BISDOM KIMBERLEY EN KURUMAN, Anglikaanse Kerk van Suider-Afrika.[1]
Bisdom 1911 daargestel; ’n afstigting van die Bisdom Kaapstad.
Katedraal: Sint Siprianus die Martelaar, Kimberley.
Wapen aanvanklik in 1911 aangeneem, en volgens oktrooibriewe gedateer 23 Junie 1953 deur die College of Arms verleen. Die blason lui (volgens my vertaling):
Gedeel van silwer en swart, ’n krukkekruis van die een in die ander binne ’n skildsoom van blou waarop elf silwer ruite.
Brownell[2] skryf:[3] “Hierdie weergawe van die wapen, met 11 silwer ruite in die skildsoom, is vanaf 1914 tot 1930 in Crockford’s Clerical Directory getoon, waarna die getal ruite verminder is na agt, die gewone getal vir wapenfigure wat in die moderne heraldiek op skildsome gevoer word.
“Die formele verlening van hierdie wapen in 1953 deur die College of Arms het egter na die oorspronklike 11 ruite teruggekeer.
“Die heraldiese term ‘potent’ [die Engelse benaming vir ’n krukkekruis] verwys na ’n kruk, en hierdie wapen stel dus die medeverhouding tussen die blanke en swart lede van die bisdom, waar elkeen help om die las van die ander te dra, en albei heilig gemaak deur die kruis wat ‘potent’ [magtig] is om albei te volhou.
“Die diamante in die blou skildsoom – ’n verwysing na diamantdraende ‘blou grond’ – sinspeel op die hoofindustrie van die katedraalstad.”
Oor die bisdom:
Toe die bisdom in 1911 gestig is, het dit die geheel gedek van die eermalige kolonies van Griqualand-Wes (in 1889 tot die Kaapkolonie geannekseer) en British Bechuanaland (in 1895 tot die Kaap geannekseer), asook ’n aansienlike gebied ten suide van die Oranjerivier.
Tot hede toe behou dit hierdie oppervlakte. Die noordelikste dele van die bisdom het in 1977 deel geword van Bophuthatswana, en hierdie distrikte, sowel as dié van Vryburg (vanaf tot ’85 die Republiek Stellaland) is in 1994 deel gemaak van die Provinsie Noordwes.
