Mahigpit na tinututulan ng MIGRANTE International at MIGRANTE Sectoral Party ang implementasyon ng bagong labas na Omnibus Policies ng Overseas Workers Welfare Administration (OWWA) na ipinagtibay ng Board of Trustees nito sa pamamagitan ng palihim na pagapruba ng Board Resolution No. 038 noong Setyembre 19, 2003.

Ginawa ang nasabing patakaran upang lubusin ng gubyerno ang kontrol nito sa pondo ng mga migrante sa ibayong dagat at maipatupad nang walang hadlang ang kanyang maitim na balak sa nasabing pondo. Mula ng pagpasok ng kasalukuyang taon, iba’t ibang iskema ang tinangka ng pamahalaan na ipatupad sa mga pondo sa OWWA.

Una rito ang paglipat ng OWWA Medicare Fund sa Philhealth sa pamamagitan ng palihim na pagpirma ni Pangulong Gloria Macapagal-Arroyo sa Executive Order 182 noong Pebrero 14, 2003. Ngunit dahil sa mainit na protesta ng mga migrante, nabigong ilipat ang nasabing pondo noong Hulyo 1 hanggang sa kasalukuyan.

Sa pamumuno ni Labor Secretary Patricia Santo Tomas, tinangka rin ilusot sa OWWA Board of Trustees ang isang resolusyong maglilipat sa Livelihood Program ng OWWA tungo sa National Livelihood Service Fund (NLSF) sa ilalim ng Office of the President. Ngunit bagupaman maisahapag sa board meeting ang nasabing panukala, maagap nating kinondena ang nasabing iskema.

Hindi rin maipaliwanag nila Secretary Sto. Tomas at OWWA Administrator Virgilio Angelo ang pagsuspindi nito sa General Financial Assistance Program (GFAP) ng OWWA sa mga galit na migrante sampu ng kanilang pamilya.

Lalong nataranta sina Sto. Tomas at Angelo nang mag-backfire sa kanila ang pinakulo nilang anomalya na diumano’y may fake claimants sa Medicare fund na aabot sa P10 milyon.

Kaagad nating hinamon si Angelo at si Sto. Tomas na patunayan ito, gayundin din ang pag-imbestiga sa US$253,500 (P11,407,500) pondong inilaan kay General Roy Cimatu. Ang nasabing pondo ay para sana sa malawakang pagpapalikas (massive evacuation) ng mga Pilipinong migranteng manggagawa sa Gitnang Silangan noong gyera ng US sa Iraq.

Walang naganap na evacuation, wala na ring ginawang accounting at liquidation si General Cimatu – at wala ring paliwanag hanggang sa ngayon kapwa si Sto. Tomas at Angelo. Dahil sa mga sunod-sunod na kapalpakang ito, naglabas naman sa ngayon sina Sec. Sto. Tomas at Admin. Angelo ng Omnibus Policies na kapapalooban ng kanilang mga iskema na hindi nila magawa noong una.

Ang mga pakanang ito ay mga sumusunod:

1. Nililimita ang membership ng bawat migrante sa bawat kontrata na hindi lalampas ng dalawang taon. Ibig sabihin, tanggal na sa membership list ang mga returned migrants at kung ma-terminate ka matapos ang 3 buwan, hindi ka na rin myembro ng OWWA.

2. Limitasyon ng coverage ng mga benefits lalo’t higit sa mga pamilya. Sa Article VIII ng Omnibus Policies tanging Family Assistance Loan at Education and Training Benefits lamang ang nilalaan sa pamilya habang kahina-hinalang wala ng nababanggit hinggil sa Medical Assistance.

3. Peligroso ang Section 3 ng Article VI na nagpapaliwanag hinggil sa General Investment Policy. Malaki ang posibilidad na sa nasabing probisyon ay muling gamitin ang Trust Fund ng mga migrante sa mga kagaya ng R-II Builders, PNB bonds, at sa iba pang bangkaroteng Government-Owned and Controlled Corporations (GOCCs).

4. Delikado rin ang Section 8 ng Article VII na nagbibigay kapangyarihan sa Board of Trustees na i-realign ang pondo sa hindi malinaw na mga hangganan.

5. Sa Section 6, provision (a) ng Article VIII malinaw na tumatakas sa responsibilidad ang OWWA sa tungkulin nitong i-repatriate ang mga migrante sa pamamagitan ng Omnibus Policies. Ang probisyon sa RA No. 8042 hinggil sa repatriation ay pangunahing nakasalalay sa mga migrante mismo at pangalawa lamang sa recruiter. Sa nasabing batas ang responsibilidad ng gobyerno sa repatriation ay nalilimita lamang sa panahon ng sakuna, epidemya at mga giyera.

6. Malabo rin ang Section 6, provision (b) ng Article VIII na inililipat sa DOLE ang implementasyon ng reintegration program at kawalan ng linaw sa proseso hinggil sa Livelihood Loan.

7. Sa Section 4 ng Article II binabanggit na magiging transparent ang OWWA sa pangangalaga nito ng pondo. Ngunit sa Section 5, provision (h) ng Article III, sinasabi naman na lahat ng minutes, transcripts at tapes ay confidential at hindi maaring ipaalam sa publiko. Malinaw na gagawing ligal ang mga pagpapatupad ng patakaran na palihim at walang konsultasyon sa mga migrante at kanilang pamilya.

8. Sa Article III, malinaw na ibabaon na ng Omnibus Policies ang huling pako para maging ganap ang kontrol ng pamahalaan sa pondo at tuluyan nang burahin ang pagiging quasi-government institution ng OWWA na pinatatakbo ng mga trust fund mula sa dugo at pawis ng mga migrante sa ibayong dagat.

Ang mga representative mula sa management, labor, sea-based, land-based at women sectors ay mananatiling palamuti lamang habang ang mga ito ay appointed ng DOLE secretary.

Sa pangkalahatan, ang Omnibus Policies ay paglulusaw sa nalalabi pang karapatan ng mga migrante sa kanilang inipong pondo. Ganap na iniiwas din ng patakarang ito ang pamahalaan sa kanyang tungkulin na pangalagaan ang kapakanan ng migrante at kanilang pamilya at ipinapasa ito pangunahin sa mga migrante mismo.

Lulubusin din ng patakarang ito ang paggamit ng mga pondo sa OWWA sa iba’t ibang paraan maging ito ay walang kinalaman sa kapakanan ng mga migrante at kanilang pamilya.

Ibasura ang OWWA Omnibus Policies
Isulong ang Tunay na Maka-Migranteng OWWA Charter.

Dahil dito, kami ay nananawagan na ibasura ang Omnibus Policies ng OWWA at palitan ito ng isang maka-migranteng charter na magtataguyod sa kanilang tunay na interes. Sa ilang mga partikular, ang charter na ito ay lalamnin ng mga sumusunod na probisyon:

1. Ang membership fee ng mga migrante sa OWWA ay dapat sa mga employer sinisingil. Ang sinumang mapapatunayang ipinapasa ang pagbayad ng membership fee sa mga migrante mismo ay dapat patawan ng karampatang parusa.

2. Habambuhay (Lifetime) dapat ang membership. Maaring i-revoke ng migrante ang kanyang membership sa layuning makuha ang kanyang membership fee, kasama ang naging interes nito.

3. Higit na masaklaw na benefits at welfare services sa migrante at/o sa kanyang pamilya. Ang proseso ng pag-claim ng mga serbisyo at benepisyo ay hindi dapat maging dagdag-pahirap sa nangangailangan sa pamamagitan ng red tape at malalang burukrasya. Lalo’t higit na hindi pwedeng suspindihin ang mga nasabing programa sa lahat ng pagkakataon.

4. Mas malawak na komposisyon ng OWWA Board of Trustees. Ang komposisyon ng OWWA Board of Trustees ay dapat lahukan ng mga sumusunod: mga Chairperson ng Committee on Labor ng Senado at Kongreso; isang Commission on Audit (COA) representative; Party-list representative ng Overseas Workers; Party-list representative ng Labor; Partylist representative ng Women; at dalawang (2) seabased at apat na (4) land-based representatives na ihahalal sa pamamagitan ng Overseas Absentee Voting. Dapat nang tanggalin sa board ang mga secretary ng Department of Finance at Department of Budget and Management, ang Undersecretary of Labor and Employment at mga appointive sectoral positions.

5. Badyet ng OWWA mula sa pamahalaan. Upang maipakita ang bahagi ng responsibilidad ng pamahalaan sa kapakanan ng mga migrante, ang kalahati ng taunang budget ng OWWA ay nararapat na magmula sa taunang General Appropriations Fund ng gobyerno.

6. Palawakin ang mga on-site services. Dapat din palawakin ang saklaw ng mga on-site services lalo na ang mga programa sa repatriation at legal assistance.

7. Pagkakaroon ng sistema ng recall. Kailangang magkaroon ng sistema ng recall sa mga bumubuo ng Board of Trustees kung mapapatunayang ito ay hindi nagsisilbi sa interes ng migrante at ng kanilang pamilya.

8. Ibalik ang OWWA bilang quasi-government institution. Dapat ibalik ang katangian ng OWWA bilang quasi-government institution na protektado mula sa pakikialam at pangungulimbat ng mga opisyal ng gobyerno, mga politiko, partido-politikal at iba pang makapangyarihang indibidwal.

Magkaisa Para sa Isang Makamigranteng OWWA Charter!

Iligtas ang pondo ng mga migrante at kanilang pamilya!

Ilantad ang mga iskemang kontrolin ang pondo ng mga migrante!

Ibasura ang Omnibus Policies ng OWWA!

MIGRANTE Sectoral Party
Oktubre 2003