成晚, 希望今晚之後, 我地會好似以前咁啦!

2007年2月8日
突如其來的感覺今日約左一個女孩子去睇戲, 最大既感覺係我冇乜感覺, 睇完戲個腦不斷轉, 直到我上巴士的一刻, 好衝動咁打電話比中學時代一個好緊要好緊要既人, 好想可以相擁一下, 只可惜... 我明白, 今日我更明白, 似乎一切都係講緣份, 我都唔想再用力去尋找, 不如就等上天安排!

2007年2月7日

豬潤麵,豬潤面
放工同左 TATA 去黃金買野, 冇夾過既情況底下唔知點解撞色, 灰白藍, 真係好襯, 可惜唔記得左影番張相, side 左呀! 今日既任務係買 NDSL, 裝飾既 EARPHONE, 行左幾間, 比我地問到一間平 50 蚊, 最後 1500 蚊就買到 NDSL, 真係勁平! 靚仔哥哥 d服務好到爆, 人地好認真咁幫我地貼保護貼, TATA 突然一句"It's magic!", 搞到阿靚仔都忍唔住笑, 仲話有 d 咁既 fd 先開心呀! 係呀, 我認架, 響 TATA 隔黎真係隨時會笑死架! 之後我地去食豬潤麵, 女人隻耳唔知咩構做, 竟然聽到同檯的人講市佢壞話, 唔通係千里耳! 最好笑係個男人既老婆細細聲講話"人地望住你la!" lee 句佢都聽到, 可以諗下當時個氣氛會有幾好笑... 完全係 feel 到佢地既眼神係有條電響度推黎推去law! 食飽又買完野, 去搭 MTR 又想講"LEE個世界真的很細", 因為又撞到豬潤夫婦, 真係冤家路窄! 這一天的晚上過得很愉快...因為笑了很多... 多謝 TATA!

2007年2月5日

情人節快到la!
響公司趕住幫客 update, 聽五天精華遊講情人節既野, 提醒我情人節快到la, 今年既心情同上年比較簡直係天與地, 可能真係唔想再自找麻煩掛, 信任這個字眼在我心中以譯成另一個意思, 做左廿幾年人都依然咁愚蠢, 找真相, 自我欺騙, 自我催眠, 真係好想唱許志安"想說"入面句歌詞! 回憶可以係心靈精神的靈丹妙藥, 但份量錯亦可以係奇毒無比既毒藥, 似乎我唔好再TAKE野la, 繼續我既新旅程, 希望會搵到更多新奇有趣既野啦!

放左工同老豆媽子去旺角買衫, 唔係因為要去做我堂哥既証婚人, 我諗都幾難叫郁佢地, 認真同佢地簡衫試衫真係好得意, lee 件又誇得滯果件又空 liuliu, 最好笑係果句"阿姐件衫點賣", 我即刻答我媽子 198蚊斤, 笑到我地......阿媽真係 cute! 好似好耐冇試過行行行, 行咁耐街, 點解???咪又係果個原因! 行唔慣真係好累, 阿媽話我依家腳力應該好 d 格, 其實係應該好 d 既, 不過行咁耐, 好 d 都會累啦! 今日既金句係"有咩E郁, 揸住碌竹"

2007年2月3日

Step Up
我成日都為興趣, 為目標想做一 d 事, 每次一呼百應後都唔能夠維持下去, 一個人要做些一班人先有效果既事, 真提不起勁堅持下去, 剪接, 音效, 處理Vocal, 開台, 廣播劇, 行山, 公司擴展, 家庭, 全部都係有頭冇尾, 或者係我唔夠號召力啦! 遇到 3 個傻人, 大家都有一團火, 目標可能未必一樣, 但目的地都係同一個地方, 感覺用4個字黎形容"好好好好", 雖然唔知幾時會行到分叉路, 但真的感謝"緣途有你"地! 今日真累死la......

2007年1月30日

話咁快就10堂!
雖然學既野越黎越難, 但每次 miss 既讚賞, 同埋其他同學勁跟唔上, 對比之下, 另我有心機繼續學, 阿心, Joanna真係好好笑, 成日都會同佢地做埋 d 爆笑事, 阿心成日都學男步, 仲話要同我爭女, 真係比佢笑死!

諗諗下, 原來我已經好耐冇試過響屋企用電腦la, 每朝番到公司都見到朋友夜晚 msn 我既 message, 搞到我 d movie 同相都仲未搞, 今個星期真係要搞搞佢!

2007年1月29日

散步
奀妹搭錯車入黎搵我傾計, (其實我知係另有原因gei, hehe), 由天頌行到去西鐵站, 話題中, 成日都問我 lee 個岩唔岩, 果個岩唔岩, 其實可能岩架, 不過我又冇心wor, 而家咁都幾好! 今日已經唔知第幾次比人話我唔係好似男仔, 我都唔知比咩反應, 只係我覺得我鍾意既野比較冷門啫, 你咁講會趕走我 d 客仔架!

2007年1月28日
跟 call 的樂趣收到 call, 出左別銅做野, 有時星期日冇野做, 跟 call 都幾寫意, 可能係因為唔鍾意自己一個人出街, 每次放假有 call, 都會周圍行下, 唔知係咪習慣左, 果種想去邊就去邊, 想食乜就食乜既感覺都真係幾爽!

2007年1月27日

追星
咁大個人都未做過既事, 今日做左第一次, 2:00pm 約左祖兒去朗豪坊小豬簽唱會, 真係估唔到佢咁多粉絲, 多到嚇死人, 周圍都冇位企, 於是我地行左去星巴克, 點知竟然買杯野飲就可以企入去露天既位置, 嘩...都ok近wor, 企響度左望右望先發覺男女既比例係...95% 係女, 我真係覺得有 d 樣衰, 不過應承左陪佢, 算啦! 接近開始既時間, 我見前面個欄位有些少空間, 即刻襯冇人就叫我妹走入去, 今次佢真係近到爆! 講番小豬, 佢真係樣樣掂, 係繼劉華後值得欣賞既男歌手! 演唱完畢, 我地又趕落去排隊簽名, 見到頭先一齊睇 show 果兩個小女生, 即刻叫左佢地埋黎陪祖兒攞簽名, yeah, 終於唔洗樣衰la!

跟住我就入左屯門同佢地食飯打牌, 最後就係一年冇出現過既分享時間, 回顧展望, 每個人每個故事, 另大家更了解對方, 希望面前既難關能夠好快解決, 應援團隊員亦隨時候命!

2007年1月26日

越黎越似樣既舞班
去到排舞室, 竟然有十個人, 突然多左 4 個同學真係太好, 點知靚女 reception 話我地冇 book 場, 呆左..., 好彩最後都傾掂數, 遲左 15 mins, 蝕... 今日可能係多左新同學既關係, 進度有點慢, 但當我一諗起十個人排好哂之後一定好正, hehe! 嘩嘩嘩, 有個新同學拉筋個頭可以店到大脾, 好勁呀! 唔知要拉幾耐先得呢?

2007年1月23日

家庭樂
放左學去 MK Join 埋媽展祖兒行街, 好似好耐都冇試過同屋企人行街la, 都有幾多搞笑野發生bor! 原本今日係要幫媽咪買衫, 但佢乜都冇買, 阿展就買左一件衫兩對鞋兩條褲, 勁!!! 見到好多人都著好少衫, 我行到差唔多商場出口我就講左句:"天水圍真係特別凍架, 我著件厚褸都仲覺得凍, 旺角真係...(一踏出商場), 都好凍wor!" 佢地 3 個笑死左! 13蚊既茄蛋牛肉手攪麵都幾好食個wor, 仲好食過 d 幾十蚊碗既麵!

2007年1月21日

戒掉習慣
每逢深夜時份, 如仍未能入睡, 往往都會因當時的心情掛念不同的聲音, 不管是朋友或是舊情人, 就是那適合的聲線令這通話加添一份暖流, 傾談的內容更別於其他對象, 其他時間, 正正是這個原因, 深夜第一時間想起的通話對象就是自己心中認定的知己好友! 不知道何時開始忘記了傾電話這個習慣, 究竟是忘掉這習慣, 還是沒有動力令我延續這習慣...

2007年1月20日

遺留下來的約會
曾經每年四次的約會已不復再, 有幸今年還可以跟嘉怡見見面, 相約在咖啡室中, 談談大家的近況, 雖然很久沒有見面, 但似乎有數不盡的話題, 難得的是...還是我認識的她! 生活, 感情的難關每天都要面對, 希望這小禮物帶給你幸運! 祝生日快樂!

夜晚去左菲菲屋企打牌, 點知我早左個幾兩個鐘, 自己一個去左盈豐, 好多小學生既野食呀, 我忍唔住都買左包薯條黎食, 包薯既特別之處係用啡色紙袋裝既, 落左鹽同埋茄汁, 再加兩支竹籤吉吉下咁食既, 正! 芘芘真係好, 一收工就過左黎陪我, 底錫! 今晚蜜室既晚飯認真麻麻, 咋咋淋番去開戰, 點解今晚個個都咁爛口, 平時最唔似講粗口果 d 人都講到錯哂, 句句都有, 仲要錯 grammar, 反而我最乖仔, haha! 唔知咩原因, 係咪當左我地 d 仔唔係仔呢, 真係夠膽死響我地面前..., 大家睇睇下星矢, 芘芘出絕招"雅典娜之嘆息", 正係笑到反肚! 今晚覺得越黎越似一家人每星期既聚會, 多左咁多兄弟姊妹, 真係好! (win 左 d 的士錢真係好)

2007年1月19日
休閒星期五今日起身好頭痛, 於是都係偷懶冇番工, 就係咁過左休閒既一個星期五, 夜晚已經冇事la, 如常上堂, 上一堂健老師拍低左我地上課既情況, 仲要放左上 youtube, 都未練熟搞到勁樣衰, 今日順暢左好多la, 加埋有 2 個新同學, 真係越黎越好玩, 遲 d 會 upload d 可以出得街既 movie 比大家睇架la!

2007年1月17日

維修師傅
我諗除左滅蟲公司, 昆蟲專家, 同清潔垃圾人員之外, 應該都唔會太多人見識過盜墓迷城入面成咋蟲湧出黎既場面, 今日我又要見識下 lee 個場面, 有時一路整部 printer 見到有 d 野郁都真係幾嘔下, 不過要搵食都冇辦法啦! 每次行到去你隻手度果個冷震真係...真係...真係...你以為我見得多就唔驚咩, 咁就錯la, 一路整一路響度仆你個街...咦(唔係好奇果個咦wor)...fucking shit...就係咁, 整左成日la!

2007年1月16日
其中一個新同學今日值得記低既係, 比新同學啤住, 搞到我..., ==完==

2007年1月15日
黃金會議收工去左剪頭髮, 諗住番屋企既時間, 黃金組合召開會議, 可能係有任務, 即刻約左響銀座酒店機地等, 開左一輪會, 問題都係同一個啦, 其實都唔需要刻意去解決, 適當的時候問題定必形刃而解, 加油呀黃金組合!

2007年1月13日

堂哥就黎結婚la!
堂哥就黎結婚, 今晚同堂哥堂家姐食飯, 雖然話自從佢地父母走左之後最親就係我老豆, 但其實又真係唔係好熟, 所以成晚傾計都有好多冷場位, 響咁嚴肅認真既情況底下, 我老豆講當年一件事, 講左一句:"我當年點解要咁做呢? 主要係有一個原因既, 第一..."我同我細佬即刻忍住笑, 真係辛苦! 身邊既人一個一個咁結婚la, 結婚好似同我好有距離!

2007年1月7日

玩樂透支
5:00am先訓得著, 10點幾就醒左, 今日狀態不佳, 成個人好似太空慢遊, 想訓多陣, 但出面既麻雀聲嘈到訓唔到, 隻左眼睇野有波浪紋, 幫阿姨手頂幾鋪, 4筒5筒睇唔清楚, 最後又係出絕招, 碰到 6 將嘈哂咁, 扮到好緊張, 最後全部人都上當, 個個都棄糊, 順利過關, 食完飯我真係頂唔訓la, 隻左眼好大浪呀, 費時暈船浪, 10點訓左la!

2007年1月6日

玩不停
尋晚DERBY師傅剩左1300CR 比我, 尋晚兩點半訓, 今朝九點又要晨操, 去到有 D 谷氣, 真係唔知隻特別週想點, 搞到我唔夠半個鐘推左 1300CR, 諗住番屋企訓啦, 點知惡夢開始, 贏到傻左+爆到七彩, 就係咁, 玩到1:30pm 頂唔順la, 番屋企叉電, 叉到5:30pm即出門口趕出去富榮花園, 好彩265B 一程就去到啫, 小玲間屋環境幾好, 好舒服, 陳芝麻肥左好多好多, 君玲仲係瘦猛猛, 最搞笑個廚房塊大玻璃真係搞到有 d 似魚缸, 參觀完畢跟住開始玩, NDS X 8 既威力實在太大la, 其他人就打牌, 玩到咁上下, 大食會開始, 之後大皇 lur 左咁耐, 我地終於都同佢玩啤牌, 條友仔做莊殺哂, 好彩我唔洗輸啫, 傾傾下, 我多口講左一句, 不如鬥講卡通片名, 就係咁先知原來大家都係唔讀書掛住睇電視架, 點幾鐘散場, 嘉敏叫我落蘭桂坊, 我都諗住去架la, 點知我又口多問佢地去唔去食宵夜, 跟住我地就成班夜媽媽去搵煲仔飯, Mission complete, 大家都飽住咁番屋企la...

2007年1月5日

老豆生日飯
一早 book 左正冬火煱, 估唔到去到可以咁多人, book 左都要得個幾鐘, 最後我地都係放棄左, 去左對面果間, 名我都已經唔記得左la, d野食都ok 啦, 最開心既係, 好耐都冇試過咁齊人一齊食la, 次次都梗係 lee 個唔得閒果個病, 當然阿媽梗係習慣性同屋企打比較架啦, 不過耐耐地一次都幾好丫! 跟住就係 lee 幾日連續既節目開始, 上左車有人叫我入屯門打NDS, 廢事成日 SIDE 錢搭的士, 最後都係冇去, 咁星期五丫ma, 聽日又唔洗番工, 咁我番到入天水圍梗係...

2007年1月3日

應援團香港版
收工遲左走, 準備搭巴士之際, Tammy 急 call, 我地去左 NARA 飲野, 諗住傾到10幾走, 一望錶 3 個人既反應都係"吓...乜.乜12點架la", 唔緊要啦, 反正都有車番屋企, 點知...我Join 左佢地架的士番入屯門, 都唔緊要, 但點知...去到建生以為冇車, 好彩有最後一班車番屋企, 點知...去到兆康, 尾班車改早左, 冇車番屋企......, 點算好呢, 我響兆康搭的士又行勁遠, 搭去洪水橋轉的士又同建生直搭8折的差唔多價錢, 搭去元朗再轉 van 又好似好 on 居, 最後我都係 on 居左, 算啦, 我地"應援團" 今晚總算應援成功!

2007年1月2日
退步好難, 今堂好難, 要抽多 d 時間練先得la...

2007年1月1日

2007新年快樂, 真係新年快樂呀!
今日起身已經係2點幾, 老母問我買唔買番場, 我就簡左隻膽, 亂拖3隻冷腳, 贏左三佰幾, 一沖線果下, 我同佢兩個一齊講"好...D..."(解說:我同阿展去打機, 成日都會幫人改名, 有個阿叔笑果陣好高音, 我地叫佢"高音叔", 有個一中條冷Q就會叫"好...D...",我地叫佢好 D 叔, 冇頭髮叫"光頭佬", 4眼中年男人叫"四眼佬", 佢老婆叫"四眼嫂"[不過佢老婆冇帶眼鏡])估唔到唔識亂買比我中左, 真係新年快樂呀!Hehe...

2006年12月31日

簡單除夕夜
今日原本有兩個活動架, 但今日一起身就有少少發燒, 於是我兩邊都冇去, 最後都係留番響屋企, 咁既日子冇得去玩似乎係好大既損失, 但今年聖誕我已經賺左啦, 今日先病都算代我不薄, 最後我都走左出去倒數, 就係去左馬機倒數, 永遠最冇野玩, 最悶果時, lee 班友都一定響度, 有佢地真係唔會有機會悶呀!!!

2006年12月30日

點解咁大唔透架?
今日冇乜野做就訓多陣, 點知收到 call, 去左葵芳甘味, 去到原來條 cable 插得唔實, 我真係想*%#@^%$#, 不過反正都冇野做, 算啦! 出到去我感覺到我屎忽有 d 痕, 打左比師傅同師姊問資料價錢, 仲痕到走左去荃灣睇, 睇都未夠仲要買左...TOTAL$1,575 包哂所有野既 NDS, 師傅師姊即刻上左 NDS 寺傳授我技術, 我定必將佢發揚光大!

2006年12月29日

家*品茶, 一聚
放左學同 Tammy 去搵到方飲野, 上到一間 cafe 先知原來只係剛開左一個星期, 開店的都是幾個年青人, 同佢地講到餐廳既野鬼咁好傾, 搞到我掉低左 Tammy...之後我同 Tammy 玩好耐未玩過既飛行棋, 其實我真係好想問係咪有咩唔開心? 最後我都冇問, 可能同我一樣, 有時只係想有個人陪下自己, 即使大家一齊悶, 都好過自己一個悶丫, 就係過左黎一陣, 跟住就走左la, 可能搭車時間仲長過坐低傾計既時間, 下次再約我就唔洗怕悶la, 因為我聽日會買...

2006年12月27日
今日一年前既今日, 好有心去做一件事, 今日心情都唔一樣la, 沒有壓力, 日子過得輕鬆多la, 打開閃閃 fans 牌, 感動架, 不過都只有開心冇左失落既感覺la, 唔應該再回頭, 看前行, 看前行!

2006年12月26日

對唔住, 坐我下家個個都一樣架, 哈哈
今日係休息日, 阿姨黎左, 我都加入戰團, 今日既口號係"補一補身先", 其實我唔係對邊個特別差, 係除非我黑得好緊要, 如果唔係坐我下家都一定要接我招, haha! 8番都冇食過, 依然可以以次名出線, 唔該唔好唔侵我玩呀, 最多下次我唔食咁多啦! 哈哈! 晚餐係打邊爐, 係呀, 又係打邊爐呀! 食死我la

2006年12月25日

住家 feel, 打邊爐過住暖粒粒既聖誕
沒有情人的聖誕, 好彩有 3 個女孩子同我一齊過, 今晚約左 CATHY, BELL, 雯政打邊爐, 4:00PM 到左良景, CATHY 遲到搞到我要等佢半粒鐘, 行行下買左 3 份得意禮物比佢地, 之後我同佢兩個人就去買餸, 我個人不嬲都係咁婆仔架, 女人唔講價, 等我黎, 4個人食買左 6 個人既份量, 上到去洗野整野, 差唔多 CATHY 整哂, 真係要學阿 BELL 話DRY, 下次去邊玩, 要帶埋佢去(做工人一流), 第一次見雯政 lee 個 LOOK, 幾好睇wor! 傾左成晚, 對佢既感覺有 D 改變, 可能係之前既印象太先入為主啦! 飲飽食醉之後雯政番屋企, 我地 3 個去唱 K, 竟然同佢地咁乖既人唱到差唔多 5:00AM, 勁!

2006年12月24日

平安夜 06
由東涌番到屋企, 涼都未沖就上左床訓覺, 5:500pm 出門口, 打比阿樂, 點知佢仲響屋企, 上到 fayma 度, 原來得我一個遲到既人, 但係最早到! 晚餐食左一個好夠未既羊腩煲, 每人30蚊就搞掂, 大家都話 lee 餐真係低 X, 點解 D 女仔講野仲粗過我既? 今日其中一個對話係咁既: 女人要健康就要講"唔該幫幫手"或者問姊妹借野, 至於男人就要記住"健康就是除褲"! 今晚既節目係打牌, 睇top model, 傾計, 倒數, 好簡單過左一個好平安既平安夜! 其實我真係唔覺得悶, 如果可以, 我唔介意每一年都響同一個地方聚一聚架! HEHE

2006年12月23日

聖誕扮野聯歡會2006
lee 幾日唔理天氣熱定凍都好, 為左唔好病, 我都著好多件衫, 終於黎到今日la, 好醒神執好兩大袋用品出發, 我地一行 16 人包括, 我, fayma, tammy, vincent, 阿沛, 阿樂, 歐大姐, Iceman, Joey, 家明表哥, 戴老師, 戴老師男朋友KEN, 小玲, 小玲個妹浩龍, 晶晶, Ambrose, 去塘福參加聖誕扮野聯歡會2006, 辛辛苦苦終於買齊哂 d 野, 8 個人都一抽二抽, 今次 d 野預到岩岩好, 仲有錢剩可以比我地搭的士, 入到去間屋比預期正好多, 真係唔錯, 個廳夠哂大, 而且仲好新淨, 男人就佈置, 女人就準備野食, 彩色閃閃燈, 白色閃閃聖誕樹, 閃帶, 佈置到好靚, 好有聖誕氣氛, 雖然有人話我洗唔洗咁大陣象, 但係當完成佈置大家都一齊講一聲"嘩...好靚呀!" 我拎得咁辛苦都值得! 我地開始 BBQ, 準備東西既過程其實都有好多樂趣, 好唔容易先透好爐, 辛苦哂la, ICEMAN! 16 個人逼埋一個爐, 你一句我一句, 嘈喧巴閉令寒冷既天氣變得熱烘烘, 真係好熱鬧, 由於我地 BBQ 既地方同其他人係共用既, 而且仲要望到我地屋個廁所, 廁所個玻璃又好透, 爆笑事就黎la, 有好幾個人都比大家睇到佢幾時除褲幾時優褲, 好香豔, 完左lee 個話題, 我地開始黎料la, 先係歐大姐黎一個慾望 JONGO, 跟住浩龍跳光管舞
接住就係交換禮物 + 聖誕扮野聯歡會, 今晚既做型就勁la,
1.小玲 + 浩龍:骨妹 + 老細組
2.阿樂 + Vincent:老人院阿婆阿伯組
3.安迪 + 阿沛:聖誕老人組
4.Fayma + 歐惠兒:墜落凡間的天使組
5.靚花 + Ken:宇宙代表隊
6.Joey:魔女
7.晶晶 + Ambrose:情侶睡衣組
8.ICEMAN:過氣企街阿姑
9.Tammy:紅番 look
最後由 Tammy 大熱勝出奪得現金獎, 接住我地玩遊戲,
1)計時摸盲雞:玩到最後果 round, 越唔 lee 埋就越安全
2)大電視:見到大家做動作個樣真係好好笑架
3)逼到爆:C組就最慘, 係咁輸, 輸到淨番兩格要做高難度動作
4)圍枚...拍七, Iceman教既青蛙跳多人版, ping pan 嘩......
輸左既都要接受大懲罰, 就係擲骰子
道具：紙造骰子 2 粒, 透明膠片
玩法：圍枚輸左的兩個人, 一人擲一粒骰
骰子1: 吹, 吻, 含, 舔, 咬, 冇事
骰子2: 下巴, 面, 咀, 額頭, 耳, 鼻
今晚真係玩得好開心, 首先要響 lee 度多謝遊戲進行中冇得玩幫手拍攝, 計時既咁多位, 今次我要特別多謝 Fayma, 歐惠兒, 非常出力幫大家完成一次咁圓滿既 party, 最後我要多謝大家, 大家要有一份踴躍, 投入一齊玩, 先可以有咁好既氣氛, 希望黎緊會再有更多好玩既 party!

2006年12月17日

輕鬆一下
好多日冇去打機, 收工見早就去左輕鬆一陣, 見到班 friend 真係好 x 嘈, 阿海今日起哂 Q, 我今日都爆到傻左, 我係咁比人小, 唔好意思我都唔想, 哈哈! 我愛採珠......
今日都幾豐富, 食左好耐冇食既伊藤家, Blueberry chesse cake, 香辣牛肉杯麵, 熱朱古奶, shake shake 薯條, 正! 生活模式似乎一路響度轉變緊, 由得佢順其自然, 唔知會變成點呢?

2006年12月17日

Ces't Bon
今日要開工, 其實開工都唔係有咩特別, 係去到個客度, 見到 d 裝修咁正, 真係有好多野諗, 響度諗如果有人黎同我食餐飯就好la, 最好要飲少少酒, 慢慢座低, 聽英文經典歌, 最緊要係食佢個甜品, 諗到個人悶死左, 諗下不如打比人傾下電話啦, 相信每個人都會有好幾個傾電話對象, 我望住個電話呆一呆, 究竟應該打比邊個呢? 可以打比邊個呢? 似乎同以往出現既人物大有分別, 傾左一陣, 響個客度終於捱到 5 點, 個老細叫我食飯, lunch 都未食我梗係話好啦, 點知我做埋少少野, 個老細走左.......我個 lunch 仲未食架, 點算呀 >_<, 個 lunch 198蚊架, 慘......最後經理請我食左個甜品, 都好過冇啦! (下次真係要食左先, 唔好扮勤力)

2006年12月15日
新同學今日上堂多左幾個新同學, 天勞幾靚仔, 又友善, 至於另一個就...食左檸檬law, 仲要比JOEY睇住我正面咁食, 飽哂! 點解一路行, 一路郁呀, 真係唔怕比人笑架咩, 郁到去 CD 鋪, 睇左陣就番屋企lu!

2006年12月13日

忙碌的星期
今個星期好多野忙, 公司又忙, 二五又要上堂, 仲要安排 23 號 d 野, 星期五六仲兩間 shop 開 tim, 好累呀! 最激氣係兩個客 d 野拖拖拖, 拖到迫埋一齊, 真係麻煩, 星期六日千祈唔好有獲呀! 收工同 bobo 食飯, 有佢既地方真係想靜一陣都唔得, 今晚最好笑都係佢咁潮既媽咪, 同埋佢把口真係衰到呢... 同佢食飯一個大男人都會突然間變左 8 婆, hehe!

2006年12月9日

今日比鬼妹笑呀!
今日突然間 popo 打比我話悶, 我地兩條友仔就去左飲下午茶, 之後再睇戲, 睇恐懼教室, 真係幾嘔下個wor, 買左野食入去, 完全都冇郁過! 睇完戲之後就趕過去屯門接下場 , 食飽飯, 再去黃金, 今晚離奇事件 1. 落車果時, fayma 問我野, 我個角度限制眼鏡睇唔到前面, 撞左埋去條柱度, 仲要好大力下, 靚女鬼妹岩岩行過, 係咁笑, 仲要同我講"I'm sorry, you are pretty funny!"....天呀! 之後我地去左黃金酒店...飲野, 離奇事件 2.飲飲下我地走左出去跳舞, 真係好搞笑, 真係估唔到 uncle 跳得下個 bor! 離奇事件 3. 有人唔見左個電話...... 記住下次比我袋啦!

2006年12月8日
Hip Hop Yo~ 今日終於上第一堂 hip hop, 有人同我一齊玩, 心情都唔同好多架, 開初我仲擔心會好魚皮, 原來暫時都係教 d 簡單野, 都應付得黎gei, 雖然一堂只係一個鐘, 但都真係幾累架, 減肥就真係岩哂!

2006年12月5日

掌聲鼓勵
每次上堂都有趣事, 今堂亦都唔例外, 雖然比人讚我學得快(勁爽), 但成日都比人話我動作太大, 唉...我都唔想架, 我一小步, 隻腳就唔知去左邊, 如果真係要就番大家既話, 個人又好似唔識郁咁law! 個個同學都好熱情, 可能黎得既人都唔會太怕醜啦, 反而咁樣令每堂都有一定的進度! 有時真係諗點解咁遲先學, 如果細個 d 就好la!

2006年12月4日
跑死我la 打緊機途中, 霞姐急 call, 明明已經用好簡單的講法教佢架啦, 但係電話教極佢都唔掂, 即刻極速番到屋企, connect 之後原來...霞姐簡岩左個 setting, 但...冇按確定law! 真係猫低噴飯呀...

2006年12月3日
國語類... 近 lee 一年聽歌既口味唔同左好多, 但始終都係鍾情於國語類, 可能係因為國語係 4 聲, 而且可以變調, 粵語歌就沒有 lee 個彈性, 國語歌無論在唔同既曲式(rock, Jazz, folk, R&B, rap, hip hop)都比較容易發揮, 再加上填詞方面國語比較容易, 經常出現觸動心靈既歌曲, 你心目中又有冇 touching 既歌呢?

2006年12月2日

悠閒星期六
星期六朝早11點幾醒左, 諗住煮個麵食啦, 咦點解聽到老豆把聲, 原來今日個唔洗番工, 於是就同佢地去左食茶, 今日我忍唔住叫老豆唔好出門口住, 等埋我先, 費事餐餐佢行先, 我去到佢食飽又話走先, 今日總算飲得正常la, 佢地兩個響度講馬, 睇見佢地真係幾好笑, 我都應該要多 d 陪下佢地先得la! 食到好飽呀, 搞到我夜晚 8 點都未肚餓, 約左奀妹, 劉太去打邊爐, 展開第二輪既戰鬥, 我地邊食邊傾, 可能同劉太太耐冇見啦, 要 WARM UP 完一輪先 TUNE 番岩個台, 如果佢兩三個月入番黎一次就差唔多la, haha!
上左奀豬屋企, 奀妹帶左 d 正野黎, 佢話 lee 隻 SK-II 既新 MASS 仲未出街架, 跟住我地四個率先試用, 唔好以為我識, 其實我真係唔識架, 唔該哂工作人員幫我, 之後我地當然影相留念啦, 新一輪激戰又開始la, 今日係咁比人(湯), 做左大輸家, 對唔住呀劉太, 我都唔想出絕招架, 我 lee 招叫做"先碰...後擾亂"

2006年12月1日	23:55
搬運工人收工同左 Cathy 去行街, 原來我今日既功能係...搬運工人, Cathy 勁勁多野買, 女人錢真係易搵! 超好笑係要去買一樣野, 但係唔知果樣野叫做乜, 去到鋪頭問店員"唔該有冇果 d 呢, 咁樣既呢, 有冇呀?" 真係勁wor!

2006年11月28日	23:55
插班生今日又係得我一個去上堂咋, 但一 d 都唔覺得悶, 識左好多同學, 佢地都對我好好, 好彩既係我都跟得上, 其實真係幾好玩丫!

2006年11月27日	22:15
祝我生日快樂

2006年11月26日