WingBB微少少東京行DAY 3

今日晨早起身第一件事 ----> 去toilet ^^ ，跟住落去食早餐，由於郵局開9:00am，飲完幾碗（？係）既麵豉湯就打包ｄ飯團上房....又係晏d食....然後再訓過....zzzZZZZ

第一站先到郵局寄包裹，到我果陣阿小姐同我講一堆我又係聽唔明既話，跟住拎左一小袋郵票、錢同postcard比我，2？咁熟面口既？原來我禽日漏咗晌郵局，雖然夾埋只係得三千幾YEN仲以為跌咗呀，多謝路不拾遺既各位！寄包裹既運費+包裝箱（$200 YEN箱+1條絕對靠得住既索帶）既費用都接近$5,000 YEN，我睇住幅圖都攪唔掂條索帶，最後都係要阿小姐幫我！如果冇特別指明，郵費係會用一張電腦出既郵籤當郵票，我梗係選擇用唔同既郵票啦，阿小姐仲拎咗幾版郵票比我揀！就係咁成個包裹都貼滿郵票！我離開郵局都成10點幾 lu。

突然醒起未退稅喎！唯有再去新宿，日本既退稅係比番現金，佢會晌passport釘住退稅既資料，直到離境果陣再海關職員撕走，所以一定要正本哩。攪掂又晌新宿車站附近行下高島百貨、tokyu hands等，高島只係一般百貨公司而已，行咗一陣悶悶哋，又打咗個電話番香港。至於tokyu hands就賣ｄ生活雜貨，有ｄ都幾騎哩！

跟住再出發去銀座。呢個東京站都可以話幾恐怖、實在太大，尤其我呢ｄ路癡隨時會唔知行左去邊！冇野既，都係四圍行下囉！唔講仲以為入左商場，有飲有食有得shopping！仲有ｄ小攤檔，賣既都係手信貨色，叮噹（依家叫多啦A夢！）產品最多，燒餅、鎖匙扣、電話繩等；我晌銀座四圍亂咁行，window shopping為主，睇下店舖裝飾等，由於唔知行緊去新橋站既方向啱唔啱就向途人問路！「Excuse me」連續幾個人都即刻彈開！「Sumimasen」原來行啱既！

晌新橋站等車時附近有對香港人，男既有ｄ面燶燶呻…「無喇喇由乜鬼銀座行泥丫，腳都軟……」女既亦都唔弱-->面黑黑不發一言。等咗一班車就等到車頭第一個位！天開始黑，景色都唔錯，第一個位嘛！到台場喇，第一站先到台場落車，出閘後即時搵阿服務員小姐攞番張車票，原來唔係蓋「無效」印架，有勞阿小姐打開個收票箱。循例同自由神像，彩虹橋影相！至於venus forts就冇入去！個人覺得除左室內建築較特別其餘同一般商場冇分別！都係留番ｄ時間去第到！我突然作出一個決定，由台場行去palette town，好難得有個地方冇密麻麻既建築又吹下海風！行左都有成45分鐘掛，沿途經過一隻船既博物館？人影都唔見，好在日本治安出名好，或者兩日冇咩講說話，我竟然邊行邊自言自語，雖然攰但係景靚！到palette town，商場入面有幾顆樹同埋設有心意卡，我寫完幾張親手掛上樹，行行下見到有摩天輪喎，又見到家鄉雞，咦？摩天輪內不准飲食？！好！咁我收埋入背囊上去食（各位千祈咪學呀^^）！上去前我問阿靚女轉一圈要幾耐？哦3件雞之嘛，10幾分鐘夠食lu，一閂門我就急不及待打開窗食呀食呀食呀，因為我仲要影相！日本人真係細心，廂座入面近腳係裝有暖氣設備！一邊食一邊睇係好有難度架！又話有10幾分鐘既；咁快架∼∼出番嚟又行左去一個有得夾公仔既樂園，又要讚日本人細心，晌公仔機旁掛有大膠袋！入面仲有幾檔小食，行左一圈我又叫左個吞拿魚簿餅食，大大塊又足料幾好味！

落番去最底果層上左架免費巴士去Aqua City，阿司機大佬話係尾班車，8點咋喎？！都係得個行字既商場，Oh agnes b！幾靚喎，都係唔買嘞！心諗隨緣啦，如果陣間再行番呢度至算（真係？）！出面景色好靚，近距離望到大橋，不過都幾食風，ｄ日本女仔真係"近"仲可以短裕仔四圍行既？？我企一陣都頂唔住行番入去！商舖都係以售賣服飾、日用品既舖仔為主，有間賣Elle T-shirt 只係$800 yen，我當然冇買啦！竟然又行番去agnes b！明知呢度冇退稅都係忍不住買下一個手袋；同款香港專門店過千，依家平成截喎，不過點解係made in China既？跟住行過去隔離台場小香港，入面既佈置似6、70年代！個人覺得冇乜特別！都成9點幾，除左食肆店舖都關門，都係時候走嘞！跟人行番去海浜公園搭車返新橋！架車異常擠迫又陣陣酒氣，喂大叔咪挨咁埋喎∼∼咦！新橋站職員收左工拿？咁我點攞返張車票？於是我作出左一個大膽既決定！等人出晒閘後．擒．欄．杆．走．人！（小童切勿模仿）「現場有cctv喎！」「是旦啦，有事至算！」

無驚無險返到池袋，又晌街邊買左ｄ飲品、又見到酒店門口果幾位短裙姐姐、又見到網友V小姐上緊粉紅色網；由於今日實在行左好多路，上洗手間果陣知痛嘞（以為風濕發）！抖完落樓下上一陣網就zzzZZZZ！