前妻:女主角阿笙(Sam),地點P記,時間四月至九月!

佢係我出黎做野之後,第一個一齊既女朋友!!

我14/1日入黎Pizza Hut,當時仲未認識到阿笙,反而係對一個叫Kitty既人有好感.....識佢果日好似係31/1,點解咁遲先識佢?因為果日返工知道有條叫阿Sam既友仔請左幾日病假,心諗呢期新年近,大把野搞喎,邊個咁把砲呀??之前仲以為叫得阿Sam既必定係男同事啦,後尾人地話我知原來係條女黎喎,即時心諗:「頂,女仔之家叫阿Sam,玩你定玩我呀!唔想返工扮野炸??」so果時對佢印象真係唔係幾好!

到後期開始有同呢條友拍著做野喇,都覺得呢隻野既自信心都好爆下喎,不過在私就覺得佢都幾玩得既!!記得第一次同佢出街係返左自己公司食T(T-Time),果時係因為阿猩,吉蒂,Kenny等等既人叫既,咁我諗住冇同過佢地出街麻,咪一齊玩下囉,之後先知原來佢都有份,咁......都冇所謂啦!!而第二次出街,我真係估唔到!?!?我地都係返公司食T,不過今次明顯同佢地多左野講既,話晒都過左一段日子、又多左一齊做野喎!到左其後仲一齊食宵夜,咁你地都估到我地既進展有幾神速架啦.....

傾電話係一個好好既溝通方法,我一真都好多謝發明電話果條契弟!點解又關事?因為我同佢既開始都係緣起於傾電話呢個咁老土既情節囉--果時收工我都會扮好人陪佢去相反既方向搭車,之後先自己番屋企架!咁佢坐緊巴士閒來冇野做喇,好自然就會拎起個手機,之後又好不由自主咁發我個罧把,我接到咯咪一齊吹吹水囉!!有一次,我、猩猩、健力同佢出左旺角行街,夜晚散果時我就例牌送佢去搭車架啦,一路行一邊傾,佢話俾我知唔開心,咁我又唔知點安慰佢喎,唯有望班車快D到啦....呢次就有少少唔同喇,當佢有車黎到既時候,佢問左一句:「你陪唔陪我返屋企呀??」當時我真係唔知應該點答.....但係到佢上車喇喎.....心急之下,我唯有同左佢上車啦!

一路上我地都好少講野....直至返到佢屋企樓下,我諗住總算陪到佢番黎喇,之後我講左句:「咁你小心D喇,我走喇!」然而佢又講左句:「不如你陪我傾多陣計好冇呀?」咁佢唔開心,我又冇理由棄佢於不顧架!?咁咪同佢坐左落公園仔D長椅度傾囉,不過可能個Feel好啦,我忽然間好多野講,而且同佢互訴心聲,彼此亦因而了解多左好多!!之後我都有keep著送佢返左屯門先,然後至自行番歸。有一晚我地等緊巴士,心血來潮醒起一首歌,於是對著佢講:「喂,你姓"李"呀呵?送首歌俾你喇!」係人都好奇架啦,當聽到話關自己事就更甚啦:「咩歌呀??」佢問我喎,咁梗係叫佢自己諗諗先啦!過左陣我開估喇:「『一生愛"李"一個』呀!咁削架!」佢唔多謝我不特止,仲話:「有車喇,行啦!」咁我地就上左車喇。一路上我地都好無聊咁哼住首歌,足足哼左差唔多一個鐘,哼到.....佢返到屋企囉!!

21/4果晚,我地終於一齊左,當然係由我開口啦!之後既一個重要日子就非我既生日莫屬啦!!果日佢送左隻細細隻既「電單車」模型俾我,對於我黎講真係物輕情義重架(ThankYou)!不過因為我地處於同一間公司做野、公司又唔係幾夠人喎!所以好難夾到時間行街街,平時只係靠返工見面架炸,唉,超慘、激可憐呀........咁有時咪等大家收工囉,不過始終都係我等佢多D!有時間我都叫佢早D返歸抖抖、等我電話好過啦!!

到左暑假話晒都有廿幾個staff,經理大人都算好人架啦,有時都刻意編我地一齊放假,可能係可憐我地冇乜時間拍拖拖掛?點都要多謝番聲既!都左九月我地好無耐呀,因為好多同事走喇,我地被打回原形,俾經理編番「牛郎織女更」呀!!算啦、都預左架喇.......九月份,真係一個唔開心既月份--12號,我地終於好和平咁分左手,不過冇乜人知,因為我地亦覺得唔雖要刻意同人地講既,到左其他人真係知果時,好似以經係翌年既二、三月喇!

有D人,到我遲職唔做果刻都仲未知其實我兩已經分開左!偶爾我返P記搵佢地吹水,洗碗阿姐依然會笑住咁問一句:「噫,番黎等阿Sam收工呀?」其實我想答佢地:「我地.....已經冇一齊好耐喇.....」聽到佢地咁問其實我個心好難受架,不過我覺得我都走左咯,咪當大家講笑吹水囉,我只係強顏歡笑、而又扮晒開心咁回應番一句:「唔係呀,我係番黎等你至真呀!!」「死仔包,阿姐你都玩!」--佢地只係笑住咁反鬧番我一句,然後就掛住一絲既笑容繼續去做野喇!唉.....好多時,真係有苦自知架炸;好多時,唔開心想同人講都係欲言又止架炸;好多時,呢D野未必有緣有份既,始終要夾timing既;好多時........

.........哈!罷了,反正....已成過去喇,已成為我畢生既其中一個回憶啦,最後,破例送上一張我兩既合照俾你地超超啦!