DIXEBRA
Grupu señeru del Rock Astur amiestu de Kortatu con pingarataes
de Llan de Cubel, ún de los más veteranos del panorama
musical astur, dende 1986 lleven furrulando perende. Llideráu pol yá
míticu Xulio Elipe "Xune", esti avilesu qu'entamó plumiando na nuesa
llingua na revista del colexu "San Fernando" a fines de los 70, y que
siguió esconsoñando concencies nes ondes de la COPE-Avilés col so
programa "Albintestate", al que-y siguiríen dellos más. Ye ún de los
adelantraos del movimientu de rexurdimientu l'asturianu, yá que cola
so música aportó a fasteres de la sociedá nes que nun caltriaría'l
folk asturián. Esta inclina dica la música celta nótase sobrotou nel
so primer trabayu ("Grieska", 1990 -Fonoastur-); nel qu'amiesten el
rock más cañeru, col ska, el punk, y Dios sabrá que más. Col
enxertamientu de la gaita asturiana, un discu que convirtió en braeros
himnos nacionales a cancios como "Rapaza Nacionaliega". Los siguientes
trabayos, yá cola so propia compañía "L'Aguañaz", son: "Asturies o
trabayes" (1993), "Apúntate a la llista" (1995), "Dieron en duru"
(1997), "Glaya un País" (2000), "Sube la marea" (2002), "Cróniques
d'un pueblu" (2003), n´estos nótase
una evolución que se fai patente na perda de cancios con un mayor
conteníu nacionaliegu esplícitu, cuntando con collaboradores del
renome d'Anabel Santiago, Fermín Muguruza,
Xosé Ambás, Xéliba, Fe de
Ratas... El so siguiente trabayu foi "Dixebra.
Cróniques d'un Pueblu" discu-llibru (escritu pol periodista Fran
Álvarez) onde faen repasu a la so llarga carrera musical. Yá pal 2005
saquen el discu, "Ensin novedá". El so últimu trabayu anguaño ye un DVD-CD en direutu, grabáu na ciudá d'Avilés
na Plaza'l Parche.
http://www.dixebra.com/
GOMERU
Ye un grupu mozu de xente uvieín, qu'avérense con
puxu al Rock Astur, amosando un claro compromisu cola custión nacional
nes lletres de los sos cantares. Dica esti intre cunten dos maquetes:
"Griesca na cai" del 2005, y la más nueva "Bales de rabia"
que sacaron nel 2008. Amás participen con un canciu nel discu
"Tributo a La Polla Records dende Asturies". La so
primer formación ye del 2004.
http://www.freewebs.com/gomeru/
GÜERKU
Grupu de
rock cañeru, ainda con poca sonadía, qu´amiesten con gaita y flauta de
travesu, formáu por xente de Lluanco y Candás, que dicen tar na llinia
de "Dixebra", amestando dellos estilos musicales siendo'l punk y el
folk los protagonistes.
http://pobladores.lycos.es/channels/musica/Guerku/
MILICIA ASTUR
Ayeranos
de L.lavayos, dende payares del 2002 lleven amosando'l so rock duru y
les sos lletres de compromisu cola custión social (son de fastera
minero) a tolos aficionaos a esti estilu. Pol momentu la so
discografía ye cuatru temes nel "Astursónicu'02", y la so
participación nel imprescindible: "Rock'n'llingua" (2004). Tomaronse
l'añu 2005 como sabáticu, pero tan entamando a retomar el trabayu.
TLFNU: 696
67 64 29
MUS
Ún de los grupos de
música elleutrónica más respetaos de tol estáu, formáu por Fran Gayo y
Mónica Vacas. Cancien n'asturianu temes que, les más de les veces, son
tradicionales. Como aveza pasar con iniciatives d'esta mena ye más
fácil alcontrar los sos discos n'USA que n'Asturies, naguamos por
qu'algamen na so tierra'l reconocimientu que yá disfruten n'otros
llaos.
http://acuareladiscos.com/mus/
NUBERU
El grupu entreguín de Chus Pedro Suárez y Manolo Peñayos, primeru col
nome de "Camaretá", entamaron a canciar na dómina de la Transición a
la democracia, convirtiéndose dafechu en símbolu de lo que denomó Nueu
Canciu Astur. Ye un grupu que significó y significa abondo na nuesa
hestoria, que llogró axuntar la vindicación de la llingua y de les
llibertaes democrátiques a la calidá artística y l'amestanza con
pautes musicales vives na tradición ástur. La música de so foi ensin
dulda la meyor campaña de dignificación de la llingua asturiana, a lo
qu'aidó en gran midida los testos poéticos de Manuel Asur. Chus Pedro
(que tamien tien discos en solitariu),
voz del grupu, collabora nel primer trabayu discográficu de los
hermanos Tejedor, poniendo-y voz a "Chalaneru", ún de los temes más
queríos pol públicu del repertoriu de Nuberu. Fasta esti
intre tienen asoleyaos 10 discos mas una collaboración nel homenax a
Los Stukas.
http://www.nuberu.com/
OI
N'AST
Aire
fresco na música comprometida cola custión nacional d´esti país la que
faen estos mozos, que como yá bién amuesen dende´l so nome avérense al
estilu Oi!, ensin escaecese del punk o´l hardcore y qu´enxerten cola
gaita asturiana, que como yá sabemos asóciase perbién. Nel CD de la XPDLl,
"L´asturianu vive, la llucha sigue" bautizáronse
discograficamente dica la so estrena en solitariu con "Sangre y
fierro" nel 2002, en 2004 tamién aparecen na compilación
"Llingua'n'Rock".
http://www.oinast.es.vg/
http://www.oocities.org/asturiesoi
PEDRU
PEREIRA
Cantautor de Cangas de Narcea que
remana la variante occidental de la nuesa l.lingua nes sos composiciones. Ta acabante
d'asoleyar el so primer discu, tituláu "Xedré", que foi una de les
grandes sorpreses de la collecha discográfica'l 2004. D'elli l'Anuariu
de la Música Asturiana dixo: "Si dalguién se preguntaba cómo
sonaría'l cruz ente los primeros Nuberu y Nacho Vegas en Xedré tien la
respuesta".
SKAMA LA
REDE
Skama La Rede ye un grupu lluanco-candasín
formáu n'ochobre'l 2003. Como afita'l so nome los sos
rítmos básense nel ska anque ensin desdexar soníos comu'l reagge o'l
punk-rock. La llingua d'espresión ye l'asturianu y les sos lletres
abondo comprometíes. Skama La
Rede tien yá un bon númberu de conciertos al llombu y
con una maqueta, "Hestories
Absurdes" que tuvo perbona acoyida ente'l público
asturianu. Hasta'l so primer discu "La nuesa hestoria", al que-y
siguió'l so siguiente trabayu, "Echaos a la mar", que los afita como
una de les bandes con meyor futuru nel so estilu nel nuesu país.
http://www.skamalarede.com/
SKONTRA
Grupu que
lleven tocando dende'l 2001, fórmenlu xente d'Avilés, Candás y Xixón , el so estilu ye'l
punk-ska, y por descontáu enxerten la gaita nos sos cancios, lo
que-yos da un toque folkie. Tan dando conciertos dende agostu'l 2002.
Tienen yá un par de discos nel mercáu, "Semeya de la rabia" (2005) y
"Cantares pa dempués d'una guerra" (2008), amás de dalgún tema grabáu pa
dellos recopilatorios.
http://www.skontra.net/
LA
TARRANCHA
Grupu de ska en toa
regla (con seición de vientos y too!!) qu'ufre ún de los meyores
direutos d'Asturies. Ún de los vocalistes, porque tien dos, ye Delfo
lo que yá ye garantía bastante de diversión. Los más de los sos
cancios son n'asturianu. Nun vos fiéis de los temes que tienen grabaos
perehí y véilos en direutu!. Por fin editen el so primer discu, col
sidreru nome de "QLT?", en que taríen pensando...
http://www.latarrancha.com
TOLI
MORILLA
Cantante de folk-rock nel sen
americanu de la espresión, un Dylan o un Springsteen (salvando les
distancies) en versión asturiana. Aveza a incluir temes n'asturianu
nos sos discos y esa foi la llingua a la que-y fai homenax nel so
caber trabayu discográficu "Nueche d'Insomniu", onde pon música a
dellos poemes escoyíos de los meyores poetes del Resurdimientu
lliterariu n'asturianu, una ayalga.
ww.tolimorilla.com
