|
Billy Lau Ho-Him's
Home Page |
|
|
迴響 2006年03月 Newsletter
3 月 5日, <<同夢同心>>這首詩歌在萬民堂一周年內正式首播, 反應不俗. 繼<<同夢同心>>之後, <<聯想>>以及<<風靈頌>>的人聲版亦先後面世. 為了趕及參加 A.F.C. 舉辦, 3月31日就截止報名既詩歌創作比賽, 趕到冇命.
3月30日, 放工, 胡亂吃了點米飯, 就趕去 Adam家, 睇「 Twins」同「蝸牛」錄<<風靈頌>>. 對牛彈琴難, 不過, 叫淨係識講廣東話既「蝸牛」一下子講一口流利國語都唔易. 叫佢扮「鬼佬」或者容易好多, 辛苦 Ronald啦! 我地錄音, 係分開錄, Twins錄完, Ronald錄. 不過, 唔係唱功有問題, 而係發音既問題, 錄左好幾次都唔得. 不過, 蝸牛雖然慢, 死爬爛爬依然可以到終點, 又何况聰明聆利既 Ronald呢? 我地係上面傾計, 佢地係 basement錄音. 費時 disturb佢地, 不過細聲講大聲笑, 依然係太遭, 唔知 Adam有冇 keep到個「笑笑版 version」. 傾到十一點到, 成功錄完, yeah!! 感謝神! 趕喉趕水, 又害得Adam arrange首歌攪到凌晨三四點鐘, 4月頭佢仲要考試, 真係唔話得.
3月31日, 一如以往, 加班, 放工晏, 返到屋企己經六點幾, 即刻打開 Adam sent過來個 MP3 file, burn 落隻碟度 (唔係老翻) 用信封入好, 再用比 Canada Post, Federal Express更快既速遞方式 - 親身送去!!! 差五分鐘 7 點收工, 感謝神, 趕到! (其實, 係 7 點收工定 7 點半呢? Anyway!!)
停不了 講開趕喉趕水, 3月10日, 返團契果陣發覺個車頭有 D唔對路, 忽然間升上一百度. 好唔容易係冇燒車頭既情况下捱到返屋企, 到 3月16日先有時間告假, 送架車去整.
爹地叫我穩陣起見(佢向來都穩陣), 叫 CAA來拖架車去, 不過, 佢好衰唔衰爆左句: 「不過可能要等兩三個鐘.」 我係個連車位都唔鐘意等既人(但我鐘意等巴士喎!), 你認為我會唔會等拖車? 拖手就等. 於是, 自己揸去, 相熟既果間車房位於 Sheppard & Markham, 由我屋企去會途經一個 stop sign同埋十五個大小燈位. 今次既任務就係要係冇燒車頭既情况下, 通過所有障礙, 將架車安全送到. 任務完成, 經驗值就會增加五十點, 支出亦會由三萬大元(買新車)跌到幾百.
我發覺當我加速, 超過六十咪, 温度就回落到四十五, 每當我停車或者減速, 温度就會升高, 高過一百二十度, 車頭就會燒. 應該係恆温器, cooler etc有事, 純靠車頭風 cool down架車之故. 不過, 所謂「知易行難」, 信心冇行為, 去唔到車房, 一樣係死, 而且係更加抵死.
係果一個時侯, 揸住架車仲過癮過打機, 緊張剌激過睇荷利活電影. 我一住揸車, 一住哼住電影<<生死時速>>裡面既背景音樂, 裝造更有驚無險既音樂效果. 可惜我冇 call 911, 叫警車幫我開路, 略嫌美中不足.
當架車轉入 Shepard, 眼見前面有兩隻「蝸牛」, 真正「蝸牛」, 一前一後一左一 右咁. 害我又做埋「超時空要塞」既男主角, 塞到 Kennedy, 已經一百度, 好衰唔衰, 路上亮起紅燈!!!
車頭越來越興, 快到紅色火災危險警告訊號, 仲未轉燈. 「主啊!! 車頭喪命了, 你不顧么?」 就係呢個時侯, 我心裡向車頭呼叫:「住了罷! 靜了罷!」 最後絕招 - 熄車!! 周圍既眾人都望住 Billy, 驚訝萬分, 心想: 「這人是誰? 連車同頭都熄晒??」
就係咁樣, 走走停停, 入五缺油有個新車頭, 但熄左五次車, 加左五十次油, 唔洗換個新車頭, 感謝神.
同夢 講番 D歌, 這段日子不停 send果幾首歌比人試聽同比意見.
坦白講, 在用字, 字音, 創意上, 比較起其他詩歌填詞人, 西伯, ACM, 盧永亨, 趙芬妮, 甚至係同我一樣, 仍然寂寂無名既詞人, 我唔覺得比佢地好, 又或者真係唔夠佢地咁好, 我唔知道自己仲有幾多進步既空間. 今日, 福音歌, 讚美歌, 以及舒法個人感受的詩歌太多, 我自問亦無法寫得比他們更好. 但如果退一步海闊天空, 寫 D冇乜人寫既, in terms of 商業角度. Biblical driven既詩歌係個幾乎未開發既市埸, 競爭少而創作空間大, 可以建立一片新天地.
一般來講, 人家對我 D歌同對我個人一樣, 比較慢熱, 冇乜人第一眼就欣賞同鐘意我 D歌, 更加少人聽第一次就明講乜, . 問題係, 係今日呢個<<快熟時代>>, 有幾多人會坐定定聽多幾次呢? 以流行曲為例, 一隻歌之所以 hit, 多唔多人 li-ke. 邊個唱, 宣傳點同播放率高唔高成正比例, 編曲則令到重重覆覆, 你抄我我抄你既歌曲歌詞, 添上新鮮感. 所以, 如果編曲好, 人氣夠, marketing有多 D卓頭, 人一樣肯聽多幾次.
又有人話, 我 D詞想表達既野太多, 令人眼花撩亂, 唔夠 focus既感覺, 都係嫁, 呢個可能係 Billy既 limitation, 又或者係固執. 不過, Billy 係有佢既原因: 一, 我討厭流行曲/現代詩歌, 一個 point, 一句詞, repeat 又 repeat既 style; 二, 要表達一個神學思想/一段經文/一卷書, 通常唔係三言兩語, 頌讚又頌讚, 委身又委身就能交待一切. 整體而言, 其實每首作品都好 focus同結構連貫, 不過, 未必一下之間睇得出 :P 三. 我寧願首歌慢熱, 都唔想比人咁快聽「爛」首歌, 又或者聽「行」晒, 即使人聽一百次二百次都仲有默想空間, 而且越來越有味道, 呢個係我對每首歌係要求同目標; 四. 現代文化講求清徹簡潔, 後現代文化則著重一份凌亂美, 多元化, 多面睇. 所以, Billy 詩歌每一句歌詞, 都係重點, 背後都至少可以講/寫一篇文章.
Anyway, 我既詞係有不足之處, 需要繼續進步 lor.
最近, 聽過盧永亨弟兄既新碟, 將過去幾首 hit songs改編, 情歌版, 英文版, 國語版..... 我係個唔鐘意重覆既人, 所以, 對弟兄同對呢隻碟有 D失望. 這亦令我反思到我將來填詞取向. 究竟我應唔應該一曲兩詞? 好似新作<<愛的諾言>>/<<祈妙旅程>>咁.... <<愛的諾言>>原意就係首情歌, 只不過, 係愛情既路上好自然令我想到祈禱和等侯, 所以才有詩歌版既出現. 人生本來就係一場遊戲, 一場跟神角力, 等侯既遊戲, 最有趣既唔係結果, 係過程, 呢個係詩歌版<<祈妙旅程>>其中一個重點. 不過, 長遠來講, 依然喜歡一曲一詞.
寫情歌還有另一番道理, 可以睇睇我既實力, 同專業詞人差幾遠.
同心 有人話我似詩歌界, 多倫多黄霑, 林夕.......無論如何, 都係過份抬舉, 我還有太多地方要/可以進步. 不過, 我既 style的而且確係彷效林夕 (唔係黄霑, 亦唔似黃偉文.)
林夕憑<<夕陽無限好>>成為05年最佳填詞人, 讀完兩則關於他的訪問, 令我思緒不寧, 感慨萬分. 填詞係會令人入心入肺, 一年 200首, 大部份失戀歌, 患抑鬱症絕對係正常. 一個林夕, 一個黃偉文, 平分了今日既香港詞壇, 但本身都是性格怪癖, 生活糜爛之人. 難道出名, 偉大既藝術家都係? 李白, 李後主, 宋徵宗, 莫扎特, 貝多芬.......都係一班怪人. 當時, 我正在寫<<同夢同心>>分享/後記, 林夕既訪問令我重新關注 Billy作為填詞人生命既操練, 堅持同需要提防既地方: 我唔可以為一首歌影響我靈命滑落, negative既詞像<<好人>>, <<爛泥>>這樣既歌係我永遠都唔會寫. (這亦可以解釋點解 Billy對 Twins, Stephy.... D歌情有獨鐘, 因為 positive.)寫詩歌更加要 positive.
<<風靈頌>>既 idea亦因為呢份對音樂事工既顧慮而孕育出來. 對象係一群熱衷音樂敬拜既音樂人, 讓大家去重新思想何謂敬拜.
諗番轉頭, 有份參與詩歌創作都係神有趣同巧妙既安排配搭. 在祈禱會上, 一群音樂人分享到一首他們遲遲未能作完的<<頌讚歸我主>>, 最後讓了給一個不懂音樂, 中文水平不高的小子完成, 令我幾佩服佢地當時果份信心. 之後, 為轉去學生區而寫既團歌<<青葱歲月>>開始左 Billy同 Adam既合作. 教會音樂人好多, 筴得埋, 合作得到既唔多, Adam可算係合作得最耐既一個, 係我心目中, Adam亦係最多才多藝, 從彈琴, 結他, 打鼓, 到編曲以致背景音樂都惦. 不過, Adam比較鐘意 rap, rock & roll music, 而我又唔鐘意. <<寒流實驗室>>之後, 即 05年 1月, 可能因為植堂, 冇乜機會再合作, 弟兄亦未必喜歡作慢歌. 之後既所有樂曲都係 Sandra既出品 (不過, 大部份依然係 Adam編曲).
話說 Tony婚禮話想叫我作首情歌, 通常我都係來者不拒(雖然唔惦), 不過, 永遠都係一句:「你有曲, 我有詞, 冇曲, 唔好揾我.」 於是, Tony揾左佢以前個 church某姊妹作曲, 講起先知原來係以前 York CCF Joshua 個妹(世界真係細). 世界真係細, 不過, 三次婚禮前開會, 彩排, 包括埋婚禮本身我都 miss左, 無緣碰面. (作曲人同填詞人素來謀面, 其實幾有趣.) 反而, 某星期日午飯係味千, 一間我淨係去一次就唔想再去第二次既餐廳居然撞到.
Billy 相信快刀斬亂麻, 唔信慢工出細貨, 相信量多自然質好, 唔信完美主義, 吹毛求疵. 有人樂意不停作曲, 我當然開心死. 之前等到死都未有一首. Sandra 係我認識既作曲人之中最多產既一個, 半個月/一個月一首. 五個月, 見左五次面, 寫左五首歌, 有三首入到詩歌創作比賽(因為其餘兩首唔岩 topic), 成績算唔錯. Project by project咁係出唔到好歌既, 唯有 consistent, 先可以作到一系列有系统既歌詞.
<<同夢同心>>係第一首有人聲, 有錄音, 而又有 promotion, 打到入成間教會既詩歌. 要多謝 Ronald既撮合, 冇左佢, Twins就唔會唱我地既歌, 你話如果首歌比我歌就死得啦! 點會咁 hit? 萬民第一經理人, 買車買電腦買電器攪宣傳, 包你滿意. Twins唱歌好就唔洗講啦!
我覺得神好恩待我地, 我地就咁樣組成左一個 team, 一條 "product line", 好自然咁找到自己既岡位. 作曲既, 填詞既, 唱歌既, 編曲既.....大家都好樂意, 而唔係出於勉強咁服事神. 我自己就更加要感恩啦! 音樂又唔識, 中文又唔惦, 唔知點解又 ok 喎! 要知道 Billy性格好被動, 能夠 team up到一隊人係神既恩典 lor.
聯想 最近思想有關版權, 原創等問題, 我諗左一段好長既時間, 好頭痛. 就以<<同夢同心>>為例, idea擺明抄腓立比書, 再加埋好撒瑪利亞人比喻, 乜野係原創呢? 有人怕我填詞叻就會驕傲, 我諗下, 我又唔係原創者, 不過, 係受造而不斷更新既個體, 有乜野值得驕傲? 相反我要慚愧, 因為神既話語咁深咁廣, 生活人生百態, 中文字十萬八萬. 從神抄寫到既詩歌居然咁狹窄咁微少咁膚淺, 唔 make sense.
版權? 另一個有趣既題目. 試諗下, 假如神要用我首歌, 不過, 等等, 版權屬於我, 每次神要用都先要有我點頭, 我唔收錢, 就好似我大發慈悲, 普道眾生咁. 每個團契, 每個教會要唱首歌都要首先煩一輪, 如果唔係就犯版權, 唔夠聖潔, 唔合神心意. 咁我係咪攔阻緊神既工作, 係咪為弟兄姊妹 create不必要既罪究感呢?
但如果冇版權, 比人抄我首歌, 甚至偷左話係佢自己既作品咁又點呢? 假如人對我地既抄襲可以令基督被傳開既, 那又何妨呢? (腓 1:18) (真係咁睇得開?) 又如果神容許同鐘意, 我地可以再寫五千首, 二千首, 一千首.......(有冇誇 D呀?) 人可以偷一首兩首話係自己作既, 但偷唔走我地背後既神, 偷唔走我地既對神晝夜既<<聯想>>.
聽番首2002年<<頌讚歸我主>>, 有人話同<<他約我去迪士尼>>似到十足十. (真係幾似) 但係<<他>>係2005年既作品. <<回到未來>>點抄? 但佢有版權, 我冇, 我出 CD可能比人告, 鬼知係 2002年作品? 我就算唔會告人, 亦唔介意比人抄比人偷, 我都唔想比人告, 一身蟻, 咁點? Anyway, 好頭痛. 唯有走著瞧, 求神比智慧啦!
|