第二日25/11/2002
池袋 --> 後樂園 --> 六本木 --> 東京鐵塔 --> 新宿 --> 池袋…..是日落雨
早餐 --> 東橫INN，午餐＋晚餐 --> 京王超市特價壽司、滷水雞雜、細魚生併盆＋池袋車站小舖頭既生果西柚、橙
今朝晌東橫INN食早餐－有美味飯團、麵豉湯仲有我唔嗜既咖啡；我仲打包左ｄ出去食....慳嘛....日本真係好多烏鴉，一出門口就聽到”丫...丫...丫”，第一站先到郵局寄postcard；出門口果陣開始倒水，晨早流流舖頭又未開，隨手晌未開門店舖門口個遮架拎起把遮，行行下見到間彈珠機場，唯有入去避雨；雖然晨咁早得少貓三幾隻，不過陣煙除都仲係好勁，toilet都係（我都算係有幫襯架）！雨依然落唔停，好不容易捱到1010開門，又可以美其名去避雨（heeeee~~），又係fancl~~~，睇睇吓見到幾位操廣東話既女士剎到，佢地都幾趕時間，又係七咀八舌咁要呢樣果樣！我都有ｄ收鑊，買過$10,000yen仲可以拎張積分卡同埋有隻幾重既碟，可惜化妝品同食品係冇退稅！
終於出發去後樂園嘞。晌香港，落雨果陣「海洋公園」既機動遊戲都唔開啦，何況日本呢！因為我搭車時見雨開始停咪搏下！失敗...早知即時改去築地啦！去到後樂園，雖然佢有開亦只有毛毛細雨，但我想玩既遊戲又冇得玩，唯有四圍行下影下相，好難得搵到個熊花圃拍照留念，就晌我放部相機晌扭蛋機上set位時，有位操流利國語既男士主動幫我揸機（heeee有艷遇？梗唔係啦，佢個仔仔企係側邊睇住架，太太晌商場shopping緊 ^^），都行咗差唔多成個鐘，行番去後樂園睇下都係冇得玩，失望而回...算罷啦！跟住晌後樂園車站隔離既小商場行左一陣，覺得有點悶就晌商場打電話返香港比朋友，一傾又廿分鐘！（接電人話：一個人晌日本發毛呀．．．一日唔講野妳得咩！呵∼∼∼）。
下一站東京鐵塔，由於唔想再轉車，就由六本木站行過去啦，睇睇車站街道圖見東京鐵塔距離都唔近喎，都係拎紙筆畫張草圖好d嘞，2？穿過左乜乜領事館再行過ｄ有間郵局喎，我當然再去幫襯下啦！間郵局晌棟類似商業中心入面，內裡靚過池袋果間多多聲！寄完卡就繼續漫步，果陣大若4點幾，途中要穿過住宅區去鐵塔，條街又少人又靜、密度低、感覺高尚、沿途多見樹木少見人、旺中帶靜、唔知係咪名校網呢！絕對係理想既家園 -----（下刪數十字，唔係sell緊樓！）難得見到一個外國人黑珍珠小姐，我當然請佢幫我影張相啦！沿路一直望到鐵塔仲以為好近，行下睇下停下都差唔多成個鐘至去到，講真我又唔想咁早上去喎，夜景靚ｄ嘛！鄰近聖誕節，樓下亦見到有幾個聖誕擺設，遊人拎住部手提係咁影，我都唔執輸∼∼搵人幫我影相 ！去「大瞭望廳」盛惠820 yen，只見街上一切景物都很渺少，尤其天黑加上霓虹燈更突出，不過，我返而覺得最靚既原來一直晌身邊，大家話維港夜景靚唔靚丫。售賣既紀念品沒有特色，洗手間比想像中簡陋，只有幫襯了在附近一部附有塔景既貼紙機，拍了一張貼紙；日本人真識做生意，大瞭望廳之上還有個「特別瞭望廳」，在十二分之十分好奇下又獻出600 yen（因為點都唔會有下一次！），分別是多行一條懶神秘既樓梯，或者接近塔頂，窗外可望到塔身紅色大柱及強力大射燈，再乘電梯到達（heee次序唔太記得lu ^^）由於再高幾層，景物又再細d，分別真係唔大！睇完晒都六點幾， 今日都叫做行左好多路，所以離開塔後都冇再晌六本木逗留就搭車走人，時間尚早，決定再到新宿行下，遇著放工時間人迫迫。
行行下就行左去京王百貨，行下又去到Burberry櫃位，連埋我在內有7-8個香港人，睇左一陣我買左一個手袋咁大把，我用簡單日文問店員退稅櫃位晌幾多樓，對方講左一大堆我唔太明既日文，去到果層見到有抽獎，哦∼原來佢係話我聽有呢樣嘢，買滿$5,000 yen可以抽一次，好嘢中獎呀！一對京王筷子！但係退唔到稅，因為我懶醒將passport留晌酒店，我拎份copy問佢得唔得；起初見佢拎去問人仲以為得！「a no.....唔得喎小姐！」唯有聽日再去啦（考慮中）∼∼成7點幾，谷鬼氣走去超市試食，最後買左盒有十二件既雜錦壽司、滷水雞雜、細魚生併盆，再晌池袋車站口既小舖買左ｄ橙同西柚，再晌藥房買少少野就拎到死死下返酒店開餐（哈，我梗食唔晒咁多野啦！因為行左好多路又冇食晏而且樣樣都想試哩！）食完坐下執下嘢睇下電視又11點，又出動去附近行下，咁夜都只係得番夜店門口仲有ｄ男人、便利店同彈珠機場果ｄ地方，返酒店沖完涼又落樓下睇報紙、上網，時間關係，我拎埋張mask去敷，唓∼拎轉面都冇人睇到啦，冇幾耐隔離企左位有ｄ醉意既日本中年男士，佢拎住兩枝礦泉水仲開左一枝嚟飲，點解我知係礦泉水？佢見我望佢咪遞另一枝話送比我囉，不過我冇要到！企左個幾鐘腳又攰都係去zzzZZZZZ
| 進入頁首 | 進入第一日 | 進入第三日 | 進入第四日 |
|---|