|
Billy Lau Ho-Him's
Home Page |
|
|
2004 October newsletter 眼紅紅(內傳)
感受未必係事實, 但卻來得真實. 所以, 感受要承認, 真相要確認, 人生才有出路. 呢個係 Billy一貫既神學觀, 跟 self denial呢套主流既壞鬼神學觀打對台.
以 Billy 04年 6月撞車為主題, 曾先後寫過三篇分享, 加埋呢一篇, 亦係最後一篇, 共四篇分享:
(建議你先讀頭三篇再讀呢一篇, 因為內心世界既思想可以非常偏激. 呢個係點解 Billy等左足足年半先堆出呢篇分享既原因)
知情意外 撞車本身冇什么大不了, 亦冇令我情緒波動, Daddy亦冇因為 我撞車而加以責備. 不過, Daddy係個諗得好多同對人戒心好重既人, 尤其係為左 protect屋企人. 佢對於對方車主誠信既質疑, 以及賠償金額/還款方式問題既不安和防範令我忐忑不安, 不勝其煩
由於撞車, Daddy亦開始逼我學車, 要我考 G 牌. 佢話找師父貴又未必教得好, 加上我日後要揸 mini van, 所以, 佢親自教我, 揸架 mini van 去考牌. 依家考到牌, 當然好啦! Daddy自己骨痛都肯教我, 我亦知道佢既好意. 不過, 果陣岩岩撞完車, 仲未驚完, 已經覺得自己好冇用, 仲要去學車, 好辛苦, 心理障礙好大, 好難頂. 加上上一代的教學方法就係有彈冇讚, 掛在口邊的總是: 「如果你咁咁咁.....我保證你 fail.」 又話:「我教阿邊個同邊個, 佢地兩個全部都一次就 pass la, 你係我個仔, 如果你 fail 就真係....」 我唔敢想像, 如果我 fail 後果會係點, (應該冇事) 但 pass同fail唔係我可以完全 control. 其實我亦唔 care, 因為係 Billy既時間觀裡面, 揸車係浪費時間.
我唔能夠因為 Daddy既出發點係好, 同埋勞心勞力, 就對於佢說話上的傷害若無其事. 雖然係咁, 有一晚, 我靠著禱告, 的起心肝去練車, 卻聽到 Daddy同Mammy在電話講: 「佢邊係去練車, 係想去探朋友之嘛.」 我聽到之後, 個心都涼晒, 忍唔住在房裡面大喊一場. 於是, 我果晚倒頭便睡, 賭氣唔去練車, 亦唔再練車. 「Fail又如何呢? 又唔係世界未日, 何况, 這不正是你專業眼光既判詞么?」 Daddy生氣就不唔洗講.
同一個朋友分享, 希望有 D安慰, 點知莫明其妙咁比佢教訓左我一餐: 「你咁大個人, 洗乜成日好似個 BB仔咁, 聽你 Daddy講, 你應該有自己主見. 撞車之麻, 洗乜問你 Daddy意見? 考牌當然係跟師父車 la......」 我唔覺得問父母意見就係 BB 同冇主見既表現, 獨立亦唔等如要孤立, 便加唔係攪對立. (不過, 呢個係大部份後生仔既諗法, 或者, 係我思想太古怪罷!) 考牌唔揾師父車, 亦非 Daddy個人的獨裁決定, Anyway, 果一番訓話卻足以令我更加 feel bad 同難受.
意外發生之後, 好多弟兄姊妹都曾經關心我, 慰問我, 同分享佢地交通意外的經歷. 但呢 D關心慰問, 似乎都彌補唔到一次疏忽同忙亂所帶來既傷害.
我講的唔係撞車, 亦唔係壞電腦, 而係一次唔見銀包事件. 可能因為弟兄姊妹果日太忙太累, 又可能因為我平時太少付出時間比佢地. (何必妄自菲薄呢?) 我當時話:「我唔見左銀包」 前後講在三次, 除左一個人, 居然冇人有反應, 冇人問侯, 冇人關心. 我忽然之間覺得個心好酸, 好孤立無援, 原來呢個世界係冇人 care 我既死活. 我唯有强作振定, 裝作若無其事咁返屋企. 呢件事令我心灰意冷, 意興闌珊....... 令我重新思想「弟兄姊妹」的定義, 以及如何去繼續實踐彼此相愛. 講到好誇張咁, 或者這只不過係條導火線罷, 但其實能正視一直未有被正視過既問題, 未嘗唔係一件好事.
以前有幾個好朋友, 都因為拍拖, 忙到冇晒 D時間. 忽然之間, 我覺得自己在公司, 在教會中, 都找唔到 peers, 亦 冇<<歸屬感>>. 好似一個半天吊既<<空中飛人>>, 高不成, 低不就, 在掌聲背後, 邊個 care 呢? 轉工, 植堂, 某程度上, 都係希望擺脫左呢 D屈結, 重新開始.
傷信 教會, 正如學校, 公司, 又或者屋企, 總之, 有人既地方就會有相處上既融洽, 亦會有相處上既問題. 呢個係頂正常既道理, 不過, 我地慣性地覺得教會唔係咁 run 既. 唔通我地要人人注意同遷就晒自己, 先覺得係彼此相愛. 同屋企人又好, 同弟兄姊妹又或者<<朋友仔>>亦一樣, 關係既建立總會有衝突同難受既時侯. 亦會有被忽略同互相誤解既時侯, 所求既或者係識得互相遷就, 識得去互相體諒.
有好多野其實大家都知, 不過, 真係經歷既時侯又好想繼續徘徊係自己既天空之中. 最好覺得全世界都好似永遠欠左自己咁, 呢種感覺或多或少可以令自己找回一點存在價值, 一份自愛自憐. 係呢 D情况之下, 有人會選擇逃避. 逃避最好既方法係轉教會. 不過問題係: 教會只愛「罪人」, 如果你扮未信, 佢會博命關心你. 如果一知你信, 仲要係某某本地教會轉過來, 佢會怕左你, 你越信得耐, 佢對你越冷淡. (所以, 有部份人心萌去意但卻遲遲末走就因為知道離開去第二間教會, 如果唔識人可能仲傷仲快死既道理.)
其實一個信左但係傷左(唔理佢點解)既人, 比一個未信既更需要別人接納同關心. 但又有邊個熱心福音既人會察覺到呢個咁福音既信息呢? 主耶穌來到世界, 唔係去外邦人當中, 而係走遍以色列地, 果班本來就信神既人當中. 做乜? 傳福音!!! 冇錯! 係傳福音!!!
如果未信既人需要福音, 信左既人就更需要福音. 教會既牧人要關心教會當中既「遊牧民眾」. 對於呢班人, 其實為數不少. 自從有左上面提到既「銀包」事件, 我開始注意到呢班人既存在. 亦嘗試進入佢地既世界(其實巳經進入左), 用佢地既眼光去睇教會既一草一木一言一行. 原來係可以睇到真理既另一面. 好似月光咁, 一般人只會睇到發光同對往地球果面, 但原來月球另外有一面, 係平時睇唔到既果一面.
係呢段觀察期間, 我發現「遊牧民眾」有幾個好特別既「病徵」. 佢係教會好耐都一事無成, 但遇然同佢傾計, 才發現佢觀察力好強, 心細, 識唔少野, 工作/讀書都唔錯. 平時好多野講好多鬼主意, 不過, 一到查經/小組, 要深入分享就冇乜聲氣. 其實佢唔係唔明段經文, 不過, 佢唔 buy 直入application呢套, 亦唔知經文點 relate to生活. 但又唔想「攪亂」個 party, 通常人叫呢種做頭腦知識. 對聖經, 對神唔係冇心, 不過叫佢事奉唔係耍太極就係馬馬虎虎, 越「大」既事奉耍太極既手段就越高明. 有問題同不滿一定唔會揾組長/牧者, 寧願同個初信甚至未信既講, 仲成日講. 不過, 一年一次退修會, 如果請外來講員, 佢又會捉往唔放, 私底下不停咁問. 原來, 佢唔係唔知自己諗乜. 掙扎是: 唔係唔想成長, 但唔想做到好似個機械人咁, 又唔想走回頭路, 唔信. 對於「遊牧民眾」, 出路係邊呢? 又有冇出路呢? (呢個亦係我有勇氣寫呢篇分享既原因. 唔係為左發洩, 亦唔係為左投訴.)
幼稚園 一個花了整整半年去思想的問題, 最近聽首好有意思既歌, 都幾有提醒.
人長大左, 就會有多左難擔既擔子, 害怕成長既人會用忙碌既事奉去找不成長的籍口, 而「遊牧民眾」則誤以為忙碌 = 成長, 以致拒絕成長. 有時教會的確比人「幾千噸責任, 冰冷像校訓」的感覺. 第一次返學, 走入幼稚園, 你或者會驚, 會喊, 但原來當你今日睇返轉頭, 幼稚園, 又或者學校都可以找到好美麗同快樂既回憶. 成長係出路, 亦可以令你活得更精采同喜樂. 點先可以成長? 一切從讀經開始. 當我地認識神更多, 好多睇法就會變, 十架路就唔會咁難頂. 與主同負一軛其實也不錯罷.
神借住呢次經歷, 令我既愛心更加長進, 對家人同弟兄姊妹的盲點睇得更清楚, 體諒就自然多了.
|