fufu diary

6月３０日 星期五

返ｄａｙ，

放工，去ｋ，佢地四回開始唱，我出到去旺角都已經７點，行到過去創興綠盒，原本想竄入去，點知一出車立就俾ｄreception 折住左：「有房未呀？」９號房呀唔該

好彩佢都無 count 到我！埋單仲係１３個人只計左十個人錢

原來aaron都係早我三個字到... 我早過佢放工，大家都係火車站行過去，點解佢會早過我咁多？點解？

俾人cut 左之後，有送咭儀式，之後庭庭繼續打機，我、yan、鴻強繼續自己唱，he力、喵喵、傑繼續溝女

九點半，大家終於捨得走，點知去食飯的又只得我地四個．．．

我地都係無朋友ga la

明天的gathering 又係無人通知我，大家講：聽日去唔去呀？幾點呀？（仲要唔係問我喎！）我咩都唔知．．．

食飯，去了樓下的漢陽苑，九點半之後每位八十八，抵呀！

竟然真係屈左aaron請！神奇呀！

多謝 aaron！

6月２９日 星期四

返ａ，又有同學仔不過明天同學仔返night，今天是我和同學仔的 last day

同佢地同maria 一齊食早餐，so happy，好耐都無試過食早餐有人同我傾計

有d唔捨得佢地

放工，終於打哂內蒙旅行的diary了～遲ｄ再加返ｄ相

我鍾意返ａ　^_^

6月２８日 星期三

又返工，返ｐ，有一大班同學仔同更，有佢地分擔一半的obs，又有人同我傾下計，so happy~

今日做左兩個我都未做過的dressing

一個係花姑叫我去洗的chest drain，唔通同花姑講我未洗過，問佢用咩洗呀？咁一定黑面，咩都唔洗做，仲要俾人交更！

自己走去當普通drain wound 咁洗，快快趣洗完，cover返，佢先入來，咩都睇唔到，好彩！

第二個係簷篷姑娘叫我洗的hernia wound，佢原本係個好普通的incision wound，不過infect 左，又紅又腫又流血，要貼sterile strip，加cosmopor，再加thick gauzes，再加pressure dressing

因為ward 的 steirle strip 太長，要開一把sterile scissors 剪開一半，不過用disposable dressing set 的 forceps 又無力，拿唔住 sterile strip 來剪，所以又要開sterile gloves

結果我用左兩個forceps 來整乾d 棉花，之後才帶 sterile gloves 剪sterile strip

兩個forceps 已經掂過，唔sterile，咁點洗？

用手．．．一隻手拿餘下的forcep，一手bare hand to patient，樣衰！

之後，一隻手已經不是sterile了，咁如何meet sterile strip出來呢？

又用返已經唔sterile的forcep

原來sterile strip 會痴住手套，唔痴落patient 的skin．．．

樣衰地最後又用返forceps 去貼

唉～未做過，成班同學仔又話要圍住睇．．．well~~ 大家一齊睇住我死！

開頭maria 都係度，不過睇左一半，無眼睇，走了！

樣衰ｘ１００

食飯，簷篷姑娘同米姑娘食，我要同花姑食

好彩花姑自己一早標左去，唔洗對住佢，我寧願自己一個人食好過同佢一齊食

食了七隻雞翼加通心粉加奶，正！

食第二輪仲要遲左去食，食完上返去十分鐘就放工，so 無聊！

明天ａ，訓了ｐａ房，二樓無鎖門，去了睇電視^_^

6月２７日 星期二

又返工，傾盆大雨，巴士又勁多人，又濕，又有遮，仲拿住飯盒，又驚倒瀉，勁狼狽！

今日我返ｄａｙ，今日有美娟姑娘，同一大班同學仔返ａ，哈哈～我又係無野做，到佢地放工，我先開始有野做

其實無野做仲慘，時間過得特別慢

放工，食飯，飽到爆肚，才驚覺到昨天買的兩磅雞翼仲有一半未煮，今晚要煮埋佢．．．

飽死了

6月２６日 星期一

又返工，勁熱

今日返ａ

宋姑娘做滿十年，要被賣走半年，之後再回來，唔知係唔係宋姑娘就黎走，人都特別開心，今日過來同我傾計！仲講佢自己ｄ低ｂ野！！爆笑！！！！

今日放ｔｅａ又有我份！宋姑娘仲特別入來同我講佢買左ｄ野食farewell，可以一齊食！

今日又俾人讚～嘻～

今日返ｐ有美娟姑娘，仲有一大班同學仔，哈哈～見佢地返工就俾哂ｄobs 佢地做！

臨放工有個落手術室，我同姑娘講我送病人落去，姑娘一臉驚愕！原來佢唔認得我！以為我係來實習的同學仔

藏身於同學群之中，姑娘搵我唔到！

放工，熱到想死！

去了買送，今晚玩焗雞翼～ｙｅａｈ～

6月２５日 星期日

又返工，勁熱

今日返ｄａｙ，下晝有高敏、子嫦姑娘、燕萍姑娘，三個好人，返工都開心ｄ～

今日下晝勁得閒，無野做，高敏同我去ｔｅａ！平時都無人會叫我去ｔｅａ，今次更加係第一次返ｄａｙ都有得ｔｅａ，仲拿埋野食入seminar room 食！

原來，大家都覺得花姑同sister 個性格差不多，但點解sister 的人緣會差咁多？

點解花姑會嫁得出？？？？竟然有人頂得佢住？？？？

其實我覺得sister 都無咩野姐～係有ｄ懶囉～只要你做好哂ｄ野，最好幫佢手做埋佢果份，佢就好開心ga la～喜怒形於色，總好過永遠黑口黑面的某人

間唔中會聽到 sister 覺得自己好寂寞，好似俾綠色spot light 射住咁，都幾慘～

另一個原來，原來我係sister 的愛將！

原來大家都覺得sister 好錫我！

或者係因為我乖！哈哈哈～

諗真，成個ward 得我一個咁得閒做哂自己ｄ野之後仲可以走去問佢有無野幫手

兩個無咩人理的人又走在一起了～

6月２４日 星期六

又返工，勁熱

今日返 p，又同花姑一更，仲有sister 同阿Me姑娘

真係好憎花姑！

雖然sister 成日黑面，但花姑更從來都無唔係黑面

講野又無禮貌又串咀，完全無面俾，成日撥人冷水

衰在唔知點解次次都會衰係佢手上

真係好憎花姑！

今日俾sister讚，雖然我唔精叻，不過都幫到手，好過師姐，嘻～

今日有個病人（五六十歲左右的阿婆），同個女（起碼三十幾的師奶）用腳趾玩石頭剪刀布！

爆笑！！！！

6月２３日 星期五

又返工，返Ａ

今日勁熱，又同花姑一更，已經躁底

放工去了剪頭髮．．．去了新港城好臭果間．．．

十幾年來最柒頭的一個頭

我：下？剪完拿？分小小layer 得唔得呀？

佢：layer 左嫁喇

前面：同我自己剪無分別

後面：佢同我剪齊佢都無咁興

6月２２日 星期四

又返工，返ｐ

同姑娘一齊叫外賣，＄２８一個送，配白飯

我地三個人叫左三個送：避風塘炒茄子、炒蜆、糖醋排骨

避風塘炒茄子好好味～

第一次訓ｐａ房

6月２１日 星期三

放假

悠閒的攤屍

仲有外賣壽司

一樂也

6月２０日 星期二

又返工，返Ａ

又同美娟姑娘、一大班同學仔一齊返工～真開心～

放工，先食個tea，再出發去調景嶺補習，再去將軍澳補習

明天他們都考試了，最後一堂

一個就話派卷再搵我補，另一個就話九月先，唔知仲有無下一次～

6月１９日 星期一

又返工，返Ｐ，可以十一點先起身，訓返一覺好既，正！成個人醒哂！

今日撞到勁多人！艾

一返工，BLOCKＡ樓下就見到Maria 和一大班同學仔，又有同學要出block了~

原來，她們就是出３Ｅ！

Maria 仲叫我睇住佢地．．．唉～我都睇佢地唔住ga～

今天有新ＥＮ同學來，起初仲以為係有讀緊ＥＮ的同學來做ＴＵＮＳ，原來是ＥＮ在OpenＵ讀ＲＮcourse的現職EN姑娘來實習，而她就是我之前出沙田醫院９Ｂ的好人美娟姑娘！：)

返返下工，出左走廊做野，竟然撞到阿餅！！！

佢表弟入左我對面病房，佢來探病！

世界真係細！

上了病房，咩都俾同學仔 + 美娟姑娘做哂，我都唔知做咩好，就係好驚佢地做漏野，勁check，仲驚過自己做

不過，多得咁多同學仔的出現，令到我有得第一次派藥！第一次做ｄ姑娘先做得的野！仲洗多左ｄ傷口添！

今日返工，終於唔係得我一個人！終於有得傾計！

今日返工好開心：)

6月１８日 星期日

又要返工，返Ｄ，放工又要去將軍澳補習

去到補習家，見到多左個小朋友，好面善．．．原來果個係我上年同佢補習的妹妹！

竟然已經唔認得佢！

ｏ！

今日超勁支力，一放工，即昏迷

6月１７日 星期六

又要返工，返Ｄ，放工仲要去調景嶺補習

補習仔個阿媽仲贈左一大條魚片俾我，條魚片係補習仔個阿爸自己整的！

：)

今日好支力，直成係想就咁訓係街！

返到去仲要無門口入，ｏ了！

好不容易找到個唔係睇緊世界杯的common room，等等下又俾人踩場，被迫睇波

昏迷了！

6月１６日 星期五

終於又要返工了！

拿了那些奶糖返去做手信，換來的是：嘩～好難食呀！

放工，去了中天的第一次gathering

沙田綠盒ｋ，cut左仲可以留低睇波添～咁著數既優惠，去邊度搵呀？

6月１５日 星期四

食ｔｅａ，補習，之後再去食ｄｉｎ

6月1４日 星期三

原來，坑口ｄ人係唔洗剪頭髮ga！

6月13日 星期二

回到香港了

來到新地方，習慣了早起，今早十點已起床了

執屋

估唔到我係間咁既房訓左一晚

打久違了的 diary ，等大家online，想：不知大家以後還有contact？還是都係果句：『我地無朋友ga～』

原本想去剪頭髮，不過又無去到

今日，roomate 的同學 (米) 來找roomate借電腦用，她不在，找了我搭訕，一傾就個幾鐘

第一個新朋友

原來電腦都可以站起來...

話說今日打打下 diary，想control alt comma出個小鍵盤，點知唔知做咩，個 mon 向右轉了90度．．．訓低了．．．

攪左好耐終於正常返～

6月12日 星期一

Ｄａｙ　１１

北京→深圳→香港

最後一天了，有點不捨得

一早三點半morning call，四點落去集合出發睇升旗

原本想沖完涼繼續玩，點知等埋我沖完涼，阿唐已經訓著了，我又唔記得阿yan 幾號房，所以大家各自訓了

三點八先仆起身，四點二先落到去，好在佢地有等埋我地

原來aaron 房無morning call，唔知醒，無得睇．．．

早知就敲一敲佢門先出發啦～

升旗，都無咩好睇，仲要無咩風，看不到隨風飄揚的國旗，有點悶．．．

不過有得睇日出，好過無啦～

有成個鐘時間影相，龜速行了天安門一個圈，好悶呀～

之後返酒店訓 + 食早餐，到九點先集合，竟然有人十點幾先落黎...

好喇，可以上車出發，去睇個北京古觀象台，仲要係今日星期一closed！

完全唔知yoyo 攪乜鬼，佢門口大大個牌寫明星期一唔開，竟然可以安排我地星期一去參觀

自己齋行，影相，之後鼠左去搵超級市場買蒙牛

離開了蒙古，原來要搵返咁多不同口味的蒙牛都唔係咁易！

買左唔係好多，不過已經好很重！

最最後一餐了，去食烤唐老鴨，aaron 掛住佢的終生幸福，無同我地坐

食完，去了最後一個景點：茶藝

昆個姐姐我地係小學五年級，佢竟然信！　呆．．．

玩完，走人

真的走了，去機場了～

大家怒影相

～就趁這分鐘來一個合照～

上了機，細佬阿妹在萬尺高空玩咖啡杯～

落機，萬眾一心齊爆奶，運輸帶上的奶堆中找回自己的爆奶，好不嘔心

仲有人的硬gip 被掟爆了

要等佢賠，等左成個鐘，點知賠左個新gip，關都未過就已經爛左．．．

落哂機，大家最後一齊搭旅遊巴返羅湖過關返香港

過關，每袋蒙牛被剪開了一包，要我地即場隊哂佢！

拿著鬼死咁重的行李，又再次走過那崎嶇不平的路，走難似的抬著自己的行李上樓梯，落樓梯，還要避開一眾幫你拿行李的騙子．．．　心中不禁想：洗唔洗為左幾包蒙牛拚命呀？　真的後悔買咁多蒙牛做乜？　辛苦極！

終於回來了，不捨得

去到新的地方，新roomate 不在，不過極之混亂！

支力

6月11日 星期日

Ｄａｙ　１０

北京

早上七點，火車到站了～我們又回到北京了

首先回到酒店，把所以行李塞哂入一間房，之後去食早餐

今日第一個景點：寶樹堂，一個賣藥的地方

第二景點：長城我們就在這個天下第一雄關，登上了長城

雖然天氣不太熱，也不很曬，但只上了第一個烽火台已經上氣不接下氣，樓梯級有膝頭咁高，想死～

不過原來上了烽火台真的別有一番風味～好清涼，好舒服～

他們繼續拾級而上，我則悠閒地在第一個烽火台等他們回來

落返去，買了一個我登上了長城！價值五元

仲有ｄ價值十三元的我登上了長城衫，好抵，不過無買

行完長城，成兩點先有lunch 食，餓死

又一餐折墮飯，有好味的咕嚕雞條，檸檬豬粒，蘿蔔牛腩，係牛呀～終於唔係食羊喇～

食飽飽，去下一個悶爆景點：景泰藍！

食飯時，莊員明明講好，一行完就走，唔睇野，唔買野，結果只有我們四個傻仔第一時間走人．．．　well~~~ 我地無朋友 ga la ．．．

上車，講返今明兩日的行程，yoyo 竟然話她們手上的行程表上，沒有毛主席紀念堂這一景點

大佬，攪咩呀？一個半個景點事小，佢仲話唔知個紀念堂幾時開，或者去到都無得入．．．你係唔係做導遊ga？咩都唔知，仲講ｄ咁不負責任既野

由ｄａｙ１的迫我地睇降旗，唔聽人講野；帶隊唔等人，自己講野唔理人；完全唔清楚車程，一叫人休息就要落車；到聽日睇升旗的安排，完全不知所謂．．．唉～　唔想再見到佢

下一站，景山公園，係唔知咩皇帝自縊的地方

之後去書城→食自己

ｄ書真係平到喊．．．

九點鐘關門，所以八點幾就要趕住去搵食～

yoyo說，在書城的地庫就是food court．．．落到去，賣原莊書ga 喎！連護衛哥哥都話：出去四周都有野食，就係哩度無野食

大家ｏ咀啦～

出到去，入左附近的ＫＦＣ，見到yoyo同Ｔｏｂｙ，原來food court 係距離幾個街口的咩咩商場的地庫... 阿巴導，你講野都真係好清楚喎

食完，想去搵超市買蒙牛，不過超市已經關門，灰～　間蒙牛水吧，只有蒙牛雪條，無奶～　灰左行返去圖書館出面集合，差點兒見到走鬼！

阿邊個，該死的人無需要病～你還是做你的健康小寶寶罷～

行返去旅遊巴時，大家ｋ癮起，又當街大大聲旁若無人地唱歌！

6月10日 星期六

Ｄａｙ　９

沙漠→呼和浩特→火車返北京

起身食過早餐，的確有昨晚被我們 meet 爛了的小腦包！ｏｍｇ

影左陣相，就要起程離開內蒙了．．．

不捨得

任了兩小時車程，到了呼和浩特，食過午飯，自己和庭庭走了出去買明信片，他去買電話卡，差點兒走失了！嚇死！

為了一張有趣的笑馬，買了一疊十張明信片

好，今天的景點一：五塔寺

唔知睇咩，總之就有間寺啦～

景點二：大昭寺

都係唔知睇乜，又係一間寺囉～

景點三：手工藝精品廠

之前ｔｏｂｙ死都話會帶我們去買平價手信，叫我地唔好係沙漠或草原買，結果，這間手工藝精品廠，係就係有哂之前我地見過的手工藝精品手信食物，不過平均貴三成至一半囉～

完全覺得佢食回佣食得好深囉～一次又一次呃我地錢！過份！

景點四：超級市場！我地迫佢帶我地去超市入貨，買大量的蒙牛，仲有奶糖！大家好似搶米咁去搶人地ｄ奶糖，轉眼間貸架空空如也，ｄstaff 都怕左我地，開了幾箱新的放在地上

見大家一箱箱咁買，我都買左幾包，心想：大家買咁多奶糖，其實有幾多人鐘意食ｄ咁酥既糖呢？

好喇，話咁快又到食晚餐的時候了～小活羊涮羊肉

唔係小肥羊，係小肥羊隔離的小活羊．．．

雖然好似成個架咁多，不過熟左其實唔係得好多

今日有一個莊員生日，另一個莊員又就快生日，食飯有蛋糕！小王同toby 仲準備了禮物給他們！大家交換了禮物

ｗｗｗ又迫大家寫卡俾小王送別　=_=||||

食完飯，he力過了對面馬路買左廿幾把蒙古刀！極之亢奮！之後佢就知死！

食飽飽，趕火車

這次真的要分別了～

ｗｗｗ還要小王給她唱一首歌，她用ｍｐ３把歌錄起．．．well～

吸收了上次火車的經驗，大家上車、放行李的效率都高了不少

最後一程火車，估唔到佢十一點就熄燈，黑媽媽，隔離勁玩killer，部份人訓了之後，我們又開始傾計

餘下兩天，大家都幫你唔到ga 喇～想做咩就做咩囉

6月9日 星期五

Ｄａｙ　８

呼和浩特→沙漠

起身，食埋個杯麵做早餐，又出發今日的行程了

第一站：成吉思汗陵

勁大，勁多鐵馬，行左成兩個幾鐘！

據說，成吉思汗唔係真係葬係度，係佢有一次唔知衰咩，好似係跌左ｄ唔知咩野，好黑仔，之後就話如果佢死左就葬佢係果度，就係咁，一個無成吉思汗屍骨的成吉思汗陵遊客區就起左係度

都係果句啦，大風到吹甩頭呀～

行左勁耐，行到最入面仲有一個博物館之類的地方，以好多壁畫講哂鐵木真的生平及成個元朝的興衰，真係好悶，加上掛住影相，追唔上導遊的步伐，無聽！

行完已經到午飯時間，搭車２去食飯之後就起程出發響沙灣，一個ｄ沙會響的沙漠

去到，可以選擇坐索道，或者行九個字上沙頂，toby（領隊）迫我地要全部人一齊行，或者一齊坐索道

坐幾分鐘索道要成工十蚊，都幾貴！加上路程講真唔遠，有一半人唔肯坐，堅持行上去，結果toby 同小王（導遊）面黑黑地屈服了，我們分頭出發，要行的人自己行，toby 同小王都唔跟佢地

仲等緊上索道時，開始下微雨（對！沙漠落雨！），小王問我們有沒有帶遮，有，不過係車上面，小王又黑面，叫我地返去拿

一聲『跑』！我們真的怒跑上車！！！哈哈～勁白痴

好了，又大風，又大雨，又濕又凍，坐係索道上面腳fing fing，都幾無聊！

剛落車就可以行過去跟行上來的人會合，根本就勁短的路程，明顯地無toby 所講的咁遠，明昆我地俾錢坐索道

會合後，開始可以俾錢活動，有騎駱駝、四驅車、滑沙

我們先騎駱駝，騎駱駝又有騎半小時同一小時，因為一小時可以出到綠洲，半小時就行到一半就回頭，於是我們又繼續做水魚俾人禁，騎一小時，＄６５

沙漠的駱駝，唔知係唔係乾隆，係有小小味，不過都唔係好臭！

駱駝隊出發左一陣，雨愈來愈大，橫風橫雨，又行雷，我覺得仲勁過香港的十號風球，好凍，又濕哂，駱駝夫三次問我們回不回頭，不過回頭無得回水，所以頂硬上！！儘管駱駝都唔係好肯行

再行多陣，真係唔知點解，唔知係唔係前面的人決定回頭，總之遠遠眺望到綠洲的紅旗，大隊就要回程了！

回程後不久，雨就停了！第二隊駱駝隊出發，他們可以去到綠洲．．．

原來『綠洲』是明昆湖，不是昆明湖！只是一潭水．．．well~~

之後，渾身濕透的我們入了一個賣手信的蒙古包包避寒，還買了些手信，入了一大瓶沙

沙漠很熱？我們冷得要死！

沙漠很曬？對！我們全身濕哂！

等埋第二隊駱駝隊回來，有些人去玩滑沙，聽一聽響沙灣的響沙，由沙上滑下去，會聽到呠呠的響聲，不過，手很痛

落返山，又有賣手信的大型商店．．．頂～擰餐死，點知山上面仲貴ｄ！

落山，又到食飯的時候！

沙漠原來到八點幾九點先天黑，一天好像多了幾小時^_^

回到酒店，這應該是我見過最惡劣的酒店，或者只可以叫做賓館，有床訓，有電視，有廁所，有過無門鎖，有花灑，不過唔好話浴缸，連企缸，或者劃開一格係沖涼，一格係馬筒都無，一開花灑豈不是全部野，包括將要著的新淨衫褲、毛巾都濕哂？不過唔洗擔心，根本就無自來水！幾頂癮！

晚，睇左一陣星，太凍，頂唔順，返了房睇電視！睇了一套１９８６年的港產片＜心動＞，幾好睇喎

6月8日 星期四

Ｄａｙ　７

內蒙草原→呼和浩特

一早食完早餐，出發去鄂爾多斯--- 另一個草原騎馬，原本騎馬是昨日的行程，不過昨天有ｄ唔知咩幹部去，所以唔俾我地騎

今日再去騎馬，我們無去，係旅遊巴唱ｋ唱了兩粒鐘

之後又去食lunch

之後又飛車去呼和浩特

三個多小時的車程後，又到晚飯時間！

食了烏蠅飯x２～

一碟有，拿走了，另一碟又係咁！勁不滿！

我地全部都唔要！

同檯的仲有躁底黃彬同寒底花輪同學，躁底勁躁！

經理出來，話換過俾我地，我地唔要，叫佢俾ｄ杯麵我地就可以了

司機私人俾左支可樂我地，謝！

等到死，之後佢地拿左幾盆方便麵出來．．．同一個廚房出來的，點食？

仲有ｄ切開了的腸仔，包包

我只吃了些包包

食完，出去超市入貨

又一次做大豪客

6月7日 星期三

Ｄａｙ　６

內蒙草原

睇完日出，原來日出了的蒙古包群、大草原，都好靚！

個天藍到好似假既～

ｄ雲白到好似假既～

個草原大到見唔到盡頭～

ｄ風大到頭都吹甩！

好凍，返去訓～訓醒繼續！

七點半morning call ！係唔係好好奇，蒙古包點樣morning call？

秘密就係個頂！

食完早餐，搭車去探訪牧民

雖然只係幾步路，不過都要搭車！因為短短幾步路，勁大風沙之下行過去，一定不比點齊人上車行一分鐘車程再落車快！

牧民家訪唔係探訪牧民，而係探訪小王．．．全程無牧民講過野，甚至出現過，只有小王不斷講解蒙古小食，同埋俾我地試食

探訪完小王，我們又上車去敖包拋石頭許願，吹到頭都甩

小王話，ｄ蒙古人會係敖包下幽會，唔知果晚ｗｗｗ有無約佢

下晝去睇賽馬+摔交表演，有點悶

之後就到草原三粒鐘的ｆｒｅｅ　ｔｉｍｅ，我們出了楊行偉降落的地方！

仲飛甩帽，怒奔幾步就斷氣了！多謝庭庭幫我執返

夜晚，廚房火災（!!!），晚餐delay，仲鬼咁少野食

篝火晚會，大家都唔知係咩，只知道九點在那裡集合，大家在那個內地夜總會似的舞廳，閃爍燈光及勁歌中呆坐了半小時都仲唔知發生咩事，究竟甚麼是篝火晚會？究竟開始左未？會唔會篝火晚會就係俾我地入個舞池中跳舞？

完全唔知發生咩事，又無anouncement，toby 同小王又唔知去左邊，莊員又愛理不理，勁鼓譟囉～

最後，原來又你因為火災，ｄｅｌａｙ了表演；toby同小王去了照顧生病的團友；莊員有點硬膠；那個篝火晚會就是有班木咀出來跳舞唱歌．．．大家訓左一陣就回蒙古包了

返蒙古包玩ｕｎｏ

又話四點叫醒我們睇銀河加日出，結果．．．我地都係無朋友ga la ，無人叫醒我地，銀河，我地都係無緣嫁喇～再見了～

6月6日 星期二

Ｄａｙ　５

大同→內蒙草原

一早又要收拾行李，出發往呼市了～

上了車，團長說由於要同內蒙大學的人表演，我們決定頹唱歌 --- 《龍的傳人》和《友共情》

在沒有準備歌詞和音樂的情況下，頹唱了幾次

大家早已咬左好耐的的ｋ癮更加發作，之後就開始屈人出去唱歌

坐了四小時的旅遊巴，終於到了內蒙古的呼和浩特市

醫飽肚仔就出發到內蒙古大學交流

今次真的是交流，每二至三個同學就有一個內蒙的學生，大家一齊睇人地勁pro 的唱歌表現，之後到我們的唱歌．．．

王導給我們的feedback 是：本來好好聽的一首歌．．．

團長的feedback：氣氛好好

well～

之後，內蒙的學生帶大家遊內蒙大學，我們的內蒙的學生叫小鐵，她來自湖南！大家的普通話還算能夠溝通，總比北大的滿族人好，她還教我們用蒙古話講我愛你

和小鐵道別後，大伙兒去吃晚飯，之後便往格根塔拉草原出發

大草原～我們來了～～愈接近草原，天色愈黑，天氣愈冷

天氣愈來愈冷，來到大草原已經十點幾，四周黑媽媽，好凍呀！

把身有帶來的禦寒衣物：一件衛衣、一件長袖衫、一件風褸都著哂上身，另加一件無袖、兩件短袖衫，都仲係好凍喎！誰說內蒙晚間有十三度？怎麼比香港的三度天冷？

大家分配好蒙古包包便返入去避寒

包包內有一壺熱騰騰的馬奶茶，除了熱，就是咸，無咩味，都唔係咁難飲姐～

滿天的星星，多到好似睇畫咁！好靚呀～原來蒙古的天空真的特別美！

出去觀了一會兒星，識得認個大熊座，小熊座，不過睇到條頸好酸！

因為要三點幾，月亮落了山才有得睇銀河，大家返了包包傾計，ｕｎｏ，點知玩夜左，無得睇銀河，唯有睇日出

日出由天文台說的四點幾，等到五點幾，大家凍到一條條白色無面人咁

不過等到日出的一刻，真的很『機動』！

第一次睇日出，原來日出得很快～

很興奮！

6月5日 星期一

Ｄａｙ　４

大同

今天的行程好輕鬆，因為大同根本就無咩地方去～

第一站，九龍壁

俾錢入去睇一幅有九條龍的石壁

無咩野睇，亦無咩野買，大家自己玩～

第二站，雲崗石窟

門外，遇到兩隻望鏡頭的曬駱駝，有趣！

幾十個石窟，個個都咁上下，唔知有咩好睇，不過真係好宏偉！好驚嘆以前ｄ人的鬼斧神工！

我深信以前古代人一定個個都識武功，一跳就上左十樓，一拳就打爆座山，如果唔係ｄ佛像點整？

食過午飯就到第三站，懸空寺

懸空寺建在山邊，據說主力的支撐架在山中，不是肉眼見到的樹枝，所以幾廿人上去都唔會倒塌！

起係山邊係唔係真係唔會撇雨我就唔知，不過以前住係懸空寺的人一定好細粒，或者係小朋友都未定！ｄ樓梯、走廊通道都勁窄，或者係佢地根本一跳就上左樓上，唔須要行樓梯咁麻煩，但係連門口都咁矮，唔通真係想佢一入房就同佛鞠個躬？

懸空寺對面有個叫恆山湖的地方，不過有山賊要收買過路錢，仲有得講價！話佢係合法？搵鬼信！不過明顯地，工作人員包庇佢地，投訴無效！我地不甘被禁，無過去！

落返地面，係廁所買了一疊postcard！原來只有女廁有野買，男廁無

是日行程完畢，大家回酒店玩ｕｎｏ

6月4日 星期日

Ｄａｙ　３

北京→大同

晨早流流去琉璃廠大街，都唔知有咩睇，間間都一樣的

遊故宮，無咩印象，又係一ｄ古代的皇宮囉～

我記得我地跟錯大佬蕩失路；

記得故宮外的便利店的寶礦力＄３．５，我頭頭尾尾一共買過五支；

門口的一元condom自動售賣機！

好了，終於離開北京，上火車去大同了～

原來大同在山西，咁山西係邊？我估係山東的西邊卦～

大陸人的確好恐怖！上火車好似走爛咁！好彩人地開多一條通道俾我地，如果唔係都唔知點先上到火車！

入了閘，仲要抬ｄ行理落樓梯，點夠人爭？

落到月台點齊人數之後，一齊上火車，成班人勁俾人打尖，又唔識頂住ｄ內地人俾自己人上先，勁混亂！

上到火車，之前事先講好要男仔幫手上哂ｄ行李上架先，結果大家完全無plan，成班男仔企哂係度頂住哂又唔知點幫，ｄ女仔係後面又上唔到車，行李多得濟根本就唔夠位上哂架，勁混亂！

又話要男仔坐邊，結果咪又係求其坐；

好不容易終於settle down哂

火車上，遇到來自山西的王先生搭訕，仲教我地玩啤牌！

坐了四個多小時火車，腳下又有個gip，無位伸腳，都真係幾支力！

夜媽媽，終於到了酒店

出了牛牛牛牛牛牛串燒店宵夜

五毫子一串，我檯十二個人食到死都係六十七個幾，仲要每人有三蚊係汽水錢！

仲有兩蚊一碗麵，食都死都得

去小型超市買野，買起哂人地成間鋪的蒙牛，我諗人地成個月都做唔到今晚咁多生意！

買完野人地仲夾道揮手歡送我地走！

完全覺得自己係大豪客！

6月3日 星期六

Ｄａｙ　２

北京

起身食完早餐就搭車去北大交流，真的很膠

首先有一個老師出來講下北大，之後有六位北大同學出來各自up 左一陣，之後就分組膠流

我組的是一個很正經的滿族人，很矮！來過香港一次，當他一講到天文，大家就dead air．．．哈哈～甚麼五等星，１５７行星．．．根本大家都唔知佢講乜！ｏ哂咀

終於講完，他帶大家遊北大

北大雖然很大，不過都是平路，好易行，未名湖好大，好靚

途中，我們見到一株很大的樹，就跟樹拍照

滿族人問：你們剛才在做甚麼？

我們：我們在扮樹

滿族人：．．．||| 滴哂汗的樣子，心想：你們這些白痴！

←好大個垃圾桶，到我膞頭咁高！

←好大個未名湖

←石舫，類似敦煌畫舫

←無頭魚，好像有一段歷史典故，不過唔知佢講咩

←草屋？

北大入面間超級市場，
仲大過恆安果間惠康，
附設的北京奧運紀念品店，
大量福娃紀念品！

←好大間圖書館

去了北大的canteen 食ｌｕｎｃｈ，每人有一張＄７．５的飯咭，大家仲以為會無野食，點知食到死！人地一張咭食一個星期的！！真折墮

即場有人煎緊餅，煮緊野食，煮好就自己拿，拿完去俾咭，佢就係張咭入面扣錢

煎緊餅　自己拿

三十蚊

四張咭，扣除手續費，夾埋有三十蚊可以用，換了一檯野食，仲有四個漲爆的肚！

我地咩都ｓｈａｒｅ來食，俾北大的同學恥笑

膠流完，去頤和園

圍著頤和園走了半個圈，的確好大

好大個湖

皇后間房

其實皇宮雖然大，但皇帝或者皇后住果間房，其實都唔係咁大，皇宮咁大或者只是因為多人住！

雜耍，一個字：悶！大家自己食蝦片等散場

都係少林寺十八銅人最好笑，不過仲未出摺‘登’

又食飯喇～　去了一間充滿聖誕氣氛的飯店！

長安街夜景，完全唔知發生咩事就俾人屈哂，一人俾三十蚊，成架旅遊巴四十七人，夾左千三蚊，夜晚係長安街行一個圈，明屈！

6月2日 星期五

Ｄａｙ　１

香港→深圳→北京

一大早四點就要出去搭亡命 van ，好在等左一陣就有車，出到旺角仲有時間去Ｍ記食個早餐

食食食，食到遲到，趕唔切搭頭班火車，要阿ｙａｎ同學和阿唐同學等；不過都好，羅湖六點半先開關，去到剛剛好差不多開關，無遲

過關時，排我們前面的一位團友Heidi，因為回鄉証過了期，過不了！要等九點人地office 開工先有得辦手續...ｏｈ～～～

過了關，安全到達羅湖口岸茶餐廳集合

等等等，終於齊人，大伙兒走難似的抬著自己的行李上樓梯，落樓梯，還要避開一眾幫你拿行李的騙子，走過崎嶇不平的路，好不容易可以上旅遊巴出發往機場了

內地，一個十年無去過的地方，第一次回祖國旅行，印象差極！

到了琛圳寶安機場，相認了同組的小庭庭

他未吃早餐，ｓｏ上了ＫＦＣ，原來ＫＣＦＣ有粥食！仲有成肚氣！

我地俾張一百蚊佢找，佢竟然鬧私地晨早流流俾咁大張錢佢，又要我同小庭庭一齊俾，好似覺得我地係去同佢唱錢咁

一大早上去俾錢佢賺，仲要俾佢鬧，食屎大！

我們的飛機

飛機 delay了30min，唔知點解，亦無廣播，飛到咁上下仲遇上了氣流，搭飛機可以仲‘chock’過搭巴士，好似玩過山車咁，仲有free fall，嚇Ｑ死；加上飛機全包宴，難食程度直迫法輪大法至高無上的境界！原來包係可以咁難食ｇａ～原來簡簡單單的兩片火腿，係可以完全就咁係冰箱拿出來生食ｇａ～旅程一開始的一程飛機，真係大開眼界，增廣見聞！

飛機全包宴